Ferreirúa

        Martes, 21 d'agostu de 2012   Puertu Ventana - Picu Ferreirúa

        Dende'l puertu Ventana empieza a caminase en dirección oeste per un senderu bien marcáu. Cresteando ente Asturies y Lleón y en constante pero llevadera subida, alcanzamos la cume que tamos viendo dende qu'entama la patiada.
        Ye difícil nun dir echando güeyades pa tras porque les vistes pa les Ubiñes son estraordinaries, pero como lo previsto ye volver pel mesmu sitiu, tiempu habrá pa disfrutar.
         Mentanto vamos viendo a mandrecha los valles de Teberga colos impresionantes fayeos, la Sobia, los Puertos de Marabiu, Cueiru, el Caldoveiru,... A manzorga la siempre guapa Babia.
         De frente tenemos el cordal de La Mesa, Los Vígaros, los Albos, el Morrunegru lleonés,...Tolo que más tardi veremos con más aposentu dende la cume.
         Anque tamos avezaos a creyer qu'l picu que tamos viendo va ser la parte cimera de la nuesa caminata, nesta xerra paecióme qu'esto s'esaxera. Pémeque tien la culpa tar viendo la cume casi dende'l principiu. Antes de llegar tenemos que coronar un tras otru'l picu'l Cuevu, les L.lombes y les Corones.Taba convencíu de qu'esta ultima yera'l final, pero...tovía falta un bon trechu.
         Dicía a lo primero que ye llevadera l'ascensión. Ye verdá, pero al menos a min, nun me paez nada cómodu'l pedreru final. Punxi munchu procuru pa pasalu y dábame sensación de refugu'l tener que volver pel mesmu sitiu. Pémeque ye daqué peligroso sobre too si ta moyao. (A lo meyor ye la mio vieyera).
         Na cume, yá dixi lo muncho y guapo que vemos. Paga la pena l.legar.