Va prestame poner equí dalgunes de les munches semeyes que faigo nes mios caminates. Nun pretendo describir rutes nin dar conseyos sobre'l meyor camín pa faceles. N'Internet hai abondo d'eses informaciones y lo único que diba conseguir ye confundir.
De toes formes toi abiertu a responder a les entrugues que faiga daquién interesáu en dalgún de los mios paseos.
Fadré una introducción de caúna de les rutes.

miércoles, 27 de julio de 2016

Camín vieyu de Banduxu y picu L'Oubiu

          Domingu, 7 de febreru de 2016          Carretera A-228 P:K. 21 - Foz de Valmoru - Banduxu Barriu La Molina - Barriu`l Palaciu (Torrexón, ilesia, casona,...) - Barriu'l Toral - Folgueras - Praos d'Eiros - Mayáu Beloseiros - Fontespina - Xerra La Piedra - Picu L'Oubiu - Baxar per cara sur pa tomar el camín a Bustiel.lu - Bustiel.lu - Carreterina a sienda l'Osu - En Las Ventas, sin entrar nel pueblu esviase a la izquierda pela sienda l'Osu - P. K. 21 de AS-228. 

           ¿Nun nos ufierten los montes nun espaciu pequeñu un resume de toles guapures de la Tierra? Los climes y les zones de vexetación escalónense nes sos pendientes: nelles pué abrazase nuna sola mirada los cultivos, los montes, les praderíes, los xelos, les nieves, y cada tarde la lluz agonizante del sol da a les cimes un aspeutu maraviyosu de tresparencia. Nos nuesos díes yá nun s'adora a los montes, pero polo menos aquellos que los conocen quiérenlos con un amor fondu. Élisée Reclus
       
          Distancia: 19,05 km
          Finaliza nel puntu de partida (circular): Sí
          Desnivel acumuláu subiendo: 1129 m
          Altitú máxima: 1374 m
          Desnivel acumuláu baxando: 1129 m
          Altitú mínima: 279 m

          Merecería la pena facer esti paséu anque solo fuera por gociar de los tres  kilómetros de la Foz de Valmoru, vieyu camín de Banduxu y alhaxa natural y paisaxística.
           N'ocasiones apaez talláu na piedra, otres empedráu y en casi tol percorríu acompáñamos el ruiu del regueru con tabayoninos que refresquen l’entornu. Una guapa y espesa viesca autóctona da solombra a tol trayectu.
          En cruciando cuatro pontes, el postreru d'ellos al pie de un guapu saltu d'agua, llegamos a Banduxu al traviés del barriu La Molina.
           Lo mesmo que diximos del camín ye aplicable a esti pueblu. Percorrelu, xubiendo adulces poles sos cais hasta'l barriu’l Palaciu ye un privilexu del que gociamos a esgaya.
          Foiu declaráu Bien d'Interés Cultural en 2009 so la figura de Conxuntu Históricu.  Nun se ve davezu una aldega asturiana con  arquitectura popular que caltenga a lo llargo de los sieglos la so fisonomía ensin grandes alteraciones.
           Ente los sos elementos más destacaos tán la torre circular de Banduxu, de la dómina baxomedieval y de les meyor conservaes d'Asturies; al llau una casona con otra torre cuadrada (la de Tuñón), na que tuvo la cárcel y la casa’l conceyu; y pa completar el conxuntu la ilesia parroquial de Santa María, la más antigua Proaza, pos apaez yá documentada dende’l sieglu X, calteniendo de la so fábrica románica l'ábside semicircular.
           Dempués d’esfrutar d'esti conxuntu, siguimos al centru del pueblu y, dexando a la nuesa derecha'l llavaderu, subimos al barriu del Toral. Detrás de la última casa, nuna bifurcación, tómase'l camín de la esquierda, con restu d'empedráu, que nos introduz nel valle pela zona de Folgueras.
          Vamos per un camín que debió ser importante porque presenta un espectacular y bien calteníu adoquináu.
          Siguimos el camín que sube a la derecha hasta llegar a la cabana d’Eiros. Cruciamos dos portielles y continuamos per un tramu un pocu más zarráu de vexetación hasta llegar a dos cabañes, les de Beloseiros.
          Continuamos pela derecha pa dempués de pasar pela xerra La Piedra subir a l'Obiu. Baxaremos pela cara sur pa tomar el camín a Bustiel.lu y pela sienda l'Osu acabar esta guapa escursión.

          El percorríu entama nel p.k. 21 de la carretera Teberga casi enfrente a una parada d’autobús que llama daqué l’atención porque cerca nun hai nengún núcleu de población. Per una ponte, ensin barandielles pero bastante anchu pa pasar sin mieu, aportamos a la Sienda l’Osu. Caminamos unos metros a mandrecha y atopamos una señal que pon Bandujo Pueblo Medieval.
          Aparqué’l coche unos trescientos metros más alantre del aniciu’l camín. Esto fexo que tuviera que desandalos y ente dir y venir amesta-y unos 600 metros a la caminata. Casi enfrente la parada’l autobús hai sitiu pa dexar cuatro o cinco coches.
          Col picu L'Oubiu a la vista dexé'l camín pa tratar de atayar. Pémeque nun foi la meyor decisión. Con bastante dificultá travesé unos cuantos metros de beriza alta que sumando-y la nieve y l'agua nun me resultó mui agradable.
          Si repitiese'l paséu siguiría pel camín que traía unos cientos de metros más. Dempués per otru camín a mandrecha llégase al mesmu llugar per onde fixi l’ascensu. L'arrodiu ye pequeñu.

Powered by Wikiloc

sábado, 9 de julio de 2016

Patiando pel conceyu coyán: PR AS-63: Picu Cuyargayos

                    Domingu, 31 de xineru de 2016          Llaiñes / Ladines - Caminos del Cándanu - Mayáu Faidiellu - Campera Les Collaínes (Siguiendo hasta l'altu pa ver el pantanu de Tanes del vecín conceyu de Casu) - Fayéu - Pradera d'Imblenes - Xerru Piqueru - Pradera d'Imblenes - Colláu Imblenes - Picu Cuyargayos - Colláu Mezquita - Mayáu Farriondas - Mayáu Feleches - El Revesaoriu - Ríu y foz del Nozalín - Agues - Llaíñes / Ladines.

          "Siempre va haber un nuevu cume mirándome sele y
engatusador, apenes
dibuxáu sobre l'horizonte.
Un nuevu cume, un nuevu retu. 
Entós buscaré nel mio amor pol monte les 
fuercies, les ganes y el deséu."
Alex Acroy

          Distancia: 15,39 km
           Finaliza nel puntu de partida (circular): Sí
           Desnivel acumuláu subiendo: 1008 m
           Altitú máxima: 1389 m
           Desnivel acumuláu baxando: 1008 m
             Altitú mínima: 470 m

          Entamamos a caminar en LLaiñes per una pista de formigón y dempués de tierra. A poca distancia atopamos una encruciyada, los Caminos del Cándanu.                
          Dempués de una pequeña parada p'almirar el pantanu Rusecu y los pueblinos de los alredores seguimos pel camín de mandrecha que mos lleva al mayáu Faidiellu.
           Pasáu esti apriscu seguimos a la izquierda pa llegar a la campera Les Collaínes.
          Anque nun ye necesariu pémeque paga la pena siguir hasta l'altu pa ver el pantanu de Tanes nel conceyu vecín de Casu. Nesta ocasión nun paramos muncho porque taben cazando y eso siempre me pon un pocu alteriáu y dame daqué llercia.
          Siguimos per un senderu a mandrecha pa dir subiendo per un guapu fayéu que desemboca na Pradera d'Imblenes. Ensiguida alcontraremos un lletreru que pon “Vista pintoresca”. Esviándomos unos metros a la derecha subimos al cresteríu del Xerru Piqueru dende'l que los nuesos güeyos puen gociar de bones vistes del valle del altu Nalón.
          Volvemos a la sienda pela que veníamos hasta llegar al colláu Imblemes. Equí cambiamos de direición siguiendo más o menos al norte per un senderu bastante marcáu. Podemos siguir faldiandola la xerra Bermeya, onde casi al final ta’l Cuyargayos, hasta’l colláu Mezquita. Dempués, a mandrecha, per un marcáu camín subimos al picu.
           Yo preferí coyer un atayu qu’en diagonal y pindia subida llevóme a la base. Quiciabes pola mio edá o condición física tuvi qu'usar dalgo les manes pa llegar a la cume.
           De toes formes mereció la pena l’esfuerciu porque les vistes dende la cume son impresionantes: picos Torres, Retriñón, Peña Mea, Cogollu, Valnalón, Trigueru, Peñamayor, Xamoca, La Senda, Requexón de Valdunes, La Llambria, Campigüeños Tiatordos, Maciedome,…; pueblinos como Soto, Agues, LLaíñes, Villamoréi, Rusecu,…; l’embalse…
          Baxando a la vera'l ríu Nozalín imaxinábame lo guapo que sería antaño antes d'iguar el camín. El progresu nun suel aguapiar los paisaxes.
          Anque hai dalgo barru y tenemos que pasar un regatu sin ponte qu'hai cerca Llaiñes, prestóme d'abondo'l trayeutu que sube dende Agues y que crucia un perguapu castañéu
          Una prestosa excursión.

