Penarrueda y Puertos de Güeria

          Vienres, 30 d'agostu de 2013          L.lindes - La Cuaña - Manín Fonderu - Manín d'Arriba - Val.lina Grande - Embudu Val.lina Grande - Campa los Texos - Cuchiel.la de Penarrueda - Penarrueda - Col.léu Lingléu - La Cardosina - Mayéu Los Cuadros - La Foz Grande - Col.léu la Cándana - Les Escolmenes - La Cuaña - L.lindes.
          

        “Vivi la to vida como si subieres un monte. De vez en cuando mira la cume, pero ye más importante almirar les coses guapes del camín. Subi sele, firme, y disfruta cada momentu. Les vistes dende la cima serán el regalu perfeutu tres el viaxe.”  Harold V. Melchert

          Fae bien de tiempu qu'intento llevar a la práctica el dichu clásicu  de los que patiamos pelos montes: "Hai que subir como un vieyu pa llegar a la cume como un mozu".
          Si daquién que me conoz llee esto, de xuru que pensará: "esti paisanu yá chochea, ¿cómo quedrá subir? Ensin dulda que naide me quita los años nel monte nin nel llanu. Pero pémeque, como los coches, toos tenemos más d'una velocidá. L'escoyer caminar con asosiegu garantízame disfrutar del paisaxe con más intensidá y llegar a la cume sin dificultá p'alendar.
          Como a otros munchos montes, facer una escursión a Penarrueda fae que gociemos tanto del percorríu como de la cume.
          Pel camín, los guapos fayeos, los mayaos, los praos, los regatos, les viesquines de carrascos y d'otros arbustos, les vaques y caballeríes pastiando, los montes que mos arrodien formen un paisaxe d'una guapura que ye difícil esplicar.
          La cume ye un miradoriu privilexáu de les vecines Ubiñes, del valle de Quirós, del Aramu, de les xerres d'Aranga, Tene, Sobia, Gradura, el Gurrión, Caldoveiru,...Media Asturies.
          Amás de les vistes, conmueve la presencia de les trincheres y parapetos de piedres que traen a la memoria l'esfuerciu y la llucha de los soldaos republicanos que dempués de tantu sufrimientu claudicaron  ante'l poder de los militares golpistes.
          Faciendo'l camin con la tranquilidá de la que falaba nun hai pilancos que mos impidan pasalo bien.
          A dicir verdá prodúxome dalgún engorriu la baxada al col.léu Lingléu per un senderu  bien pindiu y con muncha piedra suelto. Tamién me compliqué un poco pente los piornos, espineres y carrascos por querer baxar demasiao direutu  a La Cardosina.
          Pue resultar un poco fatigoso la subida dende la Foz Grande al col.léu la Cándana porque les pates yá tan un pocu cansaes pero compénsase pola guapura del fayéu pel que se pasa.
          En resume ye una escursión perguapa y mui recomendable sobre too si se fae na primavera o nel entamu'l branu cuando les praderes tienen el máximu verdor, pelos regatos cuerre más agua y tovía queda dalgo nieve nes cumes. De xuru que los colores que la seronda da a los fayeos tamién fae que sea una bona estación pa facer el paséu.
          Yo paselo bien n'agostu.
          Siempre va prestamos dir a Penarrueda.

Prestosu paséu pel Narancu

          Domingu, 25 d'agostu de 2013          Ciudá Narancu - Carretera'l Narancu - Camín d'Ules - Ules - Carretera'l Centru Asturianu - Pista a Contriz - Contriz - Monte a traviés cruciando'l P.R. AS-239 - P.R.AS 239 - Picu Llampaya - Carretera Brañes - Llampaya - Llampaxuga - Camín de Santiagu - Les Campes - La Florida - Ciudá Narancu.
         

