Va prestame poner equí dalgunes de les munches semeyes que faigo nes mios caminates. Nun pretendo describir rutes nin dar conseyos sobre'l meyor camín pa faceles. N'Internet hai abondo d'eses informaciones y lo único que diba conseguir ye confundir.
De toes formes toi abiertu a responder a les entrugues que faiga daquién interesáu en dalgún de los mios paseos.
Fadré una introducción de caúna de les rutes.

martes, 30 de abril de 2013

Xerra de Caranga: La Forcada

        Domingu, 21 d'abril de 2013       Villamexín - Collada Aciera - La Forcada - Colláu La Forcá - Vallina de La Forcá - Collada Aciera - Villamexín.

        "Depués de tener conocimientu falsu d'un monte ensin conocelu, yes a entendelu y descubrílu cuando xubes, llegues, sientes y baxes d'él".
Germán Rojas
   
        Tando'l día anterior patiando pel Camín Francés en dirección Forcaos Viel.los, decidí dir  al picu La Forcada en cuanto pudiera.
        La xerra Caranga paez que tien imán. Si se ve dende un altu exerce un atractivu visual, que tarde o temprano, llévamos a pisala. Y nun solo la xerra, tamién engancha'l valle que  forma col Aramu y el guapu pueblín de Villamexín.
        Como paicía qu'amanecía guapo, nun dexé qu'enfriara la idea y, hacia les diez de la mañana, entamé a caminar en Villamexín. El camín ye cómodu pero bien pindiu, va pente praos, castañales, ablanares y dalguna faya.
        Vamos dexando a mandrecha'l regatu Fayes. Pásase per Cerezales, Prau Nuevu y Varodríguez pa llegar al mayáu de Llindelafaya. Al paicer, esti conxuntu de cabañes ganaderes foi un antiguu poblamientu nel qu'había una lleprosería y nel que tovía queda una capiella.
        Dende que se sal de Villamexín siempre tenemos a la vista'l picu La Forcada y La Hoya. Cuando se va viendo la cara este del primeru llamen l'atención tres furacones que paecen cueves.
        De secute tamos na collada Aciera, un guapu mirador de los valles de Quirós y de montes como El Gurrión, peña Rueda, los Fontanes, Peña Ubiña,...
        La llástima ye que'l tiempu, un pocu emborrascáu, nun dexaba ver gran cosa.
        Dende esta prestosa campera a manzorga pue subise a la xerra de Tene. Pa dir a La Forcada hai una pista bien nueva qu'en dirección norte llévamos al pie del colláu que ta ente los dos picos. En cuenta de subir pela vallina, cola vista puesta na cuevona de más al sur, entamé a ascender hasta llegar a la  boca de la supuesta cueva.
        Dende equí, sin pasar pel colláu, llégase en pocu tiempu a la cume.
        Con bona visibilidá,  los nuesos güeyos puen gociar coles vistes de los dos valles: pel que subimos y el que se forma cola xerra Sobia. Al norte Proaza y el valle de Trubia; al noroeste, el monte pel que pasa'l Camín Francés, que patié'l día enantes. Al este l'Aramu y al sur los montes que víamos dende la collada Aciera.
        La vuelta fíxila muncho más cómoda. Baxé al colláu La Forcá y per una siendina con munches revueltes llegué a la pista disfrutando del día qu'entamaba a tar más claru.
        Cola borrina casi desapaicía completóse una guapa mañana de monte.


jueves, 25 de abril de 2013

Forcaos Viel.los, Loral, Cuevallagar

        Sábadu, 20 d'abril de 2013        Cantu la Cruz - Portiel.la El Guamón - Camín de Maraviu - Forcaos Viel.los - Loral - Cuellagar - Portiel.la El Guamón - Cantu la Cruz.

        "Pa min solo esiste una manera  más agradable de viaxar qu'a caballu: a pie. Aníciase la marcha cuando t'apetez; párase según to voluntá; esfórciase poco o muncho según se desee; obsérvase too..."
         Jean-Jacques Rousseau (Sieglu XVIII)

