Va prestame poner equí dalgunes de les munches semeyes que faigo nes mios caminates. Nun pretendo describir rutes nin dar conseyos sobre'l meyor camín pa faceles. N'Internet hai abondo d'eses informaciones y lo único que diba conseguir ye confundir.
De toes formes toi abiertu a responder a les entrugues que faiga daquién interesáu en dalgún de los mios paseos.
Fadré una introducción de caúna de les rutes.

lunes, 27 de abril de 2015

La Múa dende Les Covayes

          Vienres, 19 d'avientu de 2014          Les Covayes - Gusmián de Baxu - Gusmíán  de Riba - Navalucu - Les Cuerries - La LLosa - Rollamiu - Colláu Incosa - Picu La Múa - Colláu Incosa - Rollamiu - El Cayu - El Respeñu - Les Covayes.

          "Siempre va haber una nueva cima mirándome serena y suxestiva, apenes dibuxada sobre l’horizonte. Una nueva cume, un nuevu desafíu.
          Entós buscaré nel mio amor pol monte  les fuerces, les ganes y el deséu".
Álex Acroy

          Distancia: 15,06
          Circular: Sí
          Subiendo: 716 m
          Altitú máxima: 990 m
          Baxando: 716 m
          Altitú mínima: 320 m

          Nun llevo cuenta les veces que tuvi nesti, más que guapu, vistosu monte. Subiere en munches ocasiones dende Frainoquiso siguiendo'l PR AS - 46. Pa baxar, alternaba'l cada vez menos marcáu PR col crestéu pela xerrina  Casielles.
          Sin tener nenguna dificultá cualquiera de les dos baxades nunca se m'escaecerá'l día que, a unos 30 metros de la pista de formigón, yá nel guapu mayáu de Casielles, un inoportunu resbalón ocasionóme la rotura del peroné pel todiyu izquierdu que me tuvo unos cuantos díes nel hospital y unos meses sin poder dir al monte. Foi un percance qu'enseñóme lo fácil que ye tener una caída "tonta" y que dende aquella fae que desaxere'l curiáu caminando pel monte.
          Ye una asocedíu que me presta contar de xemes en cuando porque pue valer pa que toos estrememos les precauciones anque los riesgos mos paezan mínimos.
          N'otres ocasiones subiere dende Les Foces del Pendón siguiendo caminos distintos. Tamién tengo dío dende La LLama previu pasu per Les Praeres. O dende Carancos o Montecoya pasando pel picu Maza o Qués na xerrina d'esti nome.
          Les vistes dende la cume del guapu pueblín piloñés de Les Cuerries animáronme a facer la escursión dende esa parte del cordal poco habitual pa los navetos. Pasu ente pasu fui aumentando les distancies y buscado percorríos que fixeren posible facer un paséu circular.
          Nel  últimu mes de payares dexare'l coche nuna amplia curva qu'hai dempués de Les Covayes, viniendo d'Infiestu, y que permite aparcar a tres o cuatro vehículos. Di la vuelta pa, yá nel pueblu, per una caleya con direición sur dir subiendo pa pasar cerca de Beronda y cambiando a direición oeste faldear la xerra pa llegar al colláu Incosa bien  visible dende la Múa y conocíu por pasar per elli subiendo dende Les Cuerries. Aquí'l camín yá lu dominaba y sin denguna dificultá llegué al vistosu picu. A la vuelta baxé per Les Cuerrries y dempués de los más de dos kilómetros y mediu de carretera que separen los dos pueblos llegué a onde dexare'l coche.
          Nun me prestare esta última parte'l percorríu y falando con un paisano del llugar indicóme un camín que, casi paralelu a la carretera, xunta Les Covayes con Les Cuerries.
          Prometíme entós repitir el paséu per esti camín y la verdá ye que foi una sorpresa peragradable porque trescure pente unes guapes viesques autóctones que tovía calteníen los guapos colores de la seronda.
          Una escursión perguapa cola única torga d'unos perros  sueltos qu'había en Gusmián y que fixeron un pocu desagradable'l pasu per esti llugar.
          Xunto a una cuadra qu'hai a manzorga con direición a Les Cuerries entama'l el guapu camín per onde s'anicia'l paséu.
           Dende La Múa les vistes, si ta bon día, son perbones: al sudeste tres del Vízcares y otros montes de Piloña  los Picos d'Europa, y más al sur los montes de Ponga, Casu, Sobrescobiu y Ayer; al oeste la xerra vecina de Peñamayor; al norte La Llomba, el cordal de Peón y el Sueve...Y amás gran parte de los conceyos de Nava, Sieru, Sariegu, Cabranes, Piloña,...Nun se pue pidir más.