Va prestame poner equí dalgunes de les munches semeyes que faigo nes mios caminates. Nun pretendo describir rutes nin dar conseyos sobre'l meyor camín pa faceles. N'Internet hai abondo d'eses informaciones y lo único que diba conseguir ye confundir.
De toes formes toi abiertu a responder a les entrugues que faiga daquién interesáu en dalgún de los mios paseos.
Fadré una introducción de caúna de les rutes.

jueves, 31 de enero de 2013

Camín de Santu Tomás de Priandi

        Domingu, 27 de xineru de 2013           Priandi - Les Tercies - La Real - La Castañal - L'Artosa - Campanal - Traveséu - Capiella Santu Tomás - Priandi.

        Un exemplu de que nun fae falta dir lloñe o ascender a un picu pa relaxase y disfrutar de la naturaleza ye esta sienda naveta.
        Viesques, praos, regatos, matos, xubir, baxar, caleyes y caleyos. Too esto y más topamos nesti perguapu camín.
        Salimos de Priandi y namás cruciar el ríu Pra empezamos a patiar a mandrecha per una carreterina.
Vamos caminando ente praos hasta Les Tercies. Dempués a la vera un regatu pasamos pe La Pontona; siguimos de llargo dexando una esviación a manzorga que va a Llaméu. Enseguida llegamos a La Real y un poquiñín más allá, topamos una pista asfaltada que pente una guapa viesca llévamos a La Castañal. Esti guapu pueblín, pertenez al vecín conceyu de Bimenes.
         Dende esta aldea tenemos que salvar un bon desnivel pa llegar a l'Artosa. Hai que dir, en dirección este, buscando pasu ente l'abonda broza que dificulta'l camín. L'antiguu trazáu de la sienda tapóse con felechos, escayos, árgomes y arbolucos. Nun queda otru remediu que dir apartando artos y cotoyes, agachándose o arreblagando pencima de los tueros que tupen los senderucos que fixeren los animales domésticos y salvaxes que pueblen esta fastera pela que subimos a L'Artosa.
         Nun sé si será verdá'l dichu de "Si ye de l'Artosa, nube peligrosa". Lo cierto ye que dende estes camperes a la vera Peñamayor, nos díes escamplaos, pue vese Piloña, Nava, Sariegu, Bimenes, tola llanera Sieru hasta Uviéu ya intuir al norte la grandiosidá del Cantábricu.
        Baxando per una bona pista y dexando que los nuesos güeyos gocien col paisaxe cercanu de La Puente Arriba llegamos a Campanal y Traveséu. Pal primeru tenemos que isviamos a mandrecha y a la vuelta pasamos pel segundu. De xuru que presta face-yos una visita.
        Dende Traveséu, paga la pena  abandonar la carreterina pa dir a echa-y una güeyada a la capilla de Santu Tomás y a los vieyos carbayos que la vixilen.
        Yá tamos cerca  Priandi y sin necesidá de dar la vuelta baxamos a la pista que mos lleva a onde entamamos la patiada.
         A min, a lo último, tocóme moyame, pero en sin dulda, pasélo perbien.
        

viernes, 25 de enero de 2013

El Pierzu

        Sábadu, 8 de setiembre de 2012        Collada Llomena - Xerra Escueñu - Mayáu Cerboes - picu Pierzu.
        
