Va prestame poner equí dalgunes de les munches semeyes que faigo nes mios caminates. Nun pretendo describir rutes nin dar conseyos sobre'l meyor camín pa faceles. N'Internet hai abondo d'eses informaciones y lo único que diba conseguir ye confundir.
De toes formes toi abiertu a responder a les entrugues que faiga daquién interesáu en dalgún de los mios paseos.
Fadré una introducción de caúna de les rutes.

miércoles, 27 de marzo de 2013

Costa Brava (Al llau de la mar tamién presta).

        Xueves y llunes, 14 y 18 de febreru de 2013       D'escursión per Cataluña. Un poquiyín del GR 92.

        "El meyor escalador del mundu ye'l que más disfruta escalando"
        Alex Lows

        Gústame más el monte, pero de xemes en cuando, respirar l'aire la mar y ver paisaxes nuevos, a min préstame a esgaya. De xuru que nun lo faigo más veces porque'l tiempu y sobre too'l bolsu nun me dexen. 
        El paséu del xueves consistió en dir y venir dende Lloret de Mar con dirección sur, Camín de Blanes.
        El llunes dalgo paicío pero pal norte, en sentíu Tossa de Mar.
        El Gr 92 sigue tol llitoral catalán dende Portbou (Girona) hasta Ulldecona (Tarragona). Patiar per esta sienda déxanos ver ensenades, playes, cantiles y xerres costeres.
        Escaleres, formigón, llábanes y pequeñes viesques de pinos ye lo que pisamos nestes prestoses caminates. Gustáronme les escursiones y con seguridá, si se tercia, nun será la última vez que les faga.

miércoles, 20 de marzo de 2013

Tabayón de ríu Secu (Falda de Peñamayor)

       Vienres, 15 de marzu de 2013        Pra - Sienda Ribera'l ríu La Peña - Les Mesties - Camín del Valle de Baxu - Tabayón del Ríu Secu - Les Mesties - El Colláu - Pra.

       "Pues beneficiate de too lo que t'aporta'l monte, simplemente caminando per él,..."
       Juanjo Garbizu

       Esti paséu, siempre guapu, yelo sobre too n'época de desxelu. El tramu que va a la vera'l ríu la Peña, cada vez más conocíu polos que-yos gusta patiar al aire llibre, ye pa min la parte más guapa del P. R. AS - 198. 
       Esti PR que muncha xente llama ruta de Los Molinos ta perbien descritu y esplicáu en munchos blogs ya inclusive en páxines oficiales del Ayuntamientu de Nava y de La Comarca de la Sidra. Ye por ello que nun m'apetez nunca describir lo que yá otros fixeron bien, y lo único que podría facer, ye confundir a xente, como por esperiencia sé qu'ocurre.
        Esti afluente del Pra ta formáu ente otres per riegues que vienen de Campanal, del Peranchu, del Valle y de Bobia. Pela lladera este d'esti últimu requexu de Peñamayor baxa'l ríu Secu que cuando la nieve ta derritiéndose conviertese nun ríu con agua abondo que forma guapos tabayones.
        Pa llegar a ellos, en Les Mesties, tenemos qu'abandonar el PR travesando'l ríu per un puente de formigón ximielgu al qu' hai al principiu de la sienda xunto al molín de Pra. Hasta aquí disfrutamos de lo más prestoso d'esti camín, y si vamos sollertes, nun mos pasa desapercibíu. Ta unos cien metros antes de que s'empiece a subir pa la Cipresa y caminamos  pela manzorga'l ríu hasta que vemos a la otra parte la señal del últimu molín. Siguimos y con direción sur ensiguida empezamos a sintir el ruxir del agua que se depeña monte abaxo. El camín tien agua y barru en cantidá, lo que fae un pocu difícil la marcha.
         Hai cuatro semeyes que fixi'l vienres pasáu nel "Paseín nel entornu de Peñamayor" onde pue vese que'l tabayón ye munchu más grande. Tenía'l tiempu xustu pa volver y amás, lo resbalioso del terrenu diome un poco llercia y di la vuelta. Yá nun soi un neñu pa meteme en berenxenales...
         Quédame pendiente dir a esplorar con más tiempu y con meyor clima, anque desapaeza'l saltu que ye del too estacional. Pémeque diendo per un camín que sube pel Peranchu a Bobia pue baxase pa velo meyor. Esplorarélo. Toi falando del mio segundu pueblu y tiempu tendré...
          Pa facer más entretenida la vuelta, en Les Mesties garré'l camin que casi paralelu al de dir pasa pol guapu mayáu del Colláu y xúntase en Pra col del entamu.
           Como casi siempre prestóme enforma la patiada.

