Caminadina per Peñamayor

          Vienres, 28 de xunu de 2013          Les Praeres - Llames Llagar - Picu el Tarnu (Les Antenes) - Peñamayor - Ortigal - Colláu'l Covayu - Espines - Ortigosa - Les Praeres.

          “Los montes agasayáranmos con la so guapura, y nosotros quixímoslos cola inxenuidá propia d’un neñu y reverenciámoslos cola veneración qu’un monxu siente polo divino.”  Maurice Herzog

          Foi un paseín pequeñu pero prestosu a esgaya. Dexé'l coche, como siempre, antes del chigre Les Praeres. Yá fai unos años que lu aparco nuna esplanadina qu'hai al llau d'una cabaña un pocu más abaxu. Antaño dexáralu en Pra pero yeren otros tiempos. Los años nun pasen de baldre.
          Crucié'l mayáu con direición sur dexando a manzorga La Cota o Picu Reondu. Entamé a subir y nel primer cruce dirixíme a la derecha pa onde se ven les remocicaes cabañes de Llames Llagar. A llau de la segunda que s'atopa a la vera'l camín, salíme de la pista p'agarrar les antigues marques d'un senderu que fixeren les mules cuando subíen el material pa la caseta les antenes. Pasu ente pasu y parándome bien d'ello pa echar el güeyu p'atrás y ver el llamativu paisaxe que va surdiendo: l'Oroxu, Llames Llagar, Les Praeres, La Varallonga, La Múa, tola Puente Arriba, la Llomba, El Sueve, Sieru, Sariegu, Nava, Cabranes,...D'esti mou llegué al picu H.ueyu, que per Nava tol mundu llama Les Antenes.
          Aquí la parada tien que ser un pocu más llarga porque al panorama que víamos na subida hai qu'añader l'espectáculu que se mos presenta pal oeste, el sur y l'este: la mitá'l conceyu Bimenes, Sieru, Noreña, Llanera, Uviéu,..., la peña l'Home, la Bauga, Campagués, Peña Mea, les Ubiñes, l'Aramu, los montes de Llaviana, Sobrescobiu, Aller, Casu, Piloña, Ponga,  Amieva, los Picos,...Lo mesmo que vamos ver cinco minutos más tarde cuando llegamos a Peñamayor col so guapu buzón de cumes, una reproducción n'aceru d'una botella sidra.
          Dempués d'otra llarga  parada echamos a andar camín del Ortigal col Texu de frente. A esti picu yá nun llegué. Poco antes d'entamar la subida, per un senderu a manzorga, baxé al colláu'l Covayu dende onde se ven les guapes praderes d'Anés y Breza con la Triguera como vixilante.Dende equí per una pista y pasando per Espines y Ortigosa volví a les Praeres p'acabar esta curtia pero prestosa escursión.

Ver todas

Consigue el tuyo

Circuitu peles Xanes, puertos d'Andrúas, Pandu la Mortera, xerra Serandi, Villamexil, Proaza y sienda l'Osu

          Miércoles, 26 de xunu de 2013               Les Xanes - La Rebollada - Colláu de la Canal Seca - Braña Bruxana - Puertos d'Andrúas - Pandu La Mortera - Puertos d'Andrúas - Picu Cutiay -  Colláu de la Canal Seca - Xerra Serandi - Pr As235 - Villamexín - Proaza - Sienda l'Osu - Villanueva - Aparcamientu de Les Xanes.

          "Los despistaos nun esisten. Esisten los despistes, y hai persones que los cometen con  más frecuencia qu'otres, pero nadie naz despistáu" Anonimu


