Va prestame poner equí dalgunes de les munches semeyes que faigo nes mios caminates. Nun pretendo describir rutes nin dar conseyos sobre'l meyor camín pa faceles. N'Internet hai abondo d'eses informaciones y lo único que diba conseguir ye confundir.
De toes formes toi abiertu a responder a les entrugues que faiga daquién interesáu en dalgún de los mios paseos.
Fadré una introducción de caúna de les rutes.

miércoles, 16 de enero de 2013

Pel Cordal de Nava

        Sábadu, 12 de xineru de 2013     Pozucorderu (Nava) - Casa'l Cordal - Picu l'Ará - Campabaxera - Les Cuadrielles (Lieres) - Solvay - El Solanu (El Remediu) - Picu L'Ará - Pozucorderu.

        El Cordal de Nava ye una ringlera oteros que de este a oeste recorre los llímites de Nava y Bimenes y dempués de Sieru y Bimenes.
        Faigo esti paséu de unos 16 ó 17 kilómetros varies veces al añu y, anque nun tenga una especial guapura, préstame.
        Nesti tiempu, hai partes con barru abondo que compliquen un pocu'l recorríu. La ivernada xúntase colos trabayos de repoblacíón forestal que tan faciendo. Esta torga paga la pena pensando que, los que dientro d'unos años, patien per estos cuetos hasta agora ermos, puedan dir a la sombra d'especies autóctones que trensformarán positivamente esta xerrina.
        El camín entama en Pozucorderu, d'onde sal una pista que pon: La Cebosa. Siempre en suave subida, patiamos per tierres de Nava hasta la casa'l Cordal. Dende equí, pasando pel Cantu Les Vigues, hasta'l picu l'Ará, la sienda fai llímite ente Nava y Bimenes. Esta modestísima cume ye ún de los munchos "Tres Conceyos" qu'hai n'Asturies. Xúntense equí Nava, Bimenes y Sieru, La pista empieza agora a separar los muncipios de Sieru y Bimenes hasta l'altu La Cruz.
        A manzorga fuimos viendo Peñamayor, La Cebosa, Priandi/Lloréu, Buruyosa, La Rubiera,... A mandrecha, lloñe, la xerra la Llomba y más cerquina, Villa, Vega, Robléu, la Peruyera, Quintana, Sierra, Villamartín, El Solanu,...
        Na midida que mos acercamos al oeste empezamos a ver Peña Mea, El Retriñón y gran parte de los montes del sur d'Asturies hasta Les Ubiñes. Pal norte columbramos la Llomba col Fariu, la peña Careses y tola llanera de Sieru hasta Uviéu.
        Llégase a un área recreativa que pon La Cruz. Pémeque'l nome debía ser Campabaxera como se llama'l túmulu megalíticu que'hai na parte cimera del área.
        Vinimos hasta agora pel GR-105 y unos doscientos metros más abaxo abandonámoslu pa siguir pel PR-277  que mos dexa en Les Cuadrielles (Lieres). Equí volvemos a cambiar de dirección pa pasar pela esplanada de les abandonaes mines de Solvay. (Esti sitiu tien pa min un significáu especial y réspígome cada vez que lu piso; sicasí, siempre m'apetez volver).
         Siguimos pal este subiendo per una pista de formigón que mos lleva a El Solanu otra vez n'El Remediu (Nava). Per un guapu camín bien pindiu volvemos a la vera'l picu l'Ará y desandamos la sienda hasta Pozucorderu, recreando los güeyos otra vegada más con Peñamayor y los pueblinos de Traveséu, Campanal, Grátila, Basoréu, Cezosu, Piloñeta,...A lo lloñe El Sueve, El Cuera, Los Picos...
        Pónme de mal humor, siempre que camino pequí, mirar pal Remediu y velu cruzáu en toles direcciones peles llinies d'alta tensión. ¿Fairíen daqué malo los vecinos/es d'esti pueblu pa recibir esti castigu?
        Asina y too, como dixi al principiu, prestóme la patiada.
        (Les semeyes del track de Wikiloc son d'otra escursión).      
       
  

3 comentarios:

  1. Hola Arturo, guapa la pateada y guapu el dia pa facer fotos. Les fotos muy chules, pretame muncho la del burrín. Un abrazu.

    ResponderEliminar
  2. Bueno, pues aquí también te dejo comentario, no se la significación que para ti tiene Solvay pero para mi mucha, mi padre trabajó en la fabrica que tiene en Torrelavega, donde venía a parar el carbón de las minas asturianas y yo convivi en dos veranos en el campame to que la empresa organizaba para los hijos-as de los trabajadores en Reinosa donde compartí tienda y travesuras con el grupo de asturianos que venian de las minas.
    Que años y que recuerdos.
    Un saludo.

    ResponderEliminar
  3. Na mina de Solvay morrió mio padre nun accidente de trabayu.
    Anque pasaron munchos años hai coses que te marquen pa siempre.
    Saludos

    ResponderEliminar