Va prestame poner equí dalgunes de les munches semeyes que faigo nes mios caminates. Nun pretendo describir rutes nin dar conseyos sobre'l meyor camín pa faceles. N'Internet hai abondo d'eses informaciones y lo único que diba conseguir ye confundir.
De toes formes toi abiertu a responder a les entrugues que faiga daquién interesáu en dalgún de los mios paseos.
Fadré una introducción de caúna de les rutes.

sábado, 18 de mayo de 2013

Monsacru: Cuitu Rumiru y Llanu Villar

          Domingu, 12 de mayu de 2013          La Collá - Mayáu Les Capielles - Picu Cuitu Rumiru - Picu Llanu Villar - Mayáu Les Capielles - La Collá.

         "Frente al desastre (del nuestru mundu d'agora), el monte ye una de les más belles escapades. El monte ye'l ser pluscuamperfeutu a quien veneramos y delantre del que nun se pue más qu'esbozar una danza. Un reinu de verdadera llibertá un pequeñu cachu de paraisu."
François Florence.

          No que va d'añu les circustancies faen que les mios patiaes sean curties y cercanes.
          De toes formes eso nun implica que nun seyan satisfactories y ayuden a escapar unes hores de les dificultaes que mos pon la vida.
         Pola so cercanía a Uviéu esti ye otru de los recursos a los qu'acudo nestes circustancies.
         Nos últimos años suelo dir dende La Collá y volver pel mesmu sitiu. Préstame dir viendo'l guapu valle qu'hai ente'l picu Garcilleru o Praiquín y la xerra Mantega. Nun toi seguru, pero pémeque, ye la razón pa que siempre escueya esti camín.
          Disfruto abondo patiando sele pel mayáu de les Capielles y xubiendo pali pali al Cuitu Rumiru y dempués al Llanu Villar. Nos díes ensin nubes hai unes vistes que faen que los nuesos güeyos gocien a esgaya. Esta xornada nun yera'l casu pero asina y too disfruté en cantidá.
         Na vuelta, otra vez seliquín, pa pasalo bien agüeyando pal mayáu, la llagunina, les capielles, la Siella l'Obispu, Santolaya, Uviéu, el Garcilleru, Mantega,...

        

4 comentarios:

  1. Hola Arturo, préstame la patiada que fixiste, otra de les que voy daxando patras, precisamente po la cercanía. Tengo qu´animame a facela. Y les tus fotos animenme a ello. Un abrazu.

    ResponderEliminar
  2. Hai otros sitios pa entamar la xubida y toos son prestosos. Hasta pue facese circular. Merez la pena.
    Un saludu.

    ResponderEliminar
  3. Bufff, un par de vegaes xubí al Monsacru y nes sos parés n'Otura bien de vegaes tuve esguilando. La verdá ye que l'ascensión dende la Collá, sacante les torretes llétriques, préstame munchísimu.

    Norabona, por la patiada, por visitar les capiyes... presta muncho esi mayáu.

    Un abrazu

    ResponderEliminar
  4. L´ascensu desde la Collada ye el más prestosu pa dir al Monsacro. La última vegada que tuve elli, xubi pa esperar que fuera de nueche en cume y tirar delles semeyes. El descensu ya de nueche cerrao, .. foi perguapu.
    Un saludu

    ResponderEliminar