Va prestame poner equí dalgunes de les munches semeyes que faigo nes mios caminates. Nun pretendo describir rutes nin dar conseyos sobre'l meyor camín pa faceles. N'Internet hai abondo d'eses informaciones y lo único que diba conseguir ye confundir.
De toes formes toi abiertu a responder a les entrugues que faiga daquién interesáu en dalgún de los mios paseos.
Fadré una introducción de caúna de les rutes.

miércoles, 8 de mayo de 2013

Ún de los mios paseos del colesterol.

          Domingu, 28 d'abril de 2013           Ciudá Narancu - Camín a Ules - Ules - El Llanu - Llampaya - Llampaxuga - Camín de Santiagu - Lloriana - La Bolguina - Peña Ñora - Malpica - Molina - Llampaxuga - Camín de Santiagu - San Llázaru Paniceres - Les Campes - La Florida - San Pedru Los Arcos - Ciudá Narancu.

         "Fatiga menos caminar sobre terrenu quebráu que sobre terrenu llanu."
         Aristóteles (384 - 322 a. C.)

          Cuando les circustancies nun me permiten dir al monte, faigo paseos semiurbanos que m'apacigüen les ganes de caminar.
          Per Uviéu tengo varios recursos: Si fae buen tiempu y dispongo de más de tres hores escueyo'l Narancu; si non, los alredores d'Uviéu, pelos que voi alternando trayeutos pa nun ver siempre lo mesmo.
         Préstame que nun sean del too llanos y que'l tránsitu sea escasu y eso nun ye difícil.
         Últimamente patio con frecuencia pela lladera suroeste del Narancu.
         Salgo de mio casa y bien llueu toi pela carretera que sube al monte. Poco dempués d'un afamáu restaurante esvíome a manzorga p'agarrar una caleya que, sin perda posible, llévame al guapu pueblín d'Ules.
         Dende equí, con pocu tráficu, sigo con direición Brañes hasta'l cruce de Llampaya. Nesti llugar, asitiau baxo la peña del mesmu nome, otra vez a manzorga empieza una baxada que sigo hasta Llampaxuga. Al llau de la capiella'l Carmen hai un camín que pela derecha baxa a la fonte La Pipera y Lloriana. Ye'l Camín de Santiagu con direición Grau. Según el tiempu que tenga vuelvo pa Uviéu o sigo a La Bolguina. Equí pela carretera As 232 con direición Uviéu, poco antes de Ponteo, vuelvo al carreterín que va a Llampaxuga  y xunto a la ilesina, a mandrecha, otra vez pel Camín de Santiago, paso per San Llázaru Paniceres, Les Campes, La Florida y San Pedru Los Arcos.
          Ye un paséu de 15 ó 16 km nun comparable a una patiada pel monte. Pero como suele dicise: "A falta de pan bona ye la boroña".

4 comentarios:

  1. Hola Arturo, no ye comparable, pero como tenemos la suerte de vivir en un paraisu, pa cualquier sitio que entames andar, topeste con paisaxes y sitios que merez la pena ver. Estamos tan acostumbraos a velos que no los apreciamos, y despues de velos en unes magnifiques fotos como les tuyes, parez que los vemos d ´otra manera. Un abrazu.

    ResponderEliminar
  2. Mui guapes les semeyes, y comu presta ver qu'en cualquier llau puede facese una patiada bien prestosa y vistosa a poco que sepamos buscar un trazáu elegante.
    Saludos, y presta ver la semeya del Picu La Múa o Picos Verdes na cabecera d'esti blog, lo dichu, al llau mesmu de casa tenemos paraxes impresionantes, sólu hai que saber aprecialos y d'eso polo que veo sabes bastante!!

    ResponderEliminar
  3. L'últimu añu cayí na razón de que nun conocía sitios perguapos que tán al llau de casa. Al falar de monte toos pensamos en Picos, Les Ubiñes, Somiéu,...sin damos cuenta de lo que tenemos al rodiu. Yá de vieyu entamé a correxir los equivocos pasaos.
    "Nunca ye tarde a los 70" de Aurelio GONZÁLEZ OVIES
    Gracies a los dos.
    Un saludu

    ResponderEliminar
  4. Soy una carbayona viviendo en Lanzarote dende fai dalgunos añinos.
    Préstenme pola vida estos blogues pa entamar paseínos nuevos pa cuando vuelvo de vacaciones.
    Pero siempre, siempre, y más cada vegada que pasa, cáenseme unes llarimines : ¡qué suerte teneis, fí@s , de nun tener que echalo de menos!...
    Un saludu .
    Vanessa.

    ResponderEliminar