Va prestame poner equí dalgunes de les munches semeyes que faigo nes mios caminates. Nun pretendo describir rutes nin dar conseyos sobre'l meyor camín pa faceles. N'Internet hai abondo d'eses informaciones y lo único que diba conseguir ye confundir.
De toes formes toi abiertu a responder a les entrugues que faiga daquién interesáu en dalgún de los mios paseos.
Fadré una introducción de caúna de les rutes.

lunes, 26 de noviembre de 2012

L'Escobín o Picayu

        Sábadu, 24 de payares de 2012       Olloniegu, La Mortera, Escobadielles, Escobín, valle a antigües mines, Servanda, Olloniegu.


       Nun va munchu tiempu que m'enteré qu'esti modestu monte ye'l techu d'Uviéu. Creyía que la cota más alta taba nel Narancu. Siempre pensé que’l vértice xeodésicu qu'hai nel picu Paisanu lo yera.
       Superada la inorancia, díxime que tenía que dir a conocelu.

       El sábadu, 24 de payares dediqué-y la mañana y de xuru que me prestó.
       Bueno, sin tener en cuenta dalgún enguedeyu que paez que tengo que buscar cada vez que salgo. A vegaes pienso que debe tar implícito nesta actividá pues, por fácil que seya, siempre atopo daqué que lo complica.

       Dexé'l coche xunto a la ilesia d'Olloniegu y atravesé'l pueblu con direción a Mieres.
       Subí pela carreterina que va a La Mortera . Un kilómetro más arriba hai una desviación a la izquierda con un indicador de varios pueblos. L'últimu ye Escobadielles que, pol nome, pue que tenga dalguna rellación col Escobín.
       Dende esti llugar sigue un camín que,sin perda, llévamos hasta'l picu. Pásase per sitios mui guapos y el camín resulta entreteníu.
       Con seguridá que la patiada paga la pena porque hai unes guapes vistes de la cuenca'l Nalón, de Xixón, d'Uviéu y de tol cordal del Aramo. Per otru llau, el bon día siempre ayuda.
       Empecé'l regresu pel mesmu sitiu de la subida y, dempués d'unos cientos de metros, entamé a baxar per un camín  que me paició que me llevaba sin munches dificultaes a onde tenía'l coche.
       Ye un valle perguapu que llega a les antigües mines, atapaes por un castañéu bien tupíu.
        Hasta equí too bien. El problema apaició cuando empecé a ver chalecos naranxes y a sentir lladrar perros.
       Seguru que me punxi nerviosu y en llugar de baxar a lo que queda de les mines siguí per un camín mediu cubiertu polos escayos.
       Cuando pensé que taba'l salir acabóse la sienda. La solución: o dar la vuelta o baxar pel castañéu que ye mui pindiu y tien tantos artos, cotoyes y espineres como castañales.
        Fici lo último y nun me resultó nada fácil. El desnivel qu'hai ye grande y la maleza abonda. Amás los chalecos mariellos y el ruíu de los perros preocupábenme.
        Nun desaxero si digo que tardé más de media hora na baxada. O polo menos paiciómelo. Nun miré’l reló.
        Yá fuera la viesca, ún de los monteros díxome que nun yera mui prudente andar así pela maeda. Nun-y contesté mal porque nel fondu diome la impresión de que a lo meyor tenía razón y amás tovía taba algo asustáu.
        Taba en Servanda y los diez minutos que me faltaben pa llegar al coche dedíquelos a pensar nes compatibilidaes ente caceríes y senderismu. Nun llegué a nenguna conclusión.
         Por fortuna, los malos momentos escaécense ensiguida y el resume de la patiada foi positivu.

No hay comentarios:

Publicar un comentario