Va prestame poner equí dalgunes de les munches semeyes que faigo nes mios caminates. Nun pretendo describir rutes nin dar conseyos sobre'l meyor camín pa faceles. N'Internet hai abondo d'eses informaciones y lo único que diba conseguir ye confundir.
De toes formes toi abiertu a responder a les entrugues que faiga daquién interesáu en dalgún de los mios paseos.
Fadré una introducción de caúna de les rutes.

lunes, 30 de septiembre de 2013

Ríes Baxes 1: E287 Roteiro de Donón (Cangas do Morrazo) y cruceiro do Hío

          Martes, 16 de xunetu de 2013          Donón (Mirador del monte O Facho) - Camín al cabu Home - Camín al cabu Robaleira - Playa de Barra - Pinar y complexu dunar - Donón

    “El viaxeru saborguialo too colos sos venti sentíos, y atopa entá que son pocos, anque sía capaz, por exemplu, y por eso conténtase colos cinco que traxo al nacer, d'oyer lo que ve, de ver lo qu'oye, goler lo que siente nes puntes  los deos y saborguiar na llingua'l sal que nesti momentu esactu ta oyendo y viendo na fola que vien del mar abiertu” José Saramago

          Tuviéramos fae una montonera d'años nesti perguapu sitiu de les Ríes Baxes y prestábamos volver.
          Con esi enfotu dirixímosmos a Donón, un pueblín de la parroquia de Hío nel municipiu de Cangas do Morrazo.
          La nuesa intención yera caminar y disfrutar del paisaxe de la península de Morrazo ente les ríes de Pontevedra y Vigo. Nun escoyimos un bon día y anque mos prestó queda pendiente volver facer el roteiro con meyor visibilidá.
          Entamamos el percorríu xunto a una escultura metálica d'una caracola fecha pol artista gallegu Lito Portela. En direición al cabu Home, va dexándose a mandrecha los impresionantes cantiles de la costa da Vela. A vegaes pente'l borrín vense les cercanes islles Cíes y con más claridá'l faru del cabu.
          Como'l día nun daba pa muncho en llugar de llegar al cabu, tomamos una pista a manzorga que lleva a punta Robaleira y punta Subrido. Tampoco llegamos a  los sos faros; bordiando la costa pasamos a la vera la sablera de Barra, una de les playes nudistes más conocíes y frecuentada d'España.
          Dende esti llugar per un senderu que traviesa un campu dunar cubiertu por un pinar y dempués pente bambúes, uvares y una heteroxénea vexetación llegamos a Donón y a la guapa caracola d'aceru.
          Con una bona sudada, magar que'l nublu nun impidía'l calor, prestómos tomar unes clares nuna terraza d'un quioscu al llau del miradoriu la Caracola.
          Dempués, antes de volver pal nuesu campamentu base en Cambados, fiximos una curtia parada en Hío pa ver una vegada más el so maxestosu cruceiru.

jueves, 26 de septiembre de 2013

Pelos montes de Nava: La Múa y xerrina Casielles.

          Sábadu, 21 de setiembre de 2013          Frainoquiso - La Llera - Casielles - Mayáu Brañabernez - Colláu La Verde o de Brañabernez - Picu La Múa - Colláu La Verde - Picu Casielles - Mayáu de Casielles - El Cantu - El Somolín - Frainoquiso.

           "Un filósofu ye un home que xube a un cume en busca del sol; atopa borrina, baxa y esplica'l maxestosu espectáculu que vio." William Somerset Maughan


