Va prestame poner equí dalgunes de les munches semeyes que faigo nes mios caminates. Nun pretendo describir rutes nin dar conseyos sobre'l meyor camín pa faceles. N'Internet hai abondo d'eses informaciones y lo único que diba conseguir ye confundir.
De toes formes toi abiertu a responder a les entrugues que faiga daquién interesáu en dalgún de los mios paseos.
Fadré una introducción de caúna de les rutes.

viernes, 26 de julio de 2013

Caminadina per Peñamayor

          Vienres, 28 de xunu de 2013          Les Praeres - Llames Llagar - Les Antenes - Peñamayor - Ortigal - Colláu'l Covayu - Espines - Ortigosa - Les Praeres.


          “Los montes agasayáranmos con la so guapura, y nosotros quixímoslos cola inxenuidá propia d’un neñu y reverenciámoslos cola veneración qu’un monxu siente polo divino.”  Maurice Herzog


          Foi un paseín pequeñu pero prestosu a esgaya. Dexé'l coche, como siempre, antes del chigre Les Praeres. Yá fai unos años que lu aparco nuna esplanadina qu'hai al llau d'una cabaña un pocu más abaxu. Antaño dexáralu en Pra pero yeren otros tiempos. Los años nun pasen de baldre.
          Crucié'l mayáu con direición sur dexando a manzorga La Cota o Picu Reondu. Entamé a subir y nel primer cruce dirixíme a la derecha pa onde se ven les remocicaes cabañes de Llames Llagar. A llau de la segunda que s'atopa a la vera'l camín, salíme de la pista p'agarrar les antigues marques d'un senderu que fixeren les mules cuando subíen el material pa la caseta les antenes. Pasu ente pasu y parándome bien d'ello pa echar el güeyu p'atrás y ver el llamativu paisaxe que va surdiendo: l'Oroxu, Llames Llagar, Les Praeres, La Varallonga, La Múa, tola Puente Arriba, la Llomba, El Sueve, Sieru, Sariegu, Nava, Cabranes,...D'esti mou llegué al picu H.ueyu, que per Nava tol mundu llama Les Antenes.
          Aquí la parada tien que ser un pocu más llarga porque al panorama que víamos na subida hai qu'añader l'espectáculu que se mos presenta pal oeste, el sur y l'este: la mitá'l conceyu Bimenes, Sieru, Noreña, Llanera, Uviéu,..., la peña l'Home, la Bauga, Campagués, Peña Mea, les Ubiñes, l'Aramu, los montes de Llaviana, Sobrescobiu, Aller, Casu, Piloña, Ponga,  Amieva, los Picos,...Lo mesmo que vamos ver cinco minutos más tarde cuando llegamos a Peñamayor col so guapu buzón de cumes, una reproducción n'aceru d'una botella sidra.
          Dempués d'otra llarga  parada echamos a andar camín del Ortigal col Texu de frente. A esti picu yá nun llegué. Poco antes d'entamar la subida, per un senderu a manzorga, baxé al colláu'l Covayu dende onde se ven les guapes praderes d'Anés y Breza col Trigueru como vixilante.Dende equí per una pista y pasando per Espines y Ortigosa volví a les Praeres p'acabar esta curtia pero prestosa escursión.

sábado, 20 de julio de 2013

Circuitu peles Xanes, puertos d'Andrúas, Pandu la Mortera, xerra Serandi, Villamexil, Proaza y sienda l'Osu

          Miércoles, 26 de xunu de 2013               Les Xanes - La Rebollada - Colláu de la Canal Seca - Braña Bruxana - Puertos d'Andrúas - Pandu La Mortera - Puertos d'Andrúas - Picu Cutiay -  Colláu de la Canal Seca - Xerra Serandi - Pr As235 - Villamexín - Proaza - Sienda l'Osu - Villanueva - Aparcamientu de Les Xanes.

          "Los despistaos nun esisten. Esisten los despistes, y hai persones que los cometen con  más frecuencia qu'otres, pero nadie naz despistáu" Anonimu


          Pémeque los años nun corrixen lo que siempre fixi mal. El mio sentiu de la orientación nunca tuvo mui desarrolláu y a estes altures yá nun tien arreglu al menos por medios naturales.
          La mio intención yera facer una escursión llarga per unos llugares perguapos pero nunca llegar a esos 36 km que foi lo que resultó al final.
           Fixi como pensare más de la mitá del recorríu. El despiste vieno na última parte de la escursión.
           Salí del aparcamientu de Les Xanes y subí pel camín que se fae davezu hasta onde s'atopa un senderu que con bon desnivel va  a la Rebollá. Dende esti guapu pueblu empezaron a torcese les coses porque'l día que paicía que diba ser buenu nun acababa de despexar. Con cierta dificultá d'orientación, pela Canal Seca y el colláu del mesmu nome, llegué a la braña Bruxana que ye inconfundible pola so cabaña con teyáu de tapinos. Con dellos problemes p'alcontrar el GR 106, porque la borrina yera espesa abondo, pente agua y barru a esgaya y dempués de pasar pelos puertos d'Andrúas y la espetacular viesquina de carrascos, aporté al Pandu la Mortera. Nestes guapes praderíes los mios sentíos pudieron disfrutar porque la nublina paicía qu'entamaba a quitase.
          Dempués de unes cuantes vueltes alredor del sitiu onde unos díes antes paicíame que dexare unos antioyos entamé'l regresu con bastante meyor tiempu. Yá otra vuelta  na braña Bruxana subí al modestu picu Cutiay pa gociar col guapu panorama. La mio intención yera baxar per Serandi y la foz de Picarós* a la sienda'l Osu. Con esi determín baxé al colláu de la canal Seca y dempués de patiar un pocu pela xerra Serandi despistéme y vime metíu pente escayos y cotoyes nun caminín coles marques del Pr AS 235. Con abonda dificultá porque l'agua, el barru, la maleza y los argayos nun lo poníen fácil, caminé en direición sur hasta qu'atopé un terrenu mitá camín empedráu y mitá ríu. Agora yá con sentíu oeste y una baxada que lo resbalioso de les llábanes moyaes fixo enrevesada llegué a San Martín.
          P'acabar de facelo llargo, pela carretera fui a Villamexín. D'equí baxé a Proaza y pela sienda l'Osu aporté al aparcamientu del molín de les Xanes dempués de los 36 kilómetros de los que falaba al principiu.
          Una patiada dalgo más llarga y complicada que les habituales.