Powered by Wikiloc

jueves, 9 de junio de 2016

Nel entornu Peñamayor: Piquinos Oroxu y Cuervos.

          Domingu, 29 de payares  y domingu, 6 d'avientu de 2015               La Era (Piloñeta) - La H.uente (Piloñeta) - Molín de Pra - P.R.AS-198. "Ruta de la Ribera del ríu  Peña" - Les Mesties - La Cipresta - La Cabañina - Ponte'l Bayu - Camín a Grátila - Esvíu izquierda a Pista Grátila/Campanal - Ponte La Cardosa - Camin/senderu per viesca Les Milanes (castañéu y robléu) a Traveséu - Traveséu - Capiella Santu Tomás -Enllace col camín que vien de La Pontona - LLaméu - Casa La LLinariega (L'Artosa) - Xerrina Oroxu - Picu Oroxu - Colláu La Campa, Oroxu o Melendreros - Mayáu LLames LLagar - Les Praeres - Picu Cuervos - Pista Les Praeres/Pra - Molín de Pra - La H.uente (Piloñeta) - La Era (Piloñeta).

          Hai delles coses bones que dicir alrodiu de caminar..., por exemplu, requier más tiempu que cualquier otra forma de locomoción esceuto reptar. En consecuencia, dilata'l tiempu y allarga la vida, que yá ye de por sí demasiáu curtia pa desperdiciala cola velocidá... Caminar fai que'l mundu sía muncho más grande y, por ello, más interesante. Ún tien tiempu pa observar los detalles. Edward Paul Abbey


          Distancia: 19,6 km
          Finaliza nel puntu de partida (circular): Sí
          Desnivel acumuláu subiendo: 1020 m
          Altitú máxima: 936 m
          Desnivel acumuláu baxando: 1020 m
          Altitú mínima: 126 m

           Siendo consciente que les descripciones que pueo facer de los percorríos  podíen llegar a confundir más qu’ayudar desistí dende la primera entrada d'esti pocu pretenciosu blog d'elles. ¡Tantes veces lo pasara mal por confiar nos cortapega de dalgunos blogs!
          Por suerte agora hai bastantes blogueros que describen con maestría les sos escursiones. ¡Norabona a toos ellos! Los aficionaos al monte sabemos quien son y tamos peragradecíos de lo que mos cuenten, enseñen y aconseyen.
          Al mesmu tiempu siempre quedaba insatisfechu poles casi nules aportaciones a los posibles visitantes. Les semeyes y poco más.
          El poder añadir el track, dende que tengo GPS, ilusióname pensando qu'agora pueo ayudar a alguien que-y preste dalgúna de les mios caminates.
          Esta circunstancia esíxeme qu'a veces repita'l paséu, si me prestó, pero nun me gusta'l camín que siguí o dalguna parte d'él.
          Busco alternatives a lo que nun me gustare o pudiera ser problemático pa posibles caminantes.
          Esti foi una vez más el casu. Una selmana antes baxare pel Valle y esto, que pa min que subí y baxé milenta veces per esi llugar ye daqué complicao porque cada día que pasa apréciase menos l'antiguu camín, más lo podría ser pa quien nun conoza la zona.
          Nesta ocasión baxé pela pista Les Praeres a Pra que l’únicu problema que tien ye ser casi carreterina que nun suel entusiasmar a casi naide.
          Trátase d'una prestosa escursión pelos alredores de Peñamayor subiendo a dos piquinos nun mui visitaos pero que, sobre too ún d'ellos l'Oroxu, pon delantre los nuesos güeyos una amplia y guapa panorámica. Son namás que 935 m d'altura pero les vistes del Aramu, Les Ubiñes, montes d'Ayer y LLaviana, la vecina Peñamayor, montes de Piloña, Ponga, Picos,...Pueblos de Nava y dende esti municipiu a Uviéu tol valle central d'Asturies: Sieru, Sariegu, Noreña,...
          Per otru llau ye un placer pa los que mos gusta'l monte recorrer esta xerrina d'oeste a este culminando cola fácil ascensión a esti picu qu'en Nava casi tola xente llama Caseta'l guardia.
          Al picu Cuervos, pese a que ta al llau de Les Praeres y pasare milenta veces a la so vera, yera la segunda vez que subía y los cinco minutos que se pue tardar en llegar a la so cume nun son en baldre. Nun ye tan vistosu como l'anterior pero déxanos una visión distinta de Les Praeres, La Varallonga, Peñamayor, l'Oroxu,...
          El percorrríu nun tien dificultá. Si a casu hai unos cincuenta metros nel km 9, aniciu de la xerrina del Oroxu, nos que pola cantidá de maleza cuesta un poco caminar y ye fácil perder el senderu buenu. ¡Hai que poner procuru nesti llugar!

Powered by Wikiloc

domingo, 5 de junio de 2016

Prestosu paséu pela Puente Arriba y Priandi na seronda: Dalgunos tramos de los PR AS 198, PR AS 67 y SL 8


          Sábadu y domingu, 7 y 8 de payares           Pel P.R.AS-198: La Era (Piloñeta) - Cauvilla - Grátila - Camín a Campanal - Esviación a mandrecha per viesca Les Milanes (castañéu y robléu) a Traveséu - Capiella Santu Tomás - La Róbriga d'Allá - La Róbriga d'Acá (Les Escueles) - La Puente (Priandi) - Les Tercies - La Pontona - El Xardín - LLaméu - L'Artosa - Campanal (Pel PR AS 67) - Pista a Grátila - PR AS 198 - La Cipresa - Les Mesties - Pra (S.L.8. "Senderu local de Nava") - Pista a Les Praeres - Vocarral - La Ferrería - Esvíu pel Rebollal (Abandonando'l S.L.8. "Senderu local de Nava") - La Retuerta (Piloñeta) - La Era (Piloñeta).

          "Seronda, un añu más... Ye una pena que vivamos estresaos, murnios y alteriaos... La yerba nun s'esforcia por crecer, les flores tampoco por abrise, simplemente  faenlo; el sol relluma, les estrelles rellucen..., les nubes fórmense, axúntense, empiecen a descargar agua a la tierra, conviértense en ríos, lleguen a la mar, empiecen a vaporiase, álcense otra vegada colos rayos del sol, conviértense en nubes, vuelven cayer a la tierra..., son esos fenómenos observables que, por ser tan sutiles, nun puen esplicase. Pero sí apreciar les manifestaciones de la so guapura. Y, cuando lo faes, y repares y sientes esa maravía, atópeste bien... En paz" (Carmen Pérez Novo).

