Va prestame poner equí dalgunes de les munches semeyes que faigo nes mios caminates. Nun pretendo describir rutes nin dar conseyos sobre'l meyor camín pa faceles. N'Internet hai abondo d'eses informaciones y lo único que diba conseguir ye confundir.
De toes formes toi abiertu a responder a les entrugues que faiga daquién interesáu en dalgún de los mios paseos.
Fadré una introducción de caúna de les rutes.

jueves, 25 de septiembre de 2014

Peña l'Alba y picos Champaza y Pelitrón

          Domingu, 29 de xunu de 2014          Las Val.linas (Salceo) - Aparcamientu área recreativa l'Alba - Ermita l'Alba - Les tres Cruces - Peña l'Alba - Picu Champaza - Picu Pelitrón - El Trichoriu - Covachos - Aparcamientu  l'Alba.

          "Cuando'l picu Pelitrón pon capa, nun dexes la tuya en casa." Refrán popular 

          "La Virxe d'Alba bendita tien
          la ermita na peña, tamién
          podría tenela nel
          llanu si quixera" Cantar popular 

          Pela xerra l'Aramu:...Patiando pel Aramu:.., La Mostayal...
          Estos paseos per esta guapa y, pa los que vivimos n'Uviéu, tan cercana xerrina dexen ver que la pasada primavera y l'entamu'l branu bien pola so proximidá, bien porque yá lo echaba de menos diome pel Aramu  y los sos alredores.
          Perdí la cuenta les veces que fixi escursiones paecíes a les tres primeres. Por embargu nun pisare nunca los tres picos pelos que pasié esti día. A lo meyor porque l'empiezu ye más lloñe o porque nun allargaba bastante les otres.
          El casu ye que nin siquiera m'acercare nunca a conocer la famosa capiella de la Virxe d'Alba.
          Nun me pesó y tengo que dicir que'l paséu merez la pena. Les vistes que tenemos dende cualquiera de los tres picos del valle de Quirós colos sos pueblinos; allá abaxo'l pantanu de Vademuriu a la solombra'l  Gurrión; peña Rueda y gran parte Les Ubiñes,...Son imáxines de les que los nuesos güeyos gocien como nel monte más guapu que mos podamos imaxinar.
          Nun foi bonu'l principiu. Empecé a caminar pela pista qu'aparentaba dir pa la ermita pero como paicía que cada vez me alloñaba más di la vuelta hasta l'aparcamientu y per un senderucu bastante tomáu pola maleza, que da a entender que poca xente lu usa, xubí a la capiella sin gran dificultá pero innecesariamente daqué escayáu. A la vuelta dime cuenta cual yera'l camín qu'utilicen pastores, romeros y montañeros. Un pocu más llargu pero muncho más cómodu d'andar.
          El resto'l paséu ye tou un disfrute pa los que mos gusta'l monte. Caliza guapo y abondo y, como dicía al entamu, vistes imponentes.
          Ye bastante incómoda la subida al Champaza. Hai munches fendedures y furacos, a veces tapaos pola vexetación, que faen necesariu esaxerar la prudencia. Lo demás fácil y pa gociala.
          Por ciertu, seguramente pola fecha, les flores y plantes monteses facíen pensar que tábamos pasiando per un parque.
          Otru guapu paséu que de xuru nun voi tardar en repetir.

2 comentarios:

  1. Guapes semeyues. Por ahí va cuanta ya que nun voy. Tengo en mente dende fae tiempu una ruta pero xubiendo dende Bermiegu, pero nun soy quien a topar día para dir. A ver si a la fin ,...
    Un saludu

    ResponderEliminar
    Respuestas
    1. A min, como casi siempre me pasa, quedáronme ganes de repetir la escursión. Per un llau p'aprender meyor el camín a la capiella y per otru poles esceicionales vistes qu'hai dende les tres cumes.
      De toes formes tengo tantos paseos pendientes que yá lo dexaré pa la próxima primavera. Tamién pensé n'ampliar daqué'l percorríu subiendo al Moncuevu o al Gamoniteiru o a los dos, dependiendo del tiempu que tenga'l día que lo faga.

      Eliminar