Va prestame poner equí dalgunes de les munches semeyes que faigo nes mios caminates. Nun pretendo describir rutes nin dar conseyos sobre'l meyor camín pa faceles. N'Internet hai abondo d'eses informaciones y lo único que diba conseguir ye confundir.
De toes formes toi abiertu a responder a les entrugues que faiga daquién interesáu en dalgún de los mios paseos.
Fadré una introducción de caúna de les rutes.

viernes, 25 de noviembre de 2016

Per Bimenes: Los Molinos y Peñamayor

  
           Miércoles, 23 de marzu de 2016          La LLera - Los Cambones - Ponte La LLera - Molín de Barrial - Molín de Flora - Molín del Ferreru - Molín de Máxima - Molín de Milio o de Fermina - Molín d'Honorio - La Velía - La Envesná - Melendreros - Lladera xerrrina Oroxu - Un poquiyín de pista de Fayacava a La Campa - La Campa - Picu H.ueyu o Les Antenes - Picu Fueyu o Peñamayor - Xerru Gües - La Vaúga - Xerrros de la Vaúga - Pel PR AS 139 hasta esvíu a Santa Gadía - Santa Gadía - La LLera.

           “Cuándo camines pel monte en solitariu, preséntense munches decisiones y acciones que tienes que tomar. Baxo l'agua frío y una xubida empinada, onde nun llogres atopar onde abellugase, la mente y el to ser tienen que tar equilibraos y controlaos. Simplemente’l  nun tener con quien falar de la situación y el buscar soluciones ente otros compañeros, faite entender que tienes que decidir tú. Nun ye mui prestoso tar solu nestes condiciones, pero búscase definir el mio conceutu como caminante pel monte, tomar esperiencia que me dará madurez, seriedá y por consiguiente sabiduría no que se fai. Tuvi qu'asumir el tar ellí, a pesar de lo que pueda sentir. El "querer" nun ye bona opción, el siguir y meditar si lo sería"...
German Rojas

            Distancia: 17,28 km
             Finaliza nel puntu de salida (circular): Sí
             Subiendo: 1225 m
             Altitú max: 1143 m
             Baxando:   1225 m
             Altitú min:   240m


           Yera la cuarta vez que percorría la ruta Los Molinos de Bimenes.. La primera, pémeque foi en 2008, dexara’l coche en Rozaes y foi y vini pel mesmu camín. Prestóme porque ye guapo abondo pero lo curtio del camín, faese bien nun par d’hores, y l’escesu asfaltu hasta La Llera onde empieza la sienda dexóme daqué insatisfechu.

          Prometiérame volver pa facer una escursionina daqué más llarga entamando’l camín na Llera y xuntando la caminata col PR AS 142 que sal de Santa Gadía y que se conecta cola ruta Los Molinos.
          Nesta segunda ocasión tampoco quedé contentu. Sobre too porque’l día qu’escoyí nun foi el meyor por mor de la meteoroloxía.
          Pue vese Per Bimenes.
          Nuna tercera ocasión acompañé  a unes persones faciendo namás el percorríu de La Llera al últimu molin volviendo pel mesmu camín. (Poco más de cinco kilómetros)
          La conclusión foi que decidí facer otra excursión qu’incluyera un paséu per Peñamayor.
          D’ehí salió esta ruta que por cierto acorté sobre la marcha porque la mio intención yera subir también al Texíu y baxar per Campagüés pa continuar pel PR AS 139 hasta’l esvíu a Santa Gadía.
           Ye una prestosa escursión que trescurre casi en so totalidá pelos guapos conceyos de Bimenes y LLaviana. Mayoría pel primeru.
           Xúntase el guapu PR AS 141 "Ruta de Los Molinos" con un paseín pela guapa xerrina de Peñamayor.
           El camín nun tien nenguna dificultá. Cuando acaba el PR andamos 1,6 km pela carretera de Rozaes a Fayacava y unos metros per un prau poco dempués de Melendreros. (Anduvi unos cien metros buscando un camín qu'evitara pasar pel prau pero hai maleza abondo y di la vuelta). Entramos per un portelleru, cruciamos el prau de sur a norte pa salir del mesmu per una portiella a la vera'l camín que va pela falda la xerrina Oroxu y que nun dexamos hasta tener a la vista la pista que vien de Fayacava en direición a Les Praeres de Nava. Unos metros per ella y entamamos la subida al picu Les Antenes.
          Recorremos parte d'esti guapu monte y dempués dende La Vaúga per una pista (PR AS 139) hasta l'esvíu a Santa Gadía.
          Baxamos per un pindiu camín y dende esti pueblu 1,9 km de carreterina con mui pocu tráficu hasta La LLera, entamu y final de la escursión.
          Nesta ocasión nun hubo torgues qu'impidieren que pasaremos un bon día de monte.