           Lo mesmo que a los otros montes del mio conceyu, dos o tres veces al añu siento la necesidá de facer una visita a estos vistosos picos. Antaño facíalo munches más veces pero na midida que me voi faciendo más vieyu, pese a que tengo más tiempu llibre, amontónenseme les ganes de conocer sitios nuevos y de repitir dalgunos otros. Poro anguaño nun los paseo tantu.
          La Múa ye de los picos que siendo modestos n'altor son un miradoriu perguapu de bona parte d'Asturies: Allá alantrones, el Cornión, más cerca Vízcares, colláu Traslafuente, Maoñu, colláu Pandemules, Peña Crespa o Los Tornos, La Llambria de Taranes, Facéu, La Xamoca,...Mui cerquina la xerra de Ques, el monte Cayón, la Varallonga, Les Praeres, la Cota o picu Redondu, l'Orozu, el colláu La Campa y tola xerra de Peñamayor dende Les Antenes al Trigueru con Breza a la so solombra. Mirando pal otu llau, pal norte, gran parte de los conceyos de Piloña, Cabranes, Nava, Sariegu, tola llanera de Sieru, Noreña y Uviéu,...La peña Careses, el cordal de La Llomba , el Sueve,...
          Nos díes espeyaos podíamos tar tiempu enforma, sin cansamos, mirando pa tolo que mos arrodia. Llamentablemente nun foi'l casu d'esti día y namái pudimos disfrutar pente la borrina del vecín valle de Les Cuerries, de Peñamayor y de los pueblos de Nava. Too ello col cielu enfoscáu que fae que nun preste como otres veces y nun puea retratase cola llimpieza apropiada.
          Tengo subío munches veces pela Cueva d'Arriba, dende les foces del Pendón, dende La Llama,...Nesti día fixi la subida dende Frainoquiso pel camín de regresu del Pr AS 46. Esta parte del percorríu tamién ye mui guapa y antes de llegar al colláu de Casielles yá hai una guapa vista del camín de les Foces del Pendón. Güei taba tapáu pel borrín. Más p'alantre pásase per una guapa viesca heteroxénea de fayes, carbayos, ablanares,...
          Lo menos prestoso ye la subida del mayáu de Brañabernez al colláu del mesmu nome. Los felechos y cotoyes dificulten el camín anque agora, en parte d'él, ta más llimpio a causa d'una quema de la seronda pasada.
          La vuelta pela xerrina Casielles tamién ye perguapa y con mui bones vistes.
          Asina y too, como casi siempre, foi una guapa mañana de monte.

miércoles, 18 de septiembre de 2013

Peña La Capiella, Picu Valverde(Torre Chus Santos Novo) y Picu Torres.

          Vienres, 13 de setiembre de 2013          Braña La Capiella - Mayáu Torres - Peña La Capiella - Colláu Valverde - Picu Valverde (Torre Chus Santos Novo) - Colláu Valverde - Picu Torres - Mayáu Torres - Braña La Capiella.

         " Los errores tienen el so valor, anque namás en dalguna ocasión. Non tol mundu que viaxa a la India afaya América". Erich Kästner


           Nun pudía pidir nada más pa qu'esta escursión fuera prestosa abondo: montes guapos, vistes fantástiques, nenguna pista pela qu'andar, día maraviyosu,....
          Neses condiciones entamé'l percorríu. La mio intención yera subir al Torres y volver enseguidina pa poder ver na tele'l final d'etapa del Narancu. (Amás de patiar y retratar préstenme munches otres coses).
          Como tantes veces faigo nun tardé en camudar el plan. Subir a la peña La Capiella y al picu Valverde podía ser un complementu perguapu del paséu y tenía tiempu abondo.
          Dende'l mayáu Torres dirixíme a la manzorga pa subir al primer picu. Paicióme que'l camín más amañosu yera una canal yerbosa y mui pindia qu'atopé al primer vistazu. Foi la primera equivocación. El camín ye más cuestu de lo que pensaba y a vegaes tuvi qu'usar les manes. Y, ¿cuantayá que me diría que nun diba más a montes onde tuviera qu'utilizar les manes? Pero nun acabo conseguilo. Por si fuera poco acabé nun desbentíu que nun yera'l cume y con nun poco trabayu baxé gran parte la canal hasta que vi otra pela qu'entamé a subir y creo que llegué a la cima. Al menos paicióme la parte más alta (1942m) y hai un montón de piedres a modu  finxu.
          Nun paré un res y nel pie'l picu volví a faceme la promesa de lo de les manes. Empecé a caminar per un senderu bien marcáu que con direición oeste va pela falda'l Torres al colláu Valverde. Esti camín y la subida al Valverde nun tien nenguna dificultá. Amás esti monte de 1960 metros tien unes vistes casi tan guapes como'l Torres.
          Dempués de relaxame un bon cachu y comer daqué baxé al colláu pa subir al principal oxetivu del día. Per esta cara, la oeste, nun tien denguna dificultá. Yá cerca la cume paezme que pasando a la cara norte facilita l'ascensu a la cume.
          Pémeque nunca tuvi tantu tiempu nuna cima. Cerca dos hores. La bona temperatura, les vistes, nun sé,... nun apetecía baxar. Decidí que vería'l final d'etapa pel camín y tomélo con calma.
          Nun acabaren los contratiempos. Fixi la baxada pel llau contrariu, l'este. Y, o lo fixi mal o ye así pero, el casu ye que otra vez tuvi qu'usar les manes y facer destrepes a los que yá nun taba avezáu y amás paezme que nun son apropiaos pa les mios condiciones físiques...
          De toes maneres y a pesar de los pilancos, como casi siempre que voi al monte, pasélo bien.

