Va prestame poner equí dalgunes de les munches semeyes que faigo nes mios caminates. Nun pretendo describir rutes nin dar conseyos sobre'l meyor camín pa faceles. N'Internet hai abondo d'eses informaciones y lo único que diba conseguir ye confundir.
De toes formes toi abiertu a responder a les entrugues que faiga daquién interesáu en dalgún de los mios paseos.
Fadré una introducción de caúna de les rutes.

jueves, 8 de mayo de 2014

Picos Renorios y Texera

     Domingu, 16 de marzu y domingu 6 d'abril  de 2014          Coto Bello - Picu Renorios - Picu Texera - Coto Bello (Saliendo y llegando a Coto Bello con pequeñes y evidentes variantes pa dir y venir).  


          "Los montes nun son estadios onde satisfaer la nuesa cobicia deportiva, sinón catedrales onde praucticar la relixón de nós." Anatoli Boukreev


          Pue pensase con un daqué de razón que cuanto más alto subamos más posibilidaes tenemos de ver y gociar paisaxes impresionantes y d'una guapura estraordinaria. Tamién ye verdá que n'Asturies hai munchos dosmiles nos que les vistes déxenmos ablucaos.
          De toes formes, tolos que mos presta caminar pel monte, conocemos picos de menor altor que mos ofrecen unes panorámiques esceicionales.  Pienzu, Mofrechu, Monsacru, Turbina, Peñamayor o  l'uvieín Narancu son dalgunes cumes que puen valir d'exemplu.
          El picu Renorios (1334 m) y sobre too'l Texera (1557) son exemplos a añader. Xuntando a esta modesta altura qu'una carretera asfaltada ponmos a 1200 metros, pue deducise que'l percorríu per esti cordal ye fácil y agradecíu.
          La zona, enllena pistes de la reciente esplotación minera a cielu abiertu, ta bastante bien restaurada. Alcuéntrense pequeños abeduliares y dalguna viesquina  fayes que de xuru que sobrevivió a la actividá minera. Tamién hai praderíes, nesta época con mui pocu ganáu. Recuérdame daqué a la guapa escursión pela Sienda Tuilla.
          Nun día escampláu, como ún de los que yo disfruté, podemos dexar que los nuesos güeyos gocien mirando en toles direiciones pa los montes que mos arrodien: El cordal de Carracéu, Les Ubiñes, l'Aramu, el cordal de Longalendo col Cuetu Ventosu y la Burra Blanca, Peñamayor, Peña Mea, el Cuchu, Retriñón Torres, Toneo, los picos de la Llebre (Estorbín de Valverde, Tresconceyos, Pisones, Robequeres,...). Hasta'l Cornión podemos almirar dende'l picu Texera.
          Y como vamos caminando per una xerra que separa los valles del ríu Aller y el del Negru vemos y almiramos dalgunos de los sos guapos pueblos: Soto, Serrapio, Uriés, Cabanaquinta, Cuergo, Pel.luno, Beyo, Conforcos , Santibanes de Murias,...
          Dixérenme que nel Texera había un horru en miniatura como buzón de cume. Llevé una pequeña deceición al nun atopala y anque yá en casa pudi ver semeyes de fae unos años, al paecer va tiempu que desapaeció.
          Será porque ta cerca y ye mui apropiada pa los fines de selmana que siempre me presta venir a comer a casa o porque a los vieyos préstamos lo fácil pero'l que repitiese'l paséu dos veces en tres selmanes ye señal de que me gustó abondo. De xuru que nun tardando repitiré la escursión con munches de les variantes que se puen facer pela zona.


  






Sienda Tuilla.

7 comentarios:

  1. Hola Arturo,gracias por compartir estos lugares tan maravillosos,feliz finde semana.Un saludo.

    ResponderEliminar
  2. Gracies a tí por miralos. Y tamién bon fin de selmana .
    Saludos

    ResponderEliminar
  3. Muy guapa Arturo. Lo tengo fecho más de una vez, aunque ya van años! y miro, yo tampoco vi el horru en la Texera.
    Les vistes si que son agradecíes.
    Un saludu

    ResponderEliminar
  4. A min prestóme. Amás, como ta cerca, val pa esos díes que nun teníes na previsto y nos que nun tienes munchu tiempu. De xuru que repitiré.
    Saludos.

    ResponderEliminar
  5. Por si fuera interesante o de utilidad para ti o para los lectores de tu web, tengo publicado el siguiente blog:
    http://plantararboles.blogspot.com
    Se trata de una manual breve y sencillo para que los amantes del monte y del campo podamos reforestar, casi sobre la marcha, aprovechando las semillas que nos dan los árboles y arbustos autóctonos de nuestra propia región.

    Salud,
    José Luis Sáez Sáez

    ResponderEliminar
  6. Préstame'l to blog. Ye mui interesante y formativu.
    Gracies poles tos aportaciones.

    Saludos

    Arturo Redondo

    ResponderEliminar
  7. Mui guapa la ruta... téngola preparada pa cualesquier día así raruno de tiempu. Pero entá nun dióse esa circunstancia y sigue na carpetina de "Rutes Sueltes" jajaja. Gracies por amosámela

    ResponderEliminar