La LLera

Mapa del percorríu


Aniciu de la ruta 

Caminamos per una guapa viesca



Molín de Barrial arregláu nun fai muncho


Prestosu entornu del molín de Barrial

En subida  y con daqué barru siguimos el camín


Pequeña esviación al molín del Ferreru. Namás que veremos restos de la canal d'agua y poco más.



Praúticamente desapaicíu


Cruciamos esti ponte. Agora caminaremos a mandrecha'l ríu.


Como en casi tolos castañeos abonden les castañales vieyes.


Cuerria o corra. (Zarru de piedres de forma circular, onde s’echen les castañes hasta que podrez l’oriciu)  

Siguimos subiendo. En dellos sitios con folla abondo.


El camín y la viesca siguen siendo perguapos.

Atopamos guapos tabayoninos.

Agora siguimos pa ver los dos últimos molinos. Dempués volveremos pa subir a Melendreros y Peñamayor.



Molín de Milio. El más restauráu. Tantu'l molín como l'entornu.



Una pindia esviación a manzorga pa subir al últimu molín.




Equí atopamos ún de los tabayones más guapos.




Tamos debaxo les cases de La Velía

Allá baxo dexamos la capiella La Velía. Pela carreterina pasamos per La Envesná y de siguío llegamos a Melendreros.

Pequeña y guapa área recreativa y plaques homenaxe a tres personaxes del llugar.



Unes cuantes semeyes de Melendreros que tantes veces retratamos dende Peñamayor.



Poco dempués de salir de Melendreros subimos per un camín a manzorga que pasa xunto al depósitu d'agua. Entramos a esti prau per una portiella y salimos per otra qu'hai a la parte riba pa siguir per una breda pela lladera sur de la xerrina Oroxu.

Yá vemos el colláu La Campa o Melendreros


Subiendo a Peñamayor. Dexamos abaxo'l colláu La Campa pel que tantes veces pasamos.

Les Praeres y La Varallonga.


Otra güeyada a La Campa

Al este,  Vízcares, Maoñu, La LLambria,...

Abaxo La Cota o Reondu, Les Praeres, La Varallonga, Casielles,...Pel valle del fondu  Cecea, Coya,...el Sueve...

Abaxón casi toa La Puentearriba: Grátila, Piloñeta, Basoréu, La Curtia, Cezosu, La Capitana, La Viña, Pandu, parte d'Ovín...Un pocu más allá Nava, Castañera y muncho más.

Tamos llegando al picu H.ueyu o Les Antenes.

Picu Fueyu o Peñamayor. Detrás el picu Texu o Texíu. Más allá,ente Los Caspios y Trigueru el guapu colláu y campera de Breza con una bona nevada.

Vemos Campagüés. N'esa direición vamos. Detrás Peña Mea.

Debaxo, el camín que va de Fayacava a Campagüés, Funeres y La Vaúga. Abaxón, a mandrecha, cases y cabañes de La Vaúga per onde pasaremos.

Una güeyada a Melendreros y al prau per onde pasamos pa llegar al camín de la lladera de la xerrina Oroxu.

Un pocu pa riba d'esti cruceru caminos salimos a la pista. Siguiremos con direición La Vaúga.

Tamos nel PR AS 139 que vien dende La Casilla a La Vaúga.

Imponente Peña Mea


Vamos pel PR AS-139

Una güeyada atrás pa despidimos de Peñamayor Sur.


A la derecha esti pindiu camín pel que baxamos a Santa Gadía.

Parte de, pa min, ún de los conceyos más guapos d'Asturies: Bimenes.


Otra vez Melendreros y la xerrina y picu Oroxu.

Oroxu, colláu La Campa, Les Antenes, Peñamayor,...

Dende equí vemos el camín del depósitu d'agua de Melendreros pel que llegamos al prau con una cabaña arriba. Per una portiella salimos al camín que va pela lladera de la la xerrina Oroxu

Santa Gadía


Con esta ferramienta tamién se pu facer deporte,...Doi fe...
           



Powered by Wikiloc

2 comentarios: