Va prestame poner equí dalgunes de les munches semeyes que faigo nes mios caminates. Nun pretendo describir rutes nin dar conseyos sobre'l meyor camín pa faceles. N'Internet hai abondo d'eses informaciones y lo único que diba conseguir ye confundir.
De toes formes toi abiertu a responder a les entrugues que faiga daquién interesáu en dalgún de los mios paseos.
Fadré una introducción de caúna de les rutes.

lunes, 11 de febrero de 2013

Torrexón de Peñerudes

        Sábadu, 9 de febreru de 2013        Peñerudes - Torrexón de Peñerudes - Xerrina la Gallinera

        "Un monte que nun llegue nin a los doscientos metros d'altitú pue ser una gran fonte de gociu." Juanjo Garbizu

       Pa subir a la Mostayal, aparqué'l coche dalgunes veces en Peñerudes, al llau de les pistes polideportives. Por embargu yera la segunda vez que me dio por subir al torrexón. El casu ye que prestóme y eso que la visibilidá nun yera mui bona.
        Pémeque paga la pena conocer estes ruines, lleer la so hestoria y imaxinase'l pasáu. Pero tamién los 530 metros d'altura del prau onde ta situáu son una  favoratible talaya pa ver bona parte de los conceyos d'Uviéu, Ribera d'Arriba y Morcín. La Mostayal, que dende ellí da la impresión de que s'algama coles manes, paez un monte de muncha más altura. Debaxo'l pueblín. Y, casi a la vera, vese un cachín de los Alfilorios. Tol conxuntu produz la sensación de tar nun requexu de Suiza.
         Subí a una pequeña xerra qu'hai al oeste del torrexón. Gallinera y Coruxera creo que se llama. Con más altura aumenta la panorámica y el disfrute del entornu.
          Sin poder dicir que ye una ruta de monte, creo que  la curtia patiada pue prestar.


viernes, 8 de febrero de 2013

Vega Urriellu

           Miércoles, 30 de mayu de 2012          Invernales del Texu - Pandébano - Vega Urriellu

      "La borrachera d'aquelles hores pasaes no cimero aisláu del mundu, el gociu de l'altura, ye bastante pa xustificar cualquier patiada pel monte"
       Esta frase mediu plaxada de Giusto Gervasutti, esplica lo que yo siento na mayoría de los mios paseos pel monte.
       De cualquier manera sé qu'hai escursiones que nun me fallen y una d'elles ye esta.
       Les vistes dende Pandébano son estrordinaries: praos,  invernales, pequeños fayeos, Peña Maín, barriu'l Castiellu o Bulnes d'Arriba. Mirando p'atrás Sotres y de frente los Albos, el Neverón, l'Urriellu,...
       La llegada'l colláu Vallejo clisa los güeyos de tolos que tienen l'aciertu d'arimase ellí. El Picu, con tol so esplendor, déxamos ablucaos.
       Más tarde, na vega, mirando pal Urriellu, paez que se para'l tiempu y nun atopamos el momentu de dimos.
       La sienda ta bien señalizada y si nun hai nieve, nun tien dificultá. Amás hai cientos de manuales de monte y blogs que la espliquen
        Yo suelo tardar unes seis hores ente dir y venir. Son seis hores que nunca s'escaecen.

      

lunes, 4 de febrero de 2013

Invernales de Vanu y antiguu pueblu de Muniama

        Xueves, 31 de mayu de 2012        Arenas - Cabañes de Golpellosa - Muniama - Invernales de Vanu - Invernales de H.ornielles - Arenas

        Fai yá dos años que tengo la suerte de poder disfrutar del conceyu Cabrales casi como si fuera'l míu. D'esta miente faigo dalgunes escapaes, xeneralmente de dos díes siguíos, n'esque alterno una xornada de monte pelos picos con otra de "mediu monte" nos alredores d'Arenas.
        Aconseyáronme esta sienda y, prestóme de tal mou, qu'esta ye la cuarta vez que la faigo y de xuru que nun va ser la última.
        Dempués de patiar nos ásperos paisaxes de los Picos presta'l contraste de viesques, praos y sebes que mos ofrez esti cenciellu y guapu paséu.
        N'Arenas, pela carretera Poncebos, pocu antes del puente sobre'l Cares, encontramos el lletreru que mos indica la ruta. Allí mesmu entama un guapu camín, que paralelu a la carretera y al Cares, sube pa los invernales. Patiamos arrodiaos de mofu y felechos, pente una perguapa viesca de castañales, carbayos y dalguna faya que nun mos impiden contemplar les espectaculares vistes de la vaguada y la carretera que va  a Poncebos. Al fondu, si ta claru, vemos la zona de Cabrones y Torre Cerréu.
        Cuando'l camín dexa de ser pindiu, llégase a una encruciyada. A mandrecha ta'l antiguu y despobláu pueblu de Muniama, que merez la pena echa-y una güeyada. Posteriormente pue dase la vuelta pa ver los invernales de Vanu y de H.ornielles,
        Si nun estorba la borrina tenemos guapes vistes del Urriellu. Na baxada, dempués d'arrodiar per Vega Pandiella, dexamos que los nuesos güeyos gocien col valle de Cabrales y más al norte la xerra'l Cuera.
         Patiando per una pista y mirando pa Xuan Robre, llégase a Arenas a la vera'l Casañu, un poco más abaxo d'onde entamamos la caminada.
         Les semeyes son de mayu de 2012 y d'avientu de 2011.