         

sábado, 16 de marzo de 2013

Pel territoriu la sidra: Ruta Peña Cabrera y sienda fluvial del ríu Viacaba

        Domingu, 10 de marzu de 2013     Santolaya (Cabranes) - Peña Cabrera - Ñao - Viñón - Santolaya

        "Como siempre,esperamos que la honestidá y la humildá guíen los nueso pasos".
          Iñaki Ochoa de Olza
                                                                           
        El camín empecipia en Santolaya, capital del conceyu Cabranes. Ta mui bien señalizáu y nun tien pérdida. Crúciase'l pueblu camín del barriu Sendín pa garrar la pista qu'asciende p'Argamia. Ye una subida bastante pindia y lo único trabayoso que tien l'andadura.
        Travesamos la viesca del Picu Moru y casi  llaneando siguimos per Cuatro Caminos, Brisandi y Cotubellosu. Aquí tenemos que desentendemos de les señales si queremos pasar per onde ta'l vértice xeodexicu. Son unos cien metros de desvíu que nun aporten muncho al paséu pero a los que tamos avezaos a patiar pelos montes suelen prestamos. Dende ehí mesmo baxamos al área d'espardimientu de Peñacabrera. Aquí hai meses y bancos bastante deterioraos onde se pue descansar. Pémeque ye prestoso dir a la parte más alta d'esti atopadizu llugar, una llamativa peñona, con un mirador dende onde podemos ver la Villa, Peñamayor, los montes de Piloña, Ponga, los Picos, El Sueve, la costa,... Peñamayor ta presente dende qu'entamamos el camín y la so cercanía, nun mos dexa ver dalgún de los montes que tán al sur.
        Hasta equí travesamos per una guapa viesca de carbayos, castañales, fresnos, ablanares, ¡una faya!...De xuru qu'hai más pero yo nun les vi y llamóme l'atención esta.
        Per una pista de formigón baxamos ente árboles autóctonos a Ñao.Ye una aldea perguapa con horros, cases típiques, col so naranxu o llimoneru y un reconstruyíu llavaderu.
        Yá per carretera baxamos a Viñón onde paga la pena visitar el  Muséu de la Escuela Rural d'Asturies. Yo fíxilo'l añu pasáu nuna de les dos veces que patié per esta sienda. Tamién pue vese la ilesia románica de Santuyanu de Viñón. (S XI).
         A unos metros de la fachada d'esti monumentu ta la sienda fluvial del ríu Viacaba. Si queremos recorrela entera tenemos que baxar un kilómetru aprosimadamente pa llegar al entamu, onde hai una reproducción del castillete de la vieya mina d'antracita.
         Desandamos pa volver a pasar pela ilesia y nunos tres kilometros a la vera'l riu llegamos a les cercaníes de Santolaya. Aquí acaba la sienda y pel pindiu camín de Socueltu, subimos a Santolaya p'acabar esta guapa escursión, que de xuru nun defrauda y ye apta pa tola xente.

         ( El track ye d'otru paséu y tien amestada la ruta del Corberu)
       
       

miércoles, 13 de marzo de 2013

Picu Caldoveiru

        Sábadu, 9 de marzu de 2013        Capiella Santana (Puertos de Maraviu) - Camín Real Francés - Altu  Cuvielles - Picu Caldoveiru - Llagunina Tambaisna - Capiella Santana.