          “Tienes que mantenete en forma. Mio güela entamó a caminar cinco milles al día cuando tenía 60 años. Agora mesmo tien 97 y nun sabemos onde demontres ta.”  Ellen Degeneres

          Los paseos pel Narancu nun suelo preparalos. Tampoco llevo máquina retratar por eso les semeyes tan feches col teléfonu.
          Si nun faigo una escursión a dalgún llugar más lloñe, dende fae una bona temporada, casi a diario patio pel Narancu o alredores. Pongo esti paséu nel blog porque caminé per dalgunos sitios qu'hai tiempu que nun pisaba y prestóme enforma.
          Salí de mio casa en Ciudá Narancu hacia les once la mañana cola intención de probar si ameyoraren dalguna de les  mancadures ocasionaes más pola edá que por otra cosa. Pa ello la idea yera subir dalgún tramu bien pindiu y ver como me respondía'l cuerpu.
           Salíme de la carretera'l Narancu a la altura'l restaurante Lobato. Pasando per delantre'l colexu  Les Teresianes siguí per un camín que más o menos paralelu a la carretera llega a Ules. Dende equí con direición noreste unos 300 metros de la carretera que va al Centru Asturianu hasta agarrar la pista que sube a Contriz. Tien una bona pendiente y pasa per un castañéu bien guapu. Evitando les esviaciones, travesé xunto a les cases qu'aparenten tar desocupaes y llegué al colláu per un senderu bastante cuidáu. Percíbese qu'hai actividá agrícola y ganadera y camínase bien peles caleyes.
          Entamé la baxada y primero per un camín a manzorga y dempués a mandrecha crucié el PR AS 239 pa siguir monte a través per un senderu que sube a un pequeñu cuetu bastante usáu por moteros de trial. Salí otra vez al PR y, dempués d'unos 500 m, per una sienda bien marcada, mui pindia y casi reuta aporté al picu Llampaya con bones vistes a Uviéu, Llampaya, Llampaxuga, Lloriana, Sancloyo,...,  les xerres del Aramu, Tene, Caranga, Sobia, Gradura, Peña Manteca,...
          Con direición oeste, baxé a la carretera Brañes y pasé per Llampaya y Llampaxuga. Xunto a la so capiella tomé'l camin de Santiagu hasta llegar a Uviéu.
          Cruciando pel nuevu barriu de la Florida aporté a Ciudá Narancu dempués d'una entretenida patiada y cola satisfaición de nun resentime de nenguna mancadura.

Xerra Maín y Cabeza La Mesa o ¿Cabeza Quemada? (El so puntu cimeru)

          Martes, 20 d'agostu de 2013          Poncebos - Canal de La Rumiada - Camín vieyu de Tielvi - Ponte de Tielvi - Mayáu Vierru - Monte l'Arandanera - Cabeza La Mesa o ¿Cabeza Quemada? (Puntu cimeru de Xerra Maín) - Mayáu Groseda - Pandébano - Bulnes - Canal del Texu - Poncebos.

          "Polo xeneral, la toponimia de los  Picos d'Europa foi maltratada (como nun podía ser menos) pola práctica totalidá d'autores que d'una manera o otra  averárense a la conocencia de dalgún aspeutu d'estos montes. Y por ello la conocencia de los nomes de llugar de los Picos ye, anguaño parcial y, en munchos casos, incorrecta: los erros fuéron acumulándose d'unos autores a otros hasta'l puntu de ser aceptaos por una gran mayoría y van reproduciéndose d'una obra a otra ensin nengún sentíu críticu..." Xosé Lluis del Ríu