       


                           

miércoles, 11 de septiembre de 2013

Foces del Pendón y palaciu La Ferrería

          Llunes, 8 de xunetu de 2013          Fonte La Vegona - Los Fornos - Les Meceures - Ponte Pendón - Colláu La Canal - Mayáu Pastor - Fonte Faéu - Los Xerrapos - Tabléu - La Vallorita - Fonte La Vegona - Falaciu La Ferrería - Fonte la Vegona.

          "Los llugares abandonaos personifiquen, d'una manera cruda y guapa al mesmu tiempu, el poder ya imperiu del polvu. Son escenarios de la recolonización de la naturaleza y el más firme presaxu de la victoria final de la suciedá y la basura". Fernando Jorge Soto Roland
 
          De xuru que la mayoría de la xente cuando baxa de patiar pel PR AS 45 "Foces del Pendón" llama-y l'atención una construción vieya qu'asoma pente la viesca del valle'l ríu Pra.
          Lo que causa curiosidá a los nuesos güeyos ye'l palaciu La Ferrería. Trátase d'una construcción del sieglu XIV d'estilu renacentista barrocu al que nos sieglos siguientes fueron añadiéndo-y dependencies. El monumental edificiu foi fundáu pola familia de los Álvarez de les Asturies.
          Declaróse monumentu históricu artísticu'l 11 de xunu de 1982 y "Bien d'interés Cultural"  en 1993.
          Da llástima ver l'estáu d'abandonu nel que s'encuentra'l palaciu y los antaño guapos xardines que lu arrodien.
          Nun pue entendese que na páxina del Ayuntamientu de Nava recomienden la so visita y al mesmu tiempu te cerráu al públicu y neses llamentables condiciones. Pasa-y lo mesmo qu'a otru emblemáticu edificiu navetu: el palaciu La Cogolla que foi construyíu pola mesma familia qu'esti. Si nun se-y pon remediu les dos construcciones lleven camín de convertise en ruines.
          La visita al entornu d'esti monumentu pue ser un guapu complementu de la curtia y guapa escursión a les Foces del Pendón.
          Dexare'l coche nel camín de La Ferrería a unos trescientos metros de la planta embotelladora de Fuensanta, xunto a la fonte La Vegona (tamién n'estáu ruinosu).
          Desandando los trescientos metros entámase a subir pel bien señalizáu PR AS 45. Casi hasta  Los Fornos ye una pista de formigón aguapada pel castañéu qu'atraviesa. Dempués, práuticamente en llanu, per un senderu bastante cómudu disfrútase d'un paisaxe qu'agranda la so guapura a midida que mos acercamos a les Meceures. Pa min esta parte ye lo más guapu del percorríu. Ye una viesca heteroxénea de carbayos, fayes, ablanares,...acompangada col ruxir de los dos regatos que s'axunten equí pa dir a morrer al Pra unos kilómetros más abaxo.
          Dempués pela Canal hasta'l colláu del mesmu nome. Dende equí empieza la baxada dexando a los llaos praos y cabañes bien conservaes.
          Nel Mayáu Pastor hai l'alternativa d'agrandar la caminata peles Praeres y si se quier subiendo a la Varallonga. (Foces del Pendón).
          El fastidiu, qu'al menos a min, me produz caminar peles pistes de formigón vese amenorgáu poles vistes: Nava y la mayor parte del so conceyu: en primer planu Buyeres, Ovín, La Viña, Piloñeta, Grátila, Cezosu,...y les cuadres y praos qu'hai a la vera'l camín.
          Pa teminar, dende la fonte La Vegona, el camín a la Ferrería pente finques y un guapu arboláu. Dempués, si nun se ye mui gordu, pasales canutes pa entrar pela derecha de la portiella candada a la finca na que s'atopa'l palaciu.

sábado, 7 de septiembre de 2013

Penarrueda y Puertos de Güeria

          Vienres, 30 d'agostu de 2013          L.lindes - La Cuaña - Manín Fonderu - Manín d'Arriba - Val.lina Grande - Embudu Val.lina Grande - Campa los Texos - Cuchiel.la de Penarrueda - Penarrueda - Col.léu Lingléu - La Cardosina - Mayéu Los Cuadros - La Foz Grande - Col.léu la Cándana - Les Escolmenes - La Cuaña - L.lindes.
          


        “Vivi la to vida como si subieres un monte. De vez en cuando mira la cume, pero ye más importante almirar les coses guapes del camín. Subi sele, firme, y disfruta cada momentu. Les vistes dende la cima serán el regalu perfeutu tres el viaxe.”  Harold V. Melchert


          Fae bien de tiempu qu'intento llevar a la práctica el dichu clásicu  de los que patiamos pelos montes: "Hai que subir como un vieyu pa llegar a la cume como un mozu".
          Si daquién que me conoz llee esto, de xuru que pensará: "esti paisanu yá chochea, ¿cómo quedrá subir? Ensin dulda que naide me quita los años nel monte nin nel llanu. Pero pémeque, como los coches, toos tenemos más d'una velocidá. L'escoyer caminar con asosiegu garantízame disfrutar del paisaxe con más intensidá y llegar a la cume sin dificultá p'alendar.
          Como a otros munchos montes, facer una escursión a Penarrueda fae que gociemos tanto del percorríu como de la cume.
          Pel camín, los guapos fayeos, los mayaos, los praos, los regatos, les viesquines de carrascos y d'otros arbustos, les vaques y caballeríes pastiando, los montes que mos arrodien formen un paisaxe d'una guapura que ye difícil esplicar.
          La cume ye un miradoriu privilexáu de les vecines Ubiñes, del valle de Quirós, del Aramu, de les xerres d'Aranga, Tene, Sobia, Gradura, el Gurrión, Caldoveiru,...Media Asturies.
          Amás de les vistes, conmueve la presencia de les trincheres y parapetos de piedres que traen a la memoria l'esfuerciu y la llucha de los soldaos republicanos que dempués de tantu sufrimientu claudicaron  ante'l poder de los militares golpistes.
          Faciendo'l camin con la tranquilidá de la que falaba nun hai pilancos que mos impidan pasalo bien.
          A dicir verdá prodúxome dalgún engorriu la baxada al col.léu Lingléu per un senderu  bien pindiu y con muncha piedra suelto. Tamién me compliqué un poco pente los piornos, espineres y carrascos por querer baxar demasiao direutu  a La Cardosina.
          Pue resultar un poco fatigoso la subida dende la Foz Grande al col.léu la Cándana porque les pates yá tan un pocu cansaes pero compénsase pola guapura del fayéu pel que se pasa.
          En resume ye una escursión perguapa y mui recomendable sobre too si se fae na primavera o nel entamu'l branu cuando les praderes tienen el máximu verdor, pelos regatos cuerre más agua y tovía queda dalgo nieve nes cumes. De xuru que los colores que la seronda da a los fayeos tamién fae que sea una bona estación pa facer el paséu.
          Yo paselo bien n'agostu.
          Siempre va prestamos dir a Penarrueda.

