Pela xerra El Sueve.

          Vienres, 29 de payares de 2013         Pie de Potro (Casa Julia) - Picu Babú o Foyos - Picu Sellón - Picu Pienzu - Llanada de Bustacu - La Viescona - Pie de Potro (Casa Julia).

          "La cima d'un monte convirtióse nel sitiu onde poner los símbolos de cualquier relixón. Pero yo pienso que los montes nun tán fechos pa eso."
Reinhold Messner

          Dos veces fixere'l camín dende L'altu La Llama hasta'l Pienzu. Nun sé en cuantes ocasiones pasare les mañanes de sábados o domingos patiando al picu de la cruzona dende'l Fitu. Nos díes despexaos esta modesta xerra ye un miradoriu perguapu de la costa y de los montes d'Asturies. Amás ye bastante fácil atopase con rebaños de gamos que siempre presta.
           Tenía pendiente xubir pela Viescona y igüé esti fallu l'añu pasáu saliendo dende Casa Julia. Volví pel mesmu camín y prestárame.
          Al dia siguiente antes d'entamar otra escursión, Les Casuques - Fariu - Cuatro Xueces, formateé la tarxeta la cámara sin dame cuenta que nun descargare les semeyes. Diome rabia porque pasáralo bien y amás paicíame que podía facer una entrada prestosa pal blog. Entós propúnxime remedialo ensín dexar pasar munchu tiempu.
          Como "me lleva más el güeyu que'l botiellu" pasó casi un añu y nun m'arrepiento porque fixi un percorríu, a mio mou de ver, munchu más guapu.
          Empecé a caminar nel mesmu sitiu pero en llugar de dir pel fayéu La Viescona crucié'l regatu La Toya y pelos Tucones, lladera norte de la xerra, a veces per senderos y n'otres ocasiones pente cotoyes, berices y piedres, sin camín definíu, pero per una parea pindia enforma hasta llegar al colláu la Covaniella.
          Dende equí yá se camina meyor y per senderos con bastante cuesta, cumeando, hasta llegar al picu Babú. Si la borrina mos dexa, el restu'l percorríu ye bastante intuitivu y prestosu d'andar. Pasamos pel Sellón y el Duernes y dende equí vemos l'últimu picu: el Pienzu. Baxar, subir y desiguío tamos na cruzona que na mio humilde opinión estroza'l paisaxe. Pero esta ye otra hestoria que se m'escapa y nin tan siquiera toi seguru de llevar razón porque lo mesmo opínolo de munchos otros montes "adornaos" con toa clase de "xuguetes".
          La vuelta pel colláu Beluenzu, les cabañes de Margullines y  pela tantes veces patiada llanada de Bustacu ye entretenida y más relaxada porque yá perdiera'l mieu al borrín qu'amenazó tol día.
          Dempués a gociar baxando pela Viescona ente fayes bien grandes y poniendo procuru pa nun resbariar y pegase un xostrazu.
           Foi un día perguapu, anque pela medrana al borrín, en dalgunos momentos un pocu inquietante.
           La prósima vez tócame dir pel Altu La Llama. Tengo bon recuerdu y yá fai unos años que nun fixi esi camín.

Caminar n'El Remediu (Nava) tamién presta pero de xemes en cuando anoxa

          Vienres, 22 de payares de 2013 Ilesia El Remediu - La Calaverina - La Calavera - Rianes - Capiella l'Agua - Sorrobín - La Máquina - Llamasanti - Santianes - La Piñuca - L'Abarcón(Los Andaluces) - El Cutu - H.ueyos - Ribuli - Villamartín de Riba - El Rebollal - Los Riegos - La Foguerá - La Vega - La Casona - La Cuesta El Rebollu - El Forcáu - Cuñella - El Castañéu - La Lamparilla - Ilesia El Remediu.

           "La mio mayor satisfaición ye l'esfrute d'un cielu serenu metanes estes viesques verdes: encántenme tolos cambeos de la Naturaleza, l'agua, tormenta, y les fermoses nubes del cielu." Mary Shelley.

           Entamé a caminar pel P. R.AS - 148 xustu na direición na que suel acabase. La mio intención yera facer el percorríu del PR amestando-y un guapu tramu per Lieres y Sariegu. Llevábamos tola selmana d'agua abondo y pa nun ser menos siguía lloviendo a xarraes. P'acompangar nun faltaba l'arcu la vieya y la truena.              Eses contrariedaes facíen daqué fastidioso l'andar. Amás, cuando yá caminare kilómetru y mediu, llegando a La Mafosa, tuvi que retroceder unos cuatrocientos metros porque col agua acumulada nel camín yera imposible pasar.
           Al volver diba improvisando una alternativa. Asina ye que decidíme a dir per Rianes y subir hasta la pista que vien de L'Abarcón (Los Andaluces) y pasando a la vera la capiella l'Agua va pa Sorrobín.
           Dende esta güeria de Lieres baxé per un prestosu castañéu y pasando La Máquina y la Viona llegúe a Llamasanti. Siguí pela cera la carretera de La Secá a Villaviciosa hasta Santianes. Nes primeres cases per un camín a mandrecha llégase a La Piñuca y dempués de cruciar por segunda vez el Nora, yá lu pasara na Máquina, empieza otru guapu castañéu travesáu per una caleya bastante pindia que llega a la pista que va pa L'Abarcón.
           Tamos ya nel P.R.AS 148 del que nun me voi volver salir.
           Siempre que pasio per esta sienda préstenme les vistes d'El Remediu, Lieres y Peñamayor al sur y Sariegu y La Llomba al norte. Nos últimos años esti prestar conviértese en cabréu y pena al ver l'estrozu que REE fixo nel mio pueblu. Pero eso ye otra historia.
           El camín per H.ueyos, dexando a manzorga les Peñes del Rebollalín ye guapu anque sobraben los ocalitros. Traime bonos recuerdos de cuando siendo neños díbamos de merienda y paicíamos que tábamos nel monte.
           Un poco más arriba, en Ribuli, vienme otra vez l'anoxu al ver l'estrozu paisaxísticu que fixeren col circuitu motocrós. Cuando yá sales d'aquel panorama tan dañáu atópeste con los restos d'una casa mariñana que yera de lo más guapo del percorríu y que l'abandonu fae que dientro d'una temporada, más bien curtia, aquel sitiu tan guapu quede convertíu nuna escayada. Meyor pasar apriesa pa olvidar el repunu.
           D'equí pa lantre ye lo más prestoso del paséu: per unes viesques autóctones bien guapes pasamos Villamartín de Riba, El Rebollal, Los Riegos, La Foguerá, La Vega, La Casona y La Cuesta El Rebollu.                  Dempués la fonte El Forcáu. Sitiu afayaizu pa descansar si non fuere que yá tamos acabando la escursión. (L'agua nun ye potable dende fai una montonera años).
           Cuñella, El Castañéu y La Lamparilla son barrios bien guapos pelos que pasamos pa llegar al puntu d'aniciu: la ilesia El Remediu.
           Por ciertu, los que yá tenemos años abondo, alcordámosmos d'un edificiu bastante más guapu y anguaño estrozáu por una casetona que fixeren arimada al antiguu campanariu. Esto fai que l'últimu vistazu mos dexe una vez más un pocu enfocicaos.

Per Bimenes

          Vienres, 15 de payares de 2013              La Llera - Ruta Los Molinos - Molín de Milio - Ruta Santa Gadía - Campa El Colláu - Peña l'Home - Campa La Collá - Santa Gadía - La Llera.