Distancia: 16 km
Finaliza nel puntu de partida (circular): Sí
Desnivel acumuláu subiendo: 664 m
Altitú máxima: 581 m
Desnivel acumuláu baxando: 664 m
Altitú mínima: 245 m


          Percorremos parte de dos guapos P. R. de Nava: P.R.AS-67. "Ruta de Stu. Tomás de Priandi" y P.R.AS-198. "Ruta de  La Ribera del  Ríu Peña". Tamién el S.L.8. "Senderu LLocal de Nava"
          ¿Cuántes veces lo diría? ¡Qué guapo ye Nava!: los sos montes, viesques, caleyes, pueblinos, la so arquiteura tradicional, la so xente…
          De too esto disfrutamos nesta guapa excursión que fixi’l sábadu y domingu, 7 y 8 de payares.
          El paséu del sábadu nun me dexare convencíu porque paicíame prestosu y gustábame ponelu en Wikiloc pa que más xente pudiera gociar lo mesmo que yo.
          Atopárame con dificultaes pa pasar per dalgunos llaos pero paicíame que nun yera difícil dar col bon camín.
          Esti foi'l motivu de repetir el percorríu al día siguiente y tal como pensare pudi completar una entretenía caminata sin dificultaes y apta pa cualquiera que t'avezáu a caminar fuera de los núcleos urbanos.
          Por esti motivu les semeyes son de los dos díes.
          Como dixere nel entamu ye un paséu perguapu y al mio mou de ver aconseyable pa toles que-yos gusten la nuesa etnografía, los nuesos paisaxes y por supuestu andar.
          Trátase d'una prestosa y completa excursión. Nuna distancia nin curtia nin llarga disfrutamos abondo del nuesu conceyu: viesques, praos, ríos, senderos y caleyes; arquiteutura tradicional: capiella de Santu Tomás de Priandi y palaciu de La Ferrería; canalizaciones y restos d'antiguos molinos d'agua; horros, paneres y cases antigües (Piloñeta, Grátila, Traveséu, Campanal,…); tramos de sube y baxa n'abondo pa que los nuesos músculos trabayen...
          Nun tien nenguna dificultá. Según la época del añu podemos atopar barru y el camín daqué tomáu por maleza ente Traveséu y la capiella Santu Tomás. Parte del senderu que va d'esta capiella a La Róbriga ta semiabandonáu polo que tamién pue tener broza en dalgunos llaos.
          L'itinerariu al ser circular pue empezase en cualquier llugar del percorríu. Pola facilidá del aparcamientu un bon llugar pue ser Pra, aniciu y pasu de tantes rutes…
          Féxoseme tarde y nun completé l'itinerariu que pensare. Sería, dempués de Vocarral, siguir pel preciosu robléu pel que tantu y tantes veces gociamos pa salir a la pista que sube al Mayáu Pastor (P.R. AS-45: Foces del Ríu Pendón) y baxar a H.uensanta y d'ehí a la Ferrería.
          Desgraciadamente güei esi robléu desapaició y yá nun tien sentíu, nin siquiera, aconseyalu. ¿Qué pena!... 

lunes, 30 de mayo de 2016

Paséu per Redes: picu Maciédome

          Miércoles, 19 de payares de 2015          Pendones - Sen de la Vara - Foz del Palombar - Cabañes d'El Pláganu - Mayau Tiatordos - Collaos y viesca de Pandellanza - Casi a la vera'l mayáu LLagu - Arista del Maciédome (Nun volveré a repetir esi camín) - Picu Maciédome - Baxada al mayáu Llagu pel fácil y bon camín (menos el pedreru final. Nun me gusten) - Mayáu LLagu - Vega Texéu - Colláu Pandevilla - Viesca y cabaña La LLongar (fayéu mayormente y dalgo de carbayéu) - Cabañes la Gargasa - Camín del Cotu - Pendones.

          “Val más una tierra con árboles nos montes qu'un Estáu con oru nos bancos.” 
 Alfonso Rodríguez Castelao

          Distancia: 19 km
          Finaliza nel puntu de partida (circular): Sí
          Desnivel acumuláu subiendo: 1332 m
          Altitú máxima: 1910 m
          Desnivel acumuláu baxando: 1332 m
          Altitú mínima: 745 m

          De xuru que na mayoría de los conceyos d’Asturies, por nun dicir en toos hai llugares abondo pa gociar del otoño.
          De toes formes cuando patiamos pel nuesu pueblu o los vecinos paez que nun vamos de monte y nun tamos contentos si non facemos dalgún paséu per otros que ten daqué alloñaos.
          Toi convencíu qu’al llau de casa, nel mio casu per Nava, hai monte n’abondanza pa disfrutar del tardíu y de cualquier otra estación.
          Asina y too nes últimes serondes tenía por costume programar cinco o seis excursiones per Redes y Ponga. Como solemos dicir n’Asturies “Al cocer mengua” y quedábenme en tres o cuatro.
          El 2015 por diverses circustancies, anque punxi procuru en gociar de la seronda, nun planiara nada. La mayoría de los paseos que pudi facer daqué allexaos planifiquélos unos díes antes, normalmente dos o tres, cuando tenía la casi seguridá de poder facelos.
          Esti foi ún d’ellos y, como nun podía ser d’otra manerra prestóme a esgaya
          La mio intención yera subir al Tiatordos y al Maciédome. Pero a la hora que yera y contando con que los díes son tan curtios pasé de llargo pel mayáu del Tiatordos, onde hai menos tiempu que tuviere, pa dirixime a la guapa viesca de Pandellanza que paga la pena gociala en cualquier época del añu. ( De xuru qu'al entamu la seronda o na primavera muncho más).
          Cometí l'error de subir al Maciédome pela arista noroeste. Tuvi qu'usar les manes en más d'una ocasión y la sensación de "patiu" en dalgunos sitios fixo que nun respirara tranquilu hasta pocu antes de llegar a la cume, yá pel camín normal.
          Amás pudi comprobar que l'atayu ye pequeñu. Prometíme nun repetir la esperiencia. Nun me gusten un res eses situaciones, sobre too diendo solu.
          La baxada pel camín habitual nun tien problema a pesar de que a min tampoco me gusten nada los pedreros como'l qu'hai casi al final; cuando yá s'avista'l mayáu LLagu. De toes formes nun tien neguna dificultá.
          Dexando a un llau los íncomodos momentos del pasu per esa cimera la escursión ye perguapa y pa disfrutar d'abondo. Con seguridá que quince díes antes la viesca taría más guapa. Asina y too pasélo perbien.
          (Anque nel títulu pongo Redes creo que tamién se pisa un pocu del Parque natural de Ponga).
Powered by Wikiloc

jueves, 26 de mayo de 2016

Paséu per Peñamayor: Picos Oroxu, Les Antenes, Peñamayor y Varallonga

          Sábadu, 31 d'ochobre de 2015          La Era (Piloñeta) - La Fuente (Piloñeta) - Pra - Pel PR AS 198 (Ruta de la Ribera del río Peña) - Les Mesties - El Peranchu - Bobia (Pel camín antiguu que ta desapaicíu en munchos llugares) - Xerrina Oroxu - Peña Oroxu - Colláu La Campa o Melendreros - Les Antenes - Peñamayor (buzón botella sidra) - Ortigosa - Les Praeres - La Varallonga - Mayáu Pastor - Pista de baxada a Fuentesanta (PR AS 45, Foces del Pendón) - La Ferrería - El Rebollal - La Retuerta (Piloñeta) - La Era (Piloñeta).

          “Quien planta árboles ta al llau de la eternidá. La nuesa cobicia llexítima de más viesques ye la busca d'una humanidá más humana.“ Joaquín Araújo
          “La Madre Tierra tien de ser tratada con ciñu. Ella danos la vida, nun la riegues con venenu porque, si ella muerre, muerro, equí vamos morrer toos. Entá nun se dieron cuenta, somos lo que comemos. Vaya panda d'apanfilaos, que baxo’l so sombreru son tan probes que namás tienen dineru.“ Vandana Shiva
          “Los árboles son parte de la solución contra'l cambéu climáticu, el mayor problema qu'enfrentemos nunca.” Al Gore
          “El que nos atopemos tan a gustu en plena naturaleza provien de qu'ésta nun tien opinión sobre nós.” Friedrich Nietzsche
          “Un árbol ye'l nuesu contactu más íntimu cola naturaleza.” George Nakashima

          Distancia: 17,28 km
          Finaliza nel puntu de salida (circular): Sí
          Subiendo:1225 m
          Altitú max: 1143 m
          Baxando: 1225 m
          Altitú mín: 240 m

