Braña Cueiru y picu Altu La Casa

      Sábadu, 11 d'agostu de 2012         Puertu San Llorenzu - Collá la Tartulla - Braña Cueiru - Altu La Casa - Puertu San Llorenzu. 

        Una somedana, compañera de trabayu, fae tiempu que me dicía que-y paicía raro que diendo tantu pelos montes nun conociera La Braña Cueiru. Tenía razón, porque ye un sitiu perguapu, que ta cerca y ye fácil de patiar.
        Pémeque yá comenté n'otra entrada qu'esti añu propúnxime conocer estos llugares. Toi nello y ún foi esti. Conozo y caleyé varies veces pel camín de la Mesa dende San Llorenzu a Torrestío. Tamién fuere dende esti puertu a La Bustariega pero nunca me desvié pa Cueiru. Nin siquiera m'asomé, eso que dende La Cuendia La Celá, pasu común, sería un momentu.
        Cuando preparé la caminata yera cola intención de  dir a la braña Cueiru, subir al picu la Berza y volver. Fícilo a medies, porque de camín vi un pequeñu picu que nin siquiera sabía de la so esistencia y dempués de disfrutar per Cueiru cambiélu pol que pensare. Queda pa la prósima vez, que de xuru va ser enseguida, porque prestóme muncho y eso qu'l día borrosu y de calor nun foi de lo meyor. A les semeyes nun-yos gusta esta clase tiempu.
        El casu ye que salí del puertu San Llorenzu en dirección noreste, siguiendoel Camín de la Mesa. Pela lladera de la xerra la Verde, ente piornos y escobes, llégase a la collá la Tartulla o la Celá. El camín nun tien perda nin dificultá y los nuesos güeyos disfruten mirando pa la braña Orderias, el cordal del Cornón y la xerra del Paramu que mos queda a manzorga.
        Dende'l colláu, al oeste, vese'l guapu valle somedanu de Clavillas y pal este, les tierres de  Teberga. Siguiendo esta última dirección enseguida llegamos a la braña Cueiru. Ye'l  puntu d'unión de los conceyos de Somiéu, Balmonte, Teberga y Grau. A continuación tan les veigues de Taxa o´l Prau, Les Cancielles, Usil y Vicenturo que constituyen una de les estensiones de pastos más grandes y más guapes d'Asturies.
        Yá dixere que gustóme más el picu Altu La Casa que la Berza. Identifícome del too colo que diz Maurice Herzog y que pue lleese al principiu del blog. Cuando voi al monte la mio intención ye disfrutar y de xuru que a vegaes llógrolo subiendo al picu más altu pero la mayoría diendo o subiendo a onde m'apetez. Y esti foi'l casu.
        Dende'l Altu La Casa (1445m) hai unes guapes vistes pa tierres de Balmonte, Grau y Teberga y pa les xerres de Gradura, Sobia, l'Aramu, les Ubiñes,...
        Una prestosa patiada onde como casi siempre, influenciáu pola guapura d'alredor, paselo perbién.