          "Cuando la borrina ye paisaxe la tierra vuélvese muda, los oyíos sordos y la mirada fumu. Un aliendu d'espíritu esmorez colores, formes y caminos. Inocentes pantasmes tóquenmos la piel p'alvertinos que ye'l máxicu momentu de los tiempos perdíos." Francisco Javier Barbadillo Salgado

          Anque nos mios paseos de Peñamayor casi siempre tienen una pequeña parte del percorríu per Bimenes, pémeque nun caminare, de verdá, per esti guapu conceyu dende fae siete o ocho años.
          Llevaba una bona temporada pensando correxir esti desaciertu. Nunca llegaba'l día porque, como diz el refrán, "llévame más el güeyu que'l botiellu" y tengo na tiesta más rutes de les que'l mio tiempu me dexa facer.
          El casu ye que nun sé si reparé l'error porque escoyí un día que nun me dexó del too satisfechu y quedárenme ganes de repetir la escursión.
          Alboreció lloviendo d'abondo pero, cola esperanza de qu'abocanare, entamé a caminar y cada vez se foi poniendo'l tiempu más gafu.
          Había borrina, facía aire y per momentos diluviaba de tal manera que facía difícil andar y sobre too saber per onde s'andaba.
           La sienda Los Molinos ta bien señalada y nun tien perda. L'enllace cola de Santa Gadía que vien pela Peña l'Home tamién ye fácil d'atopar. D'equí p'alantre, nun día tan foscu, les coses complíquense sobre too, pa los que como yo, nun tán amigaos col sentíu la orientación.
          Asina ye que duldé más d'una vez per onde siguir y hasta tuvi un cachín medio perdíu pente la borrina na campa El Colláu.
          Con toos estos contratiempos nun pudi disfrutar como pensaba de esta prestosa caminada. Les guapes vistes de casi tola parroquia Santu Medero colos pueblinos de Tabayes, Piñera, Viñay, Pedréu, Castañera, Melendreros,....; les viesques autóctones que s'atopen en tol percorríu; la vecina cara oeste de Peñamayor que cierra'l valle,... L'agua y la borrina nun dexaron gociar d'esti paisaxe que, con bon tiempu, produz plasmu.
          Préstame recordar equí que Bimenes foi'l primer conceyu que declaró cooficial la llingua asturiana dientro del so territoriu. El cinco de xunetu de 1997 ye una fecha que nun se mos olvida a los que tamos convencíos de que l'asturianu ye una de les mayores ayalgues culturales que tenemos y por eso lluchamos pa que nun muerra.
          Nun pueo dicir que foi un día perdíu, en toles caminates hai momentos y coses guapes, pero sin tardar, hai que volver a patiar per Bimenes.

Fayéu Montegrande, El Xiblu y braña Les Navariegues (Teberga)

          Domingu, 10 de payares de 2013          Cercaníes La Puerca (Carretera puertu Ventana) - Fayéu Montegrande - Tabayón del Xiblu - Viesca La Ferviencia - Braña Les Navariegues. (Dir y venir)

          "La seronda siempre foi la mio estación favorita. El momentu en qu'españa too cola so guapura pasada, como si la naturaleza tuviera aforrando tol añu pal gran final."  Lauren DeStefano

          El fayéu de Montegrande ye una grandiosa y, sobre too na seronda, vistosa y colorista viesca. Si a esto-y  xuntamos el fácil accesu pela carretera'l puertu Ventana nun ye un res estraño ver l'aparcamientu enllenu coches los fines de selmana de cualquier estación del añu.
          El camín, casi llanu, invita'l paséu y disfrute de xente de toes les edaes. Con bon tiempu paez una romería. El dir y venir; el mirar y retratar, el xaréu de les rapacines faen pensar a vegaes que tamos nun parque urbanu.
          Sicasí merez la pena la caminata. Nel tardíu tolos fayeos tán perguapos y esti nun diba ser menos. Al riscar l'alba, al escurecer o a cualquier hora d'un día nun festivu, ye cuando se pue gociar meyor d'esti guapu arboláu.
          Dempués d'unos cuatro kilómetros llegamos a una ponte sobre'l ríu Fundil y de siguío empezamos a oyer l'estruendu l'agua. Tamos cerca'l tabayón del Xiblu, un de los saltos d'agua más guapos que tenemos n'Asturies.
          P'acercamos a velu hai qu'esforciase un poco más. Son cuatrocientos o quinientos metros de senderu estrechu y en dalgunos sitios con barru y maleza abondo. El sacrificiu pa llegar paga la pena facelu. L'estreldar del agua al caer d'aquella altura produzmos plasmu. Nun s'alcuentra'l momentu de dexar de facer semeyes y abandonar un llugar tan espectacular.
          De vuelta nun atravesamos el ríu. Siguimos en direición casi opuesta a la de venida pa dempués pela tamién guapa viesca la Fervienza y per un prestosu camín con dalgún tramu empedráu y n'ocasiones con munchu desnivel llegamos a Les Navariegues.
          Dempués de dexar que los nuesos güeyos gociasen del llugar y de reponer fuercies, entamamos el regresu.
          Volver pel mesmu camín a vegaes ye pesao y aburrío. N'otres ocasiones, y una foi esta, presta a esgaya facelo. Contemplar el preciosu paisaxe dende otra perspeutiva ye disfrutar doblemente del paséu.
          L'inconveniente qu'atopamos foi la cantidá de xente que pasiaba ente'l ponte sobre'l Fundil  y l'aniciu la ruta. Yera lo esperable a les dos del meudía nun guapu domingu de la seronda.
          Una prestosa y guapa mañana d'escursión peles nueses viesques y montes.

Braña Mumián y peña Gúa Somiéu (Asturies)

          Miércoles, 6 de payares de 2013          El Couto - Fayéu de la Enraimada - Braña Mumián - Peña Gúa - Braña Mumián - Peña'l Molinón - Fayéu de la Enraimada - El Couto.

          "La seronda ye una segunda primavera, onde cada fueya ye una flor." Albert Camús

          Nun tengo acordanza de pasalo mal nos mios paseos per Somiéu. Esta vez nun foi menos y prestóme abondo.
          Por casualidá o coincidencia les mios escursiones per esta guapa fastera d'Asturies siempre fueren na primavera o nel branu. Yá tocaba disfrutar de los paisaxes que pinta la seronda nesti conceyu.
          ¡Hai tantos sitios guapos na nuesa rexón que cuesta trabayu escoyer onde dir!
          Nesti paséu xúntase too lo que se precisa pa facer una ruta perfeuta: La viesca de fayes nel tardíu; la etnografía con Mumián, una de les brañes más guapes del conceyu, y el monte cola vistosa peña Gúa.
          Entamé la caminada nel pueblu de Couto (Coto de Buenamadre). Poco antes de llegar hai sitios abondo p'aparcar. Yo fíxilo al llau de una nave que paezme que fae de corte y tenada.
          Crúciase'l pueblu, mui remocicáu y al empar, según les apariencies, semiabandonáu. Empiézase a xubir en direición oeste y casi de sópitu entrase na guapa viesca de la Enraimada. Ensiguida el camín xira al sur.
          Hai que dir per una pista, a vegaes bien pindia, que nun se pue dexar por ser zona d'usu restrinxíu. De toes formes la xubida ye perentretenía y, polo menos a min, cola guapura l'entornu fíxoseme curtia y relaxante.
          Nun ye raro oyer gruñíos que, nesti territoriu, faen que te pongas sollerte pensando na presencia del osu. Nun yera la primera vez que los mios oyíos  percibieren soníos paicíos y siempre resultaron ser animales domésticos o xabalines. Nesta ocasión nun vi nada y deduxi que yeren de gochu montés. Nun fueron poques les veces que, sobre too pela mañanina, asusté y asustáronme corcios, venaos, robecos, rapiegues o xabariles. Ventayes de dir solu pela viesca o'l monte.
          Sin casi date cuenta llégase al colláu y de siguío a la guapa y bien conservada braña Mumián. Llama l'atención una ol.lera bastante bien conservada que mos dexa ver l'inxeniu de los antiguos pastores pa esfrecer la lleche d'una forma natural.
          Facemos una llarga parada pa que los nuesos güeyos y el nuesu espíritu gocien d'un llugar tan  paradisiacu y entamamos la xubida a la Peña Gúa.
          La mio intención yera ascender pela parte norte, la que ta enfrente la braña. Ye la más direuta pero tamién la más pindia.
           A los pocos metros l'aire, que facía difícil mantenese en pie, fixo que diese la vuelta y arrodiando dirixime a la cara este, muncho más cómoda y menos empinada. Seliquino, sacando provechu del paisaxe y, ensin querer, espantando robecos, llégase a esta modesta cima de 1689 metros.
          Ye un miradoriu privilexáu d'esta parte Somiéu: al llau picu Altu y un pocu más lloñe xerra'l Páramu, Penouta, Cornón, peña Salgada, Picu Moscosu, Putracón, Encarralina, peña Furada, peña Negra,...Baxando la vista pue vese la carretera'l puertu Somiéu, Caunedo, Valle de L.lagu, Urria,... y a los nuesos pies la braña Mumián.
           Nun pudo ser mui llarga la parada porque l'aire yera fríu y soplaba con fuercia. Pasu ente pasu baxamos pa volver a travesar la braña y de siguío xubir a la peña'l Molinón. Dende esta cume hai una vista bien guapa del Couto y d'Urria y la so ondulante carreterina. A los nuesos pies la multicolor viesca de la Enraimada.
          Volvemos pel mesmu camín pa completar una guapa xornada de monte.

Braña Cueiru, Necrópolis tumular de La Escrita y picu Altu La Casa

          Domingu, 27 d'ochobre de 2013          Puertu San Llorenzu - Colláu la Tartulla - Cuendia La Celada - Campa Cueiru - Cantu La Bobia - La Pousa'l Sal - Prialvaré - L'Aprecida - Necrópolis tumular de la Escrita. Regresu pel mesmu camín hasta'l Cantu La Bobia. Xubida al picu Altu la Casa - Cuendia La Celada y vuelta al Altu San Llorenzu.  

           "Caminar pelos montes p'aquellos que realmente esfrutamos con esta actividá y enllénamos l'alma" , va más allá d'un simple pasatiempu , d'una actividá deportiva , d'un desenchufase de la llocura y el ruiu de les nueses ciudaes y les nueses xeres cotidianes..." Alejandro Coria

          Fixere una escursión paicía a esta n'agostu del añu pasáu. Naquella ocasión la mio intención yera subir al picu la Berza y por recreaeme n'otres coses quedábame pocu tiempu y xubi al vecín Altu la Casa que me paicía más entretenío y volví pal puertu San Llorenzu.
          La mio intención d'esti día yera repetir el percorríu pero subiendo a los dos picos. Préstarame muncho la patiada anterior y quería subir a La Berza más que nada por aquello de que ye'l más altu de Grau y algamar eses cumes, polo menos a min, refuércenme l'ego.
          La nueche anterior, lleendo reseñes de la zona, atopé información sobre la necrópolis tumular de la Escrita y tomé la decisión d'allargar un pocu el paséu pa llegar a esti sitiu.
          Siguiendo en direición Dolía, bien señalizada en Cantu La Bobia, pásase per La Pousa el Sal onde queden restos de l'antigua calzada empedrada. Tamién llama l'atención una cuadra, a mandrecha'l camín, coles paredes abombaes que paez difícil que que nun s'esbarrumbe.
          Como casi siempre que m'acerco a un d'estos llugares prehistóricos lo único que veo ye'l lletreru. De toes formes prestóme'l camín.
           Fíxoseme tarde y como yera domingu y téngome prometío dir a casa a la hora xintar nun me daba tiempu a xubir los dos picos y elixí otra vez l'Altu la Casa. D'esta manera tengo una escusa pa volver sin tardar y subir por fin al teyáu de Grau.
          Voi a autoplaxame pa reseñar lo prestosu que ye esti percorríu. Braña Cueiru y picu Altu La Casa: "Salí del puertu San Llorenzu en dirección noreste, siguiendo'l Camín de la Mesa. Pela lladera de la xerra la Verde, ente piornos y escobes, llégase a la collá la Tartulla o la Celá. El camín nun tien perda nin dificultá y los nuesos güeyos disfruten mirando pa la braña Orderias, el cordal del Cornón y la xerra del Páramu que mos queda a manzorga.
        Dende'l colláu, al oeste, vese'l guapu valle somedanu de Clavillas y pal este, les tierres de  Teberga. Siguiendo esta última dirección enseguida llegamos a la braña Cueiru. Ye'l  puntu d'unión de los conceyos de Somiéu, Balmonte, Teberga y Grau. A continuación tan les veigues de Taxa o´l Prau, Les Cancielles, Usil y Vicenturo que constituyen una de les estensiones de pastos más grandes y más guapes d'Asturies.
        Yá dixere que gustóme más el picu Altu La Casa que la Berza. Identifícome del too colo que diz Maurice Herzog y que pue lleese al principiu del blog. Cuando voi al monte la mio intención ye disfrutar y de xuru que a vegaes llógrolo subiendo al picu más altu pero la mayoría diendo o subiendo a onde m'apetez. Y esti foi'l casu.
        Dende'l Altu La Casa (1445m) hai unes guapes vistes pa tierres de Balmonte, Grau y Teberga y pa les xerres de Gradura, Sobia, l'Aramu, les Ubiñes,..."
          A esto hai qu'amestá-y la baxada y posterior xubida dende'l Cantu La Bobia a la Necrópolis tumular de la Escrita.
          Un guapu paséu, anque al nun calcular bien, llegué a casa cerca les cuatro la tarde.

Megalitos del Padrún y picu Cerra (Ayer)

Vienres, 25 d'ochobre de 2013          Boo - Bustiyé - Cantu Les Cruces - Megalitos del Padrún - Carabanés - Picu Cerra. Regresu per Campa Espines - Les Cruces - Boo.