          El percorríu dende'l Peranchu al entamu ye claru y anque bien pindiu nun tien perda y ándase bastante bien. La falta usu fae que yá bien p'arriba desapaeza o nun sea fácil siguilu. Nesta época del añu y hasta bien entrada la primavera esto nun ye una gran dificultá porque la maleza, felechos y escayos sobre too, tan mostios y pásase per cualquier sitiu. De mayu hasta mediaos d'ochobre nun ye mui recomendable. Bastante cercana queda la buelga de la trayida d'agua de Xixón que ye una bona alternativa al camín pel que yo subí. Pehí pasen tol añu trabayadores de la EMA de Xixón. El restu'l percorríu nun tien dificultá nenguna pa cualquier persona que tenga'l vezu de caminar pel monte.
          Dende’l molín de Pra a les Mesties vamos pel PR AS 198 (Ruta de la Ribera del río Peña). Nun fai falta falar de la guapura d’esti llugar: el ríu, la Viesca, tabayoninos,…Pa gociala.
          Yá faláramos al principiu del tramu del Peranchu a la xerrina Oroxu. Presta anque ye incómodu por momentos.
          A pesar de la so modestia na altor patiar pela xerrina Oroxu ye un disfrute pa cualquier aficionáu al monte. Quiciabes seya pola so orografía o poles vistes que mos ofrez. Lo mesmo pue dicise del piquín que la corona cola caseta agora yá inútil.
          Nel H.ueyu o Les Antenes y poco dempués en Peñamayor paga la pena parar un bon trechu y dexar que los nuesos güeyos gocien una vez más, nunca mos cansa, del panorama: la mitá’l conceyu Bimenes, Nava, Cabranes, Sariegu, Sieru, Noreña, Llanera, Uviéu,…; la LLomba, peña Careses, la peña l’Home, la Baúga, Campagüés, peña Mea, les Ubiñes, l’Aramu,…; los montes de LLaviana, Sobrescobiu, Aller, Casu, Piloña, Ponga, Amieva, Los Picos,…
          Presta abondo, sobre too nel tardíu, la baxada al mayaú d’Ortigosa disfrutando de los colores de los árboles nesta perguapa estación.
          Dempúes de pasar per Les Praeres y tres la fácil subida a la Varallonga otru bon trechu pal disfrute de los nuesos sentíos.
          Díxilo munches veces y repítolo agora. Les vistes dende esti pequeñu picu son inmeyorables: a la so solombra Les Praeres, cerquina'l picu Redondu, l'Oroxu y los Fueyos, el mayáu de Llames LLagar, el colláu La Campa, tola xerra Peñamayor, la Múa, la Xamoca, el Facéu y otros montes de Piloña, d'Amieva, Ponga,...Al norte dende'l Sueve a Uviéu pueblinos de Piloña, Cabranes, Sariegu, Sieru, Noreña, Uviéu,...Peña Careses y el cordal de la LLomba,...Casi al llau toles aldees de La Puente Arriba, el palaciu La Ferrería, la guapa villa de Nava., ¿Pue pidise más?
          Tovía mos queda el guapu camín al Mayáu Pastor y la prestosa baxada pela pista a les cercaníes de H.uensanta coles bones vistes de los pueblos de la Puente Arriba.
          Tovía mos queda'l gociu de cruciar pel guapu robléu que travesamos nel esvíu a La Ferrería. Ye, pa min, de lo más prestoso'l percorríu.
          Pa quien no lu conoza tamién paga la pena parase un poquiyín na Ferrería y el so entornu.
          LLueu la viesca'l Rebollal p'acabar en Piloñeta onde podemos reponer fuercies y hidratamos nel bar Peñamayor.
          (Cuando redautamos estes llinies yá sabemos que nunca más podremos disfrutar de la  más que prestosa viesca cercana a La Ferrería. Al menos la nuesa xeneración y la de los nuesos fiyos.

sábado, 21 de mayo de 2016

Picos La Corbesa, Xuncler, Caspios de Breza, Peñamayor y les Antenes

          Sábadu, 3 d'ochobre de 2015          Aparcamientu cabaña (Debaxo Les Praeres) - Les Praeres - Ortigosa - Espines (Mayáu, xerrina y picu La Corbesa) - Xerrina y picu Xuncler - El Covayu - Anés - Breza - Picu los Caspios o Tablazu - Breza - Colláu La Goleta Llagos - Pozu Funeres - El Raigáu - LLanos d'Ortigal - Peñamayor (Buzón botella sidra) - Les Antenes (H.ueyu) - Colláu Melendreros o La Campa - Llames Llagar - Les Praeres - Aparcamientu cabaña.

          “¿Esto de mediu ambiente será porque yá destruyimos la mitá?” (Anónimo)
          “Sólo cuando l’últimu árbol tea muertu, l’últimu ríu envenenáu, y l’últimu pez atrapáu, daráste cuenta que nun pues comer dineru.” (Sabiduría indoamericana)  
           “Anque supiera que’l mundu va acabase mañana, yo güei plantaría un árbol.” Martin Luther King 

              (Estes frases tán dedicaes a los que permiten que les nueses viesques, los nuesos ríos, montes y valles tean cada día que pasa más estrozaos.)

               Distancia: 17 km
               Finaliza nel puntu de partida (circular): Sí
               Desnivel acumuláu subiendo: 9598 m
               Altitú máxima: 1280 m
               Desnivel acumuláu baxando: 959 m
               Altitú mínima: 716 m

           Nun me canso de patiar per Peñamayor. Anque repita’l percorríu siempre m’apetez facer semeyes de llugares milenta veces retrataos y qu'en cada paséu paécenme nuevos.
           Nesta ocasión, pa facer una pequeña variante, salíme del camín n'Espines p'acercame al piquín La Corbesa, guapu miradoriu del cercanu mayáu d'Ortigosa y de tol entornu.
           Volví dexar el camín na subida al Covayu pa subir a la xerrina y piquín Xuncler que ye un prestosu balcón al nun menos guapu mayáu del Caneyu.
          La última variante del paséu, qu’hebo años que fixere dos veces a la semana, foi cambiar l’habitual Trigueru pol Tablazu o Caspios de Breza.
          El restu’l paséu ye una de les munches variantes que faigo davezu pa completar una guapa circular que de xuru seguiré faciendo, de xemes en cuando,  mentanto tenga fuercies.
          Nel mayáu Espines salimos del camín dempués del cierre de la última cabaña de la izquierda con direición este pa en curtia y lliviana subida llegar a la xerrina y picu La Corbesa. Ye un guapu miradoriu del mayáu d'Ortigosa, el picu Reondu, la Múa, el valle que baxa hacia Piloña,...
          Volvemos a la pista y antes del colláu del Covayu na penúltima curva abandonamos el camín pa subir a otra guapa talaya encima'l mayáu del Caneyu: la xerrina y picu Xuncler.
          En descensu per esti cordalín llegamos a la vallina que separa'l Covayu d'Anés. Subimos per estos guapos praos pa dempués d'evitar una fayona cayía sobre la sienda baxar hasta'l regatu onde entamamos la subida a Breza.
          Sin llegar a les cabañes pela parte más oriental de la pradería coronamos otru guapu miradoriu: Los Caspios.
          Dempués de dexar que los nuesos güeyos gocien col panorama que columbramos baxamos a les cases de Breza. Arrodiamos el monte del Trigueru pa llegar al colláu La Goleta Llagos.
          Con  distinta pero tamién guapa panorámica y con direición noroeste baxamos al pozu Funeres per onde de xemes en cuando mos presta pasar.
          De siguío caminamos per una marcada sienda que trescurre pela parte baxa de Campagüés.
          Unos metros antes de la cabaña'l Raigáu entamamos a subir con direición a Peñamayor pa volver a gociala pelos LLanos d'Ortigal y los picos de Peñamayor y le Antenes.
          Poniendo procuru pa nun resbariar baxamos al colláu Melendreros o La Campa y yá per pista pasamos pel mayáu LLames LLagar y Les Praeres. Unos cientos de metros más abaxo acabamos esti guapu paséu per una de les xerres que a min más me presten. (El mio monte).

Powered by Wikiloc

sábado, 7 de mayo de 2016

Xuntando dos de los montes más emblemáticos de Nava: Peñamayor y la Múa

          Domingu, 15 de payares de 2015          La Era (Piloñeta) - La H.uente (Piloñeta) - Molín de Pra - Pista Les Praeres - La Revueltona - El Valle - Pista Les Praeres - Les Praeres - Mayáu LLames LLagar- Picu Les Antenes - Peñamayor (Buzón botella sidra) - El Covayu - Xerrina Xuncler - Mayáu El Caneyu - La LLama - El Carbayal - El Ceriscu - La Múa - Colláu La Verde - Mayáu Breñabérnez - Foces del Pendón- Les Meceures -Los Fornos - H.uensanta - La Ferrería - El Rebollal - La Retuerta (Piloñeta) - La Era (Piloñeta).

          "Nel monte les tos piernes  llévente, pero la mente guiáte. Entrena dambes." (Nun conozo l'autor)
          Distancia: 24,08 km
          Finaliza nel puntu de partida (circular): Sí
          Desnivel acumuláu subiendo: 1505 m
          Altitú máxima: 1145 m
          Desnivel acumuláu baxando: 1505 m
          Altitú mínima: 128 m

           Nun cabe dulda que la fama y prestixu que tienen dalgunos conceyos nel ambiente de los aficionaos al monte y al senderismu débese a la guapura de los sos paisaxes y a les bones condiciones de les sos rutes.
           Nun ye menos ciertu que l’interés y’l procuru que los mandatarios municipales ponen en tener en bon estáu de conservación y señalización dalgunos percorríos, cuantos más meyor, ye otru factor qu’ayuda al conocimientu y en consecuencia invita a los aficicionaos a patiar pela naturaleza a frecuentar estos llugares.
          Quiciabes Nava nun tenga tantu atractivu como Aller, Amieva, Cabrales, Casu, Piloña, Ponga, Quirós, Somiéu,…y dalgún otru conceyu mui renombráu nel mundiu del monte. Pero, y a min nun me caba dulda, pue dise a Nava a caminar y disfrutar per más sitios que les foces del Pendón o  Peñamayor.
          N’efeutu, esos dos llugares son guapos y emblemáticos pero hai muncho más y sobre too milenta maneres diferentes d’andar per esos perconocíos requexos del conceyu navetu.
          Tengo recoyío nel mio modestu blog y sobre too en Wikiloc varies rutes  distintes a les que se faen davezu pelos llugares nomaos y dalguna otra nos alredores o en otros llugares del conceyu.
          Les varies y bien distintes formes de subir a la Múa, les munches variantes qu’almiten les Foces del Pendón, el ríu la Peña, el senderu Priandi, el d’El Remediu, les milenta rutes per Peñamayor o la xerrina  l’Arrudu, el percorríu d’esta entrada...
          Esta guapa anque un pocu llarga escursión pue ser un exemplu de lo dicho anteriormente.
          Pue entamase la caminada en Molín de Pra con abondo sitiu p'aparcar.
          Dempués de caminar unos 800 metros pela pista de Les Praeres hai que tomar una esviación a mandrecha que por bon camín llévamos al mayáu del Valle. Hai un portelleru que pasamos pa entrar nel mayáu. Sigue el bon camín unos metros. Dempués d'una portiella metálica que pon El Valle y que dexamos a manzorga y una cabaña qu'hai a mandrecha empieza a estrozase la sienda y tenemos qu'abandonala entrando a un prau per un portelleru. D'equí p'arriba y hasta salir otra vez a la pista Les Praeres hai que dir buscando'l meyor pasu que ta cerca del antiguu y estropiáu camín. Cuando pela derecha, cuando pela izquierda y siempre cerca de la estrozada caleya qu'en nengún momentu perdemos de vista. Con bon tiempu nun tien gran dificultá. Pue complicase en dalgunos llugares si de recién llovió abondo. (Nesti casu ye más aconseyable subir pela pista).
          La subida a Les Antenes pue facese tol añu pel antiguu senderu qu'usaren antaño pa tresportar los materiales pa les antenes o per una canal qu'hai un poco más arriba que sal del colláu La Campa.
          El restu'l percorrríu nun tien denguna dificultá. Pue facese daqué más curtiu y cómodu diendo pela lladera'l Ceriscu sin subir a la so cima.
          Dempués del mayáu Breñabérnez esviéme un poco a mandrecha. Baxé unos cincuenta metros que tuvi que desandar.
          Pa entrar na finca'l palaciu La Ferrería hai una portiellona que de lloñe paez que nun vamos poder travesar. De cerca vemos que se pasa con facilidá pela mandrecha. Siguimos per delantre de la grandiosa casona y hai que cruciar otra portiella y tomar el camin a madrecha que sube a Ovín o a la viesca'l Rebollal.
           Si se entamó'l paséu nel molín de Pra, dempués de la portiella, siguimos a la vera un molín, travesamos un ponte y dempués de pasar otru portelleru llegaremos a un camín que per Vocarral va llevamos al puntu d'aniciu de la escursión.
Powered by Wikiloc

jueves, 21 de abril de 2016

Prestosu paséu peles Ubiñes: picos Fariñentu y Tapinón

          Domingu, 25 d'ochobre de 2015          Tuiza d'Arriba - Camín al Meicín - A los pocos metros esviación a mandrecha xunto a caseta del agua - Vallines de Coriscu - La Cuenl.lona - El Bocarón - Per senda hacia l’oeste a la base'l Fariñentu - Picu Fariñentu- Baxada pel mesmu o asemeyáu camín a la base'l picu - Dirección norte-noreste per baxu'l L.leguturbiu - Valle de Retertoriu - Sin llegar al l.legu y la braña del mesmu nome, vamos per baxu de les cayides de Siegalavá - Pel sur del mayáu Corros - Direicción sur hacia la colladaTrave - Con dirección oeste subida al Tapinón - Baxada con direición S- SE a un l.lagu artificial - Siguir con direición este hasta enllazar col PR AS 89 - Sin dexar el PR, dempués de pasar varies portiel.les llegamos a Tuiza d'Arriba. 

          "Nel monte, al igual que na vida, cometemos dellos equivocos de base a la hora d'orientamos. Por exemplu, cuando vamos xubiendo y vemos a daquién caminando más arriba de la posición na que mos atopamos, tendemos a pensar que conoz meyor la ruta que nós y al siguilu, pue que acabemos toos perdíos." Juanjo Garbizu

          Distancia: 16,54 km
          Finaliza nel puntu de partida (circular): Sí
          Desnivel acumuláu subiendo: 1470 m
          Altitú máxima: 2178 m
          Desnivel acumuláu baxando: 1470 m
          Altitú mínima: 1211 m

          Son pocos paseos al añu a lo que dalgunos nomen “Los Alpes Tuizos”. Quiciabes nenguna vez pasare de tres. De toes formes siempre pongo procuru en qu’al menos ún dellos seya nuevu pa min.
          Sería la segunda vez que pisare caún d’estos cumales de los que tenía bona acordanza. Sobre too del Fariñentu. El Tapinón resúltame daqué monótonu subilu y más con borrina que foi lo que me pasare nes dos ocasiones.
          De toes formes sabía de xente que xuntare los dos montes nel mesmu día y foi un de los munchos oxetivos que me punxere pal 2015. Eso sería la novedá,
          Tábamos a finales d’ochobre y nun yera cuestión de dexalo pa más alantre. La nieve, que me gusta pa velo, siempre foi un impedimentu pa les mios excursiones. (Nun tengo material nin edá p'aniciar una actividá nueva min.)
          Les previsiones meteorolóxiques nun yeren males y al entamu'l percorríu paicía que diba tar bon día. Por embargu, yá a la tarde y subiendo pal Tapinón, entamó a metese'l borrín y nun desapaició hasta cuando taba de vuelta bien pa baxo. De toes formes el fuerte vientu que soplaba allarribón movía la niebla y dexaba por momentos columbrar l'entornu. La contra foi'l primer fríu'l tardíu que dexaba xelaes manes y oreyes.
          A pesar d'estes torgues baxé satisfechu. Pasélo bien y cumplí ún de los oxetivos del añu. De fechu, y 2015 nun diba ser menos, casi siempre de lo proyeutáu la metá...Nun tengo remediu...
          Saliendo de Tuiza, nun sé lo que diría pensando, pero cuando me di cuenta caminare unos ciento cincuenta metros en direición al Meicín.Tuvi que desandalos. Despistes...
         Anque peles vallines del Coriscu, nesta época del añu, hai senderos bien visibles la mio tendencia a nun siguilos p'atayar fae que n'ocasiones consiga lo contrario. Ye dicir arrodiar. 
          Por más que yo nun lo faga pémeque ye aconseyable dir siempre pel camín más marcáu. Llegando a la fonte l'Aguilón (hai una bañera) debe siguise pela sienda de mandrecha que mos lleva a la Cuenl.lona. Ye un pasu d'un espolón rocosu dende'l que dempués de dar varies revueltes déxamos nel colláu pa ensiguidina tener a la vista el L.Leguturbiu y hacia l'occidente'l Fariñentu. 
          Pémeque tenía qu'haber baxao daqué más y pasar más cerca del mayáu Corros. Pasóme lo mesmo qu'a l’entamu'l percorríu. Por atayar tuvi que facer "llábanaculing" unos cuatro o cinco metros.
          De toes formes ye una caminada prestosa y sin gran dificultá.

Powered by Wikiloc

viernes, 15 de abril de 2016

¡Qué guapa ye la seronda! Per Sobrescobiu: Picu'l Cogollu

          Sábadu, 10 d'ochobre de 2015          Soto - 1,5 kilómetros del Camín de Llaímo PR AS 62  (Ruta l'Alba)  - Les Bories - Viesca y  mayáu Aviáus -  Viesca la Condilexa a Collalmonte - Vuelta pela mesma viesca Condilexa al mayáu Cogollu (penriba) - Picu Cogollu - Colláu Cogollu - Colláu Peruques (base norte del Corbellosu - Foz de Corbellosu (Baxando con dalguna dificultá pente cotoyes ,escayos y felechos) - Mayáu Trapa - Mayáu Pandu -  Camín de Llaímo PR AS 62  (Ruta l'Alba) nel Ponte'l Retortoriu - Soto.

          "Que caún sía capaz de saber hasta ónde ye capaz de llegar nel monte ye la meyor forma de tornar a casa satisfechu poles esperiencies úniques que seguro vivió. Nun tendríamos de perder nunca de vista que l'oxetivu nun ye algamar una cima por alta que sía, sinón esfrutar, arriquecenos y volver a casa pa cuntalo a los tos seres queríos." Sebastián Álvaro

          Distancia: 16,51 km
          Finaliza nel puntu de partida (circular): Sí
          Desnivel acumuláu subiendo: 977 m
          Altitú máxima: 1225 m
          Desnivel acumuláu baxando: 977 m
          Altitú mínima: 430 m

          Dende qu’entamé a facer el blog, ochobre de 2012, tuvi claro que lo mío nun yera nin describir nin dar conseyos de los meyores percorrríos. La mio modesta pretensión yera y sigue siendo enseñar los nuesos paisaxes y siguir gociando de los paseos a la vez qu’escueyo les semeyes que me paecen más representatives de la excursión.
          De toes formes, dende xunu de 2013, empecé a poner el track del percorrríu en Wikiloc de mou y manera que creo que pue ayudar, sin confundir, a dalgunes persones que-yos presten, los mios paseos.
          Asina ye que d’esi tiempu p’acá autopláxome copiando les opiniones que dexé en so día nesa bona ferramienta que ye pa los aficionaos al monte o a otros deportes el GPS y Wikiloc.      
          Pal que conoza esta ruta de xuru que-y paicerá estraño que la califique de difícil. Nun-y falta razón porque'l que la punxo difícil fui yo escoyendo caminos pocu recomendables. La primera torpeza foi siguir pel guapu y prestosu fayéu Aviaus - Condilexa hasta Collalmonte. Avistando'l Cogollu dende ellí dime cuenta que, pa min, nun yera posible subir per esa cara y la única solución yera dar la vuelta pa subir per onde suel facelo tol mundu. Esti foi'l primer equivocu. De toes formes nun m'arrepiento porque siempre ye prestoso caminar pelos fayeos y sobre too na seronda.
          Esta equivocación nun fai más difícil el percorríu pero si que lu allarga.
          De xuru que la baxada dende'l Colláu Cogollu al Colláu Peruques (base norte del Corbellosu) pue facese per senderos meyores pero, como tantes veces, fallóme la intuición montañera y a pesar de que tenté de buscar la meyor baxada pémeque nun lo llogré. Cotoyes y sobre too felechos abondo...
          Tovía estrocé más el percorrríu na baxada a la foz del Corbellosu. Equí col felechal munchu más desarrolláu y acompangáu a vegaes d'escayos y cotoyes fíxome sudar tinta pa llegar al senderu onde se crucia'l regatu Corbellosu. Más tarde, yá per bona sienda, antes de llegar al mayáu Trapa na lladera opuesta a la que baxare, dime cuenta de lo que fixere mal. Dempués que caiga la primer nevada dexará al descubiertu'l meyor camín....
          El resume ye qu'una ruta guapa y fácil pue facese difícil si'l caminante, nesti casu yo, nun ponen el conveniente procuru...
          Nun me paez mui aconseyable siguir esti percorríu sobre too nos tramos que describo como pocu recomendables.
          L’otoño, el tardíu, la seronda. Hasta los nomes que-y damos a esta estación del añu me gusten.
          Si siempre son guapos los nuesos paisaxes, nesta época del añu esta guapura acentúase. La variedá de colores de les viesques autóctones ye tanta que los nuesos güeyos nun ven el momentu de dexar de gociar.
          Nesta ocasión, primeros d’ochobre, quiciabes nun llegare a la plenitú. Asina y too, con dalguna torga de la que somos culpables, pasámoslo perbién patiando per estos montes y viesques del guapu conceyu coyanu.
     


Powered by Wikiloc

domingo, 6 de marzo de 2016

Pela LLomba. Variante del PR-AS 197 “Por las cercanías del cielo”

          Sábadu, 29 d'agostu de 2015          Vega - Canal - Villar - La Falluca - Colláu Fumarea - Campa los Güesos - Campu la Morena - Campera les Cruces - Altu'l Caballín - LLuarias - La Campa - Camín de Santiagu: (Figares - Pedrosa - La Carcavá - Vega).

          “Son les bones alcordances que se deben llevar consigo, y solo les buelgues les que tienen que dexase. Non pue pensase que'l monte va a estrañate  y por eso dexarás les tos alcordances. Yes tú’l responsable de curiar el to próximu alcuentru con él”. Germán Rojas.

          Distancia: 16,48 km
          Finaliza nel puntu de partida (circular): Sí
          Desnivel acumuláu subiendo: 481 m
          Altitú máxima: 634 m
          Desnivel acumuláu baxando: 481 m
          Altitú mínima: 281 m

          Entamamos a caminar en Vega, capital del conceyu Sariegu, en direición a Canal. Pasamos pencima l'autopista  y llegamos a esti barriu onde, como en tolos demás, podemos lleer a la so entrada'l panel explicativu d'esti topónimu.
          Siguiendo la bona señalización d'esta ruta llegamos a Villar onde, dempués de conocer l'orixen del nome nel tableru qu'atopamos en tolos pueblinos d'esti ayuntamiento, entamamos a subir, primero en direición oeste y enseguidina norte-noreste.
          A medida qu'ascendemos les vistes van siendo meyores, De xuru qu'hai que parase y echar una güeyada a la ilesia Narzana y a los barrios más occidentales de Sariegu.
          Venimos caminando per esta parroquia dende'l llugar de Canal. Si ta'l día despeyáu, nun yera'l casu, hai bones vistes de gran parte de los conceyos de  Sariegu, Nava y Sieru; la Xerra l'Aramu, Peña Mea y Peñamayor. Esti guapu cordal siempre va tar a la vista dende'l entamu'l percorríu hasta'l final.
          Caminamos unos 1200 metros y poco antes de llegar al altu La Fayuca a onde mos lleven les indicaciones del “PR-AS 197, Ruta de Las Cercanías del Cielo” tomamos un camín a manzorga que con direición noroeste llévamos a cerca l'altu Fumarea.
          Agora cambiamos el sentíu'l camín y seguimos a la derecha, al este per una pista forestal. Nel kilómetru 7,3 tenemos la opción d'esviamos a la derecha pa visitar el bon miradoriu que ye l'área recreativa de Perriellos.
          Como la mio intención yera dexar enseguidina el PR- AS 197 pa pasar per LLuaria, quiciabes el pueblín más altu del conceyu Vilaviciosa, pasé de llargo. (Tuviera unes cuantes veces nesti llugar y, sirva d’orientación a los posibles visitantes, que los trescientos metros que pon l’indicador son en realidá setecientos. Asina qu'ente dir y venir hai qu'andar casi un kilómetru más de lo previsto).
          L'aldea de LLuaria  ye una llocalidá del conceyu Villaviciosa que pertenez a la parroquia de Pueyes. Con bon tiempu ye un bon miradoriu del valle de Valdediós y de la ría.
          Dende aquí pela carreterina baxamos a la Campa y, siguiendo les indicaciones del Camín de Santiago, volvemos a Vega.
          Si tenemos suerte cola visibilidá los nuesos güeyos gociarán col guapu valle de Sariegu, les Ubiñes, l’Aramu, Peña Mea, Peñamayor, la Xamoca, los montes d’Ayer. Casu, Piloña, Ponga, los Picos d’Europa, el Sueve,…
          Otru atractivu interesante d’esti paséu o cualquier otru per Sariegu ye'l mimu y procuru que punxeren en describir la toponimia de cada pueblu con paneles a la entrada y colocar un cartelu en cada camín col so nome.
          (Nun yera bon día pa facer semeyes y hai dalguna d'otres escursionines.  Guardo-y afeutu a esti conceyu onde tengo ascendientes y dempués de Sieru y Nava, llugares de naciencia de los mios antepasaos maternos y paternos ye'l tercer sitiu onde m'atopo "en casa". Cuntando que llevo cerca cincuenta años viviendo n'Uviéu eso significa muncho...  Varies veces al añu préstame percorrer pueblos, caleyes y requexos d'esti, pa min, guapu y apreciáu llugar).

