Va prestame poner equí dalgunes de les munches semeyes que faigo nes mios caminates. Nun pretendo describir rutes nin dar conseyos sobre'l meyor camín pa faceles. N'Internet hai abondo d'eses informaciones y lo único que diba conseguir ye confundir.
De toes formes toi abiertu a responder a les entrugues que faiga daquién interesáu en dalgún de los mios paseos.
Fadré una introducción de caúna de les rutes.

sábado, 24 de noviembre de 2012

Nun canso de patiar per Peñamayor

         Sábadu, 15 de setiembre de 2012               Les Praeres, Anés, Breza y Trigueru,Campagüés, Fayacava, Les Praeres.

         Otru día más y van...di un paséu per Peñamayor.
         El recorríu foi'l de casi siempre: Les Praeres, Ortigosa, Espines, el Covayu, Anés, Breza, Trigueru, crestéu pela Goleta, Campagüés, Fayacava, Les Praeres.
 
         Nun por repitilu munches veces me cansa. Siempre alcuentro dalgo nuevo o paézmelo. Repito les semeyes nos mesmos sitios porque otra vuelta tengo la impresión de que ye la primera vez.
         Los animalinos que se ven a l'amanecer,
la borrina que dexa un mar de nubes peles zones baxes, los utres pel cordalín de la Goleta, lo claro que se víen les Ubiñes, el día bonu... Una montonera coses que faen que la patiada seya perguapa.
         Prestóme tamién atopame con vieyos conocíos del Valle'l Nalón que, como yo, son habituales d'esti monte. Oyer les vivencies montañeres d'un componente del grupu El Alba, que a sus 84 años sigue subiendo picos y patiando per faldes y crestes. Llámase Luis del Campo Tejerina. Ye un home almirable y da gusto falar con él.
         Encontré a esta xente porque va bien de tiempu que yo regresaba pel pozu Funeres y el Reigáu a Campagüés y ellos suelen dir faldiando per más arriba.
         Güei, yera’l día de setiembre nel que los del Psoe van a Funeres y paicióme que sería meyor cambiar el recorríu pa nun retrásame, porque quería llegar a casa pa xintar.
         Amás taba bien guapo pa retratar los mios pueblos: El Remediu y Piloñeta. El segundu fáigolo cada vez que baxo de Les Praeres pero’l primeru, al tar más lloñe, hai munches vegades que nun ye posible.
         En resume: un guapu día de monte.

2 comentarios:

  1. Hola Arturo. A mí pasame lo que a ti encántame Peña Mayor y cuando me fay falta ver d´aqué animalín faigo una escapá. Guapes semeyes, y los buitres aguantarente bien cerca. Un abrazu compañeru.

    ResponderEliminar
  2. Guapa Peñamayor vista con esos güeyos.

    ResponderEliminar