          "El primer pasu de la inoracia ye presumir de saber, y munchos sabríen si nun pensaren que saben" Baltasar Gracián

          Toi engardiáu colo mui antiguo y colo mui moderno. O a lo meyor ye que la mio intelixencia nun da pa más. El casu ye que onde muncha xente ve o diz que ve coses perguapes  o perinteresantes yo  nun veo más qu'un trapu con escarabayos, un cachu fierru o formigón, unos peñascos...
          Voi per una plaza, per un parque o per una autopista y déxenme ablucáu los fierros o bloques de cementu armáu que fixo un escultor nomáu, que cobró pol so trabayu dineru a montones y qu'amás hai persones que-yos gusta; que se ponen al so llau pa facer una semeya, que falen ensin parar de la guapura d'aquello.
         Nun s'olviden en mio casa, cuando faciendo una visita nel muséu Reina Sofía, casi tuvieren que tapame la boca pa nun escandalexar coles risiotades que me provocaren los, pa min, garabatos de Miró.
          D'esta miente de xemes en cuando pienso si nun quedrán tomamos el pelo.
          Daqué paicío pásame col arte megalíticu. Más d'una vez visité yacimientos prehistóricos y onde los espertos ven menhires, dólmenes o cronlechs yo namái veo piedres desorganizaes. Otru tanto de lo mesmo pásame colos castros. Miro y remiro y nun veo mas que broza y cárcoves.
          Los megalitos del Padrún son un exemplu de lo anterior. Pasaríenme desapecibíos si nun hubiere señales y carteles indicativos. El sitiu ye guapu. Ta nun altu y ye vistosu pero de lo demás...
          Asina y too prestóme'l paséu. Dexé'l coche na plaza'l pueblu de Boo y entámase a subir per Bustiyé. De siguío acábense les cases y per una pista bien pindia pasamos pel Cantu Marianes y Cantu Cazurrín. De sécute travesamos pela viesca de fayes El Faillín. Siguimos hasta'l Cantu les Cruces. Esvíamosmos a manzorga pa llegar a El Padrún onde los doctos pues esfrutar cola vista los megalitos.
          Volvemos a la pista y siguimos subiendo hasta Carabanés. Dende equí' pente beriza abondo y sin nenguna dificultá ascendemos al picu Cerra.
          Baxamos pel mesmu camín hasta'l Cantu Les Cruces y pela Via Carisa, pasando per Campa Espines, llegamos a Les Cruces. Agora a mandrecha per La Prubía  llegamos a Boo.
          El camín ye casi tou pista, la mayoría de tierra. Pa min munchu meyor que de formigón. Hay mui bones vistes de los valles d'Ayer y  L.lena. Tamién facemos disfrutar a los nuesos güeyos coles vistes de Peña Mea, Peñamayor y el cordal de Longalendo pa un llau y Les Ubiñes pal otru.
          En resume una fácil y entretenida escursión que paga la pena facer.

Camín la Sacavera (Uviéu)

          Domingu, 20 d'ochobre de 2013          Aparcamientu piscina Les Caldes - Fuso la Reina - Puertu - Siones - Caces - Aparcamientu piscina Les Caldes.

          "Enxamás un paisaxe va poder ser igual al traviés de diversos temperamentos de músicos, de pintor, de poeta. Cada paisaxe compónse d'una cantidá d'elementos esenciales, ensin cuntar colos detalles más insignificantes, que, dacuando, son los más significativos." Juan Ramón Jiménez 


          Propunxérame yá fae tiempu que pasu ente pasu tenía que dir corrixendo no posible los plantegamientos de les mios caminates. Hai una razón bien cenciella: nun conocía sitios perguapos que tengo al llau de casa. Cola sida de que "eso fáigolo en cualquier momentu", "cuando nun tenga munchu tiempu", "nos díes curtios",....diben pasando los años y nunca llegaba'l momentu.
          D'esta miente entamé l'añu pasáu a dir con más frecuencia a paraxes perguapos y cercanos.
          Uviéu, Sieru, Llangréu, Samartín del Rei Aurelio, Candamu, Les Regueres, Proaza, Santu Adrianu, Teberga, Illas, Llanera, Mieres, Riosa, Morcín, Nava, Sariegu, Villaviciosa, Cabranes, Piloña, Bimenes, Grao,..., son conceyos de la zona del centru d'Asturies con rutes abondo pa enllenar una axenda difícil de facer n'años.
          Y neso toi. Intercalando dalguna escursión a llugares más alloñaos, a poco y a poco, trato de remediar lo que nun fixi hasta agora.
          Nesti escenariu ye onde sitúo esti  guapu paséu. Nun se necesita nin coche. Hai autobús urbanu que si quies llévate al entamu la sienda. Y si m'apures un pocu nin siquiera fae falta eso. En más d'una ocasión pensé en dir dende'l parque d'Iviernu pela sienda de Fusu y enllazar con ésta. La vuelta podía facese en tresporte públicu o si tienes tiempu y fuercies pel mesmu camín.
          Como programé'l paséu pa un domingu, que me presta volver a casa a la hora la xinta, fui en coche hasta Les Caldes. Nes afueres d'esti pueblu empecé y acabé'l percorríu.
          Dos kilómetros hasta Fusu pela sienda verde a la vera'l Nalón. Dempués, dende la estación per un senderín súbese a la carretera que va a Soto Ribera y xunto al bar Chema unos metros con dirección Llavareyos hasta un esvíu a mandrecha onde, tiráu encima un matu, ta l'indicador del camín. Dempués per caleyes, dalgún tramu de formigón, senderinos bien guapos y daqué asfaltu vamos pasando per viesques de carbayos, castañales, abedurios, ablanares,... y al llau de praos, pumaraes, güertos, tierres de maíz y fabes y barrios de Puertu y Siones.
          La sienda ta marcada con azulexos con una sacavera dibuxada. Son de midida pequeña y suelen tar colocaos na parte baxa de muries y en munches ocasiones tapaos por maleza. Nes encruciyaes hai que tar sollerte pa dar con ellos y siguir el camín correutu.
          En munchos llugares del camín hai vistes perguapes de la peña Avis, la Mostayal, l'Aramu, el Nalón, Fusu La Reina, el Narancu, Uviéu, Caces, Pintoria,...
          Nun puntu de la ruta, el colláu Bustiellu, converxe col camín del utre. Otra sienda que nunca patié y promete ser un bon plan pa otra mañana de domingu.
           Hai que tar bien espiertu nel colláu del Visu, dempués de Pozobal, pa nun siguir pela carretera y garrar el camín de Llagos que bordea el picu Siones y pol que, monte a traviés, baxaremos a Caces. Ye una parte bien guapa de la escursión anque algo estrozada por una viescuca ocalitros.
          Prestáronme sobre too les vistes del Nalón, allá abaxo; les viesques autóctones; la peña Constancia al fondu la vega  Siones; los pueblinos pelos que se pasa: El Valle, La Trapa, El Pandu, La Vallina, Guayosu, Pozobal,...y un caleru bien conserváu qu'hai nesti últimu barriu.
          Tamién me prestó ver en dos tierres tuques de maíz, tan habituales antaño como, lo mesmo que les vares de yerba, tan esceicionales anguaño.

Peñamayor nunca decepciona. Picu Los Caspios de Breza.

          Vienres, 18 d'ochobre de 2013          Les Praeres - Ortigosa - Espines - El Covayu - Anés - Picu Los Caspios de Breza - Breza - Colláu La Goleta Llagos - Pozu Funeres - Campagüés - Fayacava - Colláu Melendreros o La Campa - Les Praeres.

