Va prestame poner equí dalgunes de les munches semeyes que faigo nes mios caminates. Nun pretendo describir rutes nin dar conseyos sobre'l meyor camín pa faceles. N'Internet hai abondo d'eses informaciones y lo único que diba conseguir ye confundir.
De toes formes toi abiertu a responder a les entrugues que faiga daquién interesáu en dalgún de los mios paseos.
Fadré una introducción de caúna de les rutes.

lunes, 19 de noviembre de 2012

Alredor de Peñamayor

Domingu, 18 de payares de 2012
Pra-Campanal-L'Artosa-Picu Castiellu-La Campa-Les Praeres-Pra

       Tocaba moyase y asina foi. La seronda ye pa min la estación más guapa del añu.
Pero, ¿cómo sería ensin los xarabatos, l'aire les castañes o eses viesques d'árboles autóctonos?
       De lo primero y lo tercero pudi disfrutar abondo nel paséu d'esti día.
       Esta ye otra de les munches rutes qu'empiezo en Pra (Nava).
       Dexé'l coche
nel ampliu aparcamientu qu'hai cerca’l molín y entamé'l camín pola sienda señalizada de la Ribera del ríu La Peña. Si esti recorríu siempre ye guapu, güei con elli salíu del calce, los tabayones que se formaron col agua cayendo a calderaos y la viesca colos colores de la seronda yéralo por demás.
       Siguí per esti senderu hasta la pista que xunta Grátila y Campanal. Equí garré la dirección d'esti guapu pueblu. Mediu kilómetru dempués viré a la izquierda hacia l'Artosa.
       De xuru que nun soi oxetivu, pero les vistes dende esta fastera de Nava son perguapes. Vese tol conceyu, gran parte del de Bimenes y muncho de Cabranes, Sieru y Sariegu. El pueblín de Llaméu que dexamos abaxo a mano derecha ye guapu a rabiar y los caseríos de Bimenes que se adivinen cerca, lo mesmo.
       Vamos patiando a la vera Bobia, norte de Peñamayor, que tien una viesca perguapa. De siguío, pasando per un valle nel que se ve'l pueblín yerbatu de La Castañal, entamo a caminar ente castañales y ablanares per un camín que va faldiando’l picu Castiellu .(¿Cuántos picos habrá n'Asturies con esti nome?)
       Tamos en Bimenes, na parte cimera de la parroquia de Santu Mederu. Dende equí yá se ve tola parte oeste del cordal de Peñamayor. (Ayer non, pol agua y la borrina).
       Siguese pela lladera del cordalín que tien fin nel picu Orozu hasta llegar a La Campa. Otra vegada nel conceyu Nava y sigo a Les Praeres.
       Cellebrábase'l "I Trail de Peñamayor" y pa nun estorbar, pela pista, baxé a Pra con gana quitar la moyadura y disfrutando de les guapes vistes que mos ofrez la seronda.
       Unes cuatro hores y media de patiar que nun tienen desperdiciu y que otres veces yo allargaba hasta les Foces del Pendón pa per Bocarral zarrar el circuitu.

1 comentario:

  1. Les semeyes per guapes, l´aire limpiu y la seronda precioosa, pero coyisti mal dia pa caleyar. mas que ná po la moyaura. Un abrazu.

    ResponderEliminar