Pela xerra l'Aramu: Picos Gamoniteiru, Xistras, Santiago, Rasón y Barriscal.

          Domingu, 1 y 8 de xunu de 2014          Aparcamientu l'Angliru - Picu Gamoniteiru - Picu Xistras - Picu Santiago - Llagu Xazarandín - Picu Rasón - Mayéu de la Veguellina - Picu Barriscal - Aparcamientu l'Angliru.

          «Na borrachera d'aquella hora, pasada allá arriba aislláu del mundu, na gloria de les altures, ye abondu pa xustificar cualquier llocura» Giusto Gervasutti

          Nun sé si a tola xente-y pasa lo mesmo. Cada paséu  que faigo pel monte, si me presta y eso ye casi siempre, répitolu en cuantes pueo sobre too si nun fixi tolo que tenía pensao cuando entamé'l percorríu.
          Nesta ocasión el primer domingu de xunu pensare subir les cinco cumes. El tiempu demasiau medíu y les paraes escesives fixeren que nun me vagare dir al Barriscal.
           Pémeque dixi más d'una vez que los sábados y domingos préstame tar en casa a la hora xintar y nun me gusta cambiar esta costume. Por ello nun m'entra la duda cuando se fai tarde y nun acabé'l paséu previstu. Garro'l primer atayu qu'haya y déxolo pa otru día.
          Les escursiones que  plantego los fines de selmana tienen el llargor que faiga posible nun alteriar les mios costumes. Como en dalguna otra ocasión, viendo la hora que yera, dende'l mayáu de la Veguellina siguí pal Angliru pensando qu'otru día sería.
           Tengo milenta escursiones pendientes. Munches d'elles son llugares que nun conozo y otres tantes prestaríame repitiles. Cuando voi a tachar alguna d'elles, en llugar de menguar, la llista crez y ye que quito una y apunto dos o más.
          Tengo asumío qu'anque viviera doscientos años el mio inventariu nun disminuría. Por ello nun dudo en repitir les que m'apetecen o les que dexé incompletes.
           Nesta ocasión foi'l siguiente domingu, que por suerte salió bonu, cuando completé'l proyeutu orixinal.
           Ye lo que tien esta guapa y céntrica xerrina. La borrina ye una compañera que en contaes ocasiones l'abandona. Por eso hai qu'aprovechar los pocos díes despexaos y val más nun fixase una fecha con muncha antelación. Lo que casi siempre ye un perguapu y fácil percorríu pue convertise nuna xornada desagradable y a vegaes complicada.
          El paséu ye fácil y cumple coles espectatives del caminante más esixente. Les vistes de media Asturies, de norte a sur y  d'oriente a occidente son inmeyorables. A min préstenme sobremanera les vistes de Peña Rueda y Les Ubiñes; tamién les del Monsacru y de los valles de Quirós y de Riosa. Pero nada de lo que se pon delantre los nuesos güeyos tien desperdiciu.
          Pémeque'l fácil accesu y la cercanía al centru la rexón devalúen, a xuiciu de dalgunos,  la guapura d'estos montes. Si daquién nun los conoz o patiólos poques veces siempre-y pagará la pena facer dalguna escursionina. De xuru que nun lo llamentará.
          Hai semeyes de los dos díes y dalgunes paecen repitíes. Nun ye asina y forma parte de l'almiración que tengo a esti monte.

Ver todas

Consigue el tuyo

Patiando pel Aramu: Picos Gamonal y Moncuevu

          Domingu, 18 de mayu de 2014          Covayos /Na carretera l'Angliru) - Mayáu d'Ortigales - Mayáu de Castrupín - Tollu Veguellina - Picu Gamonal - Vega Fonpedrín - El Xanguanal - ¿Picu Bauchal? ¿Morterín? - Picu Moncuevu - Aparcamientu l'Angliru - Carretera - Cueña La Casa - Camín al tollu Veguellina - Mayáu de Castrupín - Mayáu d'Ortigales - Covayos.

          "El montañismu sigue siendo una actividá incongruente na nuesa sociedá, pero pa nós ye un vehículu que tresporta los valores, los grandes desafíos, les conquistes de la nuesa naturaleza más fonda na so más poderosa espresión. La cima nun ye la única meta: a nós impórtanos la forma de percorrer el camín."
          Fabrizia Derriard y Eric Fournier

          Nunca foi la mio costume facer anotaciones de los munchos paseos que faigo per caleyes y montes y xusto fai güei tres meses que fixi esta escursión. Si la mio memoria nunca foi mui brillante col pasu los años ta deteriorada en forma.
          Con esta introducción tiento de xustificar la poca precisión cola que pueo describir esti prestosu paséu. Per otru llau, dende qu'entamé a entreteneme escribiendo y escoyendo semeyes de les mios andancies, nunca pretendí qu'esto fuera una guía pa daquién que-y pueda prestar dalgún de los mios percorríos. Dígolo nel principiu'l blog y agora tócame insistir nello.
          Cuando n'ochobre de 2012 empecé esti pasatiempu tenía ciertu resentimientu con algunos trabayos d'otres persones, que con bona voluntá y el so afán por ayudar, en más de cuatro ocasiones fixeren que me perdiere pel monte. Yo nun quería pa naide lo que pa mín fuera una mala esperiencia y por eso-y di esti enfoque.
          Hai descripciones mui bones y feches con rigor a les qu'hai qu'empoderar. Xunto a estes, nun mui numberoses, abonden los "corta y pega" que avergonzaríen a los sos autores si fueren sabedores de lo fácil que ye descubrir los sos plaxos.
          De toes formes esto nun ye lo importante. Allá caún cola so conciencia. Lo malo ye'l dañu que a veces puen facer a persones que se fíen del pretendíu prestixu de ciertos "blogueros".
          Dende va un tiempu suelo poner el track del mio paséu y esto sí que pue ayudar. Sobre too si se espliquen les equivocaciones que pudieren tener y se da una mínima información escrita del aniciu y fin de la caminata.
          Dempués d'esti aburríu parllotéu dexo unes curties reseñes de la guapa mañana de domingu que pasé.
          L'Aramu ye una xerrina que, pa los que mos queda cerca casa, ye un recursu mui recomendable pa dar satisfaición a la nuesa afición.
           Nesta ocasión dexé'l coche na curva Covayos onde hai sitiu abondo p'aparcar y nun estorbar. Xubí, quiciabes daqué escoráu a mandrecha, pel mesmu sitiu que va facer un añu: La Gamonal (1712 m).
           Baxé y con direición oeste, dexando a manzorga el Moncuevu, dirixime a un piquín qu'hai nel fondu'l valle y que nun sé'l so nome ¿Bauchal? ¿Morterín? (1553 m) Bien podía llamase tamién Moncuevu porque debaxo'l so cumal tien una cueva que de lloñe llama l'atención. Acercándose a ella resulta ser un pequeñu tendeyón natural que a vegaes usaría'l ganáu pa protexese de les inclemencies meteorolóxiques o de mosques y tabanes. Agora ta zarrada con piedres.
          Dempués, con direición sureste entamé l'ascensión pela falda'l llombu del Moncuevu (1724 m). Pasín ente pasu llégase al camín "normal" pencima'l champán de Fonpedrín. Esti picu paezme'l, más guapu y "montañeru" de tolos que conozo del Aramu: Alba, Barriscal, Champaza, Gamonal, Gamoniteiru, Monrasiellu, Rasón, Santiagu, Xistras,...
          Baxé pel llau contrariu al de la xubida y llueu dempués de tar na cume del picu situáu al este (1686 m) y casi ximielgu pero daqué más baxu siguí hacia l'aparcamientu l'Angliru.
           Unos cientos de metros pela carretera y na cueña La Casa, pel camín que baxa al tollu Veguellina, llegué al mayáu Covachos cola recompensa d'haber fecho una prestosa escursión.
       

Ver todas

Consigue el tuyo

La Múa y la Varallonga

          Vienres, 30 de mayu de 2014          Pra - Bocarral - Pista Mayáu Pastor (baxar a manzorga) - Los Fornos - Foces del Pendón - Les Meceures - Mayáu Brañabernés - Colláu La Verde - Picu la Múa - El Felguerón (Na pista Les Praeres a Puente Miera) - La Llama - Les Praeres - La Varallonga - Camín d'Entexerres - Pista a Piloñeta - Porciles - Pra.

