Va prestame poner equí dalgunes de les munches semeyes que faigo nes mios caminates. Nun pretendo describir rutes nin dar conseyos sobre'l meyor camín pa faceles. N'Internet hai abondo d'eses informaciones y lo único que diba conseguir ye confundir.
De toes formes toi abiertu a responder a les entrugues que faiga daquién interesáu en dalgún de los mios paseos.
Fadré una introducción de caúna de les rutes.

domingo, 7 de junio de 2015

La Varallonga - Foces del ríu Pendón - La Ferrería

          Domingu, 1 de marzu de 2015          La Era (Piloñeta) - La Fuente (Piloñeta) - Pra - La Revueltona - Porciles - Les Alcantarielles - Piedranidia - Los Llanos - Canal - La Varallonga - Mayáu Pastor - La Canal - Les Meceures - Foces del Pendón - Los Fornos - Fuensanta - La Vegona - La Ferrería - Ovín - La Ibesa - San Antonio (Piloñeta) - La Secá (Piloñeta) - La Era (Piloñeta)

"Munches vegaes, vemos el monte de lloñe, fermosu, interesante, enllenu desafíos. Pero cuando intentamos averanos, ¿qué asocede? Que ta arrodiáu de carreteres, qu'ente tú y la to meta interpónense montes, que lo que paez claro nel mapa ye difícil na vida real. Por ello, intenta tolos caminos, toles siendes, hasta que por fin un día t'atopes frente a la cima que tientes d'algamar." De "Manual para escalar montañas":

Distancia: 14,5 km
Finaliza nel puntu de salida (circular): Sí.
Desnivel acumuláu subiendo: 756 m.
Altitú máx.: 871 m.
Desnivel acumuláu baxando: 756 m
Altitú mín: 244 m

La xerra Peñamayor ye un sitiu maraviyosu y afayadizu pa que los que-yos guste pasiar pel monte puean gociala poniendo en práutica la so afición. Damos fe d'ello tolos adictos de la cuenca'l Nalón, de Bimenes o de Nava. Amás d'estos ye difícil atopar dalgún montañeru de la nuesa rexón que nun conoza daqué d'esti guapu monte.
De xuru que lo de patiar ye una adicción. Na mio modesta opinión una sana, guapa y satisfactoria adicción.
Como navetu siéntome arguyosu y afortunáu por tener tan a mano esti privilexáu paraxe del nuesu territoriu.
Montonera d'años llevo faciendo paseos per esti cordal y nunca me cansa.
Antes paicíame que tenía que dir pelo más alto pa pasalo bien. Les Antenes, Peñamayor, Texíu o el Triguerru; toos o dalgún d'ellos nun podíen faltar en cualquier percorríu. 
Les camperes de Les Praeres, d'Espines, El Covayu, Anés, Breza o Campagüés había que pisales pa dicir que tuvisti en Peñamayor.
Sin arrenunciar a facer escursiones per esos sitios, varies veces al añu vuelvo, toi aprendiendo a disfrutar d'otros paseinos tan satisfactorios o más que los qu'antaño facía davezu.
Asina ye qu'invento rutes, como la presente, que me faen pasar mañanes perprestoses.
Nesta ocasión trátase d'una caminata paicía a la que fae muncha xente pero en sentíu inversu. Cuasi tol mundu entama a caminar peles foces del Pendón. Yo dexelo casi pal final.
De toes formes dalguna variante fixo que'l paséu fuera muncho más entreteníu que l'habitual.
Subir a la Varallonga per una canal que sal de la pista Les Praeres, en Piedranidia, unos metros dempués d'empezar Los LLanos y casi paralela al camín va subiendo a la parte más occidental del picu, foi pa min un descubrimientu que fixo que'l percorrríu fuere muncho más guapu y satisfactoriu.
Pasar pela Ferrería a la vera'l palaciu y subir a Ovín pa llueu baxar a Piloñeta pela guapa llosa de La Ibesa ye otru estímulu destacáu d'esti perguapu paséu.
Al ser circular pue entamase'l camín en cualquier llugar: el guapu pueblín de Piloñeta, como nel mio casu, Pra, Fuensanta,...