          "Ta mui mal que la estupidez nun duela" Vince Anderson

          N'ochobre de 2012 (Per Cabrales) baxé pela carretera dende la riega Secudia a Poncebos porque nun m'atrevía a dir pel camín vieyu de Tielvi y  sobre too a baxar pela canal de la Rumiada a la carretera xunto a la central eléctrica.
          Llectures en dalgunos blogues alvertíen del peligru d'esa baxada y como tengo dicho y escrito munches veces a min nun m'estimulen "los pasos daqué aéreos, les esguiladines comprometíes, los pequeños y entreteníos patios o les baxades dalgo espuestes". Nos mios paseos pel monte atopo realidaes muncho más interesantes que too eso. Con posteridá un bon conocedor del terrenu esplicóme como yera y dende esi momentu decidí que tenía que dir a facer un percorríu qu'incluyera esi pasu. Axustándose a lo que ye real, ye una curtia canal como otres munches daqué pindia y con algo piedra suelto. Nada que con un pocu curiáu nun pueda superar un vieyu como yo.
          La ruta circular qu'entamé en Poncebos xunto a la central ye perguapa.
          El tramu ente Poncebos y Tielvi ye entreteníu y con pocu desnivel. Va paralelu a la carretera a Sotres teniendo a manzorga Portudera y a mandrecha la xerra Maín col cuetu Vierru vistosu y melgueru. Pasaremos a la so vera dempués de cruciar la carretera pel fermosu ponte medieval de posible orixen romanu y subir per una pista bien pindia al mayáu que toma'l nome del picu.
          La única dificultá qu'implica'l paséu ye'l  llargor y si acasu la abonda vexetación qu'hai nel monte l'Arandanera que fae difícil avanzar. Lo raro ye que lo que dificulta'l pasu son matoxos de fayes que amás nun dexen ver los senderos. Superada esta viesca, ensiguida llegamos a un colláu dende onde vemos el vértiz xeodésicu de Cabeza La Mesa o ¿Quemada?. Esti picu ye un miradoriu perbonu pa ver los Picos. Sobre too el macizu Central. Tamíen vemos pal norte tola xerra'l Cuera.
          Nun ye mui cómoda la baxada  a Pandébano. Paez que ta poco patiada y les siendes en dellos sitios cuasi nun se ven. Pásase pel mayáu Groseda que namái-y queda una cabaña en pie y lo que pienso que ye un bodegu pa curar el quesu.
          Del camín de  Pandébano a Poncebos pasando per Bulnes hai lliteratura a esgaya qu'empondera la so guapura muncho meyor que lo que pueda escribir yo.

          Reflexón sobre toponimia:

          Nun hai cordal sobre'l que trate de falar o d'escribir del que tenga claru'l nome de munchos de los sos llugares.

          El paletismu, el autuodiu, el desconocimientu y l'enclín castellanizante y pretendidamente cultu de munchos montañeros d'antaño y d’anguaño camudaron y siguen camudando la toponimia de los nuesos montes.

          Esto,  tien orixe nuna forma de pensar que dominó hasta apocayá, adulteró y adultera los nomes d'accidentes xeográficos qu'ofienden a la cultura asturiana.

          El problema ye que yá nun sabemos los nomes verdaderos y a les xeneraciones que nos sigan dexámos-yos una probetaya herencia cultural.

Ver todas

Consigue el tuyo

Xerra Gurrión (Picu Contruteiru)

          Vienres, 9 d'Agostu de 2013         Embalse Valdemuriu - Turiezu - Braña Chendeneva - Colláu Quintaneiru  - Picu Contruteiru - Colláu Ordiales - Camperes del Praón - Baxada pente felechal y escayada - Braña La Corrá - Baxada con más felechal y escayada - Pasu de Peñafurada - Forcada Espín - Embalse Valdemuriu.