          "El montañismu ye almiración del paisaxe, cultura y deporte. La competición nun forma parte del monte". Ángel Fernández Ortega

          Tentando seleicionar dalgunes de les munches semeyes que fixi nesti paséu nun se m'ocurre más qu'esta esclamación:  ¡Qué guapo ye Nava, La Puente Arriba, Peñamayor y tola rodiada!
          Ye verdá. Nunca ye fácil escoyer les fotos que dexar pal blog pero cuando se trata d'esta fastera d'Asturies, pa min de les más suxestives, aumenta l'apiertu.
          Esti percorríu, ún de los munchos qu'entamo dende'l molín de Pra, ye tan atrayente que como diz la publicidá: "el que lu fae repite".
          Nun ye pa menos. Tien tolo que-y pue gustar a cualquier aficionáu a patiar pelos montes y caleyes d'Asturies: paisaxes, bredes, viesques, foces, desbentíos, montes, xubíes, baxaes,...y un llargor circular que debería dexar conforme al andarín más dau a esixir.
          Los arbolaos de Bocarral, Pendón, el Felguerón y la Llama; los picos Múa y Varallonga; les vistes dende ellos, les Foces del Pendón, Les Praeres,...¿qué otra cosa-y apetez algamar a una persona qu'ama'l monte?
          Pienso qu'una mayoría de les agrupaciones de monte o de los aficionaos individuales del centru d'Asturies n'alguna ocasión fixeren estos percorríos. Xuntalo too nuna escursión, como nesti casu, ye un privilexu cenciellu y al alcance de cualquiera.
          El paséu nun tien nenguna dificultá. Si acasu la breda ente les Meceures(un pocu más arriba) y el mayáu Brañabernés pue ser daqué enrevesao pero qu'en nengún momentu tien peligru nin pérdiga.
           Nun hai camín específicu pa baxar dende la Múa al Felguerón. Sin borrina ye evidente y si la hubiere pue siguise la sienda que baxa a la Llama o con Gps siguir el track.
           Pasa lo mesmo pa baxar de la Varallonga al camín d'Entexerres. Tamién ye inequívocu y amás siempre queda la posibilidá de volver a la pista cerca Les Praeres.
           Faciendo un repasu a "Patiar y retratar" atópense abondos comentarios d'esti percorríu en: Foces del.., Paseín..., Foces..., Pelos montes de..., Caminada..., De Pra..., etc.
           Nunca suelen defraudame les escursiones pel monte y menos pelos míos, los de Nava, y esta vez nun diba ser menos. Paselo perbien y prestóme a esgaya.

Ver todas

Consigue el tuyo

Dende Cenera al Llosoriu per Foz y el cordal de Gal.legos.

Domingu, 25 de mayu de 2014          Cenera - El Molín - Camba - Coxigal - Foz - Pandil.lu - Talambreo - Collada La Segá - Picu Escayil - Picu Les Águiles - Picu Cuitu - Picu Llosoriu - Collada Tíu Vicente - Vil.lar de Gal.legos - Cenera. 

         "Xubir un monte ye un esfuerzu duru, y pa munches persones, inclusive un esfuerzu inútil. Pero yo siempre salí llargamente compensáu." Josep de Tera

          Fixera la mayor parte d'esti  percorríu'l pasáu mes de febreru: Caleyando pel valle de Cuna y Cenera...
          Prestárame muncho y aquel mesmu día metióseme ente ceya y ceya repetir la escursión.
          Nun sé si a tola xente que la gocia caminando per montes y caleyes-yos pasa lo mesmo que a min. Un día sí y otru tamién, mientres disfruto viendo y leyendo paseos d'otres persones, voi amestando rutes nueves a una llarga llista de "pendientes".
          Si a eso axunto les que me presta volver facer, como foi nesti casu, y les qu'imaxino cuando faigo una nueva, el catálogu cada día ye más ampliu.
          En fin, mientres haya fuercies físiques y ánimu, hai abondos sitios pa siguir prauticando esta afición que tantes satisfaiciones mos da.
          Hasta la collá La Segá fixi'l mesmu camín que en caleyando pel.. D'aquí p'alantre siguí pel cordal de Gallegos hasta llegar al guapu miradoriu que ye'l picu Llosoriu.
          Dempués volví faldiando la xerrina hasta la collada Tíu Vicente pa baxar per Vil.lar de Gal.legos como na primera escursión.
          Nun toi mui seguru de los topónimos Escayil, Les Águiles y Cuitu porque al tratar de documentame, como munches veces pasa, atopé desacuerdos en mapas y autores. De toes formes estos paeciéronme los más fiables.
          Conclusión: el barru del entamu, la borrina y l'orbayu nun m'estrozaron una guapa mañana de domingu y el paséu prestóme a esgaya.
          Pémeque  la caminata merez la pena y ye recomendable.

Ver todas

Consigue el tuyo

De Pra a Pra (Piloñeta, alredores de Peñamayor)

          Vienres, 16 de mayu de 2014          Pra (Piloñeta) - Sienda la Ribera'l ríu La Peña - Campanal - L'Artosa - Picu Castiellu - Colláu Melendreros o la Campa - Llames Llagar - Les Praeres - Colláu la Varallonga - Mayáu Pastor - La Canal - Foces del Pendón (Les Meceures, Los Fornos) - Bocarral - Pra.

          "Frente al desastre (del nuesu mundu actual), el monte ye una de les escapades más guapes. El monte ye'l ser pluscuamperfeutu, a quien veneramos y delantre'l cual nun se pue más qu'esbozar una danza. Un reinu de verdadera llibertá, un pequeñu cachu de paraísu."François Florence"

          N'ochobre de 2012 entamé a facer esti  mui pocu cobiciosu blog. Nun pensaba que podía llegar a cien entrades. Col pasu'l tiempu va agarrándose-y  ciñu y conviértese casi nuna obligación rutinaria pero satisfactoria.
           Préstame que seya un paséu per Nava el qu'arredondie esti, pa min, entretenimientu.
           Los que me conocen saben l'especial afeutu que-y tengo a esta fastera d'Asturies y sobre too a Peñamayor.
           Si nun m'alcuerdo mal, pémeque ye la cuarta vez que repito esti percorríu nos últimos cinco años. De xuru que paga la pena facelu.
           La guapura de la sienda la Ribera'l ríu La Peña o de les vistes dende l'Artosa o dende'l picu Castiellu. Caminar del colláu de la Campa a Les Praeres per Llames Llagar. La guapa travesía del colláu La Varallonga al Mayáu Pastor; les Foces del Pendón o el guapu carbayéu pel que se pasa pa llegar a Bocarral son llugares más que atrayentes pa qu'esta escursión seya de les más guapes que se puean facer nel entornu Nava y atreveríame a dicir que per Asturies.
            Cuando preparé esti paséu pensaba subir al picu La Varallonga dende Les Praeres. Una güeyada al reló fíxome arrenunciar y conforméme con faldiar  pela so mandrecha siguiendo los puntinos colloraos que mos lleven sin pérdiga al Mayáu Pastor.
          Yá tengo pensáu otru percorríu nel que tea incluida esta fácil y guapa ascensión a esti vistosu monte.
          Patié tantes veces per esta zona que ye comprensible que fale d'ella y de la so guapura en munches de les entrades del blog.
          Amás de les dedicaes a Peñamayor puen vese comentarios y semeyes en Foces del Pendón..., Alredor de..., Camín de Santu Tomás, Picu Oroxu y..., Foces del Pendón y palaciu La Ferrería...
          Ye una escursión que se pue aconseyar a cualquier persona que-y preste caminar pel monte y gociar d'un paisaxe que nun deceiciona. Nun tien nenguna dificultá. Si acasu los más de 21 kilómetros qu'esixen un pocu d'entrenamientu.

Ver todas

Consigue el tuyo

Peña Ubiña y Cerreos

          Miércoles, 14 de mayu de 2014          Casa de Mieres - Ubiña la grande (A medies) - Peña Cerreos - Casa de Mieres.

