Va prestame poner equí dalgunes de les munches semeyes que faigo nes mios caminates. Nun pretendo describir rutes nin dar conseyos sobre'l meyor camín pa faceles. N'Internet hai abondo d'eses informaciones y lo único que diba conseguir ye confundir.
De toes formes toi abiertu a responder a les entrugues que faiga daquién interesáu en dalgún de los mios paseos.
Fadré una introducción de caúna de les rutes.

domingo, 11 de noviembre de 2012

Foces del Pendón d'otra manera

 Foces del Pendón 

 (Pra - Bocarral - H.uensanta - Foces del Pendón - Mayáu Pastor - La Varallonga - Pra)

   Domingu, 4 de payares de 2012

        Pa min, Pra ye un sitiu estratéxicu pa empezar rutes.
Sobre too n'iviernu o cuando'l tiempu nun ayuda, equí empiezo y acabo variaes caminates más o menos llargues. Al principiu o al final, casi siempre tan presentes les Foces del Pendón.
        Güei tocaba moyase y quería tar en casa a meudía. Así que
nun tuvi dulda.
        Esti guapu paséu, que pémeque ye recomendable, empieza en Pra, onde hai sintiu abondo p'aparcar.
        Salí en dirección Les Praeres y a unos doscientos metros garré un camín a la izquierda que lleva a Bocarral. Esti ye un pequeñu y guapu caseríu arrodiau de praos, castañales, carbayos, ablanales, dalguna faya,...Dempués de pasalu, enseguidina empieza una sienda, a lo primero mui estrecha y daqué complicada, qu'atraviesa un regatu y dempués de pasar al llau d'una cabaña, entra nuna viesca de lo más guapo. Pente los árboles, a vegaes, vese'l torrexón de la Ferrería.
        Pronto taba na pista que va pal Mayáu Pastor. Tiré pa baxo con dirección H.uensanta pa dir pel camín habitual de les Foces.
        Dende equí sigo hasta'l colláu La Canal y al Mayáu Pastor.
        Si tol añu ye prestosu'l paséu, na seronda que dicir...La zona Les Meceures ta perguapa y subiendo pela canal ye difícil nun parase y echar una mirada pa la Múa y a la viesca qu'hai a la so vera.
        Nel mayáu tiré pel senderu de les Praeres y subí a la Varallonga. Pa quien nunca tuviere, pola so modestia, pue pensar que nun paga la pena, pero de xuru que s'equivoca.
        Güei nun yera'l meyor día, pos l'agua y la borrina nun dexaben ver les guapes vistes del este y sur.
        Debaxo tán Les Preres y, mirando pal norte y oeste, sí pudi tar un cachín disfrutando de la guapa panorámica. En primer términu La Puente Arriba y más lloñe casi tol conceyu de Nava, Cabranes, Sariegu, Sieru, Noreña, Uviéu,...
        L'aire, el fríu y los xarabatos ficiéronme tar ellí pocu tiempu y baxé en dirección Les Praeres.
        Dempués, pela pista agüeyando pa: Grátila, La Curtia, Basoréu, Cezosu, La Capitana, La Viña, Ovín, La Ferrería y en primer téminu Piloñeta fízoseme'l camín percortu y entreteníu.
        En fin una bona moyaura pero una prestosa caminata.

No hay comentarios:

Publicar un comentario