           "Pa mi namás esiste una manera más prestosa de viaxar qu'a caballu: andando. Entámase la marcha cuando se quier; párase a voluntá, esfórciase pocu o enforma, según apeteza. Mírase tol paisaxe... Nun necesito tomar siendes esbrozaes nin caminos cómodos. Paso per tolos llaos pelos que pasa una persona, veo too lo que pue ver un ser humanu y, como dependo solamente de mi disfruto de tola llibertá de la que pue gociar una persona."Jean-Jacques Rousseau (sieglu XVIII)

          ¿Quién me diba dicir fae unos años que  taría más de tres meses sin patiar per Peñamayor? 
Anque fae poco que tuvi na Múa, esta parte'l cordal nun lu pisaba dende'l 28 de xunu. Ye verdá que pasé casi un mes con una mancadura, producía más pola edá que por un traumatismu, que nun me dexaba andar pero y ¿los otros dos? Fáigome a mi mesmu la promesa qu'esto nun pue volver a pasame. Sobre too polo que disfruto siempre que camino pel "mio monte".
          A midida qu'avieyo soi más estrictu y llevo al pie de la lletra lo de xubir adulces, sele que sele. Y nun ye solo polo de "asciendi como un vieyu pa llegar a la cume como un mozu", que tamién. Ye, que como diz Harold V. Melchert, lo importante ye almirar les coses guapes del camín y esfrutar cada momentu. Les vistes dende la cima van ser el regalu perfectu tres el viaxe.
          Nesti paséu que fixi cientos de veces, pero que siempre me paez la primera, nun me canso de mirar a mandrecha y a manzorga, p'alantre y p'atrás. Aquella cabaña, esa viesquina, aquel picu, eses peñes, esti mayáu, aquelles yegües, esi xatín, el venáu que cuerre, el corciu que s'escuende, la llamuerga que ta más ensucha, los utres, les perdices que de sópitu s'asusten y t'asusten,...
          ¿Cuántes veces retrataría Anés, Los Caspios, Breza y La Triguera dende'l Covayu? ¿Cuántes semeyes tendré del pegollón d'Anés? ¿ N'alguna ocasión pasaría sin mirar p'atrás y almirar les praderes d'El Covayu? ¿Daquién pasará sin mirar a manzorga pa ver el mayáu del Caneyu, les cabañes de la Llama o'l picu la Múa? ¿Ye posible pasar sin quedar plasmáu mirando pa los texos y fayes de la falda este de Peñamayor?
          Sorprendióme atopar un buzón de cumes nel picu Los Caspios de Breza. Anque nun me lo paicía de xuru que nun tuviere na cima d'esti picu de cuarcita dende 2007 que ye la fecha de colocación que figura na tapa.
          La verdá ye que la mayoría de les veces o subo al Trigueru o crucio'l senderu per Llagos camín del colláu per onde s'entama a baxar pela cara oeste d'esti cordal. Si dispongo de más tiempu regreso peles cumes, parando nel Texu y Peñamayor pa recreame a fartar.
          Nesta ocasión baxé a la campa Funeres. Dende equí per un senderu ente espineres y más tarde peles  praderes de Campagüés llégase a la bien conservada cabaña del Raigáu. Pásase la riega y dempués d'un curtiu ascensu siguimos pela pradera enllena d'azafrán montés col picu de Peñamayor y la xerrina Oroxu  a la nuesa vista.
          Si nun tenemos priesa podemos entrar a tomar daqué al chigre "La Campa Gües" como pon el lletreru. Fae unos años, antes d'abrir esti bar, tenía'l vezu d'arrodiar baxando per un senderín al caseríu de la Bauga y dempués de quitar la sede na otra tabierna de Xerrugüés subir a la pista que lleva a Melendreros. Los dos sitios son recomendables pa comer si se quien recuperar les fuercies perdíes na caminata.
          Antes de llegar al albergue Fayacava, xunto a una cabaña qu'hai a mandrecha, xubí a la güelga de la trayida d'agua de la Fontona a Xixón. Per esti caminín, faldiando Peñamayor, ye un gociu pa los nuesos güeyos mirar pal guapu valle de Melendreros. Nel intre llegamos a la Campa y ensiguidina vemos la Cota, Les Praeres, La Varallonga,...Baxamos pela pista del guapu mayáu de Llames Llagar y a la vera'l picu Reondu o La Cota acabamos el percorríu un poco más pa baxu Les Praeres.
          Una escursión con variantes d'abondo que paga la pena facer de xemes en cuando.

De la playa La Griega (Colunga) a La Isla

           Sábadu, 27 de xunetu de 2013          Playa la Griega - Buelgues de dinosauriu - Monte La Villeda - Cruceru - Güerres - Cruceru - La Isla - Cruceru - Monte La Villeda - Playa La Griega.

          "...La triste realidá ye que les viesques de fayes y carbayos atópense cada vez más amenazaos y recluyíos a zones cada vez más altes. La realidá del "Paraísu Natural" ye que de les 300.000 hectárees de superficie arbolada qu'hai n'Asturies, más de la cuarta parte ta dedicada a plantaciones d'Ocalitos (Eucaliptus globulus), y que la franxa costera ye un monocultivu d'esta especie. Na mayoría de los conceyos costeros d'esta franxa yá nun esiste nin rastru de los antiguamente abondosos montes autóctonos, namái s'atopen dellos árboles esperdigaos y dellos praos y parrotales tarmiaos polos plantíos d'ocalitos." David Álvarez en Naturaleza Cantábrica: Asturies, paraiso eucaliptal.

          Yera la segunda vez d'esti añu que facía'l percorríu. Pel iviernu saliera de La Isla y sin dir a Güerres porque entamare a llover, llegué a la sablera  La Griega y di la vuelta.
          Nesta ocasión fíxilo al revés. Dexé'l coche nel aparcamientu y dempués de cruciar el ponte sobre'l ríu Llibardón, bordiando la playa y pela oriella la mar y la viesca ocalitos llégase a una esviación onde ta'l yacimientu coles buelgues de dinosaurios.
          Nel branu esta parte'l percorríu, sobre too a partir del meudía, suele tar enllena de families con rapacinos que-yos atrae enforma tolo que se refier a estos reptiles de la era del mesozoicu.
          D'equí p'alantre empieza un senderu bien pindiu pente ocalitros que lleva a la parte cimera del monte La Villeda. Dempués de llaniar un trechu volvemos a baxar a la vera la mar pa volver a entamar otra subida que con menos cuesta que l'anterior déxamos nun cruceru con dos opciones: siguir al llau de la costa en direición a La Islla o dirixise a Güerres.
          Merez la pena escoyer esta última alternativa. Ye un pueblín bien guapu nel que se axunten horros y cases tradicionales con edificios nuevos o remocicaos. Llamóme l'atención un potru de ferrar en mui bon estáu de conservación.
          De vuelta al cruceru, siguí pel camín que pente praos y mui cerca los cantiles llega hasta el guapu pueblín de La Islla. Anque yo esta vez nun lo fixi, paga la pena dar una vueltina pela parte vieya d'esta población con munchos horros y paneres que falen del pasáu más agrícola y ganaderu que marineru.
          La vuelta fíxila pel mesmu camín sin esviame a Güerres. Con Llastres casi siempre a la vista y agüeyando pa los desbentíos ye un paséu bien prestou.
          Siempre que m'acerco a la costa de la nuesa Asturies pienso como sería de guapa si en llugar de la ocalitera siguiera esistiendo la viesca autóctona que de xuru allegraba los güeyos de los nuesos antepasaos.
          Neses condiciones l'atopamos y nun tamos faciendo nada de nada por cambiala. ¡Hai tantes coses asina! Paez que nun tenemos igua.
          Asina y too préstenme tamién estos paseos a la vera la mar.

Ríes Baxes 3: Ponte Arousa y per Cambados

          Xueves y vienres, 18 y 19 de xunetu de 2013          Paséu pel ponte d'Arousa; de Corbillón a Cambados peles marismes; Torre San Sadurniño y nel entornu'l Porto Tragove.

          "Fixáivos si ye guapu'l pueblu de Cambados na provincia de Pontevedra, que según les lleendes del llugar, cuando'l demoniu tentó a Cristu, díxo-y: "Si arrodiyáu adoráresme, tantu cuantu ves voi date, sacante Cambados, Ferfiñans y Santu Tomé", los tres núcleos que configuren l'actual villa de Cambados, afamada por ser la capital del vinu Alvariño." José Manuel Vargas.