miércoles, 4 de septiembre de 2013

Prestosu paséu pel Narancu

          Domingu, 25 d'agostu de 2013          Ciudá Narancu - Carretera'l Narancu - Camín d'Ules - Ules - Carretera'l Centru Asturianu - Pista a Contriz - Contriz - Monte a traviés cruciando'l P.R. AS-239 - P.R.AS 239 - Picu Llampaya - Carretera Brañes - Llampaya - Llampaxuga - Camín de Santiagu - Les Campes - La Florida - Ciudá Narancu.
         

          “Tienes que mantenete en forma. Mio güela entamó a caminar cinco milles al día cuando tenía 60 años. Agora mesmo tien 97 y nun sabemos onde demontres ta.”  Ellen Degeneres

          Los paseos pel Narancu nun suelo preparalos. Tampoco llevo máquina retratar por eso les semeyes tan feches col teléfonu.
          Si nun faigo una escursión a dalgún llugar más lloñe, dende fae una bona temporada, casi a diario patio pel Narancu o alredores. Pongo esti paséu nel blog porque caminé per dalgunos sitios qu'hai tiempu que nun pisaba y prestóme enforma.
          Salí de mio casa en Ciudá Narancu hacia les once la mañana cola intención de probar si ameyoraren dalguna de les  mancadures ocasionaes más pola edá que por otra cosa. Pa ello la idea yera subir dalgún tramu bien pindiu y ver como me respondía'l cuerpu.
           Salíme de la carretera'l Narancu a la altura'l restaurante Lobato. Pasando per delantre'l colexu  Les Teresianes siguí per un camín que más o menos paralelu a la carretera llega a Ules. Dende equí con direición noreste unos 300 metros de la carretera que va al Centru Asturianu hasta agarrar la pista que sube a Contriz. Tien una bona pendiente y pasa per un castañéu bien guapu. Evitando les esviaciones, travesé xunto a les cases qu'aparenten tar desocupaes y llegué al colláu per un senderu bastante cuidáu. Percíbese qu'hai actividá agrícola y ganadera y camínase bien peles caleyes.
          Entamé la baxada y primero per un camín a manzorga y dempués a mandrecha crucié el PR AS 239 pa siguir monte a través per un senderu que sube a un pequeñu cuetu bastante usáu por moteros de trial. Salí otra vez al PR y, dempués d'unos 500 m, per una sienda bien marcada, mui pindia y casi reuta aporté al picu Llampaya con bones vistes a Uviéu, Llampaya, Llampaxuga, Lloriana, Sancloyo,...,  les xerres del Aramu, Tene, Caranga, Sobia, Gradura, Peña Manteca,...
          Con direición oeste, baxé a la carretera Brañes y pasé per Llampaya y Llampaxuga. Xunto a la so capiella tomé'l camin de Santiagu hasta llegar a Uviéu.
          Cruciando pel nuevu barriu de la Florida aporté a Ciudá Narancu dempués d'una entretenida patiada y cola satisfaición de nun resentime de nenguna mancadura.

domingo, 1 de septiembre de 2013

Xerra Maín y Cabeza La Mesa o ¿Cabeza Quemada? (El so puntu cimeru)

          Martes, 20 d'agostu de 2013          Poncebos - Canal de La Rumiada - Camín vieyu de Tielvi - Ponte de Tielvi - Mayáu Vierru - Monte l'Arandanera - Cabeza La Mesa o ¿Cabeza Quemada? (Puntu cimeru de Xerra Maín) - Mayáu Groseda - Pandébano - Bulnes - Canal del Texu - Poncebos.