        El pasáu tres de marzu intenté facer esta guapa escursión, pero había nieve en cantidá y nun pudo ser. Namás que llegué a la portiel.la Guamón.
        Mes y mediu más tarde, con un tiempu bastante guapu, pudi completar esti  prestosu paséu.
        Siempre ye agradable caleyar pela pista de los praos de Rañón y La Muria, na mortera Candeales. Dexar que los nuesos güeyos disfutren  mirando pal Aramu, el Gurrión, peña Rueda, les Ubiñes...
        Dirixir la vista pa la xerra Caranga y imaxinar que salimos de Villamexín y subimos pente praos a la Collada Aciera pa ver los valles de Quirós y llueu engolamos na Forcada, Cuetu Mar o Coscorbal...
        Presta agüeyar a manzorga pa ver el pueblín de Sograndiu arrodiau de praos, viesques y montes.
        Dende la portiel.la Guamón empezamos a ver Forcaos Viel.los y enseguida dende una collada al pie del Pigurices pue vese Loral, la campera Cuellagar y el camín de Maraviu qu'hai que siguir un trechu pa entamar la primera subida.
        Llegar a la cume d'esti modestu picu nun tien dificultá. Ye de los que a mi me presten y nun tien comparanza col vecín Loral. Les vistes dende la cume son perguapes: l'Aramu, xerra Caranga, la Sobia, Les Ubiñes, Gradura, montes del sur de Teverga y Somiéu, los picos qu'arrodien a Marabiu, xerra Manteca, El Cornión,...
        Anque nun seya comparable a Forcaos Viel.los nin preste la subida, merez la pena acercase a l'arredondiada cume de Loral. Quiciabes aumente la visión a norte, nordeste y noroeste. Tamién hai una bona panorámica de la campa de Cuellagar.
        Dempués, ye guapo echa-y una güeyada a la llamativa y solitaria cabaña, antes d'acercase a la cuevona.
        A la vuelta, otra vez a gociar, de la mesma manera qu'al dir, del guapu paisaxe que tenemos a la vista.
        Paga la pena facer esta cenciella patiada.

martes, 16 de abril de 2013

Pel Camín de la Mesa: Braña La Corra, Peña Negra y El Michu.

          Martes, 22 de xunu de 2010           Puertu San L.lorenzo - Piedra Xueves - Xuegu La Bola - Braña La Corra - Pena Negra - Braña La Corra - Picu Michu y vuelta.

          "Montes, ¿por qué hai en vosotros tanta guapura?
           Lord Byron

         Cuando trato d'organizar el  mio caóticu archivu de semeyes, atopo dalguna patiada de la que me quedaren bonos recuerdos. Una d'elles ye esti guapu y fácil paséu per tierres teberganes y somedanes.
          Lo de fácil tenía que ponelo ente comines, porque acuérdome que la subida  a pena Negra resultóme un pocu engorriosa.
          A les guapes praderíes que vamos encontrando pel camín, hai que xuntar el regalu que ye pa los güeyos pasar dos veces pela braña La Corra. Ver dende pena Negra media Asturies colos valles de Teberga a los nuesos pies. Mirar pal sur y ver los Bígaros, les Ubiñes, los Albos, el valle de Saliencia,...Tamién algamamos a ver pal suroeste el Cornón y más cerca la foz de Arbel.lales y de la Güérgola. Tamién queden al alcance de la nuestra vista la braña de Murias (La de Arbel.lales, nun Murias L.longas de Val.le de L.lagu) y la de  Ordiales de Éndriga.
          Dempués de la fácil ascensión al Michu, presta sentase a mirar, otra vegada más, casi tolo que yá describimos.
          Pasu ente pasu volvemos pal altu San L.lorenzo disfrutando del camín.
          Esaminando les semeyes, entrúgome cómo pasaren tres años sin volver a patiar per estos llugares tan guapos. Ye de los sitios qu'hai que ver de xemes en cuando. Tendré que poné-y remediu.        

sábado, 13 de abril de 2013

Sariegu: Peles cercaníes del cielu

        Domingu, 7 d'abril de 2013        Vega - Canal - Villar - Altu La Fayuca - Pozu Los Llobos - Foyu Valloberu - La Campa - Foyu Valloberu - La Cuesta - Vega.

        "Inclusive nel monte más baxu percíbeste pencima de lo cotidianu"
           De Monterapia llibru

           Nací y pasé gran parte de mio vida nun pueblu con tres montes de referencia. Al norte La Llomba, al sur Peñamayor y lloñe al este, El Cornión.
           "Va nevar, ta escuro pa La Llomba"."Cuando llueve y fae sol canta la vieya en Peñamayor". "Yá ta blanco pel Cornión" Frases como estes o paicíes sintíles dende pequeñu. Esto fae qu'esos llugares tan familiares pa los güeyos y les oreyes sean atrayentes y sientas deséu de pisalos.
          Nun tardé en patiar per Peñamayor, tendría siete o ocho años cuando fui la primera vez. Nun ye raro, pola distancia qu'hai, que pasara munchu tiempu pa pisar el Cornión. Lo que nun tien perdón ye que, teniéndolo a tiru piedra, nun caminare pela Llomba hasta que tenía más de cincuenta años. Menos mal que toi compensándolo y agora fáigolo  tres o cuatro veces al añu. 
           Caminar per Sariegu presta y enseña. Los paneles informativos qu'hai en cada aldea o pueblu y qu'espliquen l'orixen de los nomes, son perdidáuticos y interesantes. Gustaríame que tuvieren n'asturianu o billingüe pero tengo la esperanza de que too s'andará...,naide ye perfeutu.
            Tamién ye llamativu l'indicador col nome de cada caleya o camín.
             La escursión ye fácil y guapa, sobre too si fae bon día. Pásase por Canal y Villar, dos pueblinos que merez la pena ver. Dende'l camin de Villar pal altu La Fayuca vemos la interesante ilesia de Narzana. Acongoxa ver como'l progresu ta acabando cola peña Careses. Col día claru, vemos tol cordal asturianu, dende'l Cornión  a los montes de Yernes y Tameza.
             Tol paséu tenemos a la vista Peñamayor y Peña Mea. Dende'l finxón de Les Lloses (conceyu de Villaviciosa), vese La Villa y el Sueve.
              Yo fixi'l recorríu casi circular baxando a La Cuesta y caminando un kilómetru escasu pela carretera de San Román - Vega.
              Ye una patiada que paga la pena facer. A min nunca me decepciona.
        