Powered by Wikiloc

lunes, 29 de febrero de 2016

Patiando pel LLanes y Ribadedeva: "Los Colores del Valle Oscuru"

          Miércoles, 26 d'agostu de 2015          Tresgrandas - Santulalia - Xerra Plana - Capiella La Concepción - Pielasierra - El Cerecéu - La Borbolla - Molinos y nacimientu'l Ríu Cabra - Ríu Cabra - Umpiones - Boquerizu - La Cotera - Tresgrandas.

          " Quien caltien l'aptitú de ver la guapura nun avieya." Franz Kafka

          Distancia: 14,34 km
          Finaliza nel puntu de salida (circular): Sí
          Subiendo: 372 m
          Altitú max: 228 m
          Baxando: 372 m
          Altitú min: 35 m

          La mañana d’esti miércoles d’agostu tenía que dir a l’aeropuertu de Santander y casi sobre la marcha busqué un percorríu pa facer una excursión pel oriente d’Asturies.
          La “ruta de los colores del Valle Oscuru” paicióme una bona opción. A la vuelta de la vecina Cantabria hai qu’esviase a La Franca y dende esta localidá pela AS-346 a Tresgrandas, guapu pueblu llaniscu.
          En poco más de cinco cinco minutos, unos cuatro kilómetros, llegamos a lo que será l’aniciu de la ruta. Hai un indicador d’un bon aparcamientu y nelli un panel qu’esplica l’itinerariu.
          Dempués a lo llargo’l camín vamos topamos con otros siete con dibuxos de Julio Rey (Gallego y Rey) que comenten la naturaleza, la hestoria y etnografía del valle. Los indianos, la nacencia del río Cabra, los molinos del ríu, la fauna de la redolada, la Sierra Plana, los palacios de Braña Vieya y una panorámica de la Sierra’l Cuera.
          Pémeque foi nun d'estos paneles donde lleí que'l nome del Valle Oscuru" vien de los tiempos en que los montes yeren tan abondosos qu'a la lluz del sol costába-y llegar al suelu y les solombres cubrinlo too. Dicen los vieyos que "taba cerráu de monte", o lo que ye lo mesmo, el monte atapábalo too.
          Pero tamién dicen que al valle de Carranzo empezó a llamase-y "el Valle Oscuru" porque foi l'últimu llugar del conceyu de Llanes al que llegó la lluz eléctrica. De xuru qu'hai otres razones . . . solo hai que buscales nel camín".
        Ye agradable caminar per Xerra Plana viendo los pueblos del valle y dexando gociar a los nuesos güeyos cola cercana xerra del Cuera. Presta tamién el pasu per dalgún d'esos llugares y ver los palacios y casones sobre too na zona Ribadedeva. Lo negativo ye qu'hai qu'andar per bastantes trechos de carretera.
          Lo más guapo del percorríu son unos tres o cuatro kilómetros dende'l 7,5 al 11 aproximadamente onde s'atopen los molinos, el nacimientui del ríu Cabra y el paséu a la so vera. Esi tramu, na mio opinión, ye lo que pue llamase Valle Oscuru.
          Tuvi la suerte de ver y gociar bien de tiempu de la presencia de tres llóndrigues paraes, nalando y caminado pela oriella.
          El camín ta bien señalizáu y ye difícil perdese.

Powered by Wikiloc

sábado, 27 de febrero de 2016

Picu Moru (Bode, Parres). Un bon miradoriu a 558 m.

          Domingu, 2 d'agostu de 2015          Bode (Unos 300 m antes del pueblu viniendo de Les Arriondes) - Camín a casería La Valleya - Camín a mandrecha (Antes de llegar a la casería) - Pista - Colláu Xibil - Cresteríu xerrina picu Moru - Picu Moru - Siguir per cresteríu - Casería de Busternales - Camín mandrecha - Pista a Bode - Bode.

            "Cuenta la to hestoria: sí, cuenta la to hestoria. Ufierta'l to exemplu. Di a toos que ye posible, y asina otres persones van sentir el valor pa enfrentase a los sos propios montes." De "Manual para escalar montañas."

          Distancia: 14  km
          Finaliza nel puntu de partida (circular): Sí
          Desnivel acumuláu subiendo: 583 m
          Altitú máxima: 558 m
          Desnivel acumuláu baxando: 583 m
          Altitú mínima: 34 m

Tuvo que ser a la segunda

          Nun sé si ye habitual que nun conceyu haya dos pueblos con nomes tan paicíos: Bodes y Bode. El casu ye qu’esta circunstancia fixo que’l primer intentu de subir al guapu picu Moru nun se concretara de la primera.
           La relativa cercanía del conceyu Parres, la llonxitú’l percorríu y la escasa dificultá fexo que la tuviera apuntada nel apartáu “pa cuando tenga pocu tiempu”.
          Tampoco punxi munchu pocuru n'estudiar l’itinerariu porque cuando me falaren d’elli paicióme que nun necesitaba muncha preparación.
           Tamién, col tiempo escasu, subiera el sábadu anterior al Pienzu dende'l Fitu y fixárame qu'esvíu tenía que tomar pa dir a Bodes. Taba bien indicao y propúnxime dir al sábadu siguiente.
           Fíxilo como pensare y presentéme nel guapu pueblu de Bodes hacia les nueve la mañana col enfotu y casi la seguridá de poder subir al Moru y volver a casa pa la hora comer.
           Entamé a caminar daqué confusu porque nun m'encaxaba del too la información que traía na mio mollera colo que tenía delantre los mios güeyos. En subida, más de lo que pensaba, caminaba cola mosca tres la oreya porque cada vez me veía más perdíu. Afortunadamente atopéme con un rapaz que baxaba corriendo y entrugué-y pel picu. Punxo cara plasmu y díxome que taba pa otru llau y en direición contraria.
            El camín pel que diba enseguidina cruzaría la carretera´l Fitu y si siguía per elli llegaría al Bustacu. Como nun yera cosa dar la vuelta siguí'l paséu y completé un engorriosu percorríu circular pasando pel Fitu y baxando casi viesca a traviés hasta La Salgar y pela carretera a Bodes.
          Nun foi la mañana qu'esperaba y amás l'oxetivu col que salí de casa nun lu cumpliera y nun acababa esplicame'l porqué.
           Buscando información que me pudiere dar dalguna señal del mio despiste nun tardé en dame cuenta l'equivocu. Saliera de Bodes y pa subir al Moru'l llugar más indicáu ye Bode.
            Nun sólo aprendí un pocu de toponimia del conceyu Parres sinon  tamién que les rutes por fáciles que paezan hai que preparales convenientemente.
            El pueblín de Bode, casi a orielles del Sella, ta a unos dos kilómetros de Les Arriondes. Polo tanto la guapa villa parraguesa pue ser el puntu d'aniciu d'esta escursionina.
             Como'l mio tiempu nun yera muncho, la mio opción foi acercame en coche casi hasta'l pueblu.
          Pela carreterina de Fuentes y Sinariega, unos cientos de metros antes de Bode, con bon sitiu p'aparcar a mandrecha y  cerca d'una pista a manzorga que va a la casería La Valleya.
           Caminamos per una guapa viesca de carbayos y castañales y antes de llegar a la casería tomamos un camín a mandrecha que dempués d'atravesar un prau ponmos nuna pista que de siguío empieza a dexamos ver el cresteríu pol que llegaremos al vistosu picu Moru.
            Los nuesos güeyos van poder gociar de bones vistes de la mar, les xerres del Sueve y Escapa, los Picos, los montes d'Amieva, Ponga, Parres, Piloña, Nava,...Muncho más de lo qu'imaxinamos tando a quinientos cincuenta y picu metros d'altura...

Powered by Wikiloc

viernes, 19 de febrero de 2016

Peña Avis. Espectacular miradoriu a 411 metros.

         Domingu, 23 d'agostu de 2015            Aparcamientu instalaciones deportives de Güeñu / Bueño – Güeñu / Bueño - Carreterina Quintaniella d'Arriba - Peña Avis - Vuelta pel mesmu camín - Carreterina a Rebolón - PR AS 240 a oriella del Nalón - Área recreativa'l LLosalín - Aparcamientu instalaciones deportives de Güeñu /Bueño.

          "La vida ye como'l senderismu. Nun  sirve de nada dir  lo más rápido, lo más alto o lo más lloñe si escaecemos apreciar el paisaxe nel camín." De “Monterapia libro”.