          Pémeque los años nun corrixen lo que siempre fixi mal. El mio sentiu de la orientación nunca tuvo mui desarrolláu y a estes altures yá nun tien arreglu al menos por medios naturales.
          La mio intención yera facer una escursión llarga per unos llugares perguapos pero nunca llegar a esos 36 km que foi lo que resultó al final.
           Fixi como pensare más de la mitá del recorríu. El despiste vieno na última parte de la escursión.
           Salí del aparcamientu de Les Xanes y subí pel camín que se fae davezu hasta onde s'atopa un senderu que con bon desnivel va  a la Rebollá. Dende esti guapu pueblu empezaron a torcese les coses porque'l día que paicía que diba ser buenu nun acababa de despexar. Con cierta dificultá d'orientación, pela Canal Seca y el colláu del mesmu nome, llegué a la braña Bruxana que ye inconfundible pola so cabaña con teyáu de tapinos. Con dellos problemes p'alcontrar el GR 106, porque la borrina yera espesa abondo, pente agua y barru a esgaya y dempués de pasar pelos puertos d'Andrúas y la espetacular viesquina de carrascos, aporté al Pandu la Mortera. Nestes guapes praderíes los mios sentíos pudieron disfrutar porque la nublina paicía qu'entamaba a quitase.
          Dempués de unes cuantes vueltes alredor del sitiu onde unos díes antes paicíame que dexare unos antioyos entamé'l regresu con bastante meyor tiempu. Yá otra vuelta  na braña Bruxana subí al modestu picu Cutiay pa gociar col guapu panorama. La mio intención yera baxar per Serandi y la foz de Picarós* a la sienda'l Osu. Con esi determín baxé al colláu de la canal Seca y dempués de patiar un pocu pela xerra Serandi despistéme y vime metíu pente escayos y cotoyes nun caminín coles marques del Pr AS 235. Con abonda dificultá porque l'agua, el barru, la maleza y los argayos nun lo poníen fácil, caminé en direición sur hasta qu'atopé un terrenu mitá camín empedráu y mitá ríu. Agora yá con sentíu oeste y una baxada que lo resbalioso de les llábanes moyaes fixo enrevesada llegué a San Martín.
          P'acabar de facelo llargo, pela carretera fui a Villamexín. D'equí baxé a Proaza y pela sienda l'Osu aporté al aparcamientu del molín de les Xanes dempués de los 36 kilómetros de los que falaba al principiu.
          Una patiada dalgo más llarga y complicada que les habituales.

L'Airúa Naval. Rebollu y texu de Bermiegu.

          Sábadu, 22 de xunu y miércoles, 10 de xunetu de 2013          Bermiegu - Capiella La Mercé - Pandu la Mortera - L'Airúa Naval - Pandu la Mortera - Bermiegu(rebollu) - Texu y Ilesia de Sta María - Bermiegu 
      

          "La mio memoria ye escelente pa olvidar"   Robert L. Stevenson

         Pa la mayoría la xente será raro facer la mesma escursión con tan escasu marxen de tiempu. Pa min ye  lo normal porque yá casi nun pueo alcordame les veces que lo fixi. El casu ye que la mio cabeza, bien porque tien munchos años o bien porque nunca dio pa muncho, fae que m'olvide o pierda les coses munchísimes vegaes.
          De xuru que los montes d'Asturies deben tar enllenos de parasoles, tapes d'oxetivos, navayes, guantes, pañuelos, monederos y dende'l 22 de xunu de gafes. A la gueta d'elles fixi'l paséu del segundu día. Previamente fixere otra caminata al Pandu la Mortera dende Villanueva col mesmu resultáu qu'esta última. Eso sí, paselo bien toles veces.
          Más que'l valor de les coses que pierdo lo que me fae volver son los bonos resultaos que tuvi en dalgunes ocasiones y el refuerzu a la mio autoestima. Nesta oportunidá  prodúxome un baxón considerable.
          Too empezó fae unos doce años cuando cerca del llagu Ubales escaeciéronseme unes antiparres y volví a buscales quince díes más tarde dempués d'una bona nevada y taben nel sitiu esperáu. Otra vegada volví a Peñamayor pa recoyer un reló nel llugar que pensaba. N'otra ocasión volví por una gorra que dexare nel vértiz xeodésicu del Trigueru. L'añu pasáu fui dos díes siguíos al Vízcares. El segundu a buscar un pequeñu Geco y tamién lu atopé nel llugar previstu. Esta vez los antioyos quedaren pa que les vaques, caballeríes o cualquier bichu con presbicia puea ver la yerba con más claridá.
          Nun conocía l'Airúa y al mio mou de ver ye un monte que nun tien el prestixu montañeru que se merez. Ye el puntu más altu de la pequeña xerra de Tene. L'amplia cume ye un estraordinariu miradoriu pa los cuatro puntos cardinales: La Mostayal, xerra l'Aramu cola Gamonal, Moncuevu, Xistras y Gamoniteiru;  Peña Rueda y les Ubiñes; les xerres de Sobia, Gradura y casi p'algamar coles manes la xerra Caranga. Debaxo'l embalse de Valdemuriu a la solombra'l Gurrión; pueblinos quirosanos y la villa Proaza; la xerra de Serandi, les guapes praderíes de Bousaña y los puertos d'Andrúas, Pedroveya, Dosango, Uviéu,...
          Salimos de Bermiegu siguiendo les señales del Gr.106 con dirección Pedroveya. Travesamos les estreches caleyes que pente cases, cuadres y horros faenmos pasar al llau del afamáu rebollu. Per una carreterina asfaltada y pindia a esgaya llegamos al barriu d'Arriba onde lo único desagradable que s'atopa son dos perros que nun dexen de lladrar a la vera les pates y que faen que respires con alliviu cuando dexes atrás le últimes cases.
          D'equí pa riba altérnense cachos de formigón y de tierra.Vamos siempre a la solombra occidental del Aramu y casi de frente vemos la xerra de Tene col Airúa al fondu. Paga la pena desviase per un caminín estrechu y casi tapáu por escayos y maleza. Dalgún argayu de recién tamién añade dificultá al pasu. Pali que pali llégase a la capiella la Mercé, qu'ún inorante de la historia de la zona, entrúgase que fae ellí. De siguío aportamos enseguidina al camín principal qu'abandonáramos más abaxo y llegamos al guapu mayáu de Llinares.( La primera vez baxé pela capiella pero l'empedráu moyáu y lo pindiu que ye'l camín paezme qu'aconseyen subir, como fixi'l segundu día).
          Col camín casi llanu llegamos al Pandu La Mortera, una amplia pradería a los pies del Aramu y la xerra de Tene.
          Tenemos de frente'l picu que al principiu presenta una parede que paez dif'ícil de superar. Por embargu si perdemos unos metros d'altura en dirección oeste encontramos un caminín que mos lleva a una portiellina y pente revueltes, a lo primero mui pindies, y dempués más llixeres llegamos al prestosu miradoriu que ye la xerra de Tene. La vuelta fíxila pel mesmu sitiu cola variante la capiella.
          Dempués de pasar el mal tragu de los perros y echar otra güeyada al rebollu xiramos a la so derecha pa patiar un kilómetru escasu pa ver el texu milenariu. Volvemos pel mesmu camín al guapu pueblu de Bermiegu nel que acabamos esti guapu percorríu.