          Dende la primera vez qu'entré en coche na islla d'Arousa  apetecióme pasiar pel ponte. Hai que tener en cuenta que pa los que yá tenemos una pila arrugues ye daqué nuevo y que les primeres veces que tuviéramos en Galicia la única posibilidá de llegar yera en barcu.
          Esti ponte  inauguróse en setiembre de 1985 y  rompió l'aislamientu milenariu de la islla y dio puxu al so desenvolvimientu económicu y social.
          Pa poder caminar tranquilamente, sobre too en branu, la única solucíón ye madrugar porque dempués hai tráficu n'abondanza. Asina qu'amás de patiar los cuatro kilómetros de dir y venir vi l'amanecida y prestóme.
           Tamién ye prestosu'l paséu dende Corbilllón a Cambados evitando la carretera y travesando peles marismes pa siguir el paséu a la vera la sablera hasta llegar a una pequena islla: "A Figueira", que ta enfrente'l barriu Santu Tomás, el más vieyu de Cambados. Ellí puen vese los restos de lo que foi una fortaleza que data del sieglu X: la torre San Sadurniño.
          Ye interesante patiar pel barriu y almirar les vieyes pero remocicaes cases mariñanes.
          Nel porto Tragore presta caminar pel llargu espigón que s'adientra unos doscientos metros na ría. Tamién llama l'atención el cementeriu llanches qu'hai nos alredores.
          Gústame Cambados, capital del Alvariño, y tol territoriu El Salnés.

Ríes Baxes 2: Complexo Ons: Camín dos Pirlos (Illa d'Arousa)

          Miércoles, 17 de xunetu de 2013          Parque Natural do Carreirón: Camín dos Pirlos

                   "Tú dices: Galiza ye bien pequeña. Yo dígote: Galiza ye un mundu. Cada tierra ye como si fuera'l mundu enteru. Vas poder percorrela en pocu tiempu de norte a sur  y d'este a oeste; vas poder percorrela una y otra vez;  nun vas consiguir andala del too. Y cada vez que la percuerras, vas atopar coses nueves. [...] Pue ser ella pequeña n'estensión; pero en fondura, n'entidá, ye tan grande como quieras" Vicente Risco 

          El complexu natural Ons ye un llugar afayadizu pa les aves acuátiques migratories. Mamíferos como la llóndriga, dellos cetáceos, anfibios, reptiles y un bon númberu de pexes  conformen el delicáu equilibriu biolóxicu d'esti complexu natural.
          Ocupa O Grove, A Illa d'Arousa, Cambados, Sanxenxo, Meaño, Ribadumia, la isla de Ons y Bueu, con una estensión de 7.608 hectárees.
          El Camín dos Pirlos ye una pequeña parte d'esti complexu natural. Percorre unos cuatro kilómetros del Parque natural do Carreirón al sur de la illa d'Arousa.
          Yá fixéremos esti guapu paséu l'añu pasáu y de xuru, que si nun hai nengún impedimentu, nun será la última vez.
          Pémeque xunetu nun ye'l mes más apropiau pa ver les aves acuátiques migratories. De toes maneres esti requexu d'Aurousa tien otros reclamos naturales tan guapos que paga la pena velos y en munchos cachos patialos: les marismes, los matorrales y pinares, el paisaxe marín y submarín y sobre too'l pedreru.
          L'aire, les foles y les marees esculpieron una infinidá de formes arbitraries qu'aviven la imaxinación. D'esta  miente vemos formes fantástiques d'animales a les que los islleños punxeron nomes como: "*Con dos Tres Pés", "Con do fucino do Porco", "Con do Cocodrilo",...
          Ye un percorríu curtiu, guapu y sin más dificultá de la que signifique andar per munchos tramos d'arena. 
          La sienda ta bien señalada y nun tien perda.

          (*Con: Pedra de gran tamaño, especialmente a que se atopa nas proximidades da costa e sobresae da superficie da auga, ás veces só cando baixa o mar).

Ríes Baxes 1: E287 Roteiro de Donón (Cangas do Morrazo) y cruceiro do Hío

          Martes, 16 de xunetu de 2013          Donón (Mirador del monte O Facho) - Camín al cabu Home - Camín al cabu Robaleira - Playa de Barra - Pinar y complexu dunar - Donón

    “El viaxeru saborguialo too colos sos venti sentíos, y atopa entá que son pocos, anque sía capaz, por exemplu, y por eso conténtase colos cinco que traxo al nacer, d'oyer lo que ve, de ver lo qu'oye, goler lo que siente nes puntes  los deos y saborguiar na llingua'l sal que nesti momentu esactu ta oyendo y viendo na fola que vien del mar abiertu” José Saramago

          Tuviéramos fae una montonera d'años nesti perguapu sitiu de les Ríes Baxes y prestábamos volver.
          Con esi enfotu dirixímosmos a Donón, un pueblín de la parroquia de Hío nel municipiu de Cangas do Morrazo.
          La nuesa intención yera caminar y disfrutar del paisaxe de la península de Morrazo ente les ríes de Pontevedra y Vigo. Nun escoyimos un bon día y anque mos prestó queda pendiente volver facer el roteiro con meyor visibilidá.
          Entamamos el percorríu xunto a una escultura metálica d'una caracola fecha pol artista gallegu Lito Portela. En direición al cabu Home, va dexándose a mandrecha los impresionantes cantiles de la costa da Vela. A vegaes pente'l borrín vense les cercanes islles Cíes y con más claridá'l faru del cabu.
          Como'l día nun daba pa muncho en llugar de llegar al cabu, tomamos una pista a manzorga que lleva a punta Robaleira y punta Subrido. Tampoco llegamos a  los sos faros; bordiando la costa pasamos a la vera la sablera de Barra, una de les playes nudistes más conocíes y frecuentada d'España.
          Dende esti llugar per un senderu que traviesa un campu dunar cubiertu por un pinar y dempués pente bambúes, uvares y una heteroxénea vexetación llegamos a Donón y a la guapa caracola d'aceru.
          Con una bona sudada, magar que'l nublu nun impidía'l calor, prestómos tomar unes clares nuna terraza d'un quioscu al llau del miradoriu la Caracola.
          Dempués, antes de volver pal nuesu campamentu base en Cambados, fiximos una curtia parada en Hío pa ver una vegada más el so maxestosu cruceiru.

Pelos montes de Nava: La Múa y xerrina Casielles.

          Sábadu, 21 de setiembre de 2013          Frainoquiso - La Llera - Casielles - Mayáu Brañabernez - Colláu La Verde o de Brañabernez - Picu La Múa - Colláu La Verde - Picu Casielles - Mayáu de Casielles - El Cantu - El Somolín - Frainoquiso.

           "Un filósofu ye un home que xube a un cume en busca del sol; atopa borrina, baxa y esplica'l maxestosu espectáculu que vio." William Somerset Maughan


           Lo mesmo que a los otros montes del mio conceyu, dos o tres veces al añu siento la necesidá de facer una visita a estos vistosos picos. Antaño facíalo munches más veces pero na midida que me voi faciendo más vieyu, pese a que tengo más tiempu llibre, amontónenseme les ganes de conocer sitios nuevos y de repitir dalgunos otros. Poro anguaño nun los paseo tantu.
          La Múa ye de los picos que siendo modestos n'altor son un miradoriu perguapu de bona parte d'Asturies: Allá alantrones, el Cornión, más cerca Vízcares, colláu Traslafuente, Maoñu, colláu Pandemules, Peña Crespa o Los Tornos, La Llambria de Taranes, Facéu, La Xamoca,...Mui cerquina la xerra de Ques, el monte Cayón, la Varallonga, Les Praeres, la Cota o picu Redondu, l'Orozu, el colláu La Campa y tola xerra de Peñamayor dende Les Antenes al Trigueru con Breza a la so solombra. Mirando pal otu llau, pal norte, gran parte de los conceyos de Piloña, Cabranes, Nava, Sariegu, tola llanera de Sieru, Noreña y Uviéu,...La peña Careses, el cordal de La Llomba , el Sueve,...
          Nos díes espeyaos podíamos tar tiempu enforma, sin cansamos, mirando pa tolo que mos arrodia. Llamentablemente nun foi'l casu d'esti día y namái pudimos disfrutar pente la borrina del vecín valle de Les Cuerries, de Peñamayor y de los pueblos de Nava. Too ello col cielu enfoscáu que fae que nun preste como otres veces y nun puea retratase cola llimpieza apropiada.
          Tengo subío munches veces pela Cueva d'Arriba, dende les foces del Pendón, dende La Llama,...Nesti día fixi la subida dende Frainoquiso pel camín de regresu del Pr AS 46. Esta parte del percorríu tamién ye mui guapa y antes de llegar al colláu de Casielles yá hai una guapa vista del camín de les Foces del Pendón. Güei taba tapáu pel borrín. Más p'alantre pásase per una guapa viesca heteroxénea de fayes, carbayos, ablanares,...
          Lo menos prestoso ye la subida del mayáu de Brañabernez al colláu del mesmu nome. Los felechos y cotoyes dificulten el camín anque agora, en parte d'él, ta más llimpio a causa d'una quema de la seronda pasada.
          La vuelta pela xerrina Casielles tamién ye perguapa y con mui bones vistes.
          Asina y too, como casi siempre, foi una guapa mañana de monte.

Ver todas

Consigue el tuyo

Peña La Capiella, Picu Valverde(Torre Chus Santos Novo) y Picu Torres.

          Vienres, 13 de setiembre de 2013          Braña La Capiella - Mayáu Torres - Peña La Capiella - Colláu Valverde - Picu Valverde (Torre Chus Santos Novo) - Colláu Valverde - Picu Torres - Mayáu Torres - Braña La Capiella.

         " Los errores tienen el so valor, anque namás en dalguna ocasión. Non tol mundu que viaxa a la India afaya América". Erich Kästner


           Nun pudía pidir nada más pa qu'esta escursión fuera prestosa abondo: montes guapos, vistes fantástiques, nenguna pista pela qu'andar, día maraviyosu,....
          Neses condiciones entamé'l percorríu. La mio intención yera subir al Torres y volver enseguidina pa poder ver na tele'l final d'etapa del Narancu. (Amás de patiar y retratar préstenme munches otres coses).
          Como tantes veces faigo nun tardé en camudar el plan. Subir a la peña La Capiella y al picu Valverde podía ser un complementu perguapu del paséu y tenía tiempu abondo.
          Dende'l mayáu Torres dirixíme a la manzorga pa subir al primer picu. Paicióme que'l camín más amañosu yera una canal yerbosa y mui pindia qu'atopé al primer vistazu. Foi la primera equivocación. El camín ye más cuestu de lo que pensaba y a vegaes tuvi qu'usar les manes. Y, ¿cuantayá que me diría que nun diba más a montes onde tuviera qu'utilizar les manes? Pero nun acabo conseguilo. Por si fuera poco acabé nun desbentíu que nun yera'l cume y con nun poco trabayu baxé gran parte la canal hasta que vi otra pela qu'entamé a subir y creo que llegué a la cima. Al menos paicióme la parte más alta (1942m) y hai un montón de piedres a modu  finxu.
          Nun paré un res y nel pie'l picu volví a faceme la promesa de lo de les manes. Empecé a caminar per un senderu bien marcáu que con direición oeste va pela falda'l Torres al colláu Valverde. Esti camín y la subida al Valverde nun tien nenguna dificultá. Amás esti monte de 1960 metros tien unes vistes casi tan guapes como'l Torres.
          Dempués de relaxame un bon cachu y comer daqué baxé al colláu pa subir al principal oxetivu del día. Per esta cara, la oeste, nun tien denguna dificultá. Yá cerca la cume paezme que pasando a la cara norte facilita l'ascensu a la cume.
          Pémeque nunca tuvi tantu tiempu nuna cima. Cerca dos hores. La bona temperatura, les vistes, nun sé,... nun apetecía baxar. Decidí que vería'l final d'etapa pel camín y tomélo con calma.
          Nun acabaren los contratiempos. Fixi la baxada pel llau contrariu, l'este. Y, o lo fixi mal o ye así pero, el casu ye que otra vez tuvi qu'usar les manes y facer destrepes a los que yá nun taba avezáu y amás paezme que nun son apropiaos pa les mios condiciones físiques...
          De toes maneres y a pesar de los pilancos, como casi siempre que voi al monte, pasélo bien.

       


                           

Ver todas

Consigue el tuyo

Foces del Pendón y palaciu La Ferrería

          Llunes, 8 de xunetu de 2013          Fonte La Vegona - Los Fornos - Les Meceures - Ponte Pendón - Colláu La Canal - Mayáu Pastor - Fonte Faéu - Los Xerrapos - Tabléu - La Vallorita - Fonte La Vegona - Falaciu La Ferrería - Fonte la Vegona.

          "Los llugares abandonaos personifiquen, d'una manera cruda y guapa al mesmu tiempu, el poder ya imperiu del polvu. Son escenarios de la recolonización de la naturaleza y el más firme presaxu de la victoria final de la suciedá y la basura". Fernando Jorge Soto Roland

 

          De xuru que la mayoría de la xente cuando baxa de patiar pel PR AS 45 "Foces del Pendón" llama-y l'atención una construción vieya qu'asoma pente la viesca del valle'l ríu Pra.
          Lo que causa curiosidá a los nuesos güeyos ye'l palaciu La Ferrería. Trátase d'una construcción del sieglu XIV d'estilu renacentista barrocu al que nos sieglos siguientes fueron añadiéndo-y dependencies. El monumental edificiu foi fundáu pola familia de los Álvarez de les Asturies.
          Declaróse monumentu históricu artísticu'l 11 de xunu de 1982 y "Bien d'interés Cultural"  en 1993.
          Da llástima ver l'estáu d'abandonu nel que s'encuentra'l palaciu y los antaño guapos xardines que lu arrodien.
          Nun pue entendese que na páxina del Ayuntamientu de Nava recomienden la so visita y al mesmu tiempu te cerráu al públicu y neses llamentables condiciones. Pasa-y lo mesmo qu'a otru emblemáticu edificiu navetu: el palaciu La Cogolla que foi construyíu pola mesma familia qu'esti. Si nun se-y pon remediu les dos construcciones lleven camín de convertise en ruines.
          La visita al entornu d'esti monumentu pue ser un guapu complementu de la curtia y guapa escursión a les Foces del Pendón.
          Dexare'l coche nel camín de La Ferrería a unos trescientos metros de la planta embotelladora de Fuensanta, xunto a la fonte La Vegona (tamién n'estáu ruinosu).
          Desandando los trescientos metros entámase a subir pel bien señalizáu PR AS 45. Casi hasta  Los Fornos ye una pista de formigón aguapada pel castañéu qu'atraviesa. Dempués, práuticamente en llanu, per un senderu bastante cómudu disfrútase d'un paisaxe qu'agranda la so guapura a midida que mos acercamos a les Meceures. Pa min esta parte ye lo más guapu del percorríu. Ye una viesca heteroxénea de carbayos, fayes, ablanares,...acompangada col ruxir de los dos regatos que s'axunten equí pa dir a morrer al Pra unos kilómetros más abaxo.
          Dempués pela Canal hasta'l colláu del mesmu nome. Dende equí empieza la baxada dexando a los llaos praos y cabañes bien conservaes.
          Nel Mayáu Pastor hai l'alternativa d'agrandar la caminata peles Praeres y si se quier subiendo a la Varallonga. (Foces del Pendón).
          El fastidiu, qu'al menos a min, me produz caminar peles pistes de formigón vese amenorgáu poles vistes: Nava y la mayor parte del so conceyu: en primer planu Buyeres, Ovín, La Viña, Piloñeta, Grátila, Cezosu,...y les cuadres y praos qu'hai a la vera'l camín.
          Pa teminar, dende la fonte La Vegona, el camín a la Ferrería pente finques y un guapu arboláu. Dempués, si nun se ye mui gordu, pasales canutes pa entrar pela derecha de la portiella candada a la finca na que s'atopa'l palaciu.

Penarrueda y Puertos de Güeria

          Vienres, 30 d'agostu de 2013          L.lindes - La Cuaña - Manín Fonderu - Manín d'Arriba - Val.lina Grande - Embudu Val.lina Grande - Campa los Texos - Cuchiel.la de Penarrueda - Penarrueda - Col.léu Lingléu - La Cardosina - Mayéu Los Cuadros - La Foz Grande - Col.léu la Cándana - Les Escolmenes - La Cuaña - L.lindes.
          

        “Vivi la to vida como si subieres un monte. De vez en cuando mira la cume, pero ye más importante almirar les coses guapes del camín. Subi sele, firme, y disfruta cada momentu. Les vistes dende la cima serán el regalu perfeutu tres el viaxe.”  Harold V. Melchert

          Fae bien de tiempu qu'intento llevar a la práctica el dichu clásicu  de los que patiamos pelos montes: "Hai que subir como un vieyu pa llegar a la cume como un mozu".
          Si daquién que me conoz llee esto, de xuru que pensará: "esti paisanu yá chochea, ¿cómo quedrá subir? Ensin dulda que naide me quita los años nel monte nin nel llanu. Pero pémeque, como los coches, toos tenemos más d'una velocidá. L'escoyer caminar con asosiegu garantízame disfrutar del paisaxe con más intensidá y llegar a la cume sin dificultá p'alendar.
          Como a otros munchos montes, facer una escursión a Penarrueda fae que gociemos tanto del percorríu como de la cume.
          Pel camín, los guapos fayeos, los mayaos, los praos, los regatos, les viesquines de carrascos y d'otros arbustos, les vaques y caballeríes pastiando, los montes que mos arrodien formen un paisaxe d'una guapura que ye difícil esplicar.
          La cume ye un miradoriu privilexáu de les vecines Ubiñes, del valle de Quirós, del Aramu, de les xerres d'Aranga, Tene, Sobia, Gradura, el Gurrión, Caldoveiru,...Media Asturies.
          Amás de les vistes, conmueve la presencia de les trincheres y parapetos de piedres que traen a la memoria l'esfuerciu y la llucha de los soldaos republicanos que dempués de tantu sufrimientu claudicaron  ante'l poder de los militares golpistes.
          Faciendo'l camin con la tranquilidá de la que falaba nun hai pilancos que mos impidan pasalo bien.
          A dicir verdá prodúxome dalgún engorriu la baxada al col.léu Lingléu per un senderu  bien pindiu y con muncha piedra suelto. Tamién me compliqué un poco pente los piornos, espineres y carrascos por querer baxar demasiao direutu  a La Cardosina.
          Pue resultar un poco fatigoso la subida dende la Foz Grande al col.léu la Cándana porque les pates yá tan un pocu cansaes pero compénsase pola guapura del fayéu pel que se pasa.
          En resume ye una escursión perguapa y mui recomendable sobre too si se fae na primavera o nel entamu'l branu cuando les praderes tienen el máximu verdor, pelos regatos cuerre más agua y tovía queda dalgo nieve nes cumes. De xuru que los colores que la seronda da a los fayeos tamién fae que sea una bona estación pa facer el paséu.
          Yo paselo bien n'agostu.
          Siempre va prestamos dir a Penarrueda.

Prestosu paséu pel Narancu

          Domingu, 25 d'agostu de 2013          Ciudá Narancu - Carretera'l Narancu - Camín d'Ules - Ules - Carretera'l Centru Asturianu - Pista a Contriz - Contriz - Monte a traviés cruciando'l P.R. AS-239 - P.R.AS 239 - Picu Llampaya - Carretera Brañes - Llampaya - Llampaxuga - Camín de Santiagu - Les Campes - La Florida - Ciudá Narancu.
         

          “Tienes que mantenete en forma. Mio güela entamó a caminar cinco milles al día cuando tenía 60 años. Agora mesmo tien 97 y nun sabemos onde demontres ta.”  Ellen Degeneres

          Los paseos pel Narancu nun suelo preparalos. Tampoco llevo máquina retratar por eso les semeyes tan feches col teléfonu.
          Si nun faigo una escursión a dalgún llugar más lloñe, dende fae una bona temporada, casi a diario patio pel Narancu o alredores. Pongo esti paséu nel blog porque caminé per dalgunos sitios qu'hai tiempu que nun pisaba y prestóme enforma.
          Salí de mio casa en Ciudá Narancu hacia les once la mañana cola intención de probar si ameyoraren dalguna de les  mancadures ocasionaes más pola edá que por otra cosa. Pa ello la idea yera subir dalgún tramu bien pindiu y ver como me respondía'l cuerpu.
           Salíme de la carretera'l Narancu a la altura'l restaurante Lobato. Pasando per delantre'l colexu  Les Teresianes siguí per un camín que más o menos paralelu a la carretera llega a Ules. Dende equí con direición noreste unos 300 metros de la carretera que va al Centru Asturianu hasta agarrar la pista que sube a Contriz. Tien una bona pendiente y pasa per un castañéu bien guapu. Evitando les esviaciones, travesé xunto a les cases qu'aparenten tar desocupaes y llegué al colláu per un senderu bastante cuidáu. Percíbese qu'hai actividá agrícola y ganadera y camínase bien peles caleyes.
          Entamé la baxada y primero per un camín a manzorga y dempués a mandrecha crucié el PR AS 239 pa siguir monte a través per un senderu que sube a un pequeñu cuetu bastante usáu por moteros de trial. Salí otra vez al PR y, dempués d'unos 500 m, per una sienda bien marcada, mui pindia y casi reuta aporté al picu Llampaya con bones vistes a Uviéu, Llampaya, Llampaxuga, Lloriana, Sancloyo,...,  les xerres del Aramu, Tene, Caranga, Sobia, Gradura, Peña Manteca,...
          Con direición oeste, baxé a la carretera Brañes y pasé per Llampaya y Llampaxuga. Xunto a la so capiella tomé'l camin de Santiagu hasta llegar a Uviéu.
          Cruciando pel nuevu barriu de la Florida aporté a Ciudá Narancu dempués d'una entretenida patiada y cola satisfaición de nun resentime de nenguna mancadura.