          "L'home que sabe cuando nun actuar ye sabiu. A la mio forma de ver la vida, la valentía ye prudencia." Eurípides

          Nun toi seguru que dalguna vez me prestare secretar adrenalina pola mor del mieu. A min eso de "espuesta y pequeña  trepadina", "un pocu patiu", "pasu daqué aéreu", "esguiladina comprometida",... nun m'emociona nin m'estimula. Voi al monte a pasalo bien, a disfrutar del paisaxe, a facer exerciciu físicu,...y a percibir unes sensaciones que nengún otru sitiu me produz. D'esta miente planifico los mios paseos pensando qu'anque seyan esixentes pol altor o la llargura'l percorríu nun escuendan dalgún peligru. Asina y too ye normal atopase en cada patiada con dalguna torga que difiiculta la escursión.
          Tuviera fae una temporada nel picu Mayor y anque con unes vistes perguapes nun me quedaren ganes de repetir. Eso sí, prestárame'l paséu y  quedéme cola gana de subir al Contruteiru y facer el percorríu circular pasando per Peñafurada. Nun m'arrepiento pero tampoco quedé mui satisfechu del paséu. Lo mesmo qu'al Gurrión, nun me gustó l'ascensu a la so cume y la baxada pente felechos y artos dende les camperes del Praón tampoco ye prestosa. Pienso qu'hai que dir n'otra época del añu cuando la broza nun espoxigue como agora.
          A pesar de los problemes paga la pena la escursión. Les panorámiques de los montes de Quirós, Proaza, Teberga,...son inmeyorables. Presta'l pasu per Peñafurada y les guapes vistes del embalse dende la forcada Espín. Son paicíes a les que se ven tando nel picu Mayor.
          En resume ye una ruta recomendable si se fae nel iviernu o l'entamu la primavera y, si a daquién-y pasa lo que a min, puen evitase los cumales y entós nun tien más dificultá que lo pindio de les subides y baxades.

Ver todas

Consigue el tuyo

Cuetu Ventosu y Burrra Blanca

          Sábadu, 3 d'agostu de 2013         La Col.laona - Col.láu l'Ablanu - Cuetu Ventosu - Área recreativa l'Ablanu - Burra Blanca - Col.láu Cabal.los - La Col.laona.

          "Un día malu, ye un día malu, pero a otru día nun tien porque ser igual"
T. Briñón 

         Tengo claru que nun elixí l'itinerariu, nin el día, nin la estación adecuada pa facer esta escursión.
         El percorríu resultóme enguedeyáu y de xuru que si repito'l paséu cámbiolu. El día, emborrascáu y con borrina, nun me dexó ver les guapes vistes que s'adivinen. Y la meyor época pa patiar per montes con esti tipu de vexetación ye l'iviernu, si pue ser dempués d'una bona nevada pa que les plantes que tovía xorrecen tean achaplaes.
          El camín dende la Col.laona al col.láu l'Ablanu nun tien nenguna dificultá. Un bon tramu de pista bordiando pel oeste el cordal de L.longalendo, dos portiel.les que nun puen abrise pero que se pasen fácilmente y l.legamos al col.láu. Nun área recreativa que ta a la so vera entámase la fácil subida a Cuetu Ventosu (techu de Mieres). Sería asina si la viesca felechos y dalguna cotolla nun punxeren torgues.
          Baxamos pel mesmu camín y per un guapu senderu que sal del área empezamos l'ascensu a la Burra Blanca. Pasamos per un fayéu fermosu y pente abondes cotolles y beriza de tamañu escomanáu consiguimos l.legar a la cume que na baxada pela cara sur dámosmos cuenta que nun tien dificultá nenguna.
          De xuru que si repito la escursión vuelvo a cruciar pel fayéu, pero en llugar de subir dende elli, sigo al col.láu Fonticos. Hai siendes d'animales que mos lleven a elli. Dende equí per un camín que va al col.láu Cabal.los vense subides fáciles. (Por exemplu per onde yo baxé).
          Antes de la subida llegué ellí y hasta subí a un oteru casi del mesmu altor que'l picu que se me resistía. El casu ye que volví pa la viesca pa'ascender pente la broza.
          La visibilidá pal norte, este y sur yera nula. Pal oeste vinse los pueblos ayeranos de Cabanaquinta, Soto, Uriés y Serrapio.
          La Burra Blanca ye otru de los munchos tres conceyos qu'hai n'Asturies. Nesti casu: Mieres, Llaviana y Ayer.
          En resume: foi de los pocos díes que cuando salgo a patiar vuelvo pensando que nun foi una bona xornada d'escursión. Sicasí mañana ye otru dia.