          
       

domingo, 7 de abril de 2013

Gorfolí, Friera, Bufarán,...Nun m'aclaro

        Domingu, 24 de marzu de 2013        Taborneda - Gorfolí o Friera o Bufarán

        "Cuando se quier saber una cosa lo meyor ye entrugala"
        George Duhamel

         Amaneció un día d'agua que me fixo cambiar los planes andariegos que tenía pa la mañana del primer domingu la primavera.
         Pasaben les hores y el guxán de monte crecía. Pa poder tar en casa a la hora xintar había qu'escoyer: Narancu, recursu habitual, o daqué curtio y cercano.
         Faría un mes tuviera nel ¿Gorfolí?. Naquella ocasión salí dende La Callezuela y fixi una caminata circular pasando pel tabayón  de Friera. Pero a les diez de la mañana yera tarde pa repitir aquella guapa escursión. Alcordéme entós de que fai unos años subiere dende'l pueblín de Taborneda y que'l recorríu yera curtiu. Sin duldalo, a les once, taba al llau de la capiella San Antón entamando la caminata.
          Nun foi pequeña la moyadura y les guapes vistes de los conceyos d'Illas, Castrillón, Avilés, Corvera o Llanera quedaron pa otru día. De toes formes, como casi siempre, prestóme'l paséu.

          Tando d'alcuerdu con George Duhamel, prestaríeme que si daquién llee esto, sabe dicime si toi  ciertu.
          La primera vez que fui al Gorfolí, salí de Barréu d'Abaxo (Arlós) y costóme subir a un picu enllenu cotolles. Una temporada más tarde daquién me dixo que'l Gorfolí tenía antenes en cantidá y dexóme cola dulda. Entós, ¿ónde tuviera yo?
          Dempués de buscar información, pémeque onde tuvi esti domingu ye'l Bufarán o Friera, techu d'Illas y el Gorfolí, picu más altu de Llanera, ye'l que fuera la primera vez dende Arlós. 

miércoles, 3 de abril de 2013

Turismu per Girona y sur de Francia

        15, 16, 17 y 19 de febreru de 2013         Más mirar y retratar que patiar 

        "Los prexuicios nacionalistes cúrense viaxando"
         Adautación d'una fras de Miguel de Unamuno

        Cuando se viaxa per dalgún llau, que nun se patia davezu, pue más la curiosidá que les aficiones.
        Polo menos a min pásame. Asina ye que dedicamos más tiempu a facer turismu qu'andar pelos munchos sitios guapos qu'invitaben a ello.
        Ye grande la atraición qu'exercen pueblos guapos de la Costa Brava como Portbou, Port de la Selva, Cadaqués, Roses, Empuriabrava,  Begur,...
        Nun tendría perdón tar pela zona y nun visitar el guapu pueblín francés de Collioure. Dicen que "En Francia nun hai cielu tan azul como'l de Collioure". La so costa, les fortificaciones, les playes, les cais pindies y estreches,...Y por supuestu, emociónase y estremecese nel so pequeñu cimenteriu, onde tán enterraos Antonio Machado y so madre Ana Ruiz.
         Tamién pal interior hai pueblos perguapos,como Banyoles, La Bisbal d'Empordá, Peratallada, cola so arquitectura medieval... O los pirenáicos como Camprodou o Setcases. Esti últimu, fae que mos alcordemos del nuesu Sotres o del vecín Tresviso.
          De toes formes tovía quedó tiempu pa facer un par de curties caminates. La primera pel parque natural Cap de Creus que bien merecería  tres o cuatro díes pa patialu dafechu.
          Na segunda arimámosmos a la estación d'esqui Vallter 2000 y pasiamos pel valle. Aquí podíen dedicase selmanes a caminar peles vaguades y subir a montes como'l picu Bastiments o del Xigante (2882 m), picu de la Dona, Gra de Fajol, y otros munchos de los, pa min desconocíos, Pirineos girundenses.
          De too un poco y prestoso a esgaya.