Va prestame poner equí dalgunes de les munches semeyes que faigo nes mios caminates. Nun pretendo describir rutes nin dar conseyos sobre'l meyor camín pa faceles. N'Internet hai abondo d'eses informaciones y lo único que diba conseguir ye confundir.
De toes formes toi abiertu a responder a les entrugues que faiga daquién interesáu en dalgún de los mios paseos.
Fadré una introducción de caúna de les rutes.

viernes, 26 de julio de 2013

Caminadina per Peñamayor

          Vienres, 28 de xunu de 2013          Les Praeres - Llames Llagar - Les Antenes - Peñamayor - Ortigal - Colláu'l Covayu - Espines - Ortigosa - Les Praeres.


          “Los montes agasayáranmos con la so guapura, y nosotros quixímoslos cola inxenuidá propia d’un neñu y reverenciámoslos cola veneración qu’un monxu siente polo divino.”  Maurice Herzog


          Foi un paseín pequeñu pero prestosu a esgaya. Dexé'l coche, como siempre, antes del chigre Les Praeres. Yá fai unos años que lu aparco nuna esplanadina qu'hai al llau d'una cabaña un pocu más abaxu. Antaño dexáralu en Pra pero yeren otros tiempos. Los años nun pasen de baldre.
          Crucié'l mayáu con direición sur dexando a manzorga La Cota o Picu Reondu. Entamé a subir y nel primer cruce dirixíme a la derecha pa onde se ven les remocicaes cabañes de Llames Llagar. A llau de la segunda que s'atopa a la vera'l camín, salíme de la pista p'agarrar les antigues marques d'un senderu que fixeren les mules cuando subíen el material pa la caseta les antenes. Pasu ente pasu y parándome bien d'ello pa echar el güeyu p'atrás y ver el llamativu paisaxe que va surdiendo: l'Oroxu, Llames Llagar, Les Praeres, La Varallonga, La Múa, tola Puente Arriba, la Llomba, El Sueve, Sieru, Sariegu, Nava, Cabranes,...D'esti mou llegué al picu H.ueyu, que per Nava tol mundu llama Les Antenes.
          Aquí la parada tien que ser un pocu más llarga porque al panorama que víamos na subida hai qu'añader l'espectáculu que se mos presenta pal oeste, el sur y l'este: la mitá'l conceyu Bimenes, Sieru, Noreña, Llanera, Uviéu,..., la peña l'Home, la Bauga, Campagués, Peña Mea, les Ubiñes, l'Aramu, los montes de Llaviana, Sobrescobiu, Aller, Casu, Piloña, Ponga,  Amieva, los Picos,...Lo mesmo que vamos ver cinco minutos más tarde cuando llegamos a Peñamayor col so guapu buzón de cumes, una reproducción n'aceru d'una botella sidra.
          Dempués d'otra llarga  parada echamos a andar camín del Ortigal col Texu de frente. A esti picu yá nun llegué. Poco antes d'entamar la subida, per un senderu a manzorga, baxé al colláu'l Covayu dende onde se ven les guapes praderes d'Anés y Breza col Trigueru como vixilante.Dende equí per una pista y pasando per Espines y Ortigosa volví a les Praeres p'acabar esta curtia pero prestosa escursión.

3 comentarios:

  1. Hola Arturo, perguapa pateada. Esa parte de Peñamayor, nunca la fixi, siempre lo dexo pa otru día. Y ye una pena porque les vistes, como bien dices, son de lo meyor, ves media Asturias. Guapu dia y les fotos aun meyor. Un abrazu.

    ResponderEliminar
  2. Pémeque merez la pena patiar per tol cordal de Peñamayor. Con bon tiempu ye un balcón perguapu pa ver Asturies.
    Un saludu.

    ResponderEliminar
  3. Asturias maravilla desde cualquier punto de vista. Después de una buena caminata, una buena sentada deja a uno extasiado al protagonizar el sentimiento personal sobre un paisaje excepcional.

    Saludos.

    ResponderEliminar