Ver todas

Consigue el tuyo

Foz de los Arroxos y picos Muñón y Bígaros

          Miércoles, 31 de xunetu de 2013          Saliencia - Foz de los Arroxos - Braña de la Mesa - L.lagu L.lau - Picu'l Muñón - Picu los Bígaros - Braña de la Mesa - Camín de la Mesa - Colláu del Muru - Cuendia de la Mul.ler - La Madalena - Morteres de Saliencia - Saliencia.

           "Dempués de tener falses conocencies d'un monte ensin conocer, llogres entender y afayar el monte cuándo xubes, llegues, sientes y baxes del mesmu..."German Rojas".

          Patiara delles veces pel Camín de la Mesa dende'l puertu San Llorenzu hasta la braña que tien el mesmu nome. Tamién subiera fae años al picu los Bígaros dende La Farrapona. Pero tenía muncha gana conocer la foz de los Arroxos y  el l.lagu L.lau .
          Metíame un pocu mieu subir al Muñón  y dende esi guapu miradoriu pasar a los Bígaros. Óyense y lleense comentarios que a vegaes  producen medrana. Ún yá ye vieyu y de resultes les facultaes físiques van deteriorándose. Por ello entamé el percorríu con duldes sobre si tentar de subir al Muñón o dar la vuelta dende'l champán.
          Cuando arrodiaba'l llagu decidí siguir xubiendo. Nun m'arrepentí. Caminando con prudencia nun me paició mui complicao y prestóme a montones. Les vistes son ablucantes. Pa un llau les Ubiñes, l'Aramu, la Sobia, Gradura,...,debaxo el camín y la braña la Mesa. Pal otru'l l.lagu Cueva, los Albos, peña Orniz, más lloñe el Cornón,...,a los nuesos pies la carretera La Farrapona y el val.le Saliencia. De xuru que ye guapo en cantidá.
          Costóme un poco más trabayu la baxada. Pue ser que la fixera demasiao direuta, el casu ye que paicióme más espuesta qu'andar pel cume.
          La subida pela foz de los Arroxos gustóme n'abondo. La guapa viesca del principiu, el senderu talláu na paré calcárea, los tabayones,...De xuru que cuando baxe más agua pel regatu tienen que dexamos plasmaos.
          Resultóme un pocu llarga y aburría la baxada pela pista de formigón a Saliencia. Asina y too prestóme enforma el pasu pela braña Les Morteres.
          En tou casu foi una escursión perguapa. Pa repetir.

Ver todas

Consigue el tuyo

De la foz de Picarós a la ruta Les Xanes

          Domingu, 28 de xunetu de 2013       Aparcamientu Les Xanes - Villanueva - Sienda del Osu - Foz de Picarós - Serandi - Xerra Serandi - Colláu de la Canal Seca - La Rebollá - Ruta Les Xanes - Aparcamientu Les Xanes.

          "Dempués d'un par d'hores caminando pela xerra, el deséu de pallabres y el gociu verbal puen debese en parte a la euforia que producen la orxía d'oxíxenu y el baille d'endorfines, que seique ayuden a aguzar la percepción y la sensibilidá" (Victoriano Colodrón Denis)

