A orielles del Nalón

Martes, 25 de setiembre de 2012

Soto Ribera - Olloniegu - Bárcena - Soto Ribera

       Lo que diba ser un día de patiar y retratar pel monte, convirtióse nuna  xornada más de lo segundo que de lo primero.

          Salí de casa cola intención de dir al Condao (Llaviana) y dende ellí subir a la Xamoca. Al pocu tiempo de montame en coche cambié de plan

          Foi de los pocos díes de setiembre qu'amaneció lloviendo
y sobre la marcha decidí dar un paseín a la vera'l Nalón.

          De xuru que nun m'arrepintí. Ye más, díxime que tenía que repitir el paséu.

          Llamóme l'atención la llimpieza'l riu pese a tar tan cerca de la central térmica de Soto Ribera y de los polígonos industriales de Vegalencia y Olloniegu.

          Per otru llau, cómo diba pensar que les antiestétiques chimenees o les columnes d'alta tensión podíen ser fotoxéniques. A lo meyor ye que me lo paez a min, pero nel espeyu'l ríu pémeque queden bien.

          Total que dexé´l coche a la vera Soto Ribera y empecé a patiar con direición Olloniegu. El paseín hasta Soto Rei yá fai años que lu conocía. Pero d'allí pa yá nunca lo patiara y prestóme. Amás hai un tramu, pa mí nuevu, que sigue hasta Bárcena y que me resultó prestosu.

          Total qu'eché una mañana bien entretenía; distinta a lo que pensaba facer, pero a lo meyor por distinta ya inesperada mui agradable.

          Pémeque podía sacase más partíu de les semeyes y ye otru de los motivos pol que me prometí volver.