         “Ún, cola edá, llíbrase del deséu de facer les coses como los demás y fai tranquilamente y ensin mieu lo que-y paez a él.” William Somerset Maughan

          Guapu día de monte y tamién aclaratoriu, ¿cuantes veces serán yá?, de que los años nun pasen de baldre.
          La mio intención yera subir a Peña Ubiña dende la casa de Mieres y volver pel mesmu camín. La última vez que tuviera nesti emblemáticu monte de "los Alpes Tuizos", como diz un bon montañéru y amigu, subiera dende Tuiza d'Arriba. Y d'eso  pasaren unos cuantos años.
          Foi un día bien guapu, ensin borrina, que ye lo que más medrana me da cuando m'acerco al monte.
          El paséu mañaneru taba resultándome prestósu y too diba como tenía planificao: les guapes vegues  Candioches y Retuertu pa, dexando a manzorga Ubiña la pequeña, llegar al colláu Ronzón.
          Dende aquí empieza la "verdadera" subida que recordaba menos incómoda: los años...Cuando taba a 2252 m según el mio GPS atopéme con un neveru al que nun m'atreví nin siquiera a intentar superar. Sentéme un poco a la so vera y con una pequeña deceición di la vuelta.
           Faltábenme 159 m de desnivel y unos cuantos más de caminar pa llegar a la cume. Pero alcodábame que l'arista superior ye más ancha y fácil d'andar. Asina que volví pal colláu Ronzón cola moral daqué baxa.
          De toes formes tengo bastante asumíes les mios torgues de vieyu, cada días más grandes, y sobre la marcha decidí dir a peña Cerreos. Nesti monte nunca tuviere.
          De oeste a este según venía  de peña Ubiña fui subiendo y tamién me resultó un poco complicao llegar a la cume. Sobre too una última canaluca na que tuvi que valime de les manes. (Nun sé cuantes veces me prometí nun volver a subir a un monte nel que tuviera qu'usales, pero...)
          De toes formes prestóme y pasé una bona porción de tiempu xintando daqué, viendo les marques de les fortificaciones de la guerra civil y dexando que los mios güeyos gociasen del paisaxe.
          La baxada hacia'l sureste paecióme más cómoda y disfrutando del paséu, caminando seliquino, acerquéme a la casa Mieres.
          Un bon día de monte y la confirmación cada día más evidente de que los años nun pasen gratis.
          De toes formes como diz Somerset Maughan  tamién tien dalguna ventaya. El que nun se conforma...

Ver todas

Consigue el tuyo

La Mostayal (Per dos caminos distintos)

          Martes, 16 d'abril de 2014 y domingu, 4 de mayu de 2014          Peñerúes - La Boza - Llanu Fonderu - Llanu Cimeru - El Canalón - La Mostayal - Llanu Fonderu - La Boza - Peñerúes - Torrexón de Peñerúes - Peñerúes.
          Peñerúes - La Boza - Llanu Fonderu - Mayáu d'Ordiales - Vega Cotina - Mayáu La Piñera - La Mostayal - Pan de la Forca - Les Teixeres - Braña Gaméu - Llanu Cimeru - Llanu Fonderu - La Boza - Peñerúes.

          "Suaño colos Montes inaccesibles, los Mares alloñaos onde duérmese'l sol..." Henri Russell

          Siempre tuviera ganes de baxar de la Mostayal per Les Teixeres y Braña Gaméu. Por falta tiempu o desdexamientu nunca llegaba'l día.
          Subiere y baxare bien de veces dende La Vara o Peñerúes pero nunca atopaba'l día de baxar pela canal que mos lleva a les Teixeres y la braña Gaméu pa completar un guapu percorríu circular.
          El martes 16 d'abril diba ser el día correxir lo que munches veces me propunxi. Con esi enfotu dexé'l coche nel bon aparcamientu de Peñerúes, a la vera'l polideportivu y del monumentu al montañeru.
          Entamé la escursión y al pocu de pasar La Boza la mio cabeza, que cambia con facilidá d'idees, díxome que si nun sería meyor subir per onde pensaba baxar.
          Imaxinao y fecho: cuando llegué al esvíu, per onde davezu s'anicia l'ascensu, siguí pel camín que sigue de frente y pel qu'en principiu pensaba volver.
          Al llegar a un prau qu'hai qu'arrodiar pa dir al alcuentru de la canal pela que se sube a Pan de la Forca volví a cambiar d'idea y aprovechando que'l monte taba bastante llimpiu de maleza tiré p'arriba llegando a La Mostayal per un camín imprevistu pero bastante prestosu.
          La baxada fíxila per una de les siendes más habituales y como atayare na subida y me sobraba tiempu añadí-y al paséu una visitina al torrexón de Peñerúes que siempre presta.
          Como dexara pendiente les mios intenciones del aniciu, taba obligáu a repitir la caminata y esta vez fíxilo como lo pensare'l primer día.
          Una de les escursionines que borro de les "miles" que tengo pendientes. Lo que nun quier dicir que nun la repita. Siempre son interesantes estos percorríos que tan cerca casa.
          Quedóme'l resquemor d'abandonar el camin principal poco dempués de Braña Gaméu y tener qu'engardiame con cotolles, escayos y felechos hasta poder baxar pa garrar la sienda que va pa La Boza.
          Creo que la mio opción postrera nun ye mui aconseyable sobre too al final de la primavera y en branu cuando abonda'l zarzal. Meyor siguir pel bon senderu.
           Otres dos guapes mañanes de paséu pel monte.

Ver todas

Consigue el tuyo

Siempre presta volver al Monsacru

          Domingu, 27 d'abril de 2014         La Collá - Camín de la Llorera o de la Pastrana - Vega Les Capielles - Picu Ramiru o Cuitu Ramiru (Onde pon picu Monsacro) - Picu Llanu Villar (Onde pon La Fayona) - Picu La Fayona - Picu Mariellu - Picu Granda Madalena - Camín del Cintu - Los Yanos - Sienda debaxo la escuela escalada d'Otura - Otura - Cantu la Xerra - La Collá.


         "Montañeru que nun se equivoca, o nun va al monte o ¡menuda boca!"   Anónimo

          Decía'l montañeru suizu Erhard Loretan: "¿Cómo pue esplicase a la xente que nun xubió na so vida a un monte, por bien baxu que sía, lo qu'asocede ellí arriba?
          Un pensamientu asemeyáu téngolu siempre cuando toi nun monte  más o menos cercanu, perpatiau o nuevu pa min, de munchu o pocu altor...
          El Monsacru ye un sitiu tan cercanu a Uviéu, tan percorríu polos que mos gusta'l monte y vivimos nesta ciudá que casi paez que cuando  lu patiamos, esi día, nun salimos de casa.
         Ye un miradoriu perguapu de l'Asturies central y de munchos de los sos montes: Uviéu, Xixón, el banzáu de los Alfilorios, el torrexón de Peñerúes, los montes vecinos:  Garcilleru, Manteca, Magarrón, Llosoriu, Mostayal, Aramu o los más alloñaos de L.lena, Ayer,Casu, Ponga,...
         A min  préstame trotialu siempre y hasta dalgunes veces celebré  l'Añu Nuevu  dando un paséu per elli.
         Daquella siempre entamaba la miniescursión dende Los Yanos subiendo pela pista y volvía pel mesmu sitiu.
         Dende que una señal pon torgues p'aparcar nos Yanos empecé a dexar el coche na Collá y a subir pel Camín de la Llorera. La verdá ye que préstame más y una montonera veces fixi lo mesmo: Vega Les Capielles, picu Cuitu Ramiru, picu Llanu Villar y vuelta pela mesma sienda.
          Nunca fixere'l camín circular volviendo pel Cantu la Xerra nin pasare pelos picos Mariellu y Granda Madalena. Quiciabes esti cambéu d'itinerariu, xunío al mio estáu d'ánimu y al bon tiempu que taba, fixo d'esta escursión algo especial.
          Facía muncho que nun lo pasaba tan bien nun monte. Les sensaciones que se sienten nestos momentos namás que les saben los que tenemos la suerte de tener esta afición y podemos prauticala de cutiu.
          Ye bastante enguedeyada la toponimia que s'atopa de los nomes de los sos picos. A min paécenme fiables les esplicaciones de Caminando por Morcín y remítome a elles.
           Nunca subí dende Viapará y tengo facelo a nun tardar. De xuru que tamién ye una alternativa interesante.
          Tamién tien que ser guapo la variante qu'esplica nel so escelente blog Javier Villa Cienfuegos.
          Ye una llástima la llinia d'alta tension que con sos xigantesques columnes crucia esti guapu monte. Tendremos que tar sollertes pa que coses como éstes nun vuelvan  pasar. (Hai un proyeutu arrequexáu pola crisis que pretende franquiar la xerra Peñamayor).
          Una vegada más tengo que dicir que ye casi imposible pasalo meyor. Foi una mañana de monte pa nun escaecer.

Ver todas

Consigue el tuyo

Dos paseos asemeyaos per Peñamayor

          Martes 22 d'abril de 2014          Aparcamientu cabaña (debaxu Les Praeres) - Les Praeres - Ortigosa -  Espines - El Covayu - Anés - Picu Los Caspios de Breza - Breza - Picu La Triguera - Colláu la Goleta Llagos - Pozu Funeres - El Raigáu - Campagüés -  Fayacava - Colláu Melendreros o La Campa - Llames Llagar - Les Praeres - Aparcamientu cabaña. 