        "Vivi la vida como si subieres un monte. De xemes en cuando mira la cume, pero más importante ye almirar les coses guapes del camín. Sube despacio, firme y disfruta cada momentu. Les vistes dende la cima serán el regalu perfectu tres el viaxe".
 Harold V. Melchert
       
        El sábadu pasáu nun me dexare la nieve y esi mesmu día decidí dexalo pa güei. Esta vez nun apaició nenguna torga, asina que pasé una mañana de monte de les que me presten abondo.
        Entamé'l camín al llau mesmu de la ilesia y fui patiando pela carretera (alredor de dos kilómetros). Nun me gusta esta clase de camín, pero n'algunes ocasiones lo que ven los nuesos güeyos fae que s'escaeza la incomodidá de la superficie que pisamos. Esti ye'l casu; nun ye en vanu que los Puertos de Marabiu sean  Monumentu Natural.
        Pasada la casa don Pablo atopamos a mandrecha lo que se noma Camín Francés GR 109 y con rumbu Villanueva empezamos a subir en dirección al Caldoveiru, que tenemos a la vista dende que baxamos del coche xunto a la capiella.
        En poco más de media hora tamos nel altu de Cubielles cola vega Tambaisna a los nuesos pies y casi tocando coles manes El Caldoveiru. Echamos una güeyada a la llagunina que veremos de cerca más tarde y sin perder muncha altura vamos faldiando en dirección noroeste y, sin munchu esfuerciu, nun cuartu d'hora llegamos a la cume.
       Les vistes son impresionantes: xerra Mantega, el Cantábricu (Xixón), Uviéu, L'Aramu, peña Rueda, les Ubiñes, casi tolos montes de Teberga y Somiéu, el cordal de la Mesa,...Ye ablucante.Tiraba un aire fuerte y  bastante fríu y nun paré munchu tiempu. Baxé casi de frente al llaguTambaisna y pela vega, en dirección sur, volví pel mesmu camín de la ida. Esta vez fixi parte del recorríu per un senderu que, paralelu a la carretera, fai más llevaderu'l patiar.
       Como dixi al principiu, una mañana perguapa de fin de semana nos que me presta tar en casa a la hora xintar y proyectos de paseos paecíos pel vecín cordal de Gradura.


            

sábado, 9 de marzo de 2013

Paseín nel entornu de Peñamayor

            Vienres, 8 de marzu de 2013       Pra - La Revueltona - Mayáu del Valle (Dir y venir)

        El Valle ye un mayáu que por mor del abandonu de la ganadería ta mediu desapaicíu. Apenes queda n'usu una cabaña y la broza va apoderándose de los praos. Da un pocu de llástima ver el camín tan arregláu y el pocu usu que se fae d'él. De toles maneres ye dalgo que yá nun estraña y que vemos per cualquier monte d'Asturies.
        Como tantes otres patiaes salí de Pra, una llanadina perguapa un pocu pa baxo del guapu pueblín de Piloñeta. Hai unes cuantes rutes que puen entamase nesti sitiu: Les riberes del ríu la Peña, a Peñamayor pela Artosa, Les foces del Pendón per Bocarral,  Les Praeres y Peñamayor y munches otres que cualquier conocedor de la zona pue plantegar.
        Al Valle súbese pela pista de les Praeres hasta un sitiu conocíu como La Revueltona. Llámase asina porque'l camín da un xiru de casi 180 grados. Aquí hai que siguir pel camín de la derecha que sin pérdiga y en menos d'un kilómetro llévamos al mayáu. Fae años yera un buen atayu pa subir a Peñamayor. De fechu yo tengo dío más d'una vez y apartando escayos y furando per dalgún zarru tovía pue dise.
        Más que la mayada, lo que a min me gusta d'esti paseín, ye'l paisaxe perguapu que vemos al dir y venir. El castañéu qu'hai poco dempués de salir de Pra, los pueblos de La Puente Arriba, el cordal de La Llomba, el valle del Pra, Campanal, Traveséu, Cecea, El Sueve,...
        Préstame enforma esta clase de paseinos cuando nun tengo munchu tiempu y tengo gana de respirar monte...