        Toi convencíu, porque pásame a min, de que ye verdá lo que diz Maurice Herzog y que respuende a la mio entruga del principiu del blog: "¿Hai que llegar a la cume?". 
        Préstenme casi toes les caminates que faigo. Pero hai dalgunes que tienen como con un daqué especial. Nun sé lo que ye pero nun me cansen, disfruto más y repítoles de contino.
        Una d'elles ye la del picu Pierzu siguiendo siempre el mesmu camín. Si busco algo en común con otres siendes nes que patio frecuentemente ye que nun son mui llargues y que suelo facelo sábados o domingos.
        Dende siempre, los fines de selmana, préstame tar en casa a  la hora xintar y esto requier que'l camín nun sea demasiau llargu. En tou casu nun m'enllenen el güeyu toes lo mesmo.
       Les semeyes son de tres díes. Dos del 2012: marzu y setiembre y otra d'abril de 2010. (Dalgunes de marzu refléxen l'andanciu de quemes qu'hubo esi mes). Tienen en común cuatro coses que a lo meyor ye lo que m'atrae d'esta caminata: les vistes del Tiatordos, les llagunines d'Aranga, el mayáu Ceboes y les vistes del Cornión.
       Seya cual seya'l motivu, siempre me presta y tengo pensao siguir repitiendo mientres que puea.
       D'otra miente, en toles ocasiones tardo bastante más de tres hores, que ye lo que pon el panel del colláu Llomena y cada vez que repito paezme que'l picu ta un pocu más lloñe y emplego más tiempu. Pero eso pásame tamién con otres siendes y pémeque tengo claro por qué ye.
       ¡Qué se va facer! Los años nun pasen en baldre.

martes, 22 de enero de 2013

Niañu

        Sábadu, 10 de marzu de 2012           Aparcamientu hotel Los Avellanos - Raicedo - Pedrosu - Valle La Felguerina - colláu Niañu - Niañu.
        
        El conceyu Piloña ye un de los munchos llugares d'Asturies con abondos y guapos sitios pa patiar.
        Pa min ye un recursu del que echo mano con frecuencia cuando nun dispongo de munchu tiempu y quiero disfrutar del monte.
        El monte Cayón, les xerres de Grandesllanes y Ques, Sueve, Sellón, Tameces, Aves, Frecha, Priede, Pesquerín , Bedular,...o los valles que s'averen a elles dan pa una montonera siendes onde disfrutar de una de les mios mayores aficiones.
        Siempre atopo dalgún sitiu que nunca patié o que fai tiempu que nun lo fixi y apetezme volver.
        Esti día, col envís de volver a casa pal mediudía, decidíme pol Niañu. Esti monte ye una atalaya perguapa pa recrear los nuesos güeyos. El Sueve, los Picos, montes d'Amieva y Ponga, Peñamayor o les otres xerres piloñeses, puen vese dende esti picu.
        Nesta ocasión dexé'l coche delantre'l abandonáu hotel Los Ablanos, na carretera que xunta Espinaréu con Riofafar. Entamé la caminata per un camín asfaltáu que pon Raicedo, En suave subida pasamos el pueblu del indicador, dexamos una desviación a la derecha que va a Les Cuerries y pronto tamos nel Pedrosu. Nesti sitiu acábase'l asfaltu y siguimos per un camin a mandrecha que va paralelu al ríu La Felguerina. Una tablina que fae d'indicador diznos que tenemos que siguir pela izquierda. Pal otru llau diríamos al colláu Andolléu. Yá sin pérdida posible y pasando a la vera de guapes cabañes y teniendo a la vista otres, llegamos al colláu Niañu. Dende equí, nuna corta subida llegamos a la cume y... a gociala.

viernes, 18 de enero de 2013

Mota Cetín

        Sábadu y domingu, 9 y 10 de xunu de 2012        Collada Moandi - Cabezón y mayáu Fontecha - Biesca Cuadrazales - Collada Berroña - Mota Cetín.

