Va prestame poner equí dalgunes de les munches semeyes que faigo nes mios caminates. Nun pretendo describir rutes nin dar conseyos sobre'l meyor camín pa faceles. N'Internet hai abondo d'eses informaciones y lo único que diba conseguir ye confundir.
De toes formes toi abiertu a responder a les entrugues que faiga daquién interesáu en dalgún de los mios paseos.
Fadré una introducción de caúna de les rutes.

miércoles, 11 de septiembre de 2013

Foces del Pendón y palaciu La Ferrería

          Llunes, 8 de xunetu de 2013          Fonte La Vegona - Los Fornos - Les Meceures - Ponte Pendón - Colláu La Canal - Mayáu Pastor - Fonte Faéu - Los Xerrapos - Tabléu - La Vallorita - Fonte La Vegona - Falaciu La Ferrería - Fonte la Vegona.

          "Los llugares abandonaos personifiquen, d'una manera cruda y guapa al mesmu tiempu, el poder ya imperiu del polvu. Son escenarios de la recolonización de la naturaleza y el más firme presaxu de la victoria final de la suciedá y la basura". Fernando Jorge Soto Roland
 
          De xuru que la mayoría de la xente cuando baxa de patiar pel PR AS 45 "Foces del Pendón" llama-y l'atención una construción vieya qu'asoma pente la viesca del valle'l ríu Pra.
          Lo que causa curiosidá a los nuesos güeyos ye'l palaciu La Ferrería. Trátase d'una construcción del sieglu XIV d'estilu renacentista barrocu al que nos sieglos siguientes fueron añadiéndo-y dependencies. El monumental edificiu foi fundáu pola familia de los Álvarez de les Asturies.
          Declaróse monumentu históricu artísticu'l 11 de xunu de 1982 y "Bien d'interés Cultural"  en 1993.
          Da llástima ver l'estáu d'abandonu nel que s'encuentra'l palaciu y los antaño guapos xardines que lu arrodien.
          Nun pue entendese que na páxina del Ayuntamientu de Nava recomienden la so visita y al mesmu tiempu te cerráu al públicu y neses llamentables condiciones. Pasa-y lo mesmo qu'a otru emblemáticu edificiu navetu: el palaciu La Cogolla que foi construyíu pola mesma familia qu'esti. Si nun se-y pon remediu les dos construcciones lleven camín de convertise en ruines.
          La visita al entornu d'esti monumentu pue ser un guapu complementu de la curtia y guapa escursión a les Foces del Pendón.
          Dexare'l coche nel camín de La Ferrería a unos trescientos metros de la planta embotelladora de Fuensanta, xunto a la fonte La Vegona (tamién n'estáu ruinosu).
          Desandando los trescientos metros entámase a subir pel bien señalizáu PR AS 45. Casi hasta  Los Fornos ye una pista de formigón aguapada pel castañéu qu'atraviesa. Dempués, práuticamente en llanu, per un senderu bastante cómudu disfrútase d'un paisaxe qu'agranda la so guapura a midida que mos acercamos a les Meceures. Pa min esta parte ye lo más guapu del percorríu. Ye una viesca heteroxénea de carbayos, fayes, ablanares,...acompangada col ruxir de los dos regatos que s'axunten equí pa dir a morrer al Pra unos kilómetros más abaxo.
          Dempués pela Canal hasta'l colláu del mesmu nome. Dende equí empieza la baxada dexando a los llaos praos y cabañes bien conservaes.
          Nel Mayáu Pastor hai l'alternativa d'agrandar la caminata peles Praeres y si se quier subiendo a la Varallonga. (Foces del Pendón).
          El fastidiu, qu'al menos a min, me produz caminar peles pistes de formigón vese amenorgáu poles vistes: Nava y la mayor parte del so conceyu: en primer planu Buyeres, Ovín, La Viña, Piloñeta, Grátila, Cezosu,...y les cuadres y praos qu'hai a la vera'l camín.
          Pa teminar, dende la fonte La Vegona, el camín a la Ferrería pente finques y un guapu arboláu. Dempués, si nun se ye mui gordu, pasales canutes pa entrar pela derecha de la portiella candada a la finca na que s'atopa'l palaciu.

3 comentarios:

  1. Hola Arturo, esa ruta ye perguapa y gustame facela de cuando en cuando. ¡Que pena del Palaciu!, acabará en baxiu...con la de coses que se podíen facer con el...Guapes fotos de un de los fayeos maxicos que nos queden. Un abrazu.

    ResponderEliminar
  2. Saludos A. R. C. Por fin encontré un poco de tiempo para añadir "Patiar y retratar" a los "Blogs que recomiendo" en el mío. Mira por dónde bastantes... bastantes años después de coíncidir en nuestra época de estudiantes, ahora lo hacemos en esta afición a patiar pelos montes. Yo también suelo frecuentar Peñamayor desde La Güeria (S M R A), Laviana, Bimenes o Nava. Algún artículo hay en "Camino al andar", aunque las fotos pocas veces son mías porque si retrato, patio poco. Y tengo compañeros que lo hacen mejor que yo. En fin, saludos de nuevo y a ver si nos encontramos algún día pel monte.

    ResponderEliminar
  3. Conocía'l to blog pero nun t'identificaba como'l so autor. Préstenme abondo les dos coses. Per un llau, el blog que yá me gustaba y per otru saber que tú yes la persona que lu fae.
    Fae unos años diba per Peñamayor prácticamente toles selmanes. Agora téngolo un poco abandonao. ¡Hai tantos sitios onde dir! De toes maneres pa min sigue siendo "El mio monte".
    D'agora n'adelantre seguiréte con más atención y continuidá.
    Norabona polo bien que lo faes y lo que tú dices. A ver si mos atopamos pel monte
    Un saludu.

    ResponderEliminar