       Préstame esclariar aquí la confusión de nomes que-y dan delles persones nos sos blogs al ríu Pra. Esti ye'l nome verdaderu y  pol que se lu conoz en tola zona.
        Esto ye lo que podemos lleer na WIKIPEDIA:

El ríu Pra ñaz na Travesera de Baluga, a 800 metros de altitú, na parroquia yerbata de Santu Medero. Trescurre en Bimenes per Rozaes, Martimporra y Santuyano nesti conceyu y entra en Nava per Priandi. Nesti conceyu traviesa Priandi, Grátila, Piloñeta (onde recibe les agües del Ríu La Peña, tamién ricu antaño en molinos d'agua), Fuentesanta. Tres d'un pasu breve pela parroquia de Tresali au recibe les agües del Ríu Pendón en Frainoquiso, entra na de Ceceda, onde depués de pasar pelos pueblos de La Cueva y Grandiella, (recibiendo ente dambes poblaciones el caudal del Ríu Los Cuervos) conflui en La Vega col ríu Viáu, formando entrambos los dos el ríu Piloña.
Nel so cursu per Bimenes y tovía per Priandi pue apreciase la presencia antaño d'una bayura de molinos d'agua . Del so pasu per Nava hai que destacar qu'ente Piloñeta y Fuentesanta pasa delláu del Palaciu de la Ferrería, y más p'alantre pela planta embotelladora y enantes balneario de Fuentesanta.
Tolos sos afluyentes son recibíos pela mandrecha.
        
        
   

        

jueves, 7 de marzo de 2013

Patiando hacia Cuellagar y Loral (Más retratar que patiar 2)

        Domingu, 3 de marzu de 2013       Cantu La Cruz (Llinares, Proaza) - Portiella El Guamón. (Dir y venir)

        La mio intención yera dir al picu Loral y Cuellagar. Pero nun pudo ser.
        Cuando nun se dispón del material adecuáu (raquetes nesti casu) y les condiciones físiques, pasu ente pasu van deteriorándose, nun queda otru remediu que dexar pa otra vez la patiada programada.
        Ye'l segundu día consecutivu que me pasa y amás n'un entornu cercanu.
         De toes formes esto valme pa reflexonar y llévame a la conclusión de que lo sigo pasando bien pel monte. Dicir bien ye poco. Creo que meyor qu'antes, Pémeque pasóme'l tiempu de siendes difíciles, de soltar adrenalina... y agora mesmo, más que fae tiempu, el paisaxe, l'exerciciu físicu, el retratar,...faenme sacar provechu de toes le caminates.
        Al fin y al cabu siempre fui al monte pa pasalo bien, porque me presta, y pa eso, nun fae falta sufrir.

        Llegué hasta un poquiñín más allá de la portiella El Guamón. Cada pasu que daba facíase más difícil pola nieve y ensin duldalo di la vuelta. Foi abondo pa disfrutar del blancor de los praos de Rañón y La Muria na mortera Candeales. De la paré oeste del Aramu, de los valles de Proaza y Quirós, del cercanu de Sograndiu, de Les Ubiñes, peña Rueda, el Gurrión,...¡Qué más se pue pidir!
        Otra mañana perguapa, pa recordar...y el proyectu de volver cuando'l tiempu ameyore.

lunes, 4 de marzo de 2013

Per Teberga (Más retratar que patiar 1)

        Sábadu, 2 de marzu de 2013        Pelos puertos de Marabiu y pel PR AS - 156

        La mio intención yera dir dende la capiella Santana al Picu Caldoveiru pero la nieve y la veyera dexáronlo en cuatro kilómetros escasos de dir y venir de la ilesia hasta'l indicador del camín de la Mesa.
        Pa quitar l'esmolimientu por patiar baxé a Teberga cola intención d'andar pel PR AS - 156 dende Cueva Güerta. Nin siquiera llegué al colláu Pandu. Otra vez la nieve fixo que la patiada fuera curtia.
        De toes formes el paisaxe taba perguapu y prestóme la mañana.