        La Mota Cetín ye'l techu del conceyu Parres. L'entornu y les vistes son perguapes y paga la pena la curtia pero daqué complicada patiada pa llegar a la so cume.        
        Pa dicir verdá'l pocu llargor del camín ye'l que yo fixi. Si se quier pasar el día, hai siendes alternatives dende Llerandi o Sellañu.
        Ye un de los picos que diba dexando porque taba cerca, porque nun facía falta munchu tiempu, porque yera fácil,... y qu'esti añu pasáu propúnxime entamar a conocer.
        Toi satisfechu de les caminates del 2012 pero nun toes me resultaron cómodes y una d'elles foi esta.
        Taba fartucu ver la so silueta con forma de trapeciu ya identificábala sin equivocu dende los montes de Nava y Piloña.
         Les referencies que tenía nun me facíen pensar en que diba atopame con dalguna dificultá.  Empecé mal, porque'l dia qu'escoyí amaneció lluviosu enforma. Nun m'echó p'atras y tuvi na collada Berroña esperando una bocana pa entamar la subida. Cuando amainó un pocu, empecé a caminar y de mano dime cuenta qu'aquello nun yera tan fácil como pensara. De secute encontréme nuna terraza qu'acababa nuna paré que nun me dexaba siguir. Dempués d'estudiar un pocu la situación paicióme que lo más prudente yera baxar y dexalo pa otra vez.
         Dende la collada tuvi un trechu pensando cual sería'l meyor camín y decidí volver al otru día.
         Tuvi suerte porque, anque nun taba mui guapo, nun llovía. Acerté col camín que pensara'l sábadu y nun mui cómodamente pudi subir a la cume. Resultóme bastante enguarriosa la subida. Moyao como taba, ye resbariosa y a veces hai que usar les manes. La superficie cárstica de la cume tamién ye incómoda enforma.
         De toes formes lo que columbramos dende esti picu merez l'esfuerzu: El Sueve, el Cuera, Los Picos, los montes d'Amieva, Ponga, Piloña,...
          Cuando se describen montes como esti, nun me presta lleer en dalgunos llibros o blogs de prestixosos montañeros, términos como: baxa dificultá, cenciella subida, nun hai complicaciones, fácil ascensión,...cuando pienso que saben que nun ye del too cierto. Pémeque se fae un flacu favor.
          Afortunadamente hai abondes escepciones.

miércoles, 16 de enero de 2013

Pel Cordal de Nava

        Sábadu, 12 de xineru de 2013     Pozucorderu (Nava) - Casa'l Cordal - Picu l'Ará - Campabaxera - Les Cuadrielles (Lieres) - Solvay - El Solanu (El Remediu) - Picu L'Ará - Pozucorderu.

        El Cordal de Nava ye una ringlera oteros que de este a oeste recorre los llímites de Nava y Bimenes y dempués de Sieru y Bimenes.
        Faigo esti paséu de unos 16 ó 17 kilómetros varies veces al añu y, anque nun tenga una especial guapura, préstame.
        Nesti tiempu, hai partes con barru abondo que compliquen un pocu'l recorríu. La ivernada xúntase colos trabayos de repoblacíón forestal que tan faciendo. Esta torga paga la pena pensando que, los que dientro d'unos años, patien per estos cuetos hasta agora ermos, puedan dir a la sombra d'especies autóctones que trensformarán positivamente esta xerrina.
        El camín entama en Pozucorderu, d'onde sal una pista que pon: La Cebosa. Siempre en suave subida, patiamos per tierres de Nava hasta la casa'l Cordal. Dende equí, pasando pel Cantu Les Vigues, hasta'l picu l'Ará, la sienda fai llímite ente Nava y Bimenes. Esta modestísima cume ye ún de los munchos "Tres Conceyos" qu'hai n'Asturies. Xúntense equí Nava, Bimenes y Sieru, La pista empieza agora a separar los muncipios de Sieru y Bimenes hasta l'altu La Cruz.
        A manzorga fuimos viendo Peñamayor, La Cebosa, Priandi/Lloréu, Buruyosa, La Rubiera,... A mandrecha, lloñe, la xerra la Llomba y más cerquina, Villa, Vega, Robléu, la Peruyera, Quintana, Sierra, Villamartín, El Solanu,...
        Na midida que mos acercamos al oeste empezamos a ver Peña Mea, El Retriñón y gran parte de los montes del sur d'Asturies hasta Les Ubiñes. Pal norte columbramos la Llomba col Fariu, la peña Careses y tola llanera de Sieru hasta Uviéu.
        Llégase a un área recreativa que pon La Cruz. Pémeque'l nome debía ser Campabaxera como se llama'l túmulu megalíticu que'hai na parte cimera del área.
        Vinimos hasta agora pel GR-105 y unos doscientos metros más abaxo abandonámoslu pa siguir pel PR-277  que mos dexa en Les Cuadrielles (Lieres). Equí volvemos a cambiar de dirección pa pasar pela esplanada de les abandonaes mines de Solvay. (Esti sitiu tien pa min un significáu especial y réspígome cada vez que lu piso; sicasí, siempre m'apetez volver).
         Siguimos pal este subiendo per una pista de formigón que mos lleva a El Solanu otra vez n'El Remediu (Nava). Per un guapu camín bien pindiu volvemos a la vera'l picu l'Ará y desandamos la sienda hasta Pozucorderu, recreando los güeyos otra vegada más con Peñamayor y los pueblinos de Traveséu, Campanal, Grátila, Basoréu, Cezosu, Piloñeta,...A lo lloñe El Sueve, El Cuera, Los Picos...
        Pónme de mal humor, siempre que camino pequí, mirar pal Remediu y velu cruzáu en toles direcciones peles llinies d'alta tensión. ¿Fairíen daqué malo los vecinos/es d'esti pueblu pa recibir esti castigu?
        Asina y too, como dixi al principiu, prestóme la patiada.
        (Les semeyes del track de Wikiloc son d'otra escursión).      
       