sábado, 13 de julio de 2013

L'Airúa Naval. Rebollu y texu de Bermiegu.

          Sábadu, 22 de xunu y miércoles, 10 de xunetu de 2013          Bermiegu - Capiella La Mercé - Pandu la Mortera - L'Airúa Naval - Pandu la Mortera - Bermiegu(rebollu) - Texu y Ilesia de Sta María - Bermiegu 
      
          "La mio memoria ye escelente pa olvidar"   Robert L. Stevenson

         Pa la mayoría la xente será raro facer la mesma escursión con tan escasu marxen de tiempu. Pa min ye  lo normal porque yá casi nun pueo alcordame les veces que lo fixi. El casu ye que la mio cabeza, bien porque tien munchos años o bien porque nunca dio pa muncho, fae que m'olvide o pierda les coses munchísimes vegaes.
          De xuru que los montes d'Asturies deben tar enllenos de parasoles, tapes d'oxetivos, navayes, guantes, pañuelos, monederos y dende'l 22 de xunu de gafes. A la gueta d'elles fixi'l paséu del segundu día. Previamente fixere otra caminata al Pandu la Mortera dende Villanueva col mesmu resultáu qu'esta última. Eso sí, paselo bien toles veces.
          Más que'l valor de les coses que pierdo lo que me fae volver son los bonos resultaos que tuvi en dalgunes ocasiones y el refuerzu a la mio autoestima. Nesta oportunidá  prodúxome un baxón considerable.
          Too empezó fae unos doce años cuando cerca del llagu Ubales escaeciéronseme unes antiparres y volví a buscales quince díes más tarde dempués d'una bona nevada y taben nel sitiu esperáu. Otra vegada volví a Peñamayor pa recoyer un reló nel llugar que pensaba. N'otra ocasión volví por una gorra que dexare nel vértiz xeodésicu del Trigueru. L'añu pasáu fui dos díes siguíos al Vízcares. El segundu a buscar un pequeñu Geco y tamién lu atopé nel llugar previstu. Esta vez los antioyos quedaren pa que les vaques, caballeríes o cualquier bichu con presbicia puea ver la yerba con más claridá.
          Nun conocía l'Airúa y al mio mou de ver ye un monte que nun tien el prestixu montañeru que se merez. Ye el puntu más altu de la pequeña xerra de Tene. L'amplia cume ye un estraordinariu miradoriu pa los cuatro puntos cardinales: La Mostayal, xerra l'Aramu cola Gamonal, Moncuevu, Xistras y Gamoniteiru;  Peña Rueda y les Ubiñes; les xerres de Sobia, Gradura y casi p'algamar coles manes la xerra Caranga. Debaxo'l embalse de Valdemuriu a la solombra'l Gurrión; pueblinos quirosanos y la villa Proaza; la xerra de Serandi, les guapes praderíes de Bousaña y los puertos d'Andrúas, Pedroveya, Dosango, Uviéu,...
          Salimos de Bermiegu siguiendo les señales del Gr.106 con dirección Pedroveya. Travesamos les estreches caleyes que pente cases, cuadres y horros faenmos pasar al llau del afamáu rebollu. Per una carreterina asfaltada y pindia a esgaya llegamos al barriu d'Arriba onde lo único desagradable que s'atopa son dos perros que nun dexen de lladrar a la vera les pates y que faen que respires con alliviu cuando dexes atrás le últimes cases.
          D'equí pa riba altérnense cachos de formigón y de tierra.Vamos siempre a la solombra occidental del Aramu y casi de frente vemos la xerra de Tene col Airúa al fondu. Paga la pena desviase per un caminín estrechu y casi tapáu por escayos y maleza. Dalgún argayu de recién tamién añade dificultá al pasu. Pali que pali llégase a la capiella la Mercé, qu'ún inorante de la historia de la zona, entrúgase que fae ellí. De siguío aportamos enseguidina al camín principal qu'abandonáramos más abaxo y llegamos al guapu mayáu de Llinares.( La primera vez baxé pela capiella pero l'empedráu moyáu y lo pindiu que ye'l camín paezme qu'aconseyen subir, como fixi'l segundu día).
          Col camín casi llanu llegamos al Pandu La Mortera, una amplia pradería a los pies del Aramu y la xerra de Tene.
          Tenemos de frente'l picu que al principiu presenta una parede que paez dif'ícil de superar. Por embargu si perdemos unos metros d'altura en dirección oeste encontramos un caminín que mos lleva a una portiellina y pente revueltes, a lo primero mui pindies, y dempués más llixeres llegamos al prestosu miradoriu que ye la xerra de Tene. La vuelta fíxila pel mesmu sitiu cola variante la capiella.
          Dempués de pasar el mal tragu de los perros y echar otra güeyada al rebollu xiramos a la so derecha pa patiar un kilómetru escasu pa ver el texu milenariu. Volvemos pel mesmu camín al guapu pueblu de Bermiegu nel que acabamos esti guapu percorríu.