         

Ver todas

Consigue el tuyo

Puertos de Marabiu Xerra de Gradura: Picu Cuervu, Oubiu y peña Sala.

          Domingu, 16 de xunu de 2013          Capiella Santana - Colláu Sala o ¿Cantu Pandiella? - Picu Cuervu - Colláu La Mucheirina o ¿Cunquín? - Picu l'Oubiu -Vega Pandiella - Peña Sala - Colláu Sala - Capiella Santana.

          "Odios y cariños, favores y desprecios pasaron por min sin dexar marca; les solombres de los montes, en cambiu, enllenáronme l'alma pa siempre; yá nun salen d'ella, yá nun saldrán enxamás" (Pio Baroja)

          Nun tengo un rispiu claru la toponimia d'esta zona.y prestaríeme conocela pero atopo munches contradicciones y nun m'aclaro. Gustaríame saber tamién el nome de una llagunina qu'hai na Vega Pandiella y d'otra que se ve más al sur, camín del picu Gradura, y que yo nun vi hasta que tuvi en peña Sala. En fin hai tantes coses que nun sé...
         Ye guapu enforma el caliar d'estos montes, sobre too'l del picu'l Cuevu, pero ye muncha la cantidá de furaques y furacos qu'hai que desaxerar el curiau al andar.
          Fuera unes cuantes veces al Caldoveiru que me presta n'abondo pero estos otros picos y dalgún más nun los conocía y la verdá ye que paga la pena.
          Solamente lo que gocien los nuesos güeyos mirando pa les praderíes de los puertos de Marabiu sería bastante. A eso hai que xuntar les guapes panorámiques de los montes que mos arrodien: L'Aramu, xerra Caranga, la Sobia, El Gurrión, Peña Rueda, Les Ubiñes, Ferreirúa, Los Bígaros, El Cornón, Xerra Manteca,...
          Una escursión perguapa y qu'hai que repetir.

Ver todas

Consigue el tuyo

Picu Oroxu y Les Praeres pel Peranchu

          Vienres, 14 de xunu de 2013          Pra - El Peranchu - Bobia -Trayida d'agua de Xixón - Xerrina Oroxu (Sierra Vieya) - Peña Oroxu - Colláu Melendreros - Les Praeres - Pra.

