L'otru Narancu

Miércoles, 14 de payares de 2012 

Uviéu - Narancu - Uviéu   

          Muncha xente conoz El Narancu polos monumentos o pol ciclismu. La verdá ye que, yo que llevo años patiándolu, pueo dicir que ye dalgo más.

          Hai una montonera sitios per onde subir. Toos ellos, pémeque son meyor que la carretera. Al menos pa subir andando.

          Güei fixi una caminata perprestosa de la que pongo dalgunes semeyes.

          Salí de mio casa (Ciudá Narancu) y pela carretera llegué
a los monumentos y dende San Miguel de Liño subí per una carreterina a la h.uente Los Pastores. Dicen que la so agua ye mui bona y como se llega en coche hai bien de xente que la frecuenta.

          D'ehí p'arriba hai una guapa sienda.

          Nun se ve de lloñe pero hai una viesca de castañales y carbayos pequeña y bastante guapa.

          Nel altu, dende’l picu Pisano, onde’l santu, vese media Asturies.

Bien cerquina, baxando hacia’l norte per un camín un pocu abandonáu, tan los neveros del Cantu La Vara.

Tengo que dicir que yo conocílos nesti paséu. Debo dar les gracies a Javier Villa Cienfuegos que nel so blog “Caleyando con Cienfuegos” descríbelos perbién. (Por cierto, quien nun conoza’l blog, aconseyo-y que eche una güeyada. Va presta-y y de xuru que como me pasa a min, aprenderá munches coses).

De vuelta a la pista, un kilómetru escasu más abaxo, tán los pozos d’El Pevidal. Estos son los que yo conocía.

Presta siguir el camín y parase a ver los rastros que mos recuerden que fai unos años hebo per estos montes una guerra.

Siguiendo’l camín pal suroeste podemos subir a la peña Llampaya, un piquín bien prestosu con buzón y too.

Dende equí yo baxé a la carreterina de Brañes y per Ules volví pa Uviéu.

Pue facese una travesía de más de venti kilómetros dende’l Puente Vieyu de Llugones hasta San Pedru Nora nel vecín conceyu de Les Regueres. Yo fícila en más d’una ocasión. Nun tien perda nin dificultá y hai tren pa volver pa Uviéu.