Va prestame poner equí dalgunes de les munches semeyes que faigo nes mios caminates. Nun pretendo describir rutes nin dar conseyos sobre'l meyor camín pa faceles. N'Internet hai abondo d'eses informaciones y lo único que diba conseguir ye confundir.
De toes formes toi abiertu a responder a les entrugues que faiga daquién interesáu en dalgún de los mios paseos.
Fadré una introducción de caúna de les rutes.

martes, 13 de noviembre de 2012

Per Peñamayor

               Sábadu, 22 de setiembre de 2012

       Les Praeres, Breza, Los Caspios, cordal del Arrudu, riu Muriosa, La Focella, El Felguerón, La Llama, Les Praeres.


       Peñamayor nunca defrauda y cuando'l tiempu col que cuento nun ye mui grande o nun hai otros planes ye un recursu que nunca me falla.
       Esti día fixi un paseín perguapu per esti cordal.
       Salí de Les Praeres y per Ortigosa, Espines, El Covayu y Anés llegué a Breza.
       El tiempu pelos altos yera guapu enforma
y pa baxo, sobre too pal norte y l'este, el mar de nubes dexaba unes guapes panorámiques.
       Por cambiar un poco lo de casi siempre, subí a Los Caspios. Dende esi picu hai unes buenes vistes pa Peña Mea, El Retriñón o La Xamoca.
       A lo lloñe, encima la borrina, adivínense les cumes de los montes de Piloña, el Sueve, Ribesella, Onís, El Cuera, Ponga y Los Picos. A vista de páxaru too paez más guapu.
       Baxé pel cordalín que paralelu a la fastera este de Peñamayor y separtáu per una riega, llega a la pista que va de les Praeres a Puente Miera.
       El borrín va desapaiciendo y pue vese tol camín pol que subiere y enseguidina el puntu de llegada. Otra vuelta Les Praeres.
       Pasáu'l ríu Muriosa y per La Focella, El Felguerón y La Llama completo'l guapu circuitu del día.
       Préstame esti recorríu pero nun ye'l que más faigo polos siete o ocho km finales qu'hai de pista y que como yá dexé dicho dalguna vez nun me gusta un res.
       (Paezme guapo usar nes descripciones la toponimia de los llaos per onde patio, pero tien l'inconveniente de que seguramente nun coincide colos nomes qu'otros dan a los sitios. De toes formes, como pémeque nun hai consensu, creo qu'ente toos podemos aportar coses).

No hay comentarios:

Publicar un comentario