 "Montañeru nun ye solamente'l que vence'l monte. Tamién lo ye, y mui relevante, el que la siente, la almira y la contempla". José Ramón Lueje

          Esti ye otru de los paseos qu'entamo en Pra. Yá dixi dalguna vez que ye pa min ún de los sitios que más utilicé na mio vida d'andarín.
          La primera parte d'esta excursión trescurre pel P. R. As-198 "Ruta de la ribera del río Peña". Dexámosla cuando apaez la señal d'ultimu molín. Aquí siguimos de frente y empezamos a subir con direción a la central llétrica d'El Peranchu.
          A manzorga d'esti edificiu y con direición sur agarramos un camín bien pindiu, nesta época a cachos embarráu y en munches ocasiones tapáu per maleza y árboles cayíos. Too esto fae daqué difícil la marcha.
          Yá en Bobia, un mayáu bastante abandonáu, atopamos un tramu de camín nuevu o arregláu. Ensiguida tenemos que dexalu porque va con direición oeste y lo que queremos ye dir a la xerrina Oroxu que ta'l sur. Fai poco que a vegaes vemos la Caseta'l Guardia que ye'l nome que-y damos a la peña Oroxu.
          A veces pela trayida d'agua y otres pente escayos y cotoyes subimos a esti guapu cordalín dende onde vemos la cara oeste de Peñamayor, la peña l'Home, les praderíes de Campagüés, Peña Mea, El valle de Melendreros,...
          Pela cumbrera y caminando pal este llegamos al picu Oroxu que, anque modestu n'altor, ye un afayadizu mirador. Pal norte y de este a oeste vemos casi tol valle central d'Asturies: parte de Piloña, Cabranes, Nava, Sariegu, Sieru, Uviéu,...Pal este La Múa, Casielles, El Sueve, Vízcares, El Corníon,...Y a los nuesos pies Les Praeres a la solombra La Varallonga. Al Sur, casi al llau, Peñamayor.
          Yá por pista quédamos baxar a Les Praeres y dempués a Pra. La verdá ye que esta parte del recorríu ye la que menos me gusta. Nun ye fácil que seya too igual de guapo.
          En tou casu foi una guapa escursión.

Ver todas

Consigue el tuyo

Les Xanes, Peña Rei (de refundiu) y Valdolayés

          Domingu, 2 de xunu de 2012          Aparcamientu Les Xanes - Sienda Les Xanes - Pedroveya - Dosango - Peña Rei - Sienda Valdolayés - Aparcamientu Les Xanes.  



          "El que volviendo a facer el camín vieyu apriende'l nuevu, pue considerase un maestru."
Confucio.

          Dalgo de lo que diz Confucio pasóme nesti paséu. Salí de casa cerca les once, cola intención de volver ente les dos y les tres, como ye la mio costume, nos fines de selmana.
          El casu ye qu'un cambiu imprevistu nel itinerariu allargólu un poco, de mou y manera que llegué a casa cerca les cuatro.
          El guapu recorríu pel pequeñu Cares, como llamen dalgunos a esta sienda, ye un recursu p'andar que, por cercanía, polo curtio del recorríu y por la so guapura faigo n'abondes ocasiones. Sin dir más lloñe l'añu pasáu patielu tres veces.
          A midida que soi más vieyu improviso con más fácilidá. D'esta miente cuado subía con direición a Pedroveya, agüeyando pa la xerra que ta enriba Dosangu y que forma la paré izquierda de la sienda, decidí que tenía que subir pa ver les guapes vistes que me paicía que ofrecería.
          Col determín yá tomáu, namai salir del pueblu, en llugar de baxar pela carretera siguiendo les señales del PR, entamé a patiar per un bon camín qu'hai a manzorga y que va al depósitu d'agua. N'adelantre faese un poco más malu y cada vez más estrechu pero, sin pérdiga posible, llévamos a lo más alto de la modesta xerra y a la so cume, Peña Rey.
          Dempués de que los mios güeyos disfrutasen col guapu panorama siguí un poco en direición oeste pa entamar a baxar a un camín que pasa al llau de la llagunina que lleva'l nome de la peña. Dende equí, nun sin dalguna dificultá, culazu incluyíu, baxé a la sienda Valdolayés p'acabar el camín como siempre acostumbraba.
           Esti foi pa min un descubrimientu que nun me fixo un maestru pero si que consiguió que disfrutare más qu'otres veces.

Ver todas

Consigue el tuyo

Retratando per Cabrales y dalgo más.

          Sábadu y domingu, 25 y 26 de mayu de 2013          Sotres, Tresviso, Asiegu, Arenes, Poo, Arangues.

           "La fotografía nun pue cambiar la realidá pero sí pue amosala"
            Fred Mc Cullin

          "Si pudiera contalo con pallabres nun necesitaría cargar con una máquina de retratar"
          Lewis Hine

          "Ente les munches formes de combatir la nada, una de les meyores ye facer semeyes"
          Julio Cortázar

          "Lo más almirable de les semeyes ye que puen crear imáxes qu'inducen la emoción basaes nun únicu tema"
Brassai



          De xuru que nun ye lo mesmo pero per estos sitios tan guapos, cuando nun se pue caminar, tamién presta retrar.

Ver todas

Consigue el tuyo

Monsacru: Cuitu Rumiru y Llanu Villar

          Domingu, 12 de mayu de 2013          La Collá - Mayáu Les Capielles - Picu Cuitu Rumiru - Picu Llanu Villar - Mayáu Les Capielles - La Collá.

         "Frente al desastre (del nuestru mundu d'agora), el monte ye una de les más belles escapades. El monte ye'l ser pluscuamperfeutu a quien veneramos y delantre del que nun se pue más qu'esbozar una danza. Un reinu de verdadera llibertá un pequeñu cachu de paraisu."
François Florence.

          No que va d'añu les circustancies faen que les mios patiaes sean curties y cercanes.
          De toes formes eso nun implica que nun seyan satisfactories y ayuden a escapar unes hores de les dificultaes que mos pon la vida.
         Pola so cercanía a Uviéu esti ye otru de los recursos a los qu'acudo nestes circustancies.
         Nos últimos años suelo dir dende La Collá y volver pel mesmu sitiu. Préstame dir viendo'l guapu valle qu'hai ente'l picu Garcilleru o Praiquín y la xerra Mantega. Nun toi seguru, pero pémeque, ye la razón pa que siempre escueya esti camín.
          Disfruto abondo patiando sele pel mayáu de les Capielles y xubiendo pali pali al Cuitu Rumiru y dempués al Llanu Villar. Nos díes ensin nubes hai unes vistes que faen que los nuesos güeyos gocien a esgaya. Esta xornada nun yera'l casu pero asina y too disfruté en cantidá.
         Na vuelta, otra vez seliquín, pa pasalo bien agüeyando pal mayáu, la llagunina, les capielles, la Siella l'Obispu, Santolaya, Uviéu, el Garcilleru, Mantega,...

        

Ver todas

Consigue el tuyo

La Mostayal

          Domingu, 5 de mayu de 2013          La Vara - Vega Bobies - Brañacé - Pandelaforca - Picu Espín - Canal de la Mata - La Mostayal. (Dir y venir)

          "Quién escuchó dalguna vez la voz de los montes, nun la escaez nunca más." 
           Proverbiu tibetanu

           Disponiendo de pocu tiempu, dir a un llugar cercanu, foi l'arreglu pa facer una prestosa patiada pel monte.
           Perdí la cuenta de les veces que tuvi la suerte de poder disfrutar d'esti sitiu tan guapu.
           Pémeque  namái  qu'una vez baxé contrariáu. El motivu, naquella ocasión, foi la borrina y les poques facultaes que tengo pa orientame neses condiciones.
           Subiera dende Peñerúes y, por mieu a perdeme, baxé per La Vara y pola mor d'ello, tuvi que facer una llarga patiada pela carretera  pa llegar al coche.
           Por fortuna esta vez, facía bastante bon tiempu, y prestóme a esgaya.
           Pue facese la patiada más curtia tovía porque, agora hasta Vega Bobies ta asfaltao y, pue xubise en coche sin problemes.
            Tamién hai la posibilidá d'optar a facer una escursión más llarga empezando pela ruta Les Xanes y entamando l'ascensión per Pedroveya.
            Per tol camín y sobre too dempués de Pandelaforca hai unes vistes ablucantes: Los valles de Morcín, Riosa, Ribera d'Arriba, Quirós,... El cercanu Monsacru, el Llosoriu, Peñamayor, el Sueve, Los Picos, el restu la xerra l'Aramu, la xerra de Tene y de Caranga, La Sobia , Gradura, montes de Proaza, Teberga, Yernes y Tameza, Somiéu, Belmonte,...Uviéu, el Narancu...
            Nun sé'l motivu, pero préstame muncho la peña Mosquil, que fae que m'alcuerde de picos muncho más conocíos.
            Tamién me gusta'l guapu mayáu de Brañacé, coles sos cabañes, que nun canso de retratar.
             En definitiva, ye un monte al que siempre quiero volver.

             

Ver todas

Consigue el tuyo

Ún de los mios paseos del colesterol.

          Domingu, 28 d'abril de 2013           Ciudá Narancu - Camín a Ules - Ules - El Llanu - Llampaya - Llampaxuga - Camín de Santiagu - Lloriana - La Bolguina - Peña Ñora - Malpica - Molina - Llampaxuga - Camín de Santiagu - San Llázaru Paniceres - Les Campes - La Florida - San Pedru Los Arcos - Ciudá Narancu.

         "Fatiga menos caminar sobre terrenu quebráu que sobre terrenu llanu."
         Aristóteles (384 - 322 a. C.)

          Cuando les circustancies nun me permiten dir al monte, faigo paseos semiurbanos que m'apacigüen les ganes de caminar.
          Per Uviéu tengo varios recursos: Si fae buen tiempu y dispongo de más de tres hores escueyo'l Narancu; si non, los alredores d'Uviéu, pelos que voi alternando trayeutos pa nun ver siempre lo mesmo.
         Préstame que nun sean del too llanos y que'l tránsitu sea escasu y eso nun ye difícil.
         Últimamente patio con frecuencia pela lladera suroeste del Narancu.
         Salgo de mio casa y bien llueu toi pela carretera que sube al monte. Poco dempués d'un afamáu restaurante esvíome a manzorga p'agarrar una caleya que, sin perda posible, llévame al guapu pueblín d'Ules.
         Dende equí, con pocu tráficu, sigo con direición Brañes hasta'l cruce de Llampaya. Nesti llugar, asitiau baxo la peña del mesmu nome, otra vez a manzorga empieza una baxada que sigo hasta Llampaxuga. Al llau de la capiella'l Carmen hai un camín que pela derecha baxa a la fonte La Pipera y Lloriana. Ye'l Camín de Santiagu con direición Grau. Según el tiempu que tenga vuelvo pa Uviéu o sigo a La Bolguina. Equí pela carretera As 232 con direición Uviéu, poco antes de Ponteo, vuelvo al carreterín que va a Llampaxuga  y xunto a la ilesina, a mandrecha, otra vez pel Camín de Santiago, paso per San Llázaru Paniceres, Les Campes, La Florida y San Pedru Los Arcos.
          Ye un paséu de 15 ó 16 km nun comparable a una patiada pel monte. Pero como suele dicise: "A falta de pan bona ye la boroña".

Ver todas

Consigue el tuyo

Xerra de Caranga: La Forcada

        Domingu, 21 d'abril de 2013       Villamexín - Collada Aciera - La Forcada - Colláu La Forcá - Vallina de La Forcá - Collada Aciera - Villamexín.

        "Depués de tener conocimientu falsu d'un monte ensin conocelu, yes a entendelu y descubrílu cuando xubes, llegues, sientes y baxes d'él".
Germán Rojas
   