          "Polo xeneral, la toponimia de los  Picos d'Europa foi maltratada (como nun podía ser menos) pola práctica totalidá d'autores que d'una manera o otra  averárense a la conocencia de dalgún aspeutu d'estos montes. Y por ello la conocencia de los nomes de llugar de los Picos ye, anguaño parcial y, en munchos casos, incorrecta: los erros fuéron acumulándose d'unos autores a otros hasta'l puntu de ser aceptaos por una gran mayoría y van reproduciéndose d'una obra a otra ensin nengún sentíu críticu..." Xosé Lluis del Ríu

          "Ta mui mal que la estupidez nun duela" Vince Anderson

          N'ochobre de 2012 (Per Cabrales) baxé pela carretera dende la riega Secudia a Poncebos porque nun m'atrevía a dir pel camín vieyu de Tielvi y  sobre too a baxar pela canal de la Rumiada a la carretera xunto a la central eléctrica.
          Llectures en dalgunos blogues alvertíen del peligru d'esa baxada y como tengo dicho y escrito munches veces a min nun m'estimulen "los pasos daqué aéreos, les esguiladines comprometíes, los pequeños y entreteníos patios o les baxades dalgo espuestes". Nos mios paseos pel monte atopo realidaes muncho más interesantes que too eso. Con posteridá un bon conocedor del terrenu esplicóme como yera y dende esi momentu decidí que tenía que dir a facer un percorríu qu'incluyera esi pasu. Axustándose a lo que ye real, ye una curtia canal como otres munches daqué pindia y con algo piedra suelto. Nada que con un pocu curiáu nun pueda superar un vieyu como yo.
          La ruta circular qu'entamé en Poncebos xunto a la central ye perguapa.
          El tramu ente Poncebos y Tielvi ye entreteníu y con pocu desnivel. Va paralelu a la carretera a Sotres teniendo a manzorga Portudera y a mandrecha la xerra Maín col cuetu Vierru vistosu y melgueru. Pasaremos a la so vera dempués de cruciar la carretera pel fermosu ponte medieval de posible orixen romanu y subir per una pista bien pindia al mayáu que toma'l nome del picu.
          La única dificultá qu'implica'l paséu ye'l  llargor y si acasu la abonda vexetación qu'hai nel monte l'Arandanera que fae difícil avanzar. Lo raro ye que lo que dificulta'l pasu son matoxos de fayes que amás nun dexen ver los senderos. Superada esta viesca, ensiguida llegamos a un colláu dende onde vemos el vértiz xeodésicu de Cabeza La Mesa o ¿Quemada?. Esti picu ye un miradoriu perbonu pa ver los Picos. Sobre too el macizu Central. Tamíen vemos pal norte tola xerra'l Cuera.
          Nun ye mui cómoda la baxada  a Pandébano. Paez que ta poco patiada y les siendes en dellos sitios cuasi nun se ven. Pásase pel mayáu Groseda que namái-y queda una cabaña en pie y lo que pienso que ye un bodegu pa curar el quesu.
          Del camín de  Pandébano a Poncebos pasando per Bulnes hai lliteratura a esgaya qu'empondera la so guapura muncho meyor que lo que pueda escribir yo.

          Reflexón sobre toponimia:

          Nun hai cordal sobre'l que trate de falar o d'escribir del que tenga claru'l nome de munchos de los sos llugares.
          El paletismu, el autuodiu, el desconocimientu y l'enclín castellanizante y pretendidamente cultu de munchos montañeros d'antaño y d’anguaño camudaron y siguen camudando la toponimia de los nuesos montes.
          Esto,  tien orixe nuna forma de pensar que dominó hasta apocayá, adulteró y adultera los nomes d'accidentes xeográficos qu'ofienden a la cultura asturiana.
          El problema ye que yá nun sabemos los nomes verdaderos y a les xeneraciones que nos sigan dexámos-yos una probetaya herencia cultural.