          Vienres, 2 de mayu de 2014          Aparcamientu cabaña (debaxu Les Praeres - Les Praeres - Ortigosa - Espines - El Covayu - Anés - Picu Los Caspios - Breza - Picu La Triguera - Llagos - Picu La Goleta - Colláu la Goleta Llagos - Pozu Funeres - El Raigáu - Campagüés - L'Ortigal - Peñamayor - Les Antenes - Colláu Melendreros o La Campa - Llames Llagar - Les Praeres - Aparcamientu cabaña.
  

          "El monte ye un mundu a que'l so descubrimientu entregóse l'home nestos dos últimos sieglos, movíu, según xusta expresión de Irving, por una abondante dosis, d'amor a l'aventura, de deséu apasionáu d'aportar a una revelación." E.Wyiss

          Pémeque toi recuperando la regularidá  de los mios paseos per Peñamayor. A dicir verdá, nun me cansaré de repetilo, ye'l monte que más me presta y onde meyor lo paso. Siempre atopo daqué que me sorprende anque tea fartu velo y dende llueu nunca me deceiciona.
          Nel primer percorríu fixo un bon día que namái lu estrozó la mio escaecedera tiesta.
          Nun concibo dir al monte ensin la máquina retratar. Ye una parte casi imprescindible de les mios escursiones. El problema foi qu'al dir a facer la primera semeya aquello nun furrulaba. Desiguida dime cuenta que la batería dexárala en casa, nel cargador.
          Esti contratiempu fíxome decidir que tenía que repetir el percorríu sin tardar. Fixi dalguna semeya col teléfonu pero nun ye lo mesmo. Les quince primeres son d'esi día. Asina y too prestóme.
          Selmana y picu má tarde salí col plan de facer la mesma escursión y, esta vez sí, cola cámara en bones condiciones.
          La meteoroloxía yera distinta y la borrina más o menos espesa acompañóme tola xornada. De toes formes nun impidía gociar col paisaxe que diba apaiciendo delantre los mios güeyos.
          Tando nos Caspios, mentanto xintaba daqué, entamé a pensar en facer dalguna variante nel percorríu.Dempués de la Triguera subiría a la Goleta, el piquín que zarra la vallina Llagos pel oeste, y dempués sin baxar al pozu Funeres, si nun taba mui emborrinao, siguiría pela falda al Ortigal y llueu a Peñamayor y Les Antenes.
          Facía años que nun taba na Goleta y prestóme. Amás nun tien denguna dificultá y casi s'ataya.
          Entamando a baxar nun se vía Peñamayor y decidí dir pel pozu Funeres. N'efeutu, fíxilo asina pero poco dempués, yá per Campagüés, vi qu'espeyaba un poco y volví a cambiar los planes.
          Lo d'escamplar foi momentáneo pero yá nun me volví atrás y anque nun prestara tanto pasé pela Botella Sidra y pel pucu El Tarnu (Les Antenes). La verdá ye qu'en Peñamayor, por ser un monte tan patiáu poles mios botes, ye l'únicu sitiu onde nun me da llercia andar con borrín.
          Prometiérame fae tiempu nun baxar más pela canal que va al colláu Melendreros porque nun guardaba bonos recuerdos d'ella pero al pasar a la so vera volví a cambiar d'opinión y pali que pali llegué a la Campa sin denguna dificultá. ¡Hasta prestóme!
           Yá en casa, al descargar el track, resultóme llamativo que caminare exautamente la mesma distancia que nel primer paséu: 16,1 Km.
           Dos caminates paecíes que a pesar de dalgunes  torgues prestáronme en cantidá.

Ver todas

Consigue el tuyo

Techos de Cuideiru y Pravia: Picos Cuetu y Llan de Cubel

          Domingu, 30 de marzu de 2014          Peña Cesteiro - Picu Cuetu - Penes del Vientu - Cortafueos - Portiella - Colláu con depósitu agua - Picu Llan de Cubel - Vuelta pel mesmu camín  con pequeñes  variantes.

          "¿Cómo pue esplicase a la xente que nun xubió na so vida a un monte, por bien baxu que sía, lo qu'asocede ellí arriba?" Erhard Loretan

          Dixi munches veces qu'un monte anque nun llegue a 500 metros d'altura pue dar tantes satisfacciones como cualquier otru de más altor y prestixu.
          Caminar, subir, respirar aire puru, ver el paisaxe que tenemos delante y el que va apaiciendo a los nuesos güeyos, na midida qu'ascendemos cada metru, proporciónamos un placer inigualable.
         Si xuntamos a esto, yá de por sí suficiente,  el que tamos pisando los techos de dos conceyos d'Asturies ye fácil entender qu'esta escursión tien interés y paga la pena facela pelo menos una vez. Yo col tiempu tengo pensao repitila.
          Dempués de la ilesia de San Martín de Luiña vamos per un bon carreterín en direición a Cipiellu y Brañaseca. Aparcamos cerca la desviación a Gallineru y Lendepeña y entamamos la caminata.
          Al picu Cuetu la Ricorva, enriba Brañaseca, llégase en pocu tiempu y ensin dicultá. Nel llende del los conceyos de Cuideiru y Valdés, ye'l techu del primeru d'ellos.
         La cume más alta del conceyu pixuetu ye fácimente reconocible porque tien vértiz xeodésicu y ta al entamu'l percorríu. Ye un guapu miradoriu de la costa  y  de los viaductos de la Concha  Artedo y San Pedro.
          Siguimos el camín con  direición sureste pela xerra Los Vientos a la solombra y col ruíu de
 los xigantescos molinos del parque eólícu de Curiscao, Baos y Pumar.
          Esta agrupación de aéreoxeneradores estiéndese pelos Conceyos de Salas, Valdés y Cuideiru. Ye`l más grande d'Asturies y ún de los de mayor xeneración eólica d'España. Ta compuesta por 86 enormes artiluxos.      
          Acabáu'l paséu pente  los asordecedores artefautos baxamos per un cortafueos  pa entamar a patiar pela xerra Pumar.
          De siguío llegamos al picu Llan de Cubel al que tamién se sube sin ninguna dificultá.
          Tamos nel techu Pravia. Dende esti monte, nel llinde  los conceyos de Cuideiru y Pravia, hai una bona panorámica de la costa central d'Asturies: Oviñana, Cabu Vidiu, Peñes,... Y de les xerres interiores. Dende los Picos d'Europa a la xerra l'Aramu  los nuesos güeyos puen gociar d'unes mui bones vistes.
          Tuvi daqué dolimientu al comparar dalgunes semeyes qu'atopé cuando tovía nun punxeren el parque eólicu. Too seya pol nuesu aforfogu consumista...
          Nun voi dicir que ye'l percorríu más guapu y montañeru que se pue facer pero como dicía a lo primero ye interesante y suxestivu.

Caminada nel entornu Peñamayor: La Varallonga

          Vienres, 28 de marzu de 2014          Pra - Pista a Les Praeres - La Revueltona - Mayáu del Valle - Pista a Les Praeres - La Varallonga - Mayáu Pastor -Tabléu - La Vallorita - Bocarral - Pra.

          ¿Esto de mediu ambiente será porque yá destruyimos la metá? (Anónimu)

          Conozo dalgunos montes de la mayoría conceyos d'Asturies. Magar qu'hai munchos que me gusten nunca me cansaré de dicir qu'esta xerra, modesta n'altor,  ye pa min lo más guapo d'Asturies. Sé que nun soi oxetivu y que toi influyíu pola vecindá pero ensin dulda que ye'l cordal onde meyor lo paso.
          Esti percorríu, que como munchos otros, entama en Pra ye una escursión curtia y factible pa cualquiera mínimamente avezáu a patiar pel monte.
          La primera parte, un kilómetro y mediu aproximao, trescurre pela pista que dende Nava xube a Les Praeres.  A mandrecha hai un castañéu perguapu. Na Revueltona coyemos el camín que sal en direición contraria y pel que con facilidá llegamos al casi abandonáu mayáu d'El Valle.
          Siempre que voi pequí nun me canso de facer semeyes de los pueblinos de la Puente Arriba: Piloñeta, Grátila, Basoréu, la Curtia, Cezosu, la Capitana, la Viña... Al igual que Peñamayor tamién me paecen de lo más guapo d'Asturies.
          Pasamos un portelleru y tamos nel Valle, onde yá casi nun queden cabañes en pie. Equí acábase'l bon camín. El que siguía p'arriba hasta cerca Les Praeres ta perdíu. De momentu y nesta época del añu pásase  relativamente bien. Cola primavera avanzada y nel branu los escayos y otra maleza pónenlo daqué más difícil.
          Salimos a la pista que dexáremos na Revueltona y dempués d'unos cuatrocientos metros entamamos la guapa y fácil xubida a la Varallonga.
          Esti picu da a los nuesos güeyos muncho más de lo que podía esperase de la so modesta altura: a los sos pies Les Praeres, el picu Reondu o la Cota, l'Orozu, el guapu mayáu de Llames Llagar, tola xerra Peñamayor, la Múa, la Xamoca, el Facéu y otros montes de Piloña, de Ponga,... Al Norte dende'l Sueve a Uviéu: pueblinos de Piloña, Cabranes, Nava, Sariegu, Sieru, Noreña, Uviéu,...El cordal de la Llomba, peña Careses,...Cerquina tolos pueblinos de la Puente Arriba, el palaciu la Ferrería, la guapa villa de Nava,...¿Hai más que pidir?
          El camín de la Varallonga al mayáu Pastor, pente ablanales, ye prestosu a esgaya.
          Dempués baxamos pela pista que va a H.uensanta gociando de bones vistes.
          Un kilómetru antes del antiguu balneariu esviámosmos a manzorga pa dempués de travesar un guapu carbayéu, que dacuando déxanos ver el palaciu la Ferrería, llegar a la güeria de Bocarral y de siguío a la pista Les Praeres y a Pra. D'esta manera completamos un entreteníu percorríu circular.

