Sábadu, 5 de xineru de 2013 Carrea - Llaguna Sobia - La Siella - Vega d'Adientro -Picu Barzanalgas - Vega'l Medio - Vega d'Afuera - Llaguna Sobia - Carrea.
L'últimu branu tuviera na Siella pero nun en Barzanalgas. Quedéme coles ganes porque fíxoseme tarde y tenía'l tiempu mui xustu.
Una vegada más, subí per onde los vieyos, dende'l cementeriu de Carrea. La opción de la canal dende Sobrevilla yá nun ye pa los mios años. Dende la llaguna Sobia, cumeando, llegué a La Siella.
El día yera guapu abondo y entretúvime un bon tiempu disfrutando del paisaxe y pensando cual de los picos que tenía en frente, mirando pal este, seria Barzanalgas. Nun preparare muncho'l paséu porque paicíame tener claro que picu yera. Tenía duldes y taba dispuestu a dir al que ta más al norte, final de la xerra. Si nun fuera esi, caminaría pela cresta hasta llegar a la que ta nel mediu. Nesti tiempu llegaron tres escursionistes.
Falamos un trechu y comenté-yos les mios indecisiones. La so intención yera la mesma que la mía. Pero tamién coincidimos na inorancia. La conclusión foi que yo fixi lo que yá tenía decidío y ellos elixeron, la que pa min, yera la segunda opción.
Baxamos xuntos hasta la Vega d'Adientro y dende ellí caún tiró pal so llau.
El mio instintu montañeru del que, a lo meyor pola vieyera, presumo munches veces, fallóme. (¿Cuántes veces dirán?).
De toes formes esta vez tuvo compensación porque, a cambiu de caminar un poquiñín más, tuvi la ocasión de semiasomame al estremu norte de la xerra que, como n'otros munchos sitios de los nuesos montes, amedrana.
Dempués d'esta guapa esperiencia, cumeando, llegué a Barzanalgas. Por ciertu, ellí pon Peña Sobia. Nun tuvi ocasión de entrugalo, pero prestaríame saber cual ye'l que usen davezu los llugareños. Ye un sitiu prestosu pa contemplar les tierres quirosanes.
Baxé a la Vega'l Mediu y, Vega d'Afuera p'alantre, gociando de les vistes, volví a la llaguna Sobia y peles pindies revueltes, (dalgunos dicen envueltes), baxé a Carrea.
Un perguapu día de monte.
Hola Arturo, per guapa la ruta, y el desplome espectacular, si no recuerdo mal ye de 1014 metros. Yo ficela el añu pasau, fice la Sierra de Sobia desde Teberga y desde Quiros, no la conocia y pareciome per guapa. Un abrazu-
ResponderEliminar