Va prestame poner equí dalgunes de les munches semeyes que faigo nes mios caminates. Nun pretendo describir rutes nin dar conseyos sobre'l meyor camín pa faceles. N'Internet hai abondo d'eses informaciones y lo único que diba conseguir ye confundir.
De toes formes toi abiertu a responder a les entrugues que faiga daquién interesáu en dalgún de los mios paseos.
Fadré una introducción de caúna de les rutes.

lunes, 5 de agosto de 2013

La Gamonal

          Miércoles, 24 de xunetu de 2013           Vega Bobies - Monte Trapón - Mayáu Fonfría - Mayáu Covachos - Mayáu d'Ortigales - Castrupín - Toyu Veguellina - Picu Gamonal - Vega la Mortera - Canal de la Mortera - Campa Bildeo - Pan de la Forca - Mayáu Brañacé - Vega Bobies.


         "Nel  monte nun hai que forciar el pasu."  (César Pérez de Tudela )


         Fae tiempu que viera esta ruta en tres de los meyores blogs de montaña que conozo y que fixeren el paséu xuntos: Circular por la Sierra del AramoLa Gamonal por la ruta de los neverosSierra del Aramo: camín de los neveros, La Gamonal y canal de Mortera.
          La xerra del Aramu y en concretu la Gamonal, por so guapura y porque ta cerca de mio casa, patiárala unes cuantes vegades. Sin embargu esti percorríu nun lu conocía y atráxome dende que supi d'él.
           Como digo al entamu d'esti pocu cobiciosu blog: "Nun pretendo describir rutes nin dar conseyos sobre'l meyor camín pa faceles. N'Internet hai abondo d'eses informaciones y lo único que diba conseguir ye confundir." Los blogs a los que fago referencia son la meyor muestra y en mio modesta opinión ye mui aconseyable acudir a cualquier d'ellos pa esta o cualquier otra ruta per Asturies.
          Resultóme un poco enguedeyoso el camín dende Vega Bobies a Covachos. Anque tábamos a últimos de xunetu había barru abondo y la broza nun facía fácil l'andar.
          Dende esti guapu mayáu a la cume pasóme dalgo peculiar que nun sé si ye namái cosa mía. Tengo que dicir anque seya obvio que voi al monte a pasalo bien. En nengún casu tiento de competir con naide nin asumir riesgos innecesarios.
          La cosa ye qu'en Covachos atopéme con un mozu francés montañeru y retratista de paisaxes que aparcare'l coche xunto a la cabaña más cercana a la carretera l'Angliru. Trayía na mano un folletu del Aramu y quería subir a la Gamonal pasando per Ortigales y Veguellina. Entrugóme pel meyor camín y dixi-y que diba yo p'allá y que podía acompañame.
          Entamamos a subir, yo delantre como guía (quien me lo dixere). Nun sé como pero al cachu dime cuenta que la mio velocidá yera mayor de la de davezu. ¿Taba enfrentándome inconscientemente con alguien muncho más xoven que yo? El casu ye que escaecióseme que "pa llegar a la cume como un mozu hai que xubir como un vieyu". D'esta miente llegué al picu con dificultá p'alendar, cosa qu'intento que nunca me pase. ¿Ocurre-y esto a otra xente?
          Sicasí la esperiencia foi positiva y l'esfuerciu del rapaz francés y  el chapurriar que deprendí fai más de cincuenta años fixo que mos entendiéramos y qu'l trechu que compartimos fuera perprestosu y instructivu.
          Nun me prestó un res que'l teyáu del horru que fae de buzón de cume desapaiciera. (Al llau de lo que vi esti día pongo una semeya fecha en xunu del añu pasáu). Nun entiendo a la xente qu'estroza les coses sin motivu.
           Separámosmos na cume, él diba baxar pela carretera, y yo yá recuperáu, entamé a baxar con muncha más tranquilidá y disfrutando del guapu paisaxe pela Vega La Mortera.
          Nun me resultó nada fácil el Canal de la Mortera. Ye mui pindiu y tien muncha piedra suelto. Moyáo nun lu baxaría. Alviértese que José, Santos y Cienfuegos son más xóvenes que yo y muncho meyor montañeros.
          Les vistes a los puertos d'Andrúas y a los montes de Proaza son perguapes. El camín pente la viesca carrascos ye bastante confusu y costóme más tiempu del previstu.
          De toes formes foi un guapu día de montaña.

7 comentarios:

  1. Tengo que xubir a un piquín del Aramo que nómase'l Fontazán... a ver si soi a facer dalgo asemeyáu enllazando cola Gamonal, pa conocer al menos dalgo de la to ruta. Ye una pena que nel Aramo, siempre que xubí a cualesquiera de los cumales fícelu dende L'Angliru...

    Esto ha de camudar...

    Un abrazu

    ResponderEliminar
    Respuestas
    1. Imaxínome qu'l picu que dices ye ún de los que ta al norte de La Gamonal porque hai un mayáu que se noma asina. Nesi casu un percorríu guapu podía ser subir dende Vega Bobies al colláu Pan de La Forca y cumeando pal sur antes de La Gamonal tien que tar Fontazán. Dempués pue baxase pel este pela ruta los Neveros o pel oeste baxando'l Canal de la Mortera.
      Un saludu.

      Eliminar
    2. Voi trazar esa ruta que tas marcándome so'l mapa y a nun mui tardar pienso intentala.

      Un abrazu y gracies pola recomendación

      Eliminar
  2. Bonas amigu,

    tengo ganas asgaya de patiar por esti cordal, peime un rincón especial d'Asturias. L'áramu, la gamonal, Monsacro, el gamoniteiru... llevu años lliendu sobre eillos y fixándome na suas "curvas" siempre que puedu (siempre qu'andu por dalguna peña fronteriza cola tua tierra ou simplemente cuandu andu pol monte Narancu d'Uviéu.

    Asina que munchas gracias polas fotos, un deleite polos gueyos.

    Un saludo compañeiru.

    ResponderEliminar
    Respuestas
    1. Anque nun ye de les de mayor altor dende la xerra l'Aramu vese media Asturies. Merez la pena patiar per ella.
      Un saludu.

      Eliminar
  3. Guapa de verdad, como me gustan todas las fotos y en especial las de los lirios.
    Saludos.

    ResponderEliminar
  4. Hola Arturo...nun te pasa solo a tí, pasanos a toos. Los años nun pasen de balde...Precioses fotos, a ver si me decido y fago algo por la zona. Un abrazu.

    ResponderEliminar