Ver todas

Consigue el tuyo

Picos Renorios y Texera

     Domingu, 16 de marzu y domingu 6 d'abril  de 2014          Coto Bello - Picu Renorios - Picu Texera - Coto Bello (Saliendo y llegando a Coto Bello con pequeñes y evidentes variantes pa dir y venir).  


          "Los montes nun son estadios onde satisfaer la nuesa cobicia deportiva, sinón catedrales onde praucticar la relixón de nós." Anatoli Boukreev


          Pue pensase con un daqué de razón que cuanto más alto subamos más posibilidaes tenemos de ver y gociar paisaxes impresionantes y d'una guapura estraordinaria. Tamién ye verdá que n'Asturies hai munchos dosmiles nos que les vistes déxenmos ablucaos.
          De toes formes, tolos que mos presta caminar pel monte, conocemos picos de menor altor que mos ofrecen unes panorámiques esceicionales.  Pienzu, Mofrechu, Monsacru, Turbina, Peñamayor o  l'uvieín Narancu son dalgunes cumes que puen valir d'exemplu.
          El picu Renorios (1334 m) y sobre too'l Texera (1557) son exemplos a añader. Xuntando a esta modesta altura qu'una carretera asfaltada ponmos a 1200 metros, pue deducise que'l percorríu per esti cordal ye fácil y agradecíu.
          La zona, enllena pistes de la reciente esplotación minera a cielu abiertu, ta bastante bien restaurada. Alcuéntrense pequeños abeduliares y dalguna viesquina  fayes que de xuru que sobrevivió a la actividá minera. Tamién hai praderíes, nesta época con mui pocu ganáu. Recuérdame daqué a la guapa escursión pela Sienda Tuilla.
          Nun día escampláu, como ún de los que yo disfruté, podemos dexar que los nuesos güeyos gocien mirando en toles direiciones pa los montes que mos arrodien: El cordal de Carracéu, Les Ubiñes, l'Aramu, el cordal de Longalendo col Cuetu Ventosu y la Burra Blanca, Peñamayor, Peña Mea, el Cuchu, Retriñón Torres, Toneo, los picos de la Llebre (Estorbín de Valverde, Tresconceyos, Pisones, Robequeres,...). Hasta'l Cornión podemos almirar dende'l picu Texera.
          Y como vamos caminando per una xerra que separa los valles del ríu Aller y el del Negru vemos y almiramos dalgunos de los sos guapos pueblos: Soto, Serrapio, Uriés, Cabanaquinta, Cuergo, Pel.luno, Beyo, Conforcos , Santibanes de Murias,...
          Dixérenme que nel Texera había un horru en miniatura como buzón de cume. Llevé una pequeña deceición al nun atopala y anque yá en casa pudi ver semeyes de fae unos años, al paecer va tiempu que desapaeció.
          Será porque ta cerca y ye mui apropiada pa los fines de selmana que siempre me presta venir a comer a casa o porque a los vieyos préstamos lo fácil pero'l que repitiese'l paséu dos veces en tres selmanes ye señal de que me gustó abondo. De xuru que nun tardando repitiré la escursión con munches de les variantes que se puen facer pela zona.


  






Sienda Tuilla.

S. Pedru Nora - Picu Llampaya - Uviéu (Ciudá Narancu)

            Domingu, 2 de marzu de 2014           Apeaderu  San Pedru Nora - El Campanal - Vuelta y campu a traviés per un castañéu pa xubir a Quexu - Quexu - Ponte Gallegos - Rodiella - La Vega - Les Llanes - Campu Cimeru - El Finsu - Peña Llampaya - Contriz - Ules - Camín d'Ules a Uviéu - Carretera'l Narancu - Uviéu (Ciudá Narancu).

          "Cuando tengas un problema... camina pa que la to mente y corazón vuelvan tomar el so ritmu." (Anónimu)

          D'Uvieu a San Pedru Nora hai trenes de Feve. Ún d'ellos ye'l qu'utilicé pa empezar la escursión.

         Nun pue fallar. Por fácil que seya'l paséu siempre meto la cazuña. Nesti llargu y entreteníu percorríu entamé les equivocaciones al poco d'entamalu. Llevaba alredor de 1,5 km cuando tuvi la tentación de salime de la sienda pa siguir a la vera'l Nora y xubir a Quexu pela viesca y los praos qu'hai debaxo'l pueblu.

          Superé’l impulsu y siguí. Pero cuando llegaba a Campanal di la vuelta y consumé la meteura pata. El camín pel que paicía que  pasare apocayá un tractor acabóse de secute.

          Taba metíu nuna viesca llena escayos, inclinada y resbaliosa pol agua que cayere los díes anteriores y que siguía como si nunca lloviere.

          El calzáu que llevaba yera’l adecuáu pa dir per pistes pero nun por esa clase terrenu. D’esta miente  patié p’arriba y p’abaxo, a mandrecha y a manzorga ensin rumbu, con mieu a dame un xostrazu  hasta que dempués d’un tiempo que me paició escomanáu salí a unos praos pelos que xubí a Quexu.

          Si daquién-y apetez facer esti percorríu nun-y aconseyo facer daqué asemeyao a lo mío. Sobre too n’iviernu. Siguiendo pela pista bien marcada va gociar muncho más.

           Sacante esti percance el paséu prestóme y eso que l’orpín fixo que llegare a casa con una moyadura abondo grande.

          La primera parte’l paséu al llau d'un Ñora crecíu foi entretenida y relaxante acompañáu pel ruxir del agua y el piar de los paxarinos.

          Del ponte Gallegos al Narancu disfrútase a lo primero d’un paisaxe paecíu, también a la vera’l ríu.

           Dempués per un camín a vegaes bien pindiu y pente árboles, sobre too castañales, subimos a la carretera Brañes pasando antes al llau de construcciones de la guerra civil qu' imaxino que’l gran Víctor sigue recuperando.

          Un tramu casi llanu per carretera y xunto a una corte grandona qu’atopamos a manzorga entamamos a subir per una pista bien pindia qu’ensiguida dexamos p’ascender al picu Llampaya.

          Esta modesta cume del Narancu, que a min paezme la más montañera, ye un guapu miradoriu d’Uviéu y de gran parte d’Asturies.

          Síguese un cachu pela parte cimera del monte pa baxar per un senderu bien guapu y entamar llueu a subir per otru camín a Contriz. D’equí  a Ules per una pista de formigón y pel camín que va casi paralelu a la carretera salimos a la esquina norte del parque Pura Tomás. Tamos n’Uviéu.
          Pasamos al llau del Lobato y enseguidina Ciudá Narancu y en casa a posar la moyadura.
          Magar qu’hubo dificultaes foi una escursión agradable.         

http://youtu.be/dxGNkGaJpcA

Caleyando pel valle de Cuna y Cenera y los montes que lu arrodien.

          Domingu, 2 de febreru de 2014           Cenera - El Molín - Camba - Coxigal - Foz - Pandillu - Collada La Segá - Collada Tíu Vicente - Vil.lar de Gal.legos - Cenera.  