           Fixere esti percorríu emprincipiando pela ruta Les Xanes y baxando per Serandi fará unos diez años. Merez la pena: la foz de Picarós, el cordal de Caranga, el guapu pueblín de Serandi, les vistes del Aramu y los puertos d'Andrúas, l'escobiu Les Xanes,...¿Hai más que pidir?
          Anque tenía buen recuerdu nun me plantegare repetilu. Pero l'equivocu del otru día en Circuitu peles Xanes decidióme  volver a facelu. Eso sí, pa tener otra perspeutiva, empecipié per Picarós.
          Valióme porque pémeque enteréme onde me perdiera y amás resultó un paséu perguapu. L'únicu cambiu del d'aquella vez foi la pindia baxada dende La Rebollá a la sienda Les Xanes sin pasar pela ilesia Pedroveya.
          El día que me perdiera subiera per esti camín y prestóme. El problema ye que estos caleyos tan pindios y a cachos enllabanaos a min préstame más subilos. En realidá lo que me pasa ye que baxalos dame medrana porque el mio culu nun tien mui bonos recuerdos de sitios asina d'empinaos.
          D'otra miente, rabilando per internet, enteréme que na xerra Serandi hai un sitiu que dalgunos nomen Mirador de Les Xanes y que dicen que ye mui guapu. Al paicer vese una estraordinaria panorámica del escobiu.           
          Esto quier dicir que nun tardaré en volver pa conocelu. Toi seguru que otra vez más va ser un paséu perprestosu.

Ver todas

Consigue el tuyo

La Gamonal

          Miércoles, 24 de xunetu de 2013           Vega Bobies - Monte Trapón - Mayáu Fonfría - Mayáu Covachos - Mayáu d'Ortigales - Castrupín - Toyu Veguellina - Picu Gamonal - Vega la Mortera - Canal de la Mortera - Campa Bildeo - Pan de la Forca - Mayáu Brañacé - Vega Bobies.

         "Nel  monte nun hai que forciar el pasu."  (César Pérez de Tudela )

         Fae tiempu que viera esta ruta en tres de los meyores blogs de montaña que conozo y que fixeren el paséu xuntos: Circular por la Sierra del Aramo, La Gamonal por la ruta de los neveros y Sierra del Aramo: camín de los neveros, La Gamonal y canal de Mortera.
          La xerra del Aramu y en concretu la Gamonal, por so guapura y porque ta cerca de mio casa, patiárala unes cuantes vegades. Sin embargu esti percorríu nun lu conocía y atráxome dende que supi d'él.
           Como digo al entamu d'esti pocu cobiciosu blog: "Nun pretendo describir rutes nin dar conseyos sobre'l meyor camín pa faceles. N'Internet hai abondo d'eses informaciones y lo único que diba conseguir ye confundir." Los blogs a los que fago referencia son la meyor muestra y en mio modesta opinión ye mui aconseyable acudir a cualquier d'ellos pa esta o cualquier otra ruta per Asturies.
          Resultóme un poco enguedeyoso el camín dende Vega Bobies a Covachos. Anque tábamos a últimos de xunetu había barru abondo y la broza nun facía fácil l'andar.
          Dende esti guapu mayáu a la cume pasóme dalgo peculiar que nun sé si ye namái cosa mía. Tengo que dicir anque seya obvio que voi al monte a pasalo bien. En nengún casu tiento de competir con naide nin asumir riesgos innecesarios.
          La cosa ye qu'en Covachos atopéme con un mozu francés montañeru y retratista de paisaxes que aparcare'l coche xunto a la cabaña más cercana a la carretera l'Angliru. Trayía na mano un folletu del Aramu y quería subir a la Gamonal pasando per Ortigales y Veguellina. Entrugóme pel meyor camín y dixi-y que diba yo p'allá y que podía acompañame.
          Entamamos a subir, yo delantre como guía (quien me lo dixere). Nun sé como pero al cachu dime cuenta que la mio velocidá yera mayor de la de davezu. ¿Taba enfrentándome inconscientemente con alguien muncho más xoven que yo? El casu ye que escaecióseme que "pa llegar a la cume como un mozu hai que xubir como un vieyu". D'esta miente llegué al picu con dificultá p'alendar, cosa qu'intento que nunca me pase. ¿Ocurre-y esto a otra xente?
          Sicasí la esperiencia foi positiva y l'esfuerciu del rapaz francés y  el chapurriar que deprendí fai más de cincuenta años fixo que mos entendiéramos y qu'l trechu que compartimos fuera perprestosu y instructivu.
          Nun me prestó un res que'l teyáu del horru que fae de buzón de cume desapaiciera. (Al llau de lo que vi esti día pongo una semeya fecha en xunu del añu pasáu). Nun entiendo a la xente qu'estroza les coses sin motivu.
           Separámosmos na cume, él diba baxar pela carretera, y yo yá recuperáu, entamé a baxar con muncha más tranquilidá y disfrutando del guapu paisaxe pela Vega La Mortera.
          Nun me resultó nada fácil el Canal de la Mortera. Ye mui pindiu y tien muncha piedra suelto. Moyáo nun lu baxaría. Alviértese que José, Santos y Cienfuegos son más xóvenes que yo y muncho meyor montañeros.
          Les vistes a los puertos d'Andrúas y a los montes de Proaza son perguapes. El camín pente la viesca carrascos ye bastante confusu y costóme más tiempu del previstu.
          De toes formes foi un guapu día de montaña.