  

jueves, 10 de enero de 2013

Paséu per un requexu de Somiéu

        Martes, 31 de xunetu de 2012         La Farrapona - L.lagos de Saliencia - Vega de Camayor - L.lagu de Val.le.

        Hai dalgunos sitios que paez que creen adicción. Ún d'ellos ye'l conceyu Somiéu. Tien paraxes tan guapos y tan variaos que, al menos pa min, resúltame difícil pasar munchu tiempu sin pisalos.
        El paséu d'esti día, por muncho que lu repita, nun me cansa nin m'aburre. Dende'l altu La Farrapona a L.lagu de Val.le pasando pela Vega Camayor ye un recréu pa los güeyos que nun tien preciu.
        Entámase baxando al l.lagu Cueva. Dempués súbese pa ver el de Cerveriz y Calabazosa o L.lanegru. Cruciamos les praeres de Cerveriz, Freisnéu y Camayor, que n'esta época tan poblaes de vaques. Nun ye raro que ten acompañaes de dalgún qu'otru corciu que cuerre a escondese cola nuesa presencia. Tamién ye fácil ver a la vera los Albos  robecos paciendo reposadamente.
        Dempués del prestosu paséu, nun tien preciu'l gociu que produz asomase a contemplar el territoriu que va dende Val.le de L.lagu  a L.lagu de Val.le. Esti aparente traballingües forma un paraxe de lo más guapo qu'atopamos n'Asturies. Nun día bonu, clísense los güeyos delantre tanta guapura.
        Una patiada fácil y recomendable pa tol mundu.

lunes, 7 de enero de 2013

La Siella y Barzanalgas (Peña Sobia)

        Sábadu, 5 de xineru de 2013         Carrea - Llaguna Sobia - La Siella - Vega d'Adientro -Picu Barzanalgas - Vega'l Medio - Vega d'Afuera - Llaguna Sobia - Carrea.

        L'últimu branu tuviera na Siella pero nun en Barzanalgas. Quedéme coles ganes porque fíxoseme tarde y tenía'l tiempu mui xustu.
        Una vegada más, subí per onde los vieyos, dende'l cementeriu de Carrea. La opción de la canal dende Sobrevilla yá nun ye pa los mios años. Dende la llaguna Sobia, cumeando, llegué a La Siella.
        El día yera guapu abondo y entretúvime un bon tiempu disfrutando del paisaxe y pensando cual de los picos que tenía en frente, mirando pal este, seria Barzanalgas. Nun preparare muncho'l paséu porque paicíame tener claro que picu yera. Tenía duldes y taba dispuestu a dir al que ta más al norte, final de la xerra. Si nun fuera esi, caminaría pela cresta hasta llegar a la que ta nel mediu. Nesti tiempu llegaron tres escursionistes.
        Falamos un trechu y comenté-yos les mios indecisiones. La so intención yera la mesma que la mía. Pero tamién coincidimos na inorancia. La conclusión foi que yo fixi lo que yá tenía decidío y ellos elixeron, la que pa min, yera la segunda opción.
        Baxamos xuntos hasta la Vega d'Adientro y dende ellí caún tiró pal so llau.
        El mio instintu montañeru del que, a lo meyor pola vieyera, presumo munches veces, fallóme. (¿Cuántes veces dirán?).
        De toes formes esta vez tuvo compensación porque, a cambiu de caminar un poquiñín más, tuvi la ocasión de semiasomame al estremu norte de la xerra que, como n'otros munchos sitios de los nuesos montes, amedrana.
        Dempués d'esta guapa esperiencia, cumeando, llegué a Barzanalgas. Por ciertu, ellí pon Peña Sobia. Nun tuvi ocasión de entrugalo, pero prestaríame saber cual ye'l que usen davezu los llugareños. Ye un sitiu prestosu pa contemplar les tierres quirosanes.
        Baxé a la Vega'l Mediu y, Vega d'Afuera p'alantre, gociando de les vistes, volví a la llaguna Sobia y peles pindies revueltes, (dalgunos dicen envueltes), baxé a Carrea.
        Un perguapu día de monte.

