Va prestame poner equí dalgunes de les munches semeyes que faigo nes mios caminates. Nun pretendo describir rutes nin dar conseyos sobre'l meyor camín pa faceles. N'Internet hai abondo d'eses informaciones y lo único que diba conseguir ye confundir.
De toes formes toi abiertu a responder a les entrugues que faiga daquién interesáu en dalgún de los mios paseos.
Fadré una introducción de caúna de les rutes.

viernes, 20 de marzo de 2015

Casu na seronda (2) Picos Senda y Requexón de Valdunes

          Vienres, 21 de payares de 2014           Bezanes - Covayos - Foz d'Anciu - Valle d'Anciu - Les Brañes - Los LLanueyos - Picu La Senda - Mayáu La Vieya - Colláu Braña - Picu Requexón de Valdunes - Cuetu Braña - Los Argayos - Sotu - Bezanes.

          “La seronda siempre foi la mio estación favorita. El momentu en qu'españa tou cola so guapura pasada, como si la naturaleza tuviera aforrando tol añu pal gran final” Lauren DeStefano.

          Distancia: 17,01 km
          Circular: Sí.
          Subiendo: 1325 m
          Altitú máxima: 1709 m
          Baxando: 1325 m
          Altitú mínima: 626 m


          Nun tengo duldes, pa min l'otoñu ye la estación más guapa del añu y cuando meyor lo paso nos mios paseos. Toi convencíu de que nun me fae falta alloñame muncho p'atopar llugares onde patiar, retratar y gociar. De toes formes vivimos nuna rexón onde tovía se conserven viesques autóctones tan guapes que de xemes en cuando presta percorrer. En Piloña, Proaza, Teverga, Somiéu, Amieva, Ponga, Redes,... hai bonos exemplos.
         Amás de los paseos habituales per Peñamayor y alredores plantegárame na pasada seronda, pa disfrutala al máximu, seis escursiones. Tres per Ponga y otres tantes per Redes.
          Nun suelen coincidir los propósitos colos fechos. El dichu  "Lleva más el güeyu que'l botiellu" casi siempre se cumple nos mios proyeutos montañeros y nesta ocasión nun diba ser distinto. Esti foi'l quintu y últimu paséu de los previstos. De toes formes toi contentu porque pémeque superé la mio media en cuanto a intenciones y realidaes.
          Prestárenme abondo les tres  patiades recién feches per Ponga y la última per Redes. Yera difícil atopar llugares tan guapos. Asina y too entamé esti paséu col tardíu yá avanzáu cola mesma ilusión y les mesmes ganes de pasalo bien.
          Nun quedé defraudáu. El tiempu meteorolóxicu, los paisaxes, les siendes que patié, lo que los mios güeyos gociaron dende los picos y pelos caminos que percorrí pémeque enllenen les aspiraciones de cualquier "andamontes" del mio perfil.
         Llugares como'l valle y foz d'Anciu, Les Brañes, Vega Llagos, mayáu la Vieya, Les Llampes, Cuetu Braña, la Forcada,... Les panorámiques dende los dos picos: Tiatordos, Campigüeños, La Carrrasca, el Cuetón de les Travieses, Los Tornos,...Les vistes de les impresionantes caídes sobre'l valle de la foz de Melordaña, los colores colos que la seronda pinta les nueses viesques,...Tolos ingredientes que puen pidise-y a un bon día de monte.
          Pa subir al picu la Senda nun siguí senderu nengún. Anque nun tenga dificultá, pue facese un poco incómoda pola cantidá d'árgomes qu'enllenen el percorríu.
          La baxada d'esti picu, per un senderu bastante claru con direición NO, ye munchu más fácil.
          La subida y baxada del Requexón, na mio opinión, nun tienen complicación.
          Los dos últimos kilómetros de Sotu a Bezanes son per carretera. Nesta ocasión, esti tipu camín qu'a veces faese tan pesáu, quiciabes pola guapura'l paisaxe nun me resultó aburríu.