           "Ten presente que la felicidá atópase a lo llargo del camín, nun al final de la ruta."  (Anónimo)

          Prestóme esti percorríu pel conceyu Mieres.
          Hai delles perceiciones sobre pueblos y villes de les cuenques mineres, al mio mou d'entender, abondo equivocaes. Ye verdá que la añorada actividá minera estrozó dalgunes fasteres d'estos guapos valles d'Asturies. Pero nun ye menos cierto qu'hai pueblinos, montes y valles de lo más guapo del nuesu país.
          Nun hai más que que dir a cualquier aldea, caminar peles sos caleyes o subir a los sos montes pa dase cuenta que tamos nun sitiu maravillosu que nun tien nada qu'envidiar a otres zones más conocíes pola so guapura.
           A vegaes namás que pensamos en dalgunos llugares d'Asturies pa prauticar la nuesa actividá favorita.  Toi falando de Somiéu,  Teberga, L.lena, Quirós, Ayer, Casu, Ponga,  Amieva, Cangues d'Onís, Onís, Cabrales, les Peñameyeres,...
          N'efeutu; per estos conceyos caleyamos, subimos, baxamos, agüeyamos y almiramos. Pero nun hai qu'escaecer qu'el "paraisu natural" de la publicidá ye muncho más qu'eso. Y sin olvidar a otros conceyos, tamién perguapos, los valles mineros y los montes que los arrodien dan pa munchos percorríos a cada cual más guapu.
          Entamé la escursión unos quinientos metros antes de Cenera, nun sitiu onde hai un bon aparcamientu. Pel branu podría dexase'l coche un poco más arriba, nel área recreativa del Cantu que nesta época taba pesllada.
          Déxase la carretera a la entrada del barriu El Molin. Nesti sitiu, per un camín al principiu con bon pisu pero qu'ensiguida conviértese nun barrizal vamos ganando altura. El sudu y la dificultá p'alendar que produz la pindia cuesta casi pasa desapercibíu por tolo guapo que mos arrodia. Caminamos per una guapa viesca sobre too de carbayos que fae que los nuesos sentíos gocien n'abondancia. N'ocasiones tenemos unes bones vistes de tol valle de Cuna y de les xerres de Cuba y Segá, de Diego y Gallegos que lu arrodien.
          Yá per un camín menos cuestu y caminando agora en direición oeste vamos acercándomos al altu La Segá, divisoria ente los conceyos de Mieres y L.lena. Dende equí, en direición norte, col Aramu a manzorga, el Monsacru casi de frente y a mandrecha el valle colos sos pueblinos, los nuesos güeyos siguen sintiendo les sensaciones prestoses que mos acompañen tol percorríu.
          Na campa del Tíu Vicente agarramos un camín a mandrecha que mos cambia'l sentíu de la marcha pa baxar al guapu pueblín de Vil.lar de Gallegos. Agora per una carreterina, con pocu tránsitu, llegamos a Cenera y al principiu y fin de la nuesa guapa escursión.

Ver todas

Consigue el tuyo

Pela Viona y dalgo más. Sieru, Sariegu y Nava

          Vienres, 17 de xineru de 2014          Solvay - La Ventuca - El Reconcu - El Quintanal  (Too per Lieres-Sieru) - Llamasanti - Barbechu - Vega - Moral - Ñora - La Nozalea  (Los seis en Sariegu) - L'Abarcón-Los Andaluces ( El Remediu -Nava) - Rianes - Sorrobín - El Reconcu - La Ventuca - Solvay. 

          "Caminando, caminando voi buscando llibertá. Oxalá atope camín pa siguir caminando." ( Víctor Jara)

          No que va d'iviernu, a nun ser pel Narancu, fueron pocos los percorríos que fixi pel monte. Eso nun quier dicir qu'abandonare les mios actividaes favorites: "patiar y retratar". Anque tengo gana monte esfruté y sigo pasándolo bien faciendo escursiones más cercanes a mio casa patiando per sitios que por h o por b préstenme a esgaya.

          Nesti casu danse munchos fechos que faen qu'esti paséu tenga pa min muncho d'especial.

          En primer llugar trescurre pelos tres conceyos onde tan los mios raigaños: Nava, Sieru y Sariegu.
          L'entamu (Solvay) tien pa min un significáu especial como yá espliqué en Pel Cordal de Nava. 

          La Viona, Hai una Llínia Trazada, el prau Moral, el monte Los Andaluces,...y un montón más de pallabres rellacionaes cola caminata formen parte del mio vocabulariu dende que yera pequeñu.

           La Viona y la Llínia Trazada del cantar ye lo mesmo. Foi'l resultáu d'el proyeutu de facer un ferrocarril de Samartín del Rei Aurelio a Xixón pasando per Lieres, Sariegu y La Collada. Mio madre, nacida na Faya (Lieres) ponía davezu a la Viona como puntu de referencia pa situar praos, caleyes, quintanes y llugares.
          Les mios raices de Sariegu tan bastante alloñaes nel tiempu. Asina y too siento esti conceyu como dalgo mío. Ye por ello que préstame abondo caleyar per elli y relleer les guapes descripciones toponímiques de les sos aldees y ver lon nomes de toos sus caminos. Por poner dalguna torga diría que me prestaría más si tuviera escrito na nuesa llingua o billingüe. De toes formes naide ye perfeutu...
          Entámase a caminar a la vera los castilletes de les mines de Solvay. Mui cerquina d'onde yeren los llavaderos.
          Hasta cerca El Reconcu vase pela caxa del ferrocarril que llevaba'l carbón a Rianes. Esti tramu, antaño compartíu por mineros andando o en bicicleta y el tren, ye prestosu a esgaya. Pente praos carbayos y castañales va viéndose la barriada Los Cuarteles, la capiella  la Salú, el barriu La Pedrera, el prau Omeo,...
          Abandónase esti camín poco dempués de pasar per debaxo la Carretera Nacional 634. Un poco más alantre tamién s'anda per baxo les víes de Feve.
          Dempués de pasar al llau de la ilesia Lieres, entámase una lliviana subida que pente praos llévamos a Llamasanti (Sariegu). Nesti casu yo escoyí la variante peatonal más pindia y, pa min, más guapa que la de les bicicletes. Traviesa pequeñes viesques y hai un "sube y baxa" que asemeya al caminar pel monte.
          Dende Barbechu el percorríu per Sariegu ye per carreterines llocales pero nun ye nada aburrío porque como dicía antes ca poco llamen l'atención los lletreros colos nomes los caminos o los paneles coles descripciones toponímiques.
          Dende Ñora al Abarcón-Los Andaluces (El Remediu-Nava) hai unos 1300 metros de subida que faense curtios polo guapo l'entornu.
          Nun ye menos guapu'l camín que pasando per Rianes llega a Sorrobín y otra vez a la ilesia Lieres per onde pasamos al dir. Vamos viendo casi toa la parroquia El Remediu, La Pez, La Faya, El Pino, L'Acebal,..., la xerra Peñamayor.
          Los últimos kilómetros coinciden colos del entamu. Ye un bon momentu pa dexar que los nuesos güeyos vuelvan a gociar de lo que yá viemos porque con una perspeutiva distinta siempre descubrimos coses nueves.
          Lo dicho al principiu: anque nun sea pel monte tamién pue ser prestoso caminar.

Xerra d'Escapa: H.oyadongu y Mofrechu

          Vienres, 3 de xineru de 2014          Collada Ixena - Collada La Felguerina -Mayáu d'Hueses - Picu H.oyadongu - Picu Mofrechu - Vega Maor - Mayáu Vegalah.uente - Mayáu d'Hueses - Collada Ixena.

          "Odios y amores, favores y desprecios pasaron por min ensin dexar una buelga; les borrines de los montes, sicasí, inundaron la mio alma pa siempre; yá nun salen d'ella, yá nun van salir enxamás" (Pio Baroja) 

          Paga la pena facer una excursión a estos picos de la xerra La Escapa.

Les vistes dende  ellos son perguapes. Al norte una bona parte de la costa oriental d’Asturies, sobre too Ribesella y los meandros y desembocadura del ríu que  pon nome al pueblu. Al Sur gran parte del cordal interior asturianu, destacando los mui cercanos Picos d’Europa. Al este y oeste les guapes xerrines costeres.

Por esti motivu ye perimportante que’l tiempo acompañe, sin borrines nin ñubes, nos percorríos per estos cordales tan arrimaos a la costa.

Nesti casu nun foi el meyor día’l que escoyí pa facer la caminada. Prestóme pero hai xornaes muncho meyores pa que los nuesos güeyos puean gociar y les máquines de retratar reflexen meyor lo que mos arrodia.

El paséu ye cenciellu. Dende’l colláu Ixena, onde dexé’l coche, per una pista d’usu ganaderu va ganándose altura sin dificultá . Paezme una bona opción dir primero al H.oyadongu y dempués  d’almirar lo que la metereoloxía mos dexe, volver peles crestes pa llegar al más conocíu Mofrechu.