          Distancia: 8,34 km
          Finaliza nel puntu de partida (circular): Sí
          Desnivel acumuláu subiendo: 287 m
          Altitú máxima: 398 m
          Desnivel acumuláu baxando: 287 m
          Altitú mínima: 112 m

          Yá fai una montonera d’años que tengo una carpeta con rutes pendientes. Púnxila nos mios papeles cuantayá cola cuenta de dir apuntando y dempués borrando paseos que m'apetecíen y nunca fixere.
          El casu ye que praúticamente dexé d'usala pa lo que la ideare y lo único que suelo facer ye abultala más con rutes nueves que surden cuando l'abro pa borrar daqué. Davezu quito una y pongo tres… Imaxínome que nun soi l'únicu que-y pasa…
          De toes maneres, de cuando en vez, recurro a ella  y suelo abrila cuando se presenten ocasiones como la d'esti domingu del pasáu agostu.
          Uviéu, once de la mañana, posibilidá de tres o cuatro hores pa patiar un pocu y nengún plan previstu. Una bombilla allumó la mio mollera  y abrí la carpeta. Ensiguida l'atopé: Peña Avis (pa cuando tenga pocu tiempu). Nun tardé nin diez  minutos en preparame y tar camín de Güeñu. Nestos caso nun faen falta munchos preparativos.
          Dexé'l coche nel ampliu aparcamientu qu'hai xunto a les instalaciones deportives del pueblu los horros y entamé'l paséu.
          La mayoría'l percorríu ye per asfaltu. De Quintaniella d'Arriba sale a mandrecha una pista que mos lleva a una pequeña y guapa viesca de carbayos y castañales. Dempués de cruciala llegamos a un prau, yá debaxo la peña Avis y con direición este caminamos siguiendo un senderu, pocu claru por momentos y con daqué maleza, hasta una columnona eléctrica de les qu'abonden na zona. D'aquí sal un caminín a la izquierda que nun sin dificultá pola broza llévamos a la cima.
          El camín aconseyable ye'l de baxada. Por deconocimientu la subida fíxila per un sitiu daqué más complicáu entamando a subir antes de la torre de lletricidá xunto a una cabaña valtada.
          L'abondanza de maleza: cotoyes, artos, espineres,... complica daqué l'acercamientu a esti espectacular miradoriu.
          Pémeque lo aconseyable ye subir per una especie de muriu que a modu de crestéu llévamos a la cume. Hai una flecha mariella que tres bonos montañeros, col ánimu de facilitar la subida a los demás, pintaron onde s'inicia'l crestéu. Coincidí con ellos cuando yo baxaba.
          La vuelta fíxila casi pel mesmu camín hasta la carreterina a Rebolón y dempués pel PR AS 240 a oriella del Nalón.
          Al mio mou de ver merez la pena’l curtiu paséu. Les vistes dende esta modesta cima son ablucantes: Fusu la Reina. Puertu, Caces, Casielles, Les Caldes, parte d'Uviéu, el Narancu, Palombar, la Mostayal, la Madalena, el Nalón y dalgunos de los sos meandros,...

Powered by Wikiloc

martes, 16 de febrero de 2016

Prestosu paséu circular per Peñamayor. Picos Xuncler, La Goleta, Texíu, Peñamayor y Les Antenes

          Sábadu, 1 d'agostu de 2015           La Revueltona (Camín del Valle) - Porciles - Les Alcantarielles - Piedranidia - Los LLanos - Les Praeres - Ortigosa - Espines - Picu Xuncler - El Covayu - Anés - Breza - Picu La Goleta - Colláu La Goleta Llagos - El Texíu - Peñamayor - Les Antenes - Colláu Melendreros o La Campa - Llames Llagar - Les Praeres - Los LLanos - Piedranidia - Les Alcantarielles - Porciles - La Revueltona (Camín del Valle).

           "Respeta'l to cuerpu: namás consigue xubir un monte aquél que-y da l'atención que merez. Tú tienes tol tiempu que te da la vida, asina que, al caminar, nun t’esixas más de lo que pueas dar. Si vas demasiáu apriesa,  vas cansate y abandonar a la metá. Si lo faes demasiáu adulces, va cayer la nueche y pues perdete. Aprovecha'l paisaxe, esfruta del agua fresco de les fontes y de los frutos que la naturaleza xenerosamente t'ufierta, pero sigui caminando."  "De manual para subir montañas"

          Distancia: 19,94 km
          Finaliza nel puntu de salida (circular): Sí
          Subiendo: 1304 m
          Altitú max: 1275m
          Baxando: 1304 m
          Altitú min: 252 m

          Préstame a esgaya y por eso fixera milenta veces esti percorríu. Asina y too siempre procuro facer dalguna variante. Nesti casu, con tiempu suficiente, quixi entamar un pocu más abaxu de lo que acostumbro nos últimos años.(Cerca Les Praeres). Asina que dexé'l coche na Revueltona imaxinando como facer el paséu. Les novedaes seríen, amás del entamu, subir al Xuncler y a la Goleta.
          El Xuncler ye un piquín a la vera'l colláu Covayos al que se sube en cinco minutinos. L'esvíu merez la pena. Hai guapes formaciones rocoses y ye un prestosu miradoriu: Al este, abaxón, el guapu mayáu del Caneyu; el valle y pista que va a Ponte Miera; el Sueve, montes de Piloña, Parres, Ponga,...; al norte parte'l camín pel que vinimos: Espines, Ortigosa, la Cota, Les Praeres, la Varallonga, Peñamayor,...; al sur les praeres del Covayu y Anés, el cordal de Peñamayor del Texíu a Breza, la xerrina l'Arrudu,...
          El picu La Goleta nun aporta a los nuesos güeyos más o meyores vistes que'l Trigueru pero presta de cuando en cuando subir a piquinos que davezu nun-yos damos apreciu.
          Como casi siempre foi una guapa mañana de monte.

Mapa del percorríu 1
 Mapa del percorríu 2
La Puente Arriba saliendo de la borrina 
 Cezosu, La Capitana, Piloñeta...
El valle de Nava sigue emborrináu
Yá tamos nes Praeres. Al fondu Peñamayor. 
 Mirando con atención vemos venaes pela Cota
 ¡Préstame'l colláu La Campa ente Peñamayor y l'Oroxu!
Al Fondu colláu El Covayu  per onde pasaremos ensiguidina.
Una güeyadina atrás llegando al colláu el Covayu .
LLegando al Xuncler 
Dempués de la xerrina Xuncler, Anés. 
Picu Xuncler 
 Mirando al norte dende'l Xuncler
Un garbu o gárabu
Baxando p'Anés
Mirando al Sur: Anés, Breza y ente la borrina Trigueru y Caspios. Más a manzorga Carranques o Pandestébano 
 Ventana al picu Carranques o Pandestébano
Vaques paciendo n'Anés. 
Mirando p'atrás: El Caneyu, pista a Ponte Miera, El Cerriscu, La Múa,... 
 Anés y El Covayu
Al xabalín presta-y Breza 
Breza 
Otra güeyada atrás.
 Picu La Goleta nel cordalín continuación del Trigueru. 
Xerrrina de La Goleta. A manzorga Entellagos y al fondu'l Trigueru.
Mirando al oeste dende La Goleta.
Les Ubiñes dende La Goleta
LLaviana dende La Goleta
Paez que va escamplar
Dende'l colláu La Goleta LLagos entamamos a subir pal Texíu.
Vaca y utre cerca'l Texíu
En posición pa esnalar 
Hai otru utre. (Nun ye redundancia)
El Texíu y al fondu Peñamayor
Campagüés dende'l Texíu 
 Caminando hacia Peñamayor
 Caminando hacia Peñamayor 2
Como nes nubes, caún ve nes piedres lo que-y paez... 
 Peñamayor
 Les Ubiñes dende Peñamayor
 Dende Peñamayor Texíu y más lloñe Breza y xerrina l'Arrudu. Más emborrinao La Xamoca
 Al fondu'l camín pel que subimos al Covayu
Peñamayor, la vaca y Les Antenes. Al fondu La LLomba 
Picu H.ueyu o Les Antenes 
Nava dende Les Antenes 
Les Praeres a la solombra La Varallonga 
 Bona parte del conceyu de Nava con Grátila y Piloñeta en primer términu
Nava 
Les Praeres
 Mayáu LLames LLagar. Detrás colláu La Campa
 Les Praeres
En primer planu Ovín 
Piloñeta 
Grátila, Basoréu,... 
Piloñeta 2


Powered by Wikiloc