sábado, 5 de enero de 2013

Un paseín per Peñamayor

        Miércoles, 2 de xineru de 2013         Les Praeres - Ortigosa - Espines - El Covayu - Peñamayor - Les Praeres

        Dempués d'unos díes per  Extremadura tenía gana de patiar un pocu pela nuesa tierrina.
        Y, pa min, qué meyor sitiu que Peñamayor . Amás si nun m'enquivoco yá facía más d'un mes que nun pisaba'l mio monte.
         Fue una caminata pequeña pero prestosa anque'l día con borrina y orpín nun ayudaba.
         Dexé'l coche onde siempre, unos trescientos metros antes de Les Praeres. Nun tenía munchu tiempu y por eso elexí esti paseín. A pesar del borrín podíen vese les cabañes de Llames Llagar que siempre me presta. De siguío pel camín d'Anés, pasando per Ortigosa y Espines, llegué al Covayu. Dende ellí xubí al sierru que mira pal Caneyu y la pista que baxa pa la Marea. Dempués de facer unes semeyes crucié'l mayáu y dirixíme a La Peña.
         Onde la botella sidra siempre toi un bon cachu, anque como güei, nun se vea casi nada. D'equí en dirección norte (les antenes) baxé a Llames Llagar y dempués a Les Praeres.
         Como casi siempre prestóme la patiada y quité'l "monu" de Peñamayor pa unos cuantos díes.

martes, 1 de enero de 2013

Patiando per Extremadura 3

                Martes, 25 d'avientu de 2012        Cornalvo: Pel cerru'l Gatu y xerra Bermeya

        Dende Mèrida pela autopista a A-66, dirección Cáceres, a unos 15 kilómetros, ta'l pueblu de Aljucén. Ye la salida 606 y sin entrar na población, pela  N 630, llégase a una gasolinera que a esti llau de la carretera ta abandonada.Ye un sitiu afayadizu pa dexar el coche.
        Dende ehí mesmu empecé a caminar. A la mandrecha el ríu que lleva'l nome'l pueblu y a manzorga la devesa enllena oveyes y dalgún qu'otru caballu.
        Un km y mediu más p'alantre hai un cruceru y la escavación de les ruines d'ún antiguu puente romanu. Paga la pena echái una güeyada.
        Dende equí y en suave xubida siguí l'antiguu Camín de la Plata y güei tamién Camín de Santiago. Nun tien pérdiga porque en toles posibles desviaciones pon "Prohibíu'l pasu".
        Con una bona moyaura, empezó a llover cuando entamé la patiada, foi pasando ente rebaños d'oveyes, de vaques cola so reciella y dempués de gochos. A derecha ya izquierda encines y carbayos corcheros pero tamién madrueños, beruzos y otros arbustos. Llama l'atención el mofu blancuxu que crez nel tueru de dalgunos.
        Di la vuelta pel mesmu camín. L'aire y l'agua facíen un poco incómoda la marcha pero con too prestóme. Nun ta mal eso de cambiar de paisaxes de xemes en cuando.