Si tenemos dos coches podría dexase ún nel colláu Ixena y l’otru en El Tornu y entonces sería meyor entamar pel Mofrechu y facer el percorríu al revés pa, pasando pel H.oyadongu, volver cresteando al Tornu. Como nun yeral’l casu baxé al camín del Mofrechu pa enllazar cola pista que abandonare pa dir al primer picu.

Nun m’alcuerdo les veces que patié per esta xerra, hebo díes meyores pero también peores. Volví pa casa contentu y cola intención de repitir el paséu en cualquier momentu. Ye curtiu y nun precisa muncha planificación.

Alredores d'Uviéu: pel Narancu y daqué más. Ún de los mios paseos del colesterol 2

          Domingu, 22 d'avientu de 2013         Uviéu ( Ciudá Narancu) - Carretera'l Narancu - Samiguel de Lliño - Fonte Los Pastores - Colláu occidental del picu Paisanu - PR. AS 239 - Picu Paisanu - Cuyences - Poyana - Vía Renfe - Campu fútbol Santa Bárbara - Parque l'Acebera - Sienda l'Acebera - Puente Vieyu - PR. AS 239 - Cases de Llaviada - Cuyences - Fitora  - Villamexil - Barriu Tocote (Pumarín) - Ciudá Narancu.

          "Cientos de vegaes preguntáronmos por qué facemos esto. ¿Tú crees que nestos momentos entenderíen la nuesa respuesta? Da igual Iñaki, que mos entiendan o non, nós tuvimos la suerte de tener y sentir toos estos valores." Edurne Pasaban

          Paezme que facer exerciciu físicu crea dependencia. Nun creo que s'asemeye a la del alcohol, tabacu o otres drogues. Pero si que quiciabes puea igualase a dalgunes adicciones modernes: videoxuegos, internet, móvil, ludopatíes,...El casu ye que la sensación de bienestar que se siente durante y dempués d'un bon paséu desapaez y conviértese en malestar si pasen tres o cuatro díes sin poder facer una bona caminata.
          Yá dicía en "Ún de los mios paseos del colesterol" que a vegaes faigo paseos que m'apacigüen les ganes de caminar y en dalguna midida de monte. El Narancu, anque modestu n'altor, ye un cordal que pue dar ciertu xuegu montañeru.
          Lo cotidiano ye que camine tolos díes. Diez o doce kilómetros suel ser la media. Cuando taba n'activo, tando n'Uviéu, yera la Pista Finlandesa y la so prollongación l'escenariu qu'escoyía davezu. Nos díes curtios del tardíu y iviernu yera casi l'únicu recursu p'andar fuera de la ciudá de nueche. Solía allargar los paseos baxando per delantre la marmolería Cuyences pa volver a xubir al depósitu l'agua y volver pel mesmu camín.
          Facía munches otres variantes  según el tiempu que fixere o lo que se m'ocurriere nel momentu.                     Cuando llegaben los díes de más lluz solar, l'entamu la primavera, dirixía los mios percorríos al Narancu. Prestábame abondo ver pel Pevidal les families de xabariles, adultos y rayones, que fozaben y xugaben pente les vaques sin que nin unos nin otres s'alteriasen. Davezu siguía hasta la carretera Brañes y volvia per Llampaya, El Llano y Ules.
          De xemes en cuando facía esta mesma escursión o paecía. Pémeque, al menos yo, sacaba-y más xuegu a esti monte antes d'urbanizar el PR AS 239. Por esta razón nesta escursión salíme tolo que se m'ocurrió del camín principal. Pola mor d'esto, entafarré de barru'l mio calzáu poco dempués de cruciar la carretera y escoyer una esviación a manzorga de la pista del PR.
          El camín nun tien perda. Dempués de Samiguel de Lliño y xubir pel pindiu tramu asfaltáu que va a la fonte Los Pastores, préstame más el senderu de la mano izquierda que l'arrrodia y per una guapa viesca llega al colláu. Pue dise a mandrecha pela otra lladera, quiciás ye más curtiu pero a min nun me gusta.
          Llueu pel  PR AS.239, el picu Paisanu y bordiando pela mano drecha les instalaciones de RNE entamar a baxar pa la cara este del monte, cruciar la carretera y siguir pel PR  hasta un indicador kilométricu onde agarré un caminín a manzorga, usáu a maza por ciclistes, que se xunta otra vez al PR cerca Cuyences.
          En llugar de baxar pela guapa viesca que lleva a les Cases de Llaviada, pehí pasaré a la vuelta, síguí hacia Poyana.
          Cruciamos la carretera Villaperi, que pasa pencima la vía de Renfe que va a les canteres del Narancu, doblamos pa baxo pa caminar unos ochocientos metros a la vera'l ferrocarril hasta tomar una carreterina a mano izquierda pa pasar al llau del campu fútbol y metese nel parque l'Acebera.
          Un trechu pel parque pa baxar per una sienda que, dempués de pasar per debaxo la vía, va paralela al Nora hasta llegar al Puente Vieyu que cruciamos y entamamos otra vegada a caminar pel PR AS 239.
          Debaxo la marmolería dexamos el PR pa siguir con direición Fitoria, Villamexil, Pumarín y acabar la escursión.
           Nun foi una xenuina xornada de monte pero prestóme.

P.R. AS-43 Sorprendente Sienda Tuilla-Tiuya

          Vienres, 20 d'avientu de 2013          La Braña - La Tornera - La Braña'l Río - El Ceacal - Mirador del Peruano - Xerra Llorinte -  Baeres - La Braña.

          "Si desafortunadamente t'atopes nel paru, el monte tamién pue sirvite como válvula d'escape. Basta con buscar un altu cerca d'onde vives. De xuru lo tuvisti munchos años ensin llegar a velu. Diríxite a él. Dicho asina suena casi bíblicu, pero  asegúrote que cuando lu xubas, la to mente va funcionar a un ritmu muncho más provechosu y creativu que si te zarres en casa, dexándote aducir pola televisión." Juanjo Garbizu

          Cada paséu pel monte, y a veces tamién pel valle, guárdamos dalguna sorpresa, xeneralmente prestosa.
          Caminé per munchos sitios que m'impresionaron y dexáronme imaxes que nun escaezo. De toes formes, como esperabes por ello porque daquién te lo contare o porque leyeres dalguna información, el plasmu nun suel ser grande.
          Pémeque esti foi ún de los percorríos que más m'almiró. Nun yera d'esos sitios que crees que te van prestar y tienes pendientes de conocer.
         Yera vienres y quería tar en casa a meudía. Tenía que dir a dalgún sitiu que nun tuviere lloñe y nun m'apetecía recurrir a lo habitual: el Narancu, el Monsacru, los alredores d'Uviéu, Nava, Sariegu,... Alcordéme qu'apocayá leyere daqué sobre senderismu en Llangréu y paiciérame qu'había rutes que podíen tener interés.
          Sin pensalo muncho descargué de wikiloc el track del PR AS-43 y rumbu a Tuilla.
          A un kilómetro y picu ta'l guapu pueblín de La Braña onde hai sitiu abondo p'aparcar. Enseguidina d'entamar a caminar salse del pueblu y nun fae falta andar muncho pa dase cuenta que va ser prestosu'l paséu. Caminín pindiu, castañales, carbayos, ablanares, praos, el ruxir  del agua,... Una fonte y el regatu La Braña que baxa cantarín formando un guapu tabayón a la vera'l camín. Los díes anteriores lloviere a xarraes y de xuru eso fixo que llevare más agua de lo que trae davezu.
          Dempués de gociar del guapu saltu siguimos subiendo per un senderu pente finques y árboles. Pasamos per caseríes y dalgún tramu de pista o carretera. Un caminín ente felechos ye lo último que caminamos p'aportar al monte'l Ciacal que facía un cachu que columbrábamos.
           Nesti altu a casi 700 metros ta'l miradoriu El Peruanu. Agüeyamos y almiramos pueblinos de Llangréu, de Sieru, de Bimenes, d'Uviéu,...; La Llomba, Peñamayor,... Media Asturies del centru.
           D'equí p'alantre con direición suroeste per pistes de tierra de les antigües esplotaciones a cielu  abiertu de la Braña'l Río vamos caminando pela xerra Llorinte con bones vistes de parte Llangréu, del Aramu, les Ubiñes,...
           Nun ye tan ermu'l el terrenu como podía amosase. Ta recién repoblao y da la sensación que nunos años va tresformase nuna viesca tan guapa como pela que circulamos al entamu la marcha.
           Hai dalgunes llagunines que de xuru s'orixinaron coles mines pero que agora aguapien el paisaxe.                  Cuando tenemos a la vista les primeres cases de Mayáu Solís metemósmos n'otra viesca màs espesa que la del principiu. La baxada ye pindia y como ta moyao hai que facela con procuru pa nun dase un bon xostrazu.
           Pasamos Baeres d'Arriba y d'Abaxo, subimos unos cuatrocientos metros per otra viesquina y de secute baxamos a La Braña.
           Un paséu que me sorprendió pola so guapura, que ye aconseyable pa cualquiera que-y guste caminar y que de xuru tengo repetir.

http://youtu.be/K9iyvhkUj7Ahttps://www.youtube.com/watch?feature=player_embedded&v=K9iyvhkUj7Ahttps://www.youtube.com/watch?v=K9iyvhkUj7A

Per Peñamayor: La Triguera, El Texíu y picu El Tarnu (Les Antenes).