Ver todas

Consigue el tuyo

L'Ibéu

          Domingu, 7 de xunetu de 2013          Pedrosu - Camperes del prau Sellón - Pista de la Robellada ( A la izquierda) - Cuesta de Tebia - Llanos de Hibéu o de La Rebourdiada - Collada del Llanu'l Carru - Picu.

          "Subir al monte... lo alto sabe de lo baxo, lo baxo nun sabe nada de lo alto" (René Daumal)

          Esti guapu percorríu ye de los que me presten y a los que suelo recurrir cuando quiero tar en casa a la hora xintar.
        Lo mesmo que dende otres xerres cercanes a la costa oriental ye un miradoriu privilexáu de los Picos y de la costa Llanisca. Nesta ocasión yeren muncho meyores les vistes pa los nuesos montes más emblemáticos. Tan guapos taben que paicía que la máquina retratar emburriaba les mios manes pa que sacaren semeyes sin parar.
          Nel Pedrosu (Onís), xunto a una fonte, hai sitiu abondo p'aparcar varios coches. Unos metros más atrás, a mandrecha, empecipia una pista que dempués de pasar unes cases sigue en direición oeste. Caminamos per ella unos 400 metros y dempués de una pequeña baxada siguimos por una ponte recién fecha, subimos un trechu y atravesamos otru barriu que tien tola pinta de tar despobláu. Paez que namái que s'usen les cortes y tenaes. Quiciabes una vivienda, anque de les veces que pasé pellí nunca vi a naide.
          Ensiguidina entamamos una subida bastante pindia que pente finques y con direición norte llévamos a cruciar per un prau, nesta ocasión enllenu felechos, y dempués de pasar al llau d'una casa tamién vacía entramos nun guapu y pequeñu castañéu. A vegaes, si tamos atentos, vemos dalguna señal de PR. Pasada la viesquina llegamos a un camín que con direición nordeste llévamos a una bona pista que vien de la Robellada y pola que sin pérdiga llegamos a los Llanos de Ibéu.
       Dende equí, anque yá tamos enfrente'l picu, la meyor opción pémeque ye siguir pela pista hasta la collada del Llanu'l Carru y dende esti sitiu empezar la verdadera subida a esti guapu monte caliar. Hai dos cumes ximielgues. El vértice xeodésicu y el buzón ta na situada al oeste, dende elli vemos la otra con un bon finxu de piedres a onde paga la pena llegar.
          Como dicía al principiu les vistes son impresionantes: Pal sur amás de Los Picos vense parte de los montes d'Amieva y Ponga col emblemáticu Tiatordos; al oeste les xerres interiores y les cercanes Sueve, Escapa y Santianes; al norte los valles y la costa de Llanes y pal este la xerra del Cuera.
          En resumen: una guapa patiada que siempre apetez repetir.

Ver todas

Consigue el tuyo