        Tando'l día anterior patiando pel Camín Francés en dirección Forcaos Viel.los, decidí dir  al picu La Forcada en cuanto pudiera.
        La xerra Caranga paez que tien imán. Si se ve dende un altu exerce un atractivu visual, que tarde o temprano, llévamos a pisala. Y nun solo la xerra, tamién engancha'l valle que  forma col Aramu y el guapu pueblín de Villamexín.
        Como paicía qu'amanecía guapo, nun dexé qu'enfriara la idea y, hacia les diez de la mañana, entamé a caminar en Villamexín. El camín ye cómodu pero bien pindiu, va pente praos, castañales, ablanares y dalguna faya.
        Vamos dexando a mandrecha'l regatu Fayes. Pásase per Cerezales, Prau Nuevu y Varodríguez pa llegar al mayáu de Llindelafaya. Al paicer, esti conxuntu de cabañes ganaderes foi un antiguu poblamientu nel qu'había una lleprosería y nel que tovía queda una capiella.
        Dende que se sal de Villamexín siempre tenemos a la vista'l picu La Forcada y La Hoya. Cuando se va viendo la cara este del primeru llamen l'atención tres furacones que paecen cueves.
        De secute tamos na collada Aciera, un guapu mirador de los valles de Quirós y de montes como El Gurrión, peña Rueda, los Fontanes, Peña Ubiña,...
        La llástima ye que'l tiempu, un pocu emborrascáu, nun dexaba ver gran cosa.
        Dende esta prestosa campera a manzorga pue subise a la xerra de Tene. Pa dir a La Forcada hai una pista bien nueva qu'en dirección norte llévamos al pie del colláu que ta ente los dos picos. En cuenta de subir pela vallina, cola vista puesta na cuevona de más al sur, entamé a ascender hasta llegar a la  boca de la supuesta cueva.
        Dende equí, sin pasar pel colláu, llégase en pocu tiempu a la cume.
        Con bona visibilidá,  los nuesos güeyos puen gociar coles vistes de los dos valles: pel que subimos y el que se forma cola xerra Sobia. Al norte Proaza y el valle de Trubia; al noroeste, el monte pel que pasa'l Camín Francés, que patié'l día enantes. Al este l'Aramu y al sur los montes que víamos dende la collada Aciera.
        La vuelta fíxila muncho más cómoda. Baxé al colláu La Forcá y per una siendina con munches revueltes llegué a la pista disfrutando del día qu'entamaba a tar más claru.
        Cola borrina casi desapaicía completóse una guapa mañana de monte.

Ver todas

Consigue el tuyo

Forcaos Viel.los, Loral, Cuevallagar

        Sábadu, 20 d'abril de 2013        Cantu la Cruz - Portiel.la El Guamón - Camín de Maraviu - Forcaos Viel.los - Loral - Cuellagar - Portiel.la El Guamón - Cantu la Cruz.

        "Pa min solo esiste una manera  más agradable de viaxar qu'a caballu: a pie. Aníciase la marcha cuando t'apetez; párase según to voluntá; esfórciase poco o muncho según se desee; obsérvase too..."
         Jean-Jacques Rousseau (Sieglu XVIII)

        El pasáu tres de marzu intenté facer esta guapa escursión, pero había nieve en cantidá y nun pudo ser. Namás que llegué a la portiel.la Guamón.
        Mes y mediu más tarde, con un tiempu bastante guapu, pudi completar esti  prestosu paséu.
        Siempre ye agradable caleyar pela pista de los praos de Rañón y La Muria, na mortera Candeales. Dexar que los nuesos güeyos disfutren  mirando pal Aramu, el Gurrión, peña Rueda, les Ubiñes...
        Dirixir la vista pa la xerra Caranga y imaxinar que salimos de Villamexín y subimos pente praos a la Collada Aciera pa ver los valles de Quirós y llueu engolamos na Forcada, Cuetu Mar o Coscorbal...
        Presta agüeyar a manzorga pa ver el pueblín de Sograndiu arrodiau de praos, viesques y montes.
        Dende la portiel.la Guamón empezamos a ver Forcaos Viel.los y enseguida dende una collada al pie del Pigurices pue vese Loral, la campera Cuellagar y el camín de Maraviu qu'hai que siguir un trechu pa entamar la primera subida.
        Llegar a la cume d'esti modestu picu nun tien dificultá. Ye de los que a mi me presten y nun tien comparanza col vecín Loral. Les vistes dende la cume son perguapes: l'Aramu, xerra Caranga, la Sobia, Les Ubiñes, Gradura, montes del sur de Teverga y Somiéu, los picos qu'arrodien a Marabiu, xerra Manteca, El Cornión,...
        Anque nun seya comparable a Forcaos Viel.los nin preste la subida, merez la pena acercase a l'arredondiada cume de Loral. Quiciabes aumente la visión a norte, nordeste y noroeste. Tamién hai una bona panorámica de la campa de Cuellagar.
        Dempués, ye guapo echa-y una güeyada a la llamativa y solitaria cabaña, antes d'acercase a la cuevona.
        A la vuelta, otra vez a gociar, de la mesma manera qu'al dir, del guapu paisaxe que tenemos a la vista.
        Paga la pena facer esta cenciella patiada.

Ver todas

Consigue el tuyo

Pel Camín de la Mesa: Braña La Corra, Peña Negra y El Michu.