          Miércoles, 11 d'avientu de 2013          Aparcamientu cabaña - Les Praeres - Ortigosa - Espines - El Covayu - Anés - Breza -  La Triguera -  Colláu La Goleta Llagos - El Texíu - Peñamayor - Les Antenes - Llames Llagar - Les Praeres - Aparcamientu cabaña.

          "Hai delles coses que dicir alrodiu caminar...,por exemplu, requier más tiempu que cualesquier otru mediu de locomoción sacante arrastrase. Arriendes d'ello, dilata'l tiempu y allarga la vida que yá ye de por si demasiáu curtia pa desperdiciala cola velocidá...Caminar fai que'l mundu sía muncho más grande y, por ello, más interesante. Unu tien tiempu pa reparar los detalles." Edward Paul Abbey

          Dende fae unos años suelo entamar los percorríos per Peñamayor unos cuatrocientos metros antes del chigre Les Praeres.
          Xunto a una cabaña, a mandrecha la pista, hai un bon aparcamientu pa tres o cuatro coches.
          Antaño, y nun falo de más de diez años, dexaba'l coche en Pra y dende ellí facía les mismes caminates qu'agora.
          Tuvi dos o tres años empezando un poquiñin más arriba del camín d'Entresierres. Pero, como los años nun pasen en baldre, yá llevo una bona temporada aniciando les escursiones cerca Les Praeres. ¡Y contentu con poder facelo!
          Prometiérame a mi mesmu, el pasáu dieciocho d'ochobre, que nun podíen pasar tres meses sin pasiar pel "mio monte." Toi satisfechu porque esta vez nin siquiera pasaren dos.
          Fixera aquel día el mesmu percorríu que güei hasta'l colláu Breza: "Peñamayor nunca decepciona. Picu Los Caspios." Dempués volviere pel Pozu Funeres y Campagüés.
          Nesta ocasión, como nun tenía priesa, decidí xubir a La Triguera y dempués pasar peles otres tres cumes más emblemátiques del cordal: El Texíu, Peñón del H.ueyu (Peñamayor) y picu El Tarnu (Les Antenes).
          El día, sin ser espectacular, dexaba unes bones vistes. Sobre too pal este: El Sueve, los montes de Piloña, Ponga, Amieva, los Picos,...
          Dende Les Antenes, arrodiando, baxé pela buelga tovía bastante clara qu'usaren va cuantayá pa subir coles mules los materiales pa construyir la caseta y poner les antenes.
          Anque se tarde daqué más, escueyo esti camín antes que la canal bien pindia que baxa casi de frente al picu Oroxu.
          Bono nun ye solo que me preste más, que tamién; ye que paezme más fácil sobre too tando moyao.
          Yá tengo dicho y escrito en munches ocasiones que la mio diversión nel monte nun ye'l riesgu y a lo que muncha xente llama "pasos daqué aéreos, esguiladines comprometíes, entreteníos patios o baxades dalgo espuestes" yo nómolo pelligru y los subidones d'adrenalina préstenme más n'otres situaciones.
          Dempués, yá per pista dende Llames Llagar, pali que pali pal coche gociando del paisaxe.
          Baxaba col ánimu gachu porque atopara'l Texíu sin el so buzón y sobre too porque en Peñamayor faltaba la parte d'arriba d'él. Toi casi seguru de que a la mayoría de los asturianos que-yos gusta'l monte saben que dende fae unos cuantos años el G M La Peña punxo una botella sidra d'acero inoxidable pa que los montañeros dexaren les sos tarxetes de cume.
          Afortunadamente unos díes dempués, nun paséu curtiu y rápidu, pudi comprobar con alliviu que volvía a tar nel so sitiu.
          Pasélo perbien y una vegada más tengo que dicir que "Peñamayor nunca defrauda." 

Cordal d'Urbiés: Picos Polio y Cugullu o San Xustu.

          Domingu, 1 d'avientu de 2013          Altu la Mozqueta - Campa d'Urbiés - Campa Les Abeyes - Picu Polio - Picu Cugullu o San Xustu - Campa Les Abeyes - Campa d'Urbiés - Altu La Mozqueta.

          "El fin d'un viaxe ye solo l'entamu d'otru. Hai que ver lo que nun se vio, ver otra vegada lo que yá se vio. Ver en primavera lo que se viera pel branu, ver de día lo que se vio de nueche. Con sol, lo qu'antes se vio baxu l'agua. Ver la sema verdeante, el frutu maduru, la piedra que camudó de llugar, la solombra qu'equí nun taba. Hai que volver a los pasos yá daos pa repitilos y pa trazar caminos nuevos al so llau. Hai qu'empezar de nuevu'l viaxe, siempre. El viaxeru vuelve al camín.” José Saramago.

          Esta cita del gran José Saramago reflexa un pocu lo que me pasa a min y camiento que a la mayoría la xente.
          Lo que a veces mos pue paicer aburrío cuando decidimos facer una ruta de dir y venir pel mesmu camín, conviértese a la vuelta  nun descubrimientu de coses, paisaxes y llugares  que nel camín de partida pasárenmos desapercibíos.
          Tampoco ye lo mesmo facer un percorríu nel iviernu o nel branu; na primavera o nel tardíu; nun día soleyeru o nun día nubláu, lluviosu o con borrina. Son mui diferentes cares del mesmu paisaxe. Ye, en realidá, otru panorama.
          Dos domingos siguíos fixi esti paséu y los dos me prestó. Sicasí téngome prometío repitilo na primavera escoyendo un día ensín nubes.
          El 24 de payares, con agua y niebla abondo subí al picu Polio sin saber per onde. Amás les vistes desde el mesmu yeren nules. A la vuelta tuvi nel San Xustu, techu de Llangréu; con daqué meyor visibilidá. Tar nesti picu ye prestoso abondo anque solo sea pel bon gustu de los que punxeren los elementos que lu adornen: un cascu mineru y un castillete con una vagoneta. Estes dos pieces, tan representatives de les cuenques que'l cordal d'Urbiés separa, son pa min un exemplu de lo que se pue poner nuna cume.
          Col enfotu "d'aprender" la subida al picu Polio, nun día sin borrina, volví'l domingu siguiente. Esta vez ascendí per un llau y baxé per otru quitándome les duldes del paséu anterior. Hai munchos sitios per onde llegar y toos son perfáciles.
          De regresu volví a subir al Cogullu. Esta vez fíxilo d'una manera menos direuta que'l día anterior. Pa variar y asina disfrutar más.
          Con bon tiempu, esta modesta xerra ye un miradoriu bien guapu de los valles de Samuñu y de Turón coles sos viesques y los sos pueblinos.
          Precisamente'l picu Cugullu lleva tamién el nome del pueblu más altu del conceyu Mieres: San Xustu.

          Como nuna entrada anterior: Picu Cugullu o San Xustu vuelvo a poner equí la lleenda que'l ex-mineru y fotógrafu José Luis Soto García diz que cuenten los más vieyos del llugar.
          "Cunta la llenda que veníen estos santos fuxendo de los Romanos montaos nuna mula blanca y nel sitiu que güei conócese como comu La Patatera, la mula dio una patá nuna penasca, dexando marcá la ferraura al revés y engañando asina a sos perseguiores.
          En S. Xusto puiblu amarraron la mula onde los caños, nisti sitiu, había una piedra que traía escrito: "Cuando Dios quería equí augua había". Entós la mula dio otra patá y tornó a surdir augua.
          S. Xusto tamién fue poblao por xente que yera dispreciá, (de la mesma prosapia que Les Duernes).
          Asitiaron dos pareyes nel puiblu. Los de S. Xustu cunten que fixieron cabanes de piornos y tapinos, semaron miyo (cereal), mercaron delles cabres y asina foron medrando. Cuando allegaron los santinos Xusto y Pastor fuxendo, ellos foron los que los escondieron nueve díes, hasta que los perseguiores los descubrieron".
          José Luis Soto, San Xusto, marzo 2011.

          Hai semeyes de los dos díes. Por ello pue paicer un enguedeyu daqué incomprensible.