          Martes, 22 de xunu de 2010           Puertu San L.lorenzo - Piedra Xueves - Xuegu La Bola - Braña La Corra - Pena Negra - Braña La Corra - Picu Michu y vuelta.

          "Montes, ¿por qué hai en vosotros tanta guapura?
           Lord Byron

         Cuando trato d'organizar el  mio caóticu archivu de semeyes, atopo dalguna patiada de la que me quedaren bonos recuerdos. Una d'elles ye esti guapu y fácil paséu per tierres teberganes y somedanes.
          Lo de fácil tenía que ponelo ente comines, porque acuérdome que la subida  a pena Negra resultóme un pocu engorriosa.
          A les guapes praderíes que vamos encontrando pel camín, hai que xuntar el regalu que ye pa los güeyos pasar dos veces pela braña La Corra. Ver dende pena Negra media Asturies colos valles de Teberga a los nuesos pies. Mirar pal sur y ver los Bígaros, les Ubiñes, los Albos, el valle de Saliencia,...Tamién algamamos a ver pal suroeste el Cornón y más cerca la foz de Arbel.lales y de la Güérgola. Tamién queden al alcance de la nuestra vista la braña de Murias (La de Arbel.lales, nun Murias L.longas de Val.le de L.lagu) y la de  Ordiales de Éndriga.
          Dempués de la fácil ascensión al Michu, presta sentase a mirar, otra vegada más, casi tolo que yá describimos.
          Pasu ente pasu volvemos pal altu San L.lorenzo disfrutando del camín.
          Esaminando les semeyes, entrúgome cómo pasaren tres años sin volver a patiar per estos llugares tan guapos. Ye de los sitios qu'hai que ver de xemes en cuando. Tendré que poné-y remediu.        

Ver todas

Consigue el tuyo

Sariegu: Peles cercaníes del cielu

        Domingu, 7 d'abril de 2013        Vega - Canal - Villar - Altu La Fayuca - Pozu Los Llobos - Foyu Valloberu - La Campa - Foyu Valloberu - La Cuesta - Vega.

        "Inclusive nel monte más baxu percíbeste pencima de lo cotidianu"
           De Monterapia llibru

           Nací y pasé gran parte de mio vida nun pueblu con tres montes de referencia. Al norte La Llomba, al sur Peñamayor y lloñe al este, El Cornión.

           "Va nevar, ta escuro pa La Llomba"."Cuando llueve y fae sol canta la vieya en Peñamayor". "Yá ta blanco pel Cornión" Frases como estes o paicíes sintíles dende pequeñu. Esto fae qu'esos llugares tan familiares pa los güeyos y les oreyes sean atrayentes y sientas deséu de pisalos.

          Nun tardé en patiar per Peñamayor, tendría siete o ocho años cuando fui la primera vez. Nun ye raro, pola distancia qu'hai, que pasara munchu tiempu pa pisar el Cornión. Lo que nun tien perdón ye que, teniéndolo a tiru piedra, nun caminare pela Llomba hasta que tenía más de cincuenta años. Menos mal que toi compensándolo y agora fáigolo  tres o cuatro veces al añu. 

           Caminar per Sariegu presta y enseña. Los paneles informativos qu'hai en cada aldea o pueblu y qu'espliquen l'orixen de los nomes, son perdidáuticos y interesantes. Gustaríame que tuvieren n'asturianu o billingüe pero tengo la esperanza de que too s'andará...,naide ye perfeutu.

            Tamién ye llamativu l'indicador col nome de cada caleya o camín.

             La escursión ye fácil y guapa, sobre too si fae bon día. Pásase por Canal y Villar, dos pueblinos que merez la pena ver. Dende'l camin de Villar pal altu La Fayuca vemos la interesante ilesia de Narzana. Acongoxa ver como'l progresu ta acabando cola peña Careses. Col día claru, vemos tol cordal asturianu, dende'l Cornión  a los montes de Yernes y Tameza.

             Tol paséu tenemos a la vista Peñamayor y Peña Mea. Dende'l finxón de Les Lloses (conceyu de Villaviciosa), vese La Villa y el Sueve.

              Yo fixi'l recorríu casi circular baxando a La Cuesta y caminando un kilómetru escasu pela carretera de San Román - Vega.

              Ye una patiada que paga la pena facer. A min nunca me decepciona.

        